Read Maru MARKU 12 Bible Online

MARKU 12 - Maru bible

MARKU 12

¹Yesu wa dao: tau" jham we' yao: bam re ta" ra". Byu dayaug wa sabyi khyae dakhyae qho" to: mung:- aire khyae kyae" lhang" to:- sabyi pyag' khung: dau" to" ru we' gyebyu zaung dalam: kad' to: mung: khyae kad' zo: mo, re ngho: byid' to: co' yang: gatau: mung" khyo ye" lo" ra".

²Ayo, joe" lao"- yao: wa khyae ngho" zaui: mo, jhao" jeim dayaug re khyae ngho: phug' sabyi shi: mho' nhao: ke' ra".

³Khyae ngho" zaui: mo, wa ai: jeim re lham: taui" be, mung: akeim dam: nhao: ke' ko" ra".

⁴Khyae sang wa gatau jeim dayaug re dam: nhao: ke' ra". Khyae ngho" zaui: mo, wa ai: jeim re au: lham: be; cad'- dae te' mung: qho' lham: phyo' ako".

⁵Amung: khyae sang wa jeim gatau dayaug re dam: nhao: ke' lao"- khyae ngho" zaui: mo, wa yao: re lham: se' pye' ako". Gatau myo: sho' mo, rere: dakhyo: za: be, mo, re be,- se' pye' mo, re se' pye' mung: kad' ako".

⁶Khyae sang wa nhao: ke' nae" ru yao" zote: zo: dayaug za: adang: alo". Amung: yao: wa- Nga" zo: re wa lham: phug' myao: genae"- ga: ta" yang: lo" thao" mae khyae ngho" zaui: mo, jhao" yao: zo: re nhao: ke' ra".

⁷Ngadqere: khyae ngho" zaui: mo, wa Ceyaug wa khyae sang: nho: yham khaung sang nae" yaug ngad: ra"- lo geri: Ceyaug re se' pye' gelang:- ailao"- yao" jo,nho" wa nyhao: mae" boe" zai ngad: ra" ga:- yao: cao: yao: jho" ta" ako".

⁸Amung: yao: bam wa yao: re taung" yu yang: se' pye' mung: khyae taung gaung mae yeshapye' to" ako".

⁹Ailao" khyae sang wa khoru: kad' nae" i? Yao: wa li" mung: khyae ngho" zaui: mo, re se' pye' yang: ai: sabyi khyae rere: gaje qere byid' li" nae".

¹⁰Amung: Yham zhaug' mo, khyin: khyo" pye' ra" laug baui wa yham jheim mae" akhyag: thao" ra" laug baui boe" lo va".

¹¹Ce wa Mao"So: yang kad' ru ngad: ra". Aiwa ngonhaung" qhid' kheim: mae mug' pho: mau" ngad: ra"- ga" ra" jham: dao: re naonhaung" manghe' qu" ko" i? ga: ta" ra".

¹²Yuda au: jhaung qe wa yao: bam re qang yang: Yesu ce: dao: tau" re ta" rure ba gemung: yao: bam wa Yesu re taung: nae" seim" ako". Ngadqere: byuphung: mo" re gyaug: ako". Amung: yao: bam wa Yesu re nha: to: co' mung: phao: lo" ko" ra".

¹³Ai: thao re yao: bam wa Yesu yao" dao: thoe: yang yao: re taung: nae" qhid' mae" Pharishe qe daqhae: we' Herod byu daqhae: re Yesu jhao" nhao: ke' ako".

¹⁴Yao: bam li" mung: Yesu re Mho" Pho" we"- nao wa dangman" ru we' khag' rere: myo, nho makhyin: rure ngonhaung" ba: ra". Pe"mung:ga"re nao wa byugaui maqu" lo: Mao"So: khyo re dang dang za: mho" na: ra". Roma Khosin" re khang: gai: byid' i? Magai: byid: i?

¹⁵Ngonhaung" byid: zai: i? Mabyid: zai i? ga: myid' ako". Yesu kam" wa yao: bam geim kad' rure ba mung: yao: bam re- Naonhaung" ngore pe"mung: jham" qu" ko" i? Ngo jhao" ngaui dakye' cilo: qu" ge,- ngo qu" qu" nae"- ga: ta" ra".

