Read Maru MATHE 8 Bible Online

MATHE 8 - Maru bible

MATHE 8

¹Yesu bug gaung mae" gyo" lo lao"- byu phaung mo" zang yao" thao cao" lo: ako".

²Alao" mao gae: de: ra" byu dayaug Yesu jhao" li" mung:- yao" qhid' kheim: mae pad' thaug' thaug' yang:- Asang we"- nao nug: re wa ngore qo" gai: shao: lo" nhao zai ngad: ra" ga: mho' ra".

³Yesu wa lo, yheim" ke' mung: yao: re tin: byid: zo" re"- ngo nug:- Gyang" shao: lo" se,- ga: ta" ra". Ailao" jao" yao" mao gae: gyang" shao: lo" byaug: ra".

⁴Alao"- Yesu wa yao: re- Ce:ra" khyo re nao khag' rere: data" kyo: wa,- ngadqere: khinjaung pho" jhao" lo" mung: ni" gaung yao: re lo" qhu" wa,- amung: nao no gai: shao: lo va" khyo mo, byu qe: qhid' mae" sagse: doe, vashao:- Moshe amyin" to" ra" xeim: re lo" ngaui" byid: wa ga: ta" ke' ra".

⁵Yesu Kapena-um vogaung: khyo joe" vao lo lao"- Roma gyezug: pho" dayaug yao: jhao" li" mung:-

⁶Asang we"- nga" daui daui okaung dayaug no zang qhug' mung: maqo" lab lo: yham mae no: lang" jo; ra" ga: Yesu re ta" kyo: zo" re" bao" yu nae" mho' ra".

⁷Yesu wa yao: re ngo li" mung: yao" no re gai byid: nae"- ga: ta" ra".

⁸Alao" gyezug: pho" wa Yesu re tau: mung:- Asang we" nao nga" yham khyo vao li" nae" wa- ngo wa maman: qi" yaug ngad: ra"- nao amyin" dakheim: byid' ke' lao" re: nga" daui daui yaug wa gai: lo: li" nae".

⁹Pe"mung:ga"re ngore: kheim: so' qo" ra" zug: mo" qe: o mae na: ra" byu dayaug ngad:- amung: nga" o mae re: gyezo: qe na: ako". Gyezo: dayaug re ye: wa, ein: ngo amyin" byid: lao" yao: ye" ra". Amung: gatau dayaug re lo wa, ein: amyin" byid' ke' lao" yao: lo: ra". Alao" nga" jeim dayaug re ceru kad' wa, ein: ta" lao" yao: kad' ra"- ga: ta" ra".

¹⁰Yesu wa Ce:dao: re the' gyo: lao" mug' ra". Amung: yao" thao mae cao" ra" mo, byu qere Naonhaung" re ngo dang dang ta" geli"- Israel amyu" mae lhao" ceru" ra" lam khug: myid bo: ra" byu dayaug rere: ngo mamyao: qu" shi:

¹¹Amung: naonhaung" re ngo ta" geli"- Ba thug' shad'- ba vao shad' mae" byu myo: sho' lo mung: mug:gaung: mung"dan: mae Abraham- Isag- Yaku bam we' daga" qo" zo: shaug' li" genae".

¹²Ngadqere: ai: mung"dan: byumyu" boe" ang: ra" mo, wa taung gaung shad' mug: cad' yo khyo khe' thug' pye' ru qhug' genae". Ai: mae yao: bam wa ngug byid ngug nhe' we' zaui kyag' yang: na: li" genae"- ga: ta" ra".

¹³Ai: thao- Yesu wa gyezug: pho" re- Nao yham khyo lo" se,- nao lam khug: ru we' dakhyo: boe" vashao:- ga: ta" ra". Ai: au: mae yao: gyezug: pho" daui daui yaug wa no gai: lo" byaug: ra".

¹⁴Yesu wa Petru yham khyo vao ye" lo" ra". Yham khug mae Petru yaug myhi" wa noqam" bug yang: yab jaung: dao mae lang" jo; rure yemyao: ra".

¹⁵Yesu wa yao" lo, re tin: byid' ra"- Alao" noqam" gai: lo" byaug mung: to" li" yang: Yesu re bang" da" byid' ra".

¹⁶Myi" thao joe" lo lao" mo, byu qe wa yui zaung: ra" byu myo: sho' mo, re Yesu jhao" jhui" li" ako". Alao" Yesu wa makhyang" ra" yui jham re dao: thoe: yang khe' thug' pye' ra". No phyo: qhug' ra" mo, rere: gai byid' ra".

