Read Maru MARKU 13 Bible Online

MARKU 13 - Maru bible

MARKU 13

¹Yesu wa Caung:pa" Yham mae" thug' lo" na: ra" au:- yao" mho"zo: qemae" dayaug wa yao: re- Mho" Pho" we"- Qu" wa, khoqhi" gyag: ra" laug zang jham we' laug yham jham ngad: ra" i? ga: ta" ra".

²Ailao" Yesu wa yao: re Nao ce: laug yham qi: jham re myao: i? Ce: laug yham jham mae" laug zang jham dazang re: madang losho' byo; gyo" lo" byaug genae"- ga: ta" ra".

³Ai: thao Yesu wa Zhan:lun: bam dao mae yao: za: Caung:pa" Yham shad' khyo myo, nho qang yang: zaung: jo; ra" au:- Petru- Yaku- Yohan we' Andre bam yao: jhao" li" mung:-

⁴Ceru khonhae" boe" li" zai ngad: i? Aijham boe" nae" ngad lao" pe" ja" ve, lho boe" thug' li" nae" laug i? Ngonhaung" re ta" kyo: la, ga: ta" ako".

⁵Ailao" Yesu wa yao: bam re Naonhaung" re khag' yang re: majhui" pyag' lo" geshao:- lha" ge,-

⁶Byu myo: sho' nga" mang vin yang: thug' li" mung:- ngo wa Meshia ngad va" ga: ta" yang: byu myo: sho' re jhui" pyag' lo" byaug: li" genae".

⁷Amung: gyekhe' ru we' gyekhe' lau thoe jham re the' gyo: gelao" naonhaung" dagyo" din ge,- ai: gu: wa boe" li" ca" ra"- ngadqere: ai: lo" thao" ru wa mangad: shingad: ra".

⁸Byu damyu" we' damyu"- mung"dan: dalam: we' dalam: gye jho" zin" li" genae"- Jo, qo gatau tau mae myid lab: lab' li" nae"- bao" khug' khug' li" nae"- cejham wa qug: khai" ru aqhid ngad: ra".

⁹Naonhaung" kam" wa yao: yao: lha" yang: na ge,- Khorumung: ga" re yao: bam wa naonhaung" re taung" yu mung: tarha" yung" khyo ab byid' pye' li" genae". Tarha" Jung Yham mae naonhaung" re be; li" genae"- Zug: qe we' kho:kham qere Ngaui Bau" Lau Dao: ta" kyo: nae" qhid' mae" nga" mathao mae naonhaung" wa yao: bam: qhid' kheim: mae ye; jo, qo: li" genae".

¹⁰Amung: ai: Ngaui Bau" Lau Dao: re byumyu" alhab' re sao qhid' kho" kyo: ca" nae" ngad: ra".

¹¹Naonhaung" re taung: mung: tarha" yung" khyo ab: pye' gelao"- pe" ta" nae" laug ein: gau: qhid' khae" yang: damyid: ci ge,- Ayo, joe" lao" naonhaung" re jhau nhao: ru we' dakhyo: jhau ge,- khorumung:gare ai: dao: jham wa naonhaung" jhau: ru mangad: Gyang" Lho" Byo jhau: ru ngad: ra".

¹²Alao" yao: mao: wa yao: nhaung: re shid nae" khyo jhui" ab: pye' li" genae"- yao: zo: qe wa yao: myhi" yao: pho" qere gye kad' mung: se' nhao: li" genae".

¹³Amung: nga" mang mathao mae byu alhab' yang naonhaung" re nghang" pye' li" genae" ngadqere: lo" thao" joe" sho' zang: qhao" yaug wa khyad' yu: ru qhug' nae".

¹⁴Amung: ai: qu" din sho' ra" maca' majhad' wa mato: ang: ra" jo, qo mae to" to" rure naonhaung" the' myao gelao" (nghe' na yaug wa ba: gyo: vashao:) Yuda mung" mae na: ra" mo, wa bam khyo tao" phao geshao:-

¹⁵Yham khaung dao mae na: ra" yaug wa gyo" lo" mung: yham khug mae" zai daja: ja: re lo" yu: ciphao nae" qhid' mae" yham khug khyo mavao lo" loshao:-

¹⁶Yothaung: din" mae na yaug re: yao" bau: qhang yu: ci nae" qhid' mae" yham khyo madam: tug' lo vashao:-

¹⁷Ai: ba na gyo: mae gaung la: mo, we' zoshao nug' nau" ci mo, wa gyai qug: genae".

