Read Maru MARKU 14 Bible Online

MARKU 14 - Maru bible

MARKU 14

¹Lai co' Poe we' Man" Make' Poe joe" nae" shid' ba ca" shi" au:- khinjaung qi: qe we' Tung" Pho" qe wa Yesu re sae za: taung" yu mung: se' pye' nae" qhid' mae" pha,jhi" khyug' na: ako".

²Ngadqere: yao: bam wa mo, byu qe malhun" li" geshao:- poe ba na gyo: gu: mae makad' gejhao" ga: jho" ta" ako".

³Yesu wa Bethani mae mao gae: boe" qu" ra" Simon: yham mae zozo" na: au:- myiqe: dayaug wa gyai phug' de; ra" Mu Ra Na: Du: xau laug gyang" thaug' dathaug' cili" mung: Yesu au: mae ai: xau li" vhe' sheim: byid' ra".

⁴Ai: tau mae na: ra" mo, damyo" wa aire nhag' qu" yo" ru we'- pe"mung: ai: xau re amyid: avho: kad' pye' ra" i?

⁵Ai: xau re ngaui kye' sam yo je mae aung: mung: myaung sho: mo, re qo" gae byid: zai ngad: ra" ga:- yao: cao: jho" ta" ru we' ai: myiqe: re qobo vhin: ako".

⁶Ailao" Yesu wa- yao: yao: sae za: na shao:- naonhaung" yao: re pe"mung: khin jang: na ko" i? Yao: wa ngore gai: ra" mau" kad' byid' ava".

⁷Pe"mung:ga"re myaung sho" ra" mo, wa khonhae" re: naonhaung" we' daga" za: na: ako". Ngadqere: ngo wa naonhaung" we' khonhae" re: abang mabyid na: jo, nae" mangad:-

⁸Yao: kam" wa yao: qo" gai: kad' ra" gu: kad' ava"- yao: wa nyhab' pye' nae" qhid' mae" nga" gaung re gau: qhid' khae" yang: xau gyad byid' ava".

⁹Airumung: ngo naonhaung" re dang za: ta" ru wa Ngaui Bau" Lau Dao: re kho" kyo" lo" ra" myid gye, geim" khyi" khao: ngo" mae ce: myiqe: re beim: so: nae" qhid' mae" yao: kad' ra" mau" zo" re ta" kyo" li" genae"- ga: ta" ra".

¹⁰Ai: thao daxe: shid' yaug mae bo: ra" Yuda Iskarud wa Yesu re ab byid' pye' nae" qhid' mae" khinjaung qi: qejhao" thug' ye" lo" ra".

¹¹Yao: bam wa yao" dao: re the' gyo: gelao" ngaui mung: yao: re ngaui byid: nae" ga: dao:so: byid' ako". Yuda wa Yesu re ab byid' pye' nae" khoau: yo" nae" rure qho: na: ra".

¹²Ai: Lai co' poe xeim: yao nau" re se' ra" Man" Make' mug Poe ba na joe" nae" daba kyo shi" au:- yao" mho"zo: qe wa Yesu re Ngonhaung" wa ni" qhid' mae" Lai co' Poe myi" xeim re nao ngonhaung" re khotau mae yenyhang" seim" to: nhao nug: i? ga: myid' ako".

¹³Ailao" Yesu wa yao" mho"zo: shid' yaug re- Ni" shid' zo: vogaung: khug khyo vao ye: ge,- Qid am vo; ci: ra" yauggai dayaug wa ni" shid' zo: re lham: tug: yu: li" nae".

¹⁴Yao" thao cao" lo" mung: yao: vao lo" ra" yham mae" yham sang re- ngo nga" mho"zo: qe we' daga" Lai co' Poe myi" xeim zo: nae" bang" do, qe, khai: mae ngad: ra" i? ga: Mho" Pho" myid: nhao: ke' ra" ein: ta" ge,-

¹⁵Ailao" yao: wa ni" shid' zo: re nyhang" seim" jin" to: va" tho' pyae mae" qe, mo" daqe, re ceim" shid' byid' li" nae" Ai: qe, mae ngonhaung" qhid' mae" myi" xeim yenyhang" to: ge,- ga: pin mung: nhao: ke' ra".

¹⁶Mho"zo: shid' zo: wa thug' ye" lo" mung: vogaung: khug khyo vao ye" lo" ko" re- yao: shid' zo: re: Yesu ta" ke' ru we' dakhyo: yemyao gelao"- Lai co' Poe myi" xeim re yenyhang" ako".

