Read Maru MARKU 1 Bible Online

MARKU 1 - Maru bible

MARKU 1

¹Ce wa Mao"So: yao: zo: Yesu Khristu nho: khyo Ngaui Bau" Lau Dao: Gai ngad: ra".

²Qu" ge,- Ni" qhid' au: mae ni" khyo re nyhang" byid: nae" qhid' mae" nga" lagyo: re ngo nhao: ke' ra".

³Din" pyad' yo mae dayaug hug' na: ra" thoe wa Asang: khyo re nyhang" to: ge,- Yao" khyo re din: za: nyhang" jhao" ge,- ga: Lapa Esaia mugsug' mae tung" to" ru we' dakhyo: qhid: to" ra".

⁴Aimung: Yohan wa din"pyad' yo mae" thug' li" mung:- Qobo khyad' pye' byid' ru qhug' nae" qhid' mae" myid tha" pye' yang: qid nyhab' kham: yu ge,- ga: kho" kyo: byid: mung: qid nyhab' byid' na: ra".

⁵Yerusalem vobyu qe alhab' mo, we' Yuda mung" geim" mae" mo, byu qe yao: jhao" ye: mung: yao: yao" qobo jham re lhang: yu: ru we' yao" lo, mae Yodan gyaung: mae qid nyhab' kham: yu: ako".

⁶Yohan wa gola:u mug' yang qo; ra" mai bau: re ve, mung: shoqid phyid' cui: cui" ci: ra". Yao" zo:ve wa khyag' phaung" we' seyo: byoyhid ngad: ra".

⁷Alao" Yohan wa Nga" thao re joe" li" nae" yaug wa ngo tho' mae" qam: so' je: bo yaug ngad: ra". Ngo wa yao" khyid zhaung: taui: goe; pheim nae" lao" maman: qi"-

⁸Ngo wa naonhaung" re qid mae qid nyhab' byid' ra"- yao: wa naonhaung" re Gyang" Lho" Byo mae qid nyhab' byid' li" nae"- ga: kho" kyo" ra".

⁹Ai: thao mataung" myao" re Yesu wa Galile mung" Nazared vogaung: mae" joe" li" mung:- Yohan lo, mae Yodan gyaung: mae qid nyhab' kham: yu: ra".

¹⁰Qid mae" thug' li" lao" jao" mug:gaung go; bung" li" mung:- Gyang" Lho" Byo wa phaung" kyug' ru: yao" dao mae li" gyo" no" rure yao: myao: ra".

¹¹Ailao" mug:gaung mae" thoe jhau: thug' li" mung:- nao wa ngo jhid'de; ra" nga" zo: ngad:- nao re ngo gyai o ngaui: ra"- ga: ta" ra".

¹²Ailao" jao"- gyang" lho" byo wa yao: re din"pyad' yo khyo jhan" nhao: ke' ra".

¹³Yao: wa din"pyad' yo mae ba na byid xe geim" Satan yang ju" phyo' ru qhug' ra". Aimae seyo: gug'nyhug' jham re: na: ako". Ngadqere: mug: lagyo: jham wa yao: re li" caung da" byid' ako".

¹⁴Aimung: Yohan re thaung: taung" lhaung" pye' thao Yesu wa

¹⁵Galile mung" khyo ye: mung:- Ayo, byang" va"- Mao"So: mung"dan: jhao" li" va"- Myid tha" mung: Ngaui Bau" Lau Dao: re lam" ge,- ga: Mao"So: Ngaui Bau" Lau Dao: re kho" kyo" ra".

¹⁶Yesu Galile tham: yae mae su" lo" na: ra" au:- ngo: kung" zo: byu Simon we' yao: nhaung: Andre shid' tao geim pye' na: rure myao: ra".

¹⁷Ailao" Yesu wa Nga" thao cao" ge,- ngo naotao re byu kung" byu boe" nhao nae"- ga: yao: shid' tao re ta" ra".

¹⁸Ailao" jao" yao: shid' tao wa geim jham re to" pye' co' mung: yao: jhao" cao" ako".

¹⁹Dazab zo: ye" lo" tau mae yao: bam: lha dao mae geim pho: na: ra" Zebede yao: zo: Yaku we' yao: nhaung: Yohan tao re myao: ra".

²⁰Yao: shid' tao re myao we' Yesu khai: ke' ra". Ailao" yao: shid' tao wa yao: pho" Zebede re okaung jham we' daga" lha dao mae nha: to: co' mung: Yesu jhao" cao" ye" lo" ko" ra".

²¹Yesu we' yao" mho"zo: qe wa Kapena-um khyo joe" lo: ako". Dugno: Ba mae Yesu wa Tarha" Jung Yham khyo vao ye: mung: mho" shid' byid' ra".

²²Yao" mho" shid' khyo re the' gyo" ra" mo, byu qe wa gyai mug' byaug: ako". Pe"mung:ga"re yao: wa Tung" Pho" qeru: mangad:- kheim: so' qo" yaug ru: mho" shid' byid' ra".