¹⁶Ailao" yao: bam wa ngaui dakye' cilo: ako". Yesu wa Cemae khag' sulho we' khag' mang aso: de; ra" i? ga: myid' ra". Yao: bam wa yao: re Roma khosin" sulho we' mang aso: de; ra"- ga: tau" ako".

¹⁷Yesu wa yao: bam re Roma khosin" we' sin" ra" gu: Roma Khosin" re byid: ge,- Mao"So we' sin" ra" gu: Mao"So re byid: ge,- ga: ta" ra". Yao: bam wa gyai mug' byaug: ako".

¹⁸Ai: thao re dam: daui: to" li" khyo majo, ga: ta" na ko" ra" Saduke damyo" Yesu jhao" li" mung:-

¹⁹Mho" Pho" we"- byu dayaug yaug: yao: mao: wa zo: dau maqo" lo: yao" yham sang myhi" re shid: cug' to: co' ngad: re aiyaug: yao: nhaung: wa yao: mao" cug' mo" re gaug mung: yao: mao" qhid' mae" zo: dau nyaug xo' myhung byid: ca"- ga: Moshe ngonhaung" re tung" to: byid: co' ra".

²⁰Ana"- yao: mao: yao: nhaung: nhad' yaug na: ako". Mao: mo" yaug wa myi: dayaug lo,xo' yu: ra"- ngadqere: zo: dau maqo" lo: shid: lo" ra".

²¹Alao" mao: le; yaug cug' dam: gaug: ra"- mao: le; re: zo: dau maqo" lo: shid: lo" ra". Sam yaug ein: yaug re: ai we' dakhyo: zo: dau maqo" lo: shid: lo" ra".

²²Yao: tao ho' nhad' yaug geim" zo: dau maqo" lo: shid: lo" ko" ra". Lo" thao" mae ai: myiqe: re: shid: lo" ra".

²³Shid: rumae" dam: daui: to" li" rumae ai: myiqe: myhi" wa khoyaug: yham sang myhi" ngad nae" i? Pe"mung:ga"re yao: tao ho' nhad' yaug geim" aiyaug re ceim" ngho" vako" ra"- ga: ta" ako".

²⁴Alao" Yesu wa yao: bam re Naonhaung" wa Jham: Mugsug' we' Mao"So: qam: so' re maba geyang: shad' nghung" na ko" ra" mangad: i?

²⁵Pe"mung:ga"re shid: ra" mo, dam: daui: to" li" lao"- yao: bam wa myibyid: myiyu makad' lo: genae"- yao: bam wa mug:gaung dao mae" mug: lagyo: qe we' dakhyo: ngad: ako".

²⁶Amung: shid: ra" mo, dam: daui: to" li" ra" khyo we' sin: mung: myi: nga" na: ra" thao" paung" we' sin: yang: ta" ra" jham: dau mae Mao"So wa Moshe re ngo wa Abraham nho: Mao"So- Isag nho: Mao"So we' Yaku nho: Mao"So ngad: ga: ta" ra" Jham: dao: re tung" to" ra" Moshe tung" paug' re naonhaung" manghe' qu" ge i?

²⁷Mao"So wa shid: jo; ra" mo; nho: Mao"So mangad:- Daui: na: ra" mo; nho: Mao"So angad:- naonhaung" wa gyai yao: shad' nghung" byaug: avako"- ga: ta" ra".

²⁸Ailao" Tung" Pho" qemae" dayaug wa Yesu we' Saduke bam dayaug we' dayaug jho" ta" ngag: na ko" rure the' gyo" ru we' Yesu yao: bam re shab shab za: tau: byid' rure qu" myao lao"- Yesu jhao" qui" li" mung: yao: re Amyin" dao: alhab' mae" kholam: je: qi"thao" ngad: i? ga: myid' ra".

²⁹Yesu wa Israel amyu" we"- tae" gyo: ge,- ai: Asang ngonhaung" Mao"So wa date: za" Asang ngad: ra".

³⁰Ai: Asang ni" Mao"So re ni" aung khug nhag' lam:- myid nyan: ba: ru- gaung dau: qam: so' alhab' we' jhid'de; ca" nae" ngad: ra"- ga" ra" lam: wa qi" thao" amyin" dao: ngad: ra".

