Read Maru MARKU 11 Bible Online

MARKU 11 - Maru bible

MARKU 11

¹Yesu we' yao" mho"zo: qe wa Yerusalem we' Zhan:lun: bam khyid mae" Betphage we' Bethani khyo jhao" li" na lao"-

²Yesu wa mho"zo: shid' yaug re nhao: ke' mung: yao: shid' zo: re- Ni" shid' zo" qhid' au: mae" vogaung: khyo ye" lo" ge,- vogaung: khug khyo vao ye: we' khag' re: mazaung: qu" shi" ra" loze nau" dadau: taui" to" rure ni" shid' zo: yemyao genae"- aire pheim: yu mung: she: lo ge,-

³Byu dayaug yaug Pe"mung: airu: kad' ko" i? ga: ni" shid' zo: re myid: lao"- ni" shid' zo: wa yao: re Asang cere ci qo: ga"- ana" yao: jao" cekhyo dam: tug' nhao: ke' byid: nae" ga" ein: ta" ge,- ga: ta" ke' ra".

⁴Yao: shid' zo: wa ye" lo" mung: yham dayham: kham: dung: ayae- khyodang shad' mae loze nau" dadau: taui" to" rure yemyao lao" aire yepheim: ako".

⁵Aitau mae ye; jo; ra" mo, wa loze nau" pe"mung: pheim ko" i? ga: yao: shid' zo: re myid' ako".

⁶Yao: shid' zo: wa Yesu ta" ke' ru we' dakhyo: yao: bam re ta" kyo" ako". Ailao" yao: bam wa yao: shid' zo: re loze nau" pheim: she: lo" nhao: ako".

⁷Yao: shid' zo: wa loze nau" re Yesu jhao" she: lo mung: loze nau" dao mae yao: shid' zo" mai bau: nhe: byid' ako". Yesu re: loze nau" dao mae do; zaung: ra".

⁸Byu myo: sho' re: yao: bam: mai bau: jham re khyodang mae myhung: byid' ako". Gatau damyo" wa pa: din" mae" cilo: ra" sag' vho' sag' dang" jham re khyodang mae myhung: byid' ako".

⁹Yesu qhid' au: mae" mo, byu qe we' thao cao" ra" mo, byu qe wa zag: hug' mung:- Hosana- Asang: mang we' joe" li" ra" yaug wa ngaui lho" vashao: wo"-

¹⁰Joe" lo nae" ra" ngonhaung" yao: pho" Davi mung"dan: wa ngaui lho" vashao: wo"- Myhao: thao" ra" jo, qo mae Hosana ngad vashao: ga: ta" ako".

¹¹Yerusalem khyo joe" lao" Caung:pa" Yham khug khyo vao ye: mung: ja: khao: ngo" re yecao" qu" lhau: ra". Ba vao: lo" na lao" mho"zo: daxe: shid' yaug we' yao: wa Bethani vogaung: khyo ye" lo" ra".

¹²Ai: thao: ba Yesu we' yao" mho"zo: qe wa Bethani mae" dam: lo: na: au:- Yesu wa vae: moe' ra".

¹³Ailao" Yesu wa avho' maung" jo; ra" pho' ham" gae dagae re va: mae" the' myao: ra"- yao: wa ashi: zaui" laug ga: pho' ham" gae qao: khyo ye" lo" ra". Pho' ham" shi: zaui: yo, mangad: yang: avho' za: maung" jo; rure yemyao: ra".

¹⁴Alao" Yesu wa pho' ham" gae re thao phyao: dapyad daqae: khonhae" re: ni" ashi: khag' maqhug' zo: geshao:- ga: ta" ra". Yao" mho"zo: qere: ai: dao: re the' gyo" ako".

¹⁵Yesu we' mho"zo: qe wa Yerusalem khyo joe" ye" ako". Ailao" Yesu wa Caung:pa" Yham khug khyo vao ye: mung: Caung:pa" Yham khug mae zai aung: zai: vai mo, re khe' thug' mung: ngaui tha" zo: mo; jaung: jham we' phaung" kyug' aung: zo: mo; tao" khau" jham re tau: phaug' sin" pye' byid' ra".

¹⁶Yesu wa Caung:pa" Yham vang" khyo" pe" ja" zai rere: maci: lai: lhau nhao ngad: ra".