²³Ailao" Tarha" Jung Yham mae bona: ra" makhyang" byo zaung: ra" byu dayaug gyi: hug' mung:-

²⁴Nazared mae" Yesu we"- nao we' ngonhaung" pe" sin" i? Ngonhaung" re lhau: phyo' pye' nae" ein: joe" li" i? Nao khag' ngad: rure ngo ba:- nao wa Mao"So: gyang" lho" yaug ngad: ra"- ga: ta" ra".

²⁵Ailao" Yesu wa Sae za: na wa,- yao: mae" thug' lo" wa,- ga: ai: makhyang" ra" byo re amyin" byid' ra".

²⁶Ai: makhyang" ra" byo wa yao: re lao" thin: lhang" ke' ru we' zag: hug' mung: yao: mae" thug' lo" ra".

²⁷Mo, byu qe alhab' mug' hao" bam mung:- ce wa pe" ngad va" i? Pe" ru" mho" shid' khyo asag' ngad va" i? Ceyaug wa makhyang" ra" byo jham re amyin" byid: nae" kheim: so' qo" ru we' yao: amyin" byid' rure yao: bam tae" gyo: ko" ra" ga: yao: cao: jho" ta" ako".

²⁸Ai: lau dao: re Galile mang: geim" gam: sho' mae phyad za: hau" nhao" lo" ko" ra".

²⁹Ailao" Yesu yao" mho"zo: qe wa Tarha" Jung Yham mae" thug' li" mung: Yaku we' Yohan tao we' daga" Simon we' Andre shid' tao: yham khyo vao ye" lo" ako".

³⁰Joe" vao ye: we' Simon: yaug myhi" wa noqam" no mung: yab qo mae koe' jo; rure Yesu re ta" kyo" ako".

³¹Ailao" Yesu ye: mung: yao" lo; yang yao: re yeshe: to" ke' ra". Ailao" jao" noqam" gai: byaug: ru we' yao: bam re da" zho: da" jhaug' ra".

³²Aimung: myi" thao ba vao: cae: yo, joe" lao"- mo, byu qe no phyo: qhug' mo, alhab' we' yui zaung: ra" mo, alhab' re Yesu jhao" jhui" li" ako".

³³Vobyu qere: alhab' mo, yham kheim: mae li" zang" ham: na: bam: ako".

³⁴Alao" Yesu wa no phyo: aja: ja: qhug' ra" mo, myo: sho' re gai byid' ru we' yui myo: sho' rere; khe' khyo" pye' ra". Yao: wa yui jham re dao: jhau nae" akhang" mabyid: ngad: ra". Pe"mung:ga"re yui jham wa yao: khag' ngad: rure ba: ako".

³⁵Thao: ba ne,seim mug: bo" myi: re Yesu to" mung: cae: tae" ra" dajo, qo mae akyu" yemho' na: ra".

³⁶Simon we' yao" byin cao: qe wa Yesu thao cao" qho: ye: mung:-

³⁷qho: myao lao" alhab' mo, nao re qho: na: ako"- ga: ta" kyo" ako".

³⁸Ngadqere: Yesu tau: mung: ce: lhang" gam: vogaung: jham mae re: ngo qo" kho" kyo: nae" qhid' mae" gatau: vogaung: jham khyo ngonhaung" ye: gelang:- ai: qhid' mae" ngo joe" li" ru ngad:- ga: ta" ra".

³⁹Amung: yao: wa Galile mung" geim" jao: sho' du" qin" mung: Tarha" Jung Yham jham mae cao" kho" kyo" ru we' yui jham re khe' thug' pye' ra".

⁴⁰Ailao" mao gae: de; ra" byu dayaug Yesu jhao" li" ra". Yao: wa Yesu qhid' kheim: mae pad' thaug' thaug' mung:- nao nug: re wa ngore qo" gyang" shao: lo" nhao byid: zai ngad: ra"- ga: yao: re mho' ra".

⁴¹Yesu wa nhag' gyo" khyag' ru we' yao" lo, yheim" ke' mung: yao: re zaui" ci zo" re" Ngo nug:- Gyang" shao: lo" se,- ga: ta" ra".

⁴²Ailao" jao" mao gae: gai: lo" mung: gyang" shao: lo" byaug: ra".

⁴³Yesu wa yao: re jhaug' za: zug' nhao mung: cekhyo re khag' rere: pe" data" kyo:- Lha" wa,-

⁴⁴Ngadqere: khinjaung pho" jhao" ye: mung: ni" gaung re yeqhu" wa,- amung: mo, byu qe: qhid' mae" nao gyang" shao: lo va" khyo sagse: doe, vashao:- Moshe amyin" to" ra" ngaui" xeim: re xeim: lo" ngaui" byid: wa,- ga: ta" mung: phyad za: lo" nhao: ke' ra".

⁴⁵Ngadqere: yao: wa thug' ye" lo" mung: ai: khyo re qam: ke' ta" kyo" ru we' lau dao: hau" nhao" ke' ra". Airumung: Yesu wa vogaung: khug khyo de: de: za: magai: vao ye: lomung: vovai: voyae mae na: ra". Khyi" khao: ngo" mae" mo, wa yao: jhao" li" ako".