¹⁸Airumung: ai: ayo, wa gyo, yo, re mangad: nae" qhid' mae" Mao"So re akyu" mho' na ge,-

¹⁹Pe"mung:ga"re Mao"So phan" to" ra" mug: myid aqhid mae" ana" ba joe" sho' maboe" qu" shi" ru we' thao phyao: re: maboe" nae" ra" qug: khai: khyag' qhui: ru wa ai: ba na gyo: mae boe" thug' li" nae".

²⁰Amung: ai: ayo, ba na jham re Mao"So: yang maqhaung" pye' ngad: re wa khag' re: qo" daui: na nae" mangad:- ngadqere: yao: khyin: yu: to" ra" mo; qhid' mae" ai: ba na jham re Mao"So qhaung" pye' byid' ra".

²¹Byu dayaug yaug wa naonhaung" re Qu" ge,- cetau mae Meshia na: ra"- thoetau mae Meshia na: ra" ga: ta" ngad: re dalam" ge,-

²²Pe"mung:ga"re Meshia apyag' qe we' Lapa apyag' qe thug' li" li" genae"- gai: boe" ngad: re yao: bam wa khyin: to: va" mo, re lhao"- qo" jhui" pyag' yu nae" qhid' mae" ve, lho jham we' mug' pho: mau" zo" jham kad' qhu" li" genae".

²³Naonhaung" kam" wa lha" yang: na ge,- ngo wa maboe" li" shimae" naonhaung" re gau: qhid' khae" yang: cegu: alhab' ta" to: va".

²⁴Amung: ai: qug: khai: khyag' qhui: ru boe" thao re ba wa no; byaug nae"- lho" re: mazho: byaug lo nae".

²⁵Kyi jham mug:gaung mae" byid: gyo" lo" byaug mung:- mug:gaung mae" qam: so' jham laui" nin" li" genae".

²⁶Ailao" Byu: Yao: Zo: wa qam: so' phungbao we' daga" jham thaui: khug mae li" rure yao: bam myao genae".

²⁷Ai: thao Byu: Yao: Zo: wa mug: lagyo: jham re- mug: thao" myid thao"- mug: myid byid khyug geim" khyo nhao: ke' mung: yao" yang khyin: yu: to" ra" mo, re cao" zhang: yu: li" genae".

²⁸Pho'ham" gae re qu" yang: zhao: yu ge,- Pho'ham" gae mae" anyaug thug' li" mung: vho' nau" tad' li" lao"- zin vao kheim: joe" li" na va" rure naonhaung" ba: ako".

²⁹Ai we' dakhyo:- aijham boe" lo: na: rure naonhaung" the' myao gelao"- ayo, joe" li" va" rure naonhaung" ba: li" genae".

³⁰Ngo naonhaung" re dang za: ta" ru wa- Ana" na: jo; ra" byu ceqae" alhab' mashid shire aijham alhab' boe" lo: li" nae".

³¹Mug:gaung we' myid gaung lai: lo" byaug ngadqere: nga" dao: wa khonhae" re: malai: lo" nae".

³²Ngadqere: ai: ba na we' yo, khyin: re Mao"So mae" je yang: khag' re: maba- Mug:gaung dao mae na: ra" mug: lagyo: jham we' ai: Yao: Zo: lhao" maba gengad: ra".

³³Ai: ba na we' yo, khyin: khonhae" joe" li" nae" rure naonhaung" maba: to" ruyang lha" mung: gyang: gyang: za: lhaug' na ge,-

³⁴Amung: aiwa byu dayaug yao: yao" yham mae" gatau: mung" khyo gyaung: su" lo" nae" ngad lao"- yao" jeim qere dayaug we' dayaug yao" mau" we' yao: yham mau" re pyo: to: byid: co' mung:- kham: lhaug' yaug re lha" yang: lhaug' na nae" qhid' mae" amyin" byid: co' ru we' dau: ra".

³⁵Pe"mung:ga"re ai: yham sang wa cad' sham" zo" re la,- gae gaung: myi: re la,- qo, teim: myi: re la,- ne, seim re la,- khonhae" joe" lo nae" ru naonhaung" maba: to" rumung: lha" yang: lhaug' na ge,-

³⁶Amung: yham sang nyag din taung" joe" lo: au: naonhaung" yab: myhid' jo; rure malo: myao nae" qhid' mae" lha" ge,-

³⁷Ngo naonhaung" re ta" ru we' dakhyo: alhab' re ta" ru wa- lha" yang: lhaug' na ge,- ga: ta" ra".