³¹Shid' lam" lam: wa- ni" yham kyo: cao: re naoyao" gaung re we' dakhyo: jhid'de; ca" nae" ngad: ra"- ga" ru ngad: ra". Ce shid: lam: tho' je: qi" ra" amyin" dao: gatau majo,- ga: ta" ra".

³²Ailao" ai: Tung" Pho" wa Yesu re Ngad: ra"- Mho" Pho" we"- Mao"So wa date: za: ngad: ru we' yao: mae" je yang: gatau mana ga: nao ta" ru wa dang: ra".

³³Alao" Mao"So re aung khug: nhag' lam: alhab' we' myid nyan: ba: ru alhab' we' gaung dau: qam: so' alhab' we' jhid'de; ca" nae" ngad: ra" ga" ru we' yham kyo: cao: re yao: yao" gaung re we' dakhyo: jhid'de; ca" nae" ngad: ra" ga" ra" amyin" dao: shid' lam: re phug' cao" ru wa phad' nghaui" xeim: alhab' we' xeim: alhab' tho' je: qi" ra"- ga: ta" ra".

³⁴Yesu wa aiyaug shab za: phaug' tau" rure ba lao" yao: re- Nao wa Mao"So: Mung"dan: we' mataung" va: lo:ngad: ra"- ga: ta" ra". Ai: thao Yesu re khag' pe" re: mavae" myid: loko" ngad: ra".

³⁵Yesu wa Mao"So: yham mae mho" shid' na: au:- yao: bam re Meshia wa Davi yao: zo: ngad: ra" ga: Tung" Pho" qe khoru: mung: qo" ta" ko" ra" i?

³⁶Ni" gyevo jham re ni" khyid vo: khug mae ngo mato: to: byid: wa- nga" lo, yo shad' mae zaung: jo, wa, ga: ai: Asang wa nga" Asang re ta" ra"- ga: Davi wa Gyang" Lho" Byo vao: jaung" mung: ta" ra".

³⁷Airumung: Davi yao: yao: lhao"- Meshia re Asang ga: ta" ngad: re wa Meshia wa khoru: mung: Davi myid:zo: gai: ngad nae" i? ga: ta" ra". Byuphung: mo" wa Yesu mho" dao: re ngaui bau: za: tae" gyo" yu: ako".

³⁸Amung: Yesu wa mho" shid' zo" re"- Tung" Pho" qere lha" ge,- yao: bam wa bau: qhang ve; pye' mung: su" qin" nug mo, gai jao: gyo: mae lham: phug' myao: byid: nae" o mo,-

³⁹Tarha" Jung Yham mae gatau jaung: to" ra" tao" khau" mae zaung nug mo, ngad: ako".

⁴⁰Yao: bam wa cug' mo" qe: yham zai yokhyao: jham re phyo' zo: lhad' zo" ci mung: su qu" gai nae" geim kad' akyu" qhang sho' mho' mhug' mo, ngad: ako". Yao: bam wa je: qi" ra" dao: phyid' ru qhug' li" genae"- ga: ta" ra".

⁴¹Ai: thao Yesu wa Alu: ban" qhid' au: mae zaung: jo, mung: mo, byu qe aimae Alu: ngaui li" ke' rure qu" na: ra". Jo,nho" qo" ra" mo, myo: sho' wa Alu: ngaui myo: sho' li" ke' ako".

⁴²Masho: majhin myaung sho" ra" cug' mo" myhi" dayaug re: Alu: ban" jo; khyo li" mung: byad san: dakye' we' man" ra" gyid: ngaui shid' kye' re li" ke' ra".

⁴³Yesu wa yao" mho"zo: qere khai: yu mung: yao: bam re- Ngo naonhaung" re dang za: ta" ru wa Ce: masho: majhin myaung sho" ra" cug' mo" myhi" wa Alu: ban" mae Alu: ngaui li" ke' ra" mo, alhab' tho' mae" Alu: ngaui je: ke' ava".

⁴⁴Pe"mung:ga"re yao: bam alhab' wa yao: bam magan: mago" rumae" jan" ra" gu: re li" ke' byid' ako". Ce: cug' mo" myhi" kam" wa yao: masho: majhin myaung sho: ngadqere: qo" ra" gu: alhab' yao: zo: nae" alhab' re li" ke' pye' ava"- ga: ta" ra".