¹⁷Ana" cad' sham" zo" re Yesu wa mho"zo: daxe: shid' yaug we' daga" joe" lo: ra".

¹⁸Yao: bam zaung: jo, mung: zozo: jaung: mae zo zo" na ko" au: Yesu wa- ngo naonhaung" re dang za: ta" ru wa- ngo we' zo zo" na: ra" naonhaung" mae" dayaug wa ngore gyevo: lo, khyo ab byid' pye' li" nae"- ga: ta" ra".

¹⁹Airumung: yao: bam wa nhag' gyo" kaug' ru we' dayaug: thao dayaug Yesu re- Ai: yaug wa ngo ngad nae" i? ga: myid' ako".

²⁰Yesu wa Ai: yaug wa daxe: shid' yaug mae bobo mung: ngo we' daga" dakhug' mae za: mug jam zo: yaug ngad: ra".

²¹Pe"mung:ga"re Jham: Mugsug' mae tung" to" ru we' dakhyo: Byu: Yao: Zo: wa shid kham: nae"- ngadqere: Byu: Yao: Zo: re gyevo: lo, khyo ab byid' pye' ra" yaug wa byuxa:vaqoe, qhug' nae"- ai: yaug wa makhau: li" ngad: re yao" qhid' mae" je: gai zai ngad: ra"- ga: ta" ra".

²²Amung: yao: bam zozo" na ko" au: Yesu wa mug re yu: yu yang:- Mao"So re jeju bin: caung: byid: lao" aire cug' phai" mung:- Yu zo: ge,- ce wa nga" gaung ngad: ga: ta" mung: mho"zo: qere gae byid' ra".

²³Yesu wa sabyi keim rere: yu: yu mung: Mao"So re jeju bin: caung: byid: lao"- mho"zo: qere byid' ra". Yao: bam alhab' ai: keim mae" shaug' ako".

²⁴Yesu wa- Ce wa byu myo: sho' mo; qhid' mae" sheim: pye' ra" Mao"So: dao: thang" re dazid thaung" te' to" ra"- nga" sa: ngad:.

²⁵Ngo naonhaung" re dang za: ta" ru wa- Mao"So: Mung"dan: mae sabyi asag' re ngo qhug' shaug' ra" ba na joe" sho' ngo wa ce: sabyi re khonhae" re: dam: shaug' nae" mangad:- ga: ta" ra".

²⁶Ai: thao yao: bam wa caung: nghaui" dalam: bin: caung: lao" Zhan:lun: bam khyo thug' ye" lo" ko" ra".

²⁷Yesu wa yao: bam re naonhaung" alhab' mo, ngore to: co' mung: tao" phao: byaug genae"- pe"mung:ga"re Jham: Mugsug' mae Mao"So wa yao zaung" yaug re se' mung: yao jham wa byo: sin" lo" byaug: li" genae"- ga: tung" to" ra".

²⁸Ngadqere: ngo daui: to" li" thao re naonhaung" qhid' au: mae Galile khyo ye" lo" na: li" nae"- ga: ta" ra".

²⁹Ailao" Petru wa- yao: bam alhab' mo, nao re phao: cug' to: co' gengadqere: ngo wa nao re khonhae" re: maphao: cug' to: co' nae"- ga: Yesu re ta" ra".

³⁰Yesu wa Petru re- ngo nao re ta" ru wa ana" myi yao: qo, shid' kheim: mateim shire nao wa ngore sam lhang ha: pye' li" nae"- ga: ta" ra".

³¹Ngadqere: Petru wa- ngo nao we' daga" shid qo: li" ngadqere: nao re ngo maha: pye' nae" ga: je yang: phin" ta" ra". Mho"zo: gaje alhab' mo, re: ai we' dakhyo: ta" ako".

³²Yesu we' mho"zo: qe wa Getseman ga: mhang" ra" jo, qo khyo joe" ye" ako". Yesu wa yao" mho"zo: qere- ngo akyu" mho' na: au: naonhaung" cemae zaung: jo, lao: ge,- ga: ta" co' ra".

³³Amung: yao: wa Petru- Yaku we' Yohan bam re yao: we' daga" jhui" ye" lo" ra". Yesu wa gyai qi: sho' myid myo: myid laug qug: khai: qhug' ra".

³⁴Alao" yao: wa yao: bam re- Nga" nhag' lam: shid naeqhi" yao: gyai kaug' qhui: ra"- naonhaung" cemae lha" mung: lao" na shige,- ga: ta" ra".

