Read Maru MATHE 9 Bible Online

MATHE 9 - Maru bible

MATHE 9

¹Alao" Yesu wa lha khug yedo; zaung mung:- yao" vogaung: khyo dam: tug' gau" de; lo" ra".

²Byu damyo" wa yab qo mae lang" jo; ra" gaung jam: shid: ra" byu dayaug re Yesu jhao" dao: li" ko" ra". Yesu wa yao: bam: lam khug: myid bo: rure myao lao"- gaung jam: shid yaug re- Nga" zo: we"- nhag' dangai wa,- ni" qobo khyad' pye' byid: va"- ga: ta" ra".

³Alao" Tung" pho" qe damyo" wa- byu ceyaug wa Mao"So re jung" dao: jhau: ra" ga: yao: cao: yao: jho" ta" ako".

⁴Yesu wa- yao: bam: aung khug mae pe" myid: na ko" rure ba mung:- naonhaung" aung khug mae pe"mung: magai: ra" khyo" myid: na ko" i?

⁵Ni" qobo re khyad' pye' byid: va" ein: ta" nae" je: laui: i? Mangad: lao"- To" ye, mung: su" lo" wa, ein: ta" nae" je: laui: i?

⁶Ngadqere: byu: yao: zo: wa- myid gaung dao mae qobo khyad' byid: nae" kheim: so' qo" yaug ngad: rure qhu" byid: geli" ga: ta" mung:- ai: gaung jam: shid yaug re- To" wa, Ni" yab qo re gaug: vo, yang: yham khyo lo" wa,- ga: ta" ra".

⁷Ailao" yao: wa to" mung: yham khyo lo" ra".

⁸Aire myao: ra" mo, byu qe wa- gyaug: mug' ru we' xao su byu qere ceru" ra" kheim: so' byid' ra" Mao"So re caung:khin" byid' ako".

⁹Yesu wa ai: jo, qo mae" to" mung: su" ye" lo" na: au:- yao" khang: khyui zaung mae zaung: jo; ra" Mathe ga: mang: ra" khang: khyui zo: byu dayaug re myao: ra". Yesu wa yao: re- Nga" thao cao" la, ga: ta" lao"- Mathe wa to" mung: Yesu thao cao" ye" lo" ra".

¹⁰Mathe yham mae Yesu zozo" na: au:- khang: khyui zo: mo, myo: sho' we' qobo qo" ra" mo, myo: sho' wa Yesu we' yao" mho"zo: qe we' daga" zo li" bozo" na: ako".

¹¹Pharishe qe wa aire myao lao"- yao" mho"zo: qere- naonhaung" mho" pho" wa airu" ra" byu qe we' daga" pe"mung: zo qhan: zo" ra" i? ga: myid' ako".

¹²Yesu aire the' gyo: lao"- yao: bam re- Qao" zin" mo, wa macid' sara maqo gengad: ra"- No mo, za: aqo: ako".

¹³Ngo wa xeim: ngaui" byid' rure- ma o nhag' khyag' rure o: ra"- ga" ra" jham: dao: lajheim: re ba nae" qhid' mae" lo" mung: xeim: yu ge,- ngo wa din:man: mo, re khai nae" qhid' mae" li" ru mangad:- Qobo qo" ra" mo, re khai nae" qhid' mae" li" ru angad:- ga: ta" ra".

¹⁴Alao"- Yohan: mho"zo: qe Yesu jhao" li" mung:- ngonhaung" we' Pharishe qe wa dazab: makyo zo:ve lhaung" jao" bam:- pe"mung: ni" mho"zo: qe zo:ve majao" ko" i? ga: Yesu re myid' ako".

¹⁵Yesu wa yao: bam re Lo,xo' poe mae poe leim bang" vo qe wa- pho" sag' we' na: jo, shi" au:- kaug' qhui gai: i? Airu: mangad: nae"- ngadqere: pho" sag' re yao: bam: phaung mae" kao" jhui" lo" ra" ba na joe" lo: li" nae". Ailao" yao: bam wa zo:ve jao" li" genae".

¹⁶Bau: xug' mae pin: sag' yang khag' malhaung" pho: qu"- Airu: pho lao" zhan: lo" mung: pin: sag' cug' yang bau: xug' re lao" cad' mung: bau: je: jad; lae: lo" nae".

¹⁷Amung: sabyi qang: asag' rere: shoqid thaung axug' mae khag' malhaung" ke' qu". Airu: ke' lao" shoqid thaung baug: go; lo" mung: sabyi qang: yug: lo" ru we' shoqid thaung re: qeim: lo" byaug nae". sabyi qang: asag' re wa shoqid thaung asag' khug mae ke' to: lao" za: shid' ja: geim" maqeim nae"- ga" ta" ra".

¹⁸Yesu ceru: ta" na shi" au:- tarha" jung yham agyi dayaug Yesu jhao" li" mung:- yao" qhid' kheim: mae pad' thaug' thaug' mung: yang: Yesu re- Nga" zo: myiqe: nau" shid: byaug va"- ngadqere: nao li" mung: yao" dao mae ni" lo, li" kai: byid' ngad: re wa yao: dam: daui: li" nae" ngad: ra"- ga: ta" ra".

