Read Maru MATHE 7 Bible Online

MATHE 7 - Maru bible

MATHE 7

¹Su re dao: dakho' ge,- ailao" za: Mao"So wa naonhaung" re dao: makho' nae".

²Pe"mung:ga"re naonhaung" su re dao: kho' ra" au: ci: ra" jao dang re Mao"So ci: li" nae".

³Yao: yao" myo,jid' mae bo: ra" sag'thaung: re bo thoe magyo: lo: ni" mao:nhaung: pho" myo,jid' mae" sag' je, re pe"mung: qu" i?

⁴Ni" myo,jid' mae sag' thaung: bo: jo, zang ni" mao:nhaung: pho" re ni" myo,jid' mae" myo, vao sag' je, re yu: pye' byid: li" ein: nao khoru: mung: vae" ta" i?

⁵Geim kad' yaug we"- ni" myo,jid' mae bo: ra" sag' je; re shi" sao qhid' yu: pye' wa,- ailao" za: ni" mao:nhaung: pho" myo,jid' mae bo: ra" myo, vao bodan re nyang" za: nao myao mung: qo" yu: pye' byid' li" nae".

⁶Gyang" lho" ra" zai re lakha: jham re dabyid: ge, Airu: kad' lao" naonhaung" re dam: tug' bin" li" nae". Amung: naonhaung" palhe" qui: re vo, jham: qhid' kheim: mae dashapye' to: ge,- Airu: kad' lao" vo, jham wa ai: palhe" qui: jham re khyid: yang zab: nhae" pye' li" genae".

⁷Mho' ge,- alao" naonhaung" qo" yu genae"- Qho ge,- alao" naonhaung" myao genae"- Kham: ko' ge, alao" naonhaung" re kham: phung" byid' li" nae".

⁸Pe"mung:ga"re mho' ra" yaug wa qo" yu: li" nae"- Qho: ra" yaug wa qho: qhug' li" nae"- Kham: ko' yaug re kham: phung" byid' li" nae".

⁹Naonhaung" mae" dayaug yaug- yao: zo: mug mho' re laug baui byid: genae" i?

¹⁰Ngo: mho' re lhao maui byid: genae" i?

¹¹Magai makhyang" ra" qobo jab qe- naonhaung" lhao" re:- naonhaung" yao: zo: qere gai: ra" ja: byid: nae" ba ko" ngad: re wa mug:gaung dao mae na: ra" naonhaung" Pho" wa yao: re mho' ra" mo, re gai: ra" ja: ai: tho' mago" je yang: byid: nae" mangad: i?

¹²Aimung:- su: yang naonhaung" re khoru: kad' re naonhaung" o ngaui: ru we' dakhyo: naonhaung" re: su gaje re airu: kad' byid: ge, Ce wa kham" to" ra" tarha" we' lapa qe: dao: amyhi" ngad: ra".

¹³Ai: lhae" ra" kham: dung: khyo" vao ye: ge,- pe"mung:ga"re myi:qid: tham: khyo joe" ra" kham: dung: we' khyodang wa lae: ra". Amung: ai: khyo su" lo" mo, gyai myo" ako".

¹⁴Kao so' daui: ra" khyo joe" ra" khyodang we' kham: dung: wa lhae" ra". Amung: aire qho: myao mo, mamyo: ko" ngad: ra".

¹⁵Aung khug mae zag ne we' dau: ra" myid bo mung: adao mae yao qid ve; ci yang: naonhaung" jhao" joe" li" ra" lapa apyag' qere lha" yang: jao" ge,.

¹⁶Zau: bye, mae" sabyi shi: re mangad: lao"- zau: gae mae" pho' ham" shi: jham re lhaung" qo" phyo' yu ko" i? Yao: bam lapa apyag' qe ngad: rure yao: bam: mau" zo" ave, khyo" yang naonhaung" ba: li" genae".

¹⁷Amung: gai: ra" agae khao: ngo" wa- lho" ra" ashi: zaui" ra". Qam: mabo: ra" agae wa malho" ra" ashi: zaui" ra".

¹⁸Gai: ra" agae mae malho" ra" ashi: maqo" zaui: ngad: ra". Alao" magai: ra" agae mae re: lho" ra" ashi: maqo" zaui: ngad: ra".

¹⁹Ashi: lho" mazaui" ra" agae khao: ngo" wa thau: lhang" pye' mung: myi:khyeim" khyo pye' zaui: pye' ru qhug' ako".

²⁰Airu: mung: lapa apyag' qere yao: bam: ave, khyo" yang naonhaung" ba: li" genae".

²¹Ngo re Asang we"- Asang we"- ga: ta" ra" mo, alhab' mug:gaung: mung"dan: qo" vao ye: genae" mangad:- Mug:gaung dao mae na: ra"- nga" Pho" myid o: ra" khyo" cao" ra" yaug za: qo" vao ye" li" nae".

²²Aimung: dao: kho' ra" ba na joe" lao"- byu myo: sho' wa Asang we"- Asang we"- ngonhaung" wa ni" mang re lao: yang Mao"So: mungdao: re kho" kyo" lo va" mangad: i? Ni" mang re lao: yang: yui myo: sho' re khe' thug' pye' lo va" mangad: i? ga: ta" li" genae".

²³Ailao"- ngo wa yao: bam re Naonhaung" re ngo khonhae" re: maba- makhyang" ra" mo, we"- nga" qhid' kheim: mae" thug' lo" ge, ein: ta" nae".

²⁴Ce: nga" dao: jham re gyo" yu mung: phug' cao" ra" yaug khag' ngadqere: yao: yao" yham re laug thin dao mae zhaug' ra" pha,jhi" bo yaug we' dau: ra".

²⁵Mug: qu mung: qid je" li" ru we' la qam" hug' lo mung:- ai: yham re lo deim: gengadqere: ai: yham wa laug thin dao mae zhaug' to" ruyang mabyo; gyang: lo" ngad: ra".

²⁶Ngadqere: ce:- nga" dao: jham re gyo" yu mung:- maphug' cao" ra" yaug khag' ngadqere:- yao: yao" yham re ma dam: mae zhaug' ra" kopyad' we' dau: ra".

²⁷Mug: qu mung: qid je" li" ru we' la qam" hug' lo yang:- ai: yham re lodeim: gelao" ai: yham wa byo, gyang: lo" ra". Ai: yham byo; gyang: lo" ru wa phyi yao: ngad: ra".

²⁸Yesu ai: dao: jham re bin: kho" kyo: lao"- mo, byu qe wa yao: mho" shid' ra" khyo re mug' hao" byaug: ako".

²⁹Pe"mung:ga"re Yesu wa tung" pho" qeru: mangad:- kheim: so' qo" ra" yaug we' dakhyo: mho" shid' byid' ra".