³⁵Yesu wa aimae" dajhid' zo: lai: ye: mung:- myid gaung mae yegoe; jo, yang:- Gai: boe" ngad: re wa ai: yo, khyin: lai: lo" shao: ga:-

³⁶Aba- Pho" we"- nao wa alhab' re qo" kad' boe" yaug ngad: ra". Amung: ce: qug: khai: khyag' qhui: ra" keim re ngo mae" yu: pye' byid: la,- ngadqere: ngo o: ra" khyo" mangad:- nao o: ra" khyo" ngad vashao: ga: akyu" mho' ra".

³⁷Yao: dam: tug' lo: re yao: bam yab: myhid' jo; rure lomyao lao"- Yesu wa Petru re- Simon we"- nao yab: myhid' jo; i? Nao wa yo, qug dalam: khalhao" maqo" lhaug' na i?

³⁸Naonhaung" wa ju" phyo' ru khyo magyo" lo" nae" qhid' mae" lha" mung: akyu" mho' na ge,- byo wa nug kao bau ngadqere: gaung sho: wa qam: nang" ra".

³⁹Alao" yao: dam: ye: mung: azhao: mae" dao: we' dakhyo: akyu" dam: mho' ra"- ga: ta" ra".

⁴⁰Yao: dam: tug' lo: re- yao: bam wa myo, qid gyai la: geyang: yab: myhid' jo; rure lodam: myao: ra". Ailao" yao: bam wa Yesu re khoru: dam: phaug' tau: nae" maba logengad: ra".

⁴¹Yesu wa sam lhang ein: lhang dam: tug' lo lao"- yao: bam re naonhaung" ana" joe" sho' yab: myhid' mung: no" na genhaung i? Ga" va"- Yo, khyin: joe" va"- Qu" ge,- Byu Yao: Zo: wa qobo jab qenho: lo, khyo ab: pye' ru qhug' ava".

⁴²To" ge,- ngonhaung" ye" lo" gelang: se,- Qu" ge,- ngore ab byid' pye' yaug wa joe" li" na: ava"- ga: ta" ra".

⁴³Yesu airu: jhau: na shi" au:- daxe: shid' yaug mae bobo ra" Yuda wa khinjaung qi: qe- Tung" Pho" qe we' lau: de, au: jhaung qeyang nhao: ke' ra" shae tam"- thaung kang ci: ra" byuphung: we' daga" joe" li" ra".

⁴⁴Yesu re ab byid' pye' yaug wa- ngo bobaug baug: ra" yaug wa naonhaung" o: ra" yaug ngad: ra"- yao: re taung" yu mung: nyang" za: zaung" yang: jhui" lo" ge,- ga: yao: bam re ave, byid' to" ra".

⁴⁵Amung: Yuda wa joe" li" we' Yesu jhao" te' ye" lo" mung:- Mho" Pho" we"- ga: ta" mung: bobaug yebaug: ra".

⁴⁶Ailao" yao: bam wa Yesu re taung: mung: tang za: zaui" zag: ci: ako".

⁴⁷Ai: ayae mae ye; jo; ra" mo, mae" dayaug wa yao" shae pyang: she: yu yang: Khinjaung Yin" nho: jeim pho" dayaug: nokhye' qam" phyid' khyo" pye' byid' ra".

⁴⁸Yesu wa yao: bam re- Damya, re taung" ruru: ngore taung: nae" qhid' mae" shae we' thaung kang we' li" ko" i?

⁴⁹Ngo wa ba khao: ngo" Caung:pa" Yham mae mho" shid' mung: naonhaung" we' daga" na ngad yang: re: naonhaung" ngore mataung: ko" ngad: ra". Ngadqere: Jham: Mugsug' wa jab byang" lo ca"- ga: ta" ra".

⁵⁰Ailao" mho"zo: qe alhab' mo, wa Yesu re to: co' mung: tao" phao: lo" byaug: ako".

⁵¹Jid: mo" pin: dau za: yang" ci: ra" zolau: dayaug wa Yesu thao cao" ye" lo" ra". Yao: bam yao: re taung: nae" seim" gelao"-

⁵²Yao: wa jid: mo" pin: dau re to: co' mung: gaung pyad' tao" phao: lo" ra".

⁵³Ai: thao yao: bam wa Yesu re Khinjaung Yin" yham khyo jhui" ye" ako". Khinjaung qi: qe alhab' mo, we' Tung" Pho" qe alhab' wa ai: mae zang" ham: na: bam: ako".

⁵⁴Petru wa Khinjaung Yin" nho: yham vang" khug khyo joe" sho'- va: va: mae" Yesu thao cao" ye" ra". Yao: wa khinjaung yin" qe: gug: gam qe we' daga" zaung: jo, mung: myikhyeim" mae myi: bogao: na: ra".