¹⁹Yesu wa to" mung: yao" thao cao" ye" lo" ra". Yao" mho"zo: qere: yao: we' daga" cao" ye" lo" ako".

²⁰Alao"- qu" ge, daxe: shid' zin geim" sa: sheim no no: ra" myiqe: dayaug wa- Yesu nhaung thao" khyo te' li" mung: Yesu bau: qhang thao mae ye tin" ra".

²¹Yao" bau: thao re khalhao" ngo qo" tin" ke' re wa nga" no gai: lo" byaug nae" ga: yao: yao" aung khug mae ta" ra".

²²Yesu wa lhang: qu" yang: yao: re myao lao" Nga" myiqe: zo: we"- Nhag' dangai wa,- ni" lam khug: myid wa ni" no re gai nhao: ava"- ga: yao: re ta" ra". Ai: au: re yao:- ai: myiqe: myhi" wa no gai: lo" byaug: ra".

²³Ai: thao Yesu wa tarha" jung yham agyi pho" yham khyo joe" ye" lo" ra". Alao" yao: wa khalhao: mad mo, we" mo,byu qe mo, thaui: mo, yaug mung: na ko" rure myao lao"-

²⁴Yesu wa yao: bam re- Phao: qhui: ge,- Myiqe: nau" wa shid: ru mangad:- yab: myhid' jo, ru angad:- ga: ta" ra". Yao: bam alhab' mo, Yesu re qi: jung" pye' ako".

²⁵Mo, byu qere taung gaung khyo bin: khe' thug' pye' lao"- Yesu wa qe, khug khyo vao ye: mung: myiqe: nau" lo, mae yezaui: yang: she: to" ke' ra". Ailao" ai: myiqe: nau" wa to" lo: ra".

²⁶Ce: lau dao: re- ai: mung" geim" byang" sho' hau" nhao" lo" ako".

²⁷Yesu wa aitau mae" to" mung: su" lo" na: au:- myo, jid shid' yaug wa yao" thao cao" mung: Davi yao: zo: we"- nga" shid' yaug re nhag' khyag' yu la, wo"- ga: hug' ako".

²⁸Yesu yham dayham khyo vao lo" lao"- myo, jid shid' yaug wa Yesu jhao" li" ako". Alao" Yesu wa ni" shid' yaug lam" ko" i? ga: myid' ra". Yao: shid' yaug wa Asang we" lam" ra"- ga: phaug' tau" ako".

²⁹Yesu wa yao: shid' yaug: myo,jid' re tin: byid: zo" re" ni" shid' yaug lam khug: ru we' dakhyo: boe" lo vashao:- ga: ta" ra".

³⁰Ailao" yao: shid' yaug: myo, myao: li" ko" ra". Yesu wa yao: shid' yaug re cekhyo re khag' rere: data" kyo: ge, ga: jhaug' za: zug' nhao: ke' ra".

³¹Ngadqere: yao: shid' yaug wa thug' lo" mung: Yesu khyo re ai: mung" geim" byang" sho' hau" nhao" lo" ako".

³²Yao: shid' yaug thug' lo" na ko" au:- qu" ge, byu damyo" wa yui zaung: ra" nhad' jid dayaug re Yesu jhao" jhui" li" ko" ra".

³³Ai: yui re khe' thug' pye' lao" jao" ai: nhad' jid yaug wa- dao: jhau: thug' li" ra". Mo, byu qe wa mug' hao" byaug: ru we'- ceru" ru Israel mung" mae ngonhaung" khonhae" re: mamyao: qu" shi:- ga: ta" ako".

³⁴Ngadqere: Pharishe qe wa yao: wa yui zug: mo" qam: so' khyo" yang yui jham re khe' thug' pye' ru ngad: ra"- ga: ta" ako".

³⁵Yesu wa vogaung: mo" vogaung: ngai jham alhab' geim" khyo gam: sho' du" qin" mung: yao: bam: tarha" jung yham jham mae mho" shid' byid' ru we' mug:gaung: mung"dan: ngaui bau" lau dao: gai re kho" kyo: mung:- no phyo: aja: ja: qhug' mo, re gai byid' ra".

³⁶Byu phung: mo" wa- yao zaung" yaug mabo: ra" yao jham we' dakhyo: qug: khai: qhug' mung: byo: sin" qin" ko" rure Yesu myao lao" nhag' qu" khyag' ra".

³⁷Alao" Yesu wa yao" mho"zo: qere- Gaug myo: sho' mhang" jo; ra"- ngadqere: yad: yu nae" mau" zaui: mo, malaug ngad: ra".

³⁸Airu: mung:- ai: gaug sang: yang Yao" gaug mhang" yo mae mau" zaui: nae" byu nhao byid: nae" qhid' mae" gaug sang re akyu" mho' ge,- ga: ta" ra".