¹⁷Yesu ceru: kad' ru wa- yao: wa ngonhaung" no phyo: re yu: pye' byid: mung: ngonhaung" no jham re vin: pye' byid' ra" ga: Lapa Esaia ta" to" ra" dao: jab byang" lo nae" qhid' mae" ngad: ra".

¹⁸Yesu wa yao" lhang" gam: mae na: ra" byu phung: mo" re myao lao"- yao" mho"zo: qere tham: thoete' khyo gau" de: ye" lo" nae" qhid' mae" amyin" byid' ra".

¹⁹Alao" Tung" pho" dayaug Yesu jhao" li" mung:- Mho" pho" we"- nao khai: ye: khai: ni" thao ngo cao" nae" ga: Yesu re ta" ra".

²⁰Yesu wa yao: re tau: mung:- Zag ne jham wa khyaung qo" ako"- Ngho' jham re: asad' qo" ko" ra". Ngadqere: Byu: Yao: Zo: wa au: khyo" jo, qo lhao" maqo" ngad: ra"- ga: ta" ra".

²¹Mho"zo: gatau dayaug wa Asang we" nga" pho" mao gaung re shi" lo" nyhab' shaung: pye' nae" qhid' mae" akhang" byid: la,- ga: ta" ra".

²²Ngadqere: Yesu wa yao: re Nga" thao cao" wa,- byushid qe wa yao: bam: byushid qere nyhab' shaung vageshao:- ga: ta" ra".

²³Ai: thao Yesu wa lha khug khyo yevao: zaung: ra". Yao" mho"zo: qere: yao: we' daga" cao" ye" ako".

²⁴Alao" qu" ge, ai: tham: mae nyag din taung" la qam" hug' lo mung: lha wa bang: lhung" khug mae nab: lo" na: ra". Ngadqere: Yesu wa yab: myhid' jo; ra".

²⁵Yao" mho"zo: qe wa Yesu re nhug' mung: Asang we"- ngonhaung" re khyad' yu la, wo"- ngonhaung" wa nab: shid: lo" na va" ga: ta" ako".

²⁶Alao" Yesu wa yao: bam re- Mao"So re lam khug: ra" myid ngai: ra" mo, we"- naonhaung" pe"mung: ai: qhi" sho' gyaug: nin" ko" i? ga: bin: ta" lao" yab; jo; rumae" to" li" mung: la we' bang: lhung" re qeim: ke' ra". Alao" la we' bang: lhung" wa saug za: tae" lo" byaug: ra".

²⁷Mho"zo: qe alhab' mug' hao" byaug: ru we'- ceyaug wa pe" ru" byu ngad: i? La we' bang: lhung" lhao" re: yao" dao: re tae" gyo" ako" ga: ta" ako".

²⁸Yesu wa tham: thoete' Gadara mug: khyo joe" lo" ra". Alao" yui zaung: ra" byu shid' zo: wa lab bug mae" thug' li" mung: Yesu we' li" qhug' ako". Yao: shid" zo: wa gyai makhyang: ko" ngad: ra"- amung: ai: khyo" khag' re: mavae" su: lai: lhau ko" ngad: ra".

²⁹Yao: shid' zo: wa Mao"So: yao: zo: we"- nao we' nga" shid' zo: pe" jho" sin" i? Ayo, majoe" shire qobo byid: nae" qhid' mae" cejo, qo khyo joe" lo: i? ga: zag: hug' ako".

³⁰Yao: bam we' mataung" va" rumae vo, dajham mo" zang bad zo" na: ako".

³¹Alao" yui jham wa- Nao ngonhaung" re khe' thug' pye' nae" ngad: re wa- ai: vo, jham: khug mae ngonhaung" re yevao nhao la,- ga: Yesu re mho' ako".

³²Yesu wa- Ye" lo" ge,- ga: yao: bam re ta" ke' ra". Alao" yui jham wa ai shid' zo: mae" phao: thug' lo" mung: vo, jham: khug mae yevao gelao"- ai: vo, jham mo" zang dang" kam" nhad' mae" qid tham: khug khyo tao" byae: gyo" lo" gemung: nab: shid: pye' ako".

³³Vo, zam: mo, wa- vogaung: khug khyo tao" phao: lo" gemung:- yui zaung: ra" byu shid' yaug: khyo re we' boe" lo" ra" khyo alhab' re vobyu qere ta" kyo" ako".

³⁴Alao" vogaung geim" mae" mo, thug' li" mung: Yesu re li" qhug' ako". Yao: bam Yesu re li" myao gelao"- yao: bam: mug: mae" thug' lo" nae" qhid' mae" yao: re mho' ako".