⁵⁵Khinjaung yin" qe we' Yuda Tarha" qe, do, geim" mae" lau: de, qe alhab' wa Yesu re qo" se' pye' nae" qhid' mae" sagse: qho gengad yang: re: yao: bam mathe' qho ko" ngad: ra".

⁵⁶Sagse: myo: sho' mo, wa Yesu re gye kad' yang: mhug' ta" ako". Ngadqere: yao: bam: dao: majho" zhaung: ngad: ako".

⁵⁷Ailao" byu damyo" to" ye; li" mung: yao" khyo re sagse: mhug' kham mung:-

⁵⁸Ceyaug wa byu: lo; yang kad' to" ra" ce: Caung:pa" Yham re phyo' pye' mung: sam ba kyo lao" byu: lo; yang makad' ra" Caung:pa" Yham re ngo kad' nae"- ga: yao: ta" rure ngonhaung" the' gyo: va"- ga: ta" ako".

⁵⁹Ngadqere: yao: bam: sagse: dao: jham re: majho" zhaung: gengad: ra".

⁶⁰Ailao" Khinjaung Yin" wa mo, phaung gaung: mae" to" li" mung:- Yesu re nao dakheim: re: matau: i? Ni" khyo re yao: bam sagse: kham: na ko" ru wa khoru: i? ga: myid' ra".

⁶¹Ngadqere: Yesu wa dakheim: re: matau: lo: sae za: na: ra". Alao" Khinjaung Yin" wa Yesu re nao wa ngaui lho" ra" Mao"So: yao: zo: Meshia ngad: i? ga: dam: myid' ra".

⁶²Yesu wa Ngo ngad:- Byu: Yao: Zo: wa phung qam: so' nho: lo, yo shad' mae zaung: jo; ru we' mug:gaung: jham thaui: we' daga" li" na: rure the' myao: li" genae"- ga: ta" ra".

⁶³Khinjaung Yin" wa yao" adao: bau: qhang lao" cad' pye' mung:- ngonhaung" pe" sagse: qo lo" i?

⁶⁴Yao: Mao"So re jung" gaui: rure naonhaung" the' gyo: vako" ra". Naonhaung" khoru: myid ko" i? ga: ta" ra". Yao: bam alhab' wa Yesu re qobo qo" mung: se' pye' qhug' ang: ra" yaug ngad: ra"- ga: ta" ako".

⁶⁵Damyo" wa Yesu re khata: phoe" sheim: byid' ako". Yao" myo,khung: re thab' pye' byid: yang: zhab' thaung: mung: Nao re khag' zhab' thaung" rure tag: qu" wa,- ga: ta" ako". Khinjaung yin" nho: gug: gam qere: yao: re pyo' ako".

⁶⁶Petru wa ai: vang" khug mae na: jo; au:- Khinjaung Yin" nho: okaung myiqe: nau" dayaug li" mung:-

⁶⁷Petru myi: gao: na: rure myao lao"- yao: re zhaug' qu" mung: Nao re:- Nazared mae" Yesu we' daga" lhaung" na: ra" yaug ngad: ra"- ga: ta" ra".

⁶⁸Ngadqere: Petru wa aire ha: pye' mung:- Nao ta" ru ngo maba- Gyo: re: maba: gyo:- ga: ta" ra". Amung: yao: wa vang" kham: nhad' khyo ye" lo" ra".

⁶⁹Ai: okaung myiqe: nau" yao: re dam: myao lao"- ayae mae ye; jo; ra" mo, re- Ceyaug re: yao: bam: phung: mae" dayaug ngad: ra"- ga: dam: ta" ra".

⁷⁰Ngadqere: Petru wa aire dam: ha: pye' ra". Ailao" ai:thao dazab gai re- ai: ayae mae ye; jo; ra" mo, wa Petru re- Gaigai: yao: nao wa yao: bam: phung: mae" ngad: ra". Pe"mung:ga"re nao wa Galile byu ngad: ra"- ga: ta" ako".

⁷¹Ailao" Petru wa nhang: myan" nhang: thoe we' Naonhaung" ta" ra" byu ceyaug re ngo maba- ga: jham tang: yang: ta" ra".

⁷²Ailao" jao" qo, shid' kheim: ein: kheim: teim: ra". Petru wa Yesu yao: re Qo, shid' kheim: mateim shire nao ngore sam lhang ha: pye' li" nae"- ga: ta" ra" dao: re dam: myid: beim" li" mung: ngug: ra".