¹⁷Amung: yao: wa mo, byu qere- Nga" yham re byumyu" cao jab qera" akyu" mho' yham ga: mhang" genae" ga: Jham: Mugsug' mae tung" to" mangad: i? Ngadqere: naonhaung" wa aire damya, laug aug' kad' pye' avako"- ga: mho" byid' ra".

¹⁸Aikhyo re khinjaung qi: qe we' Tung" Pho" qe the' gyo: gelao"- Yesu re se' pye' nae" khyo qho: ako". Pe"mung:ga"re mo, byu qe alhab' yao: mho" byid' ra" khyo re mug'hao" na: bam geyang: yao: bam wa Yesu re gyaug: ako".

¹⁹Myi" thao joe" lo lao" Yesu we' mho"zo: qe wa vomo" mae" thug' lo" ko" ra".

²⁰Ai: thao: ba no' mae" Yesu we' mho"zo: qe su" lai: lo" na: au: ai: pho' ham" gae wa gae geim" kyaug' shid: jo; rure myao: ako".

²¹Ailao" Petru wa myid: beim: mung: Yesu re Mho" Pho" we"- qu" wa,- nao nhang: co' ra" pho' ham" gae kyaug' shid: byaug vanhaung- ga: ta" ra".

²²Yesu wa tau: mung: yao: bam re Mao"So re lam khug: na ge,-

²³Ngo naonhaung" re dang za: ta" ru wa yao: yao" nhag' lam: khug mae aug' o: myid mabo lo: yao: yao: ta" ru we' dakhyo: boe" nae"- ga: lam: ra" yaug khag' ngadqere: ce: bam re- bam nao qui" lo" wa,- amung: panglai: khyo gyo" vao lo" wa,- ga: ta" ngad: re ai wa yao: ta" ru we' dakhyo: boe" nae".

²⁴Airumung: ngo naonhaung" re ta" ru wa Naonhaung" mho' ra" ja: alhab' qo" yu nae" ein: lam ge,- ailao" naonhaung" gaigai: yao: qo" khae: yu genae".

²⁵Naonhaung" akyu" mho' ye; jo; au: naonhaung" re shad' lhoe" ra" yaug: qobo jham re khyad' pye' byid: ge,- ailao" za: mug:gaung dao mae" Pho" Mao"So wa naonhaung" shad' lhoe" ra" qobo jham re khyad' pye' byid: nae".

²⁶Su gaje qere naonhaung" qobo makhyad' byid: ko" re wa mug:khaung dao mae" naonhaung" Pho" re: naonhaung" shad' lhoe" ra" qobo re makhyad' byid: nae"- ga: ta" ra".

²⁷Yesu we' mho"zo: qe wa Yerusalem khyo dalhang dam: joe" lo: ako". Yesu wa Caung:pa" Yham mae su" qin" au:- khinjaung qi: qe- Tung" Pho" qe we' zug: ade, qe yao: jhao" li" mung:-

²⁸Nao aijham re pe" kheim: so' khyo" yang kad' i? Nao re aijham kad' nae" ce: kheim: so' khag' yang byid' to" i? ga: Yesu re myid' ako".

²⁹Yesu wa yao: bam re Ngo naonhaung" re dao: dakheim: myid: geli"- naonhaung" aire tau: gelao"- aijham re ngo pe" kheim: so' yang kad' rure naonhaung" re ngo ta" kyo: nae".

³⁰Yohan byid' ra" qid nyhab' wa Mao"So: kheim: so' khyo" yang ngad: i? Mangad: lao"- byu: kheim: so' khyo" yang ngad: i? Ngo re tau: gela,- ga: ta" ra".

³¹Ailao" yao: bam wa- Mao"So: kheim: so' khyo" yang ngad: ra" ein: ngonhaung" ta" re wa- airu: ngad: re pe"mung: naonhaung" yao: re malam" ko" i? ga: yao: ta" li" nae".

³²Amung: byu: kheim: so' khyo" yang ngad: ra" ein: ngonhaung" ta" nae" i? ga: yao: cao: jho" qham: ako". (Yao: bam wa mo, byu qere gyaug: ako"- pe"mung:ga"re byu alhab' mo, wa Yohan wa gaigai: yao: lapa ngad: ra" ga: myid: ako".)

³³Ailao" yao: bam wa tau: mung:- ngonhaung" maba ga: Yesu re ta" ako". Yesu yao: bam re- Aijham re pe" kheim: so' yang kad' rure ngore: naonhaung" re mata" kyo: nae"- ga: ta" ra".