Read Maru MARKU 15 Bible Online

MARKU 15 - Maru bible

MARKU 15

¹Ne, seim no' mae" khinjaung qi: qe wa lau: de, qe- Tung" Pho" qe- Yuda tarha" qe, do, geim" we' hin hin za: byin phyo: jho" qham: ako". Ai: thao Yesu re taui: mung: Pilad re yeshe: ab byid' ako".

²Pilad wa Yesu re Nao wa Yuda kho:kham ngad: i? ga: myid' ra". Ailao" Yesu wa yao: re- Aiwa nao ta" ru ngad: ra"- ga: phaug' tau" ra".

³Khinjaung qi: qe wa Yesu re qobo myo: sho' ja: zhaug' ako".

⁴Aimung: Pilad wa Yesu re- Nao pe" re: maphaug' tau: i? Yao: bam nao re khonho" gye kad' qobo zhaug' na: rure qu" wa,- ga: dam: myid' ra".

⁵Ngadqere: Yesu wa pe" dakheim: re: maphaug' tau: ngad: ra"- aimung: Pilad wa mug' ra".

⁶Pilad wa Lai co' Poe khao: ngo" mae- mo,byu qe mho' ra" kyam: byu dayaug yaug re yao: bam: qhid' mae" lhaung" nhao: ke' byid' ra".

⁷Ai: gyo: mae geim lau to" rumae byu se' mung: thaung: khug mae taung" lhaung" to" ra" geim lau qe: phaung mae Baraba ga: mang: ra" byu dayaug bo: ra".

⁸Mo, byu qe wa li" mung: Pilad re- yao: khonhae" re: lhaung" kad' byid' ru we' dakhyo: kad' byid: nae" qhid' mae" mho' ako".

⁹Ailao" Pilad wa yao: bam re- Ngo wa Yuda kho:kham re nhao: ke' byid: nae" naonhaung" o ko" i? ga: myid' ra".

¹⁰Pe"mung:ga"re khinjaung qi: qe wa Yesu re myid nug: mung: yao" lo, mae li" ab byid' to: ko" rure yao: ba yang: ngad: ra".

¹¹Ngadqere: khinjaung qi: qe wa mo,byu qere Yesu atha" Baraba re nhao: ke' byid: nae" Pilad re mho' nae" qhid' mae" poe: to" ako".

¹²Pilad wa yao: bam re- Airulao"- Yuda kho:kham ga: naonhaung" yang mhang" ra" yaug re ngo khoru: kad' nae" i? ga: dam: myid' ra".

¹³Yao: bam wa- yao: re pyao: zang mae jin" se' pye' wa,- ga: dam: zag: hug' ako".

¹⁴Pilad wa yao: bam re- Pe"mung: i? Yao: pe" ja" qobo shad' lhoe" va" ra" i? ga: ta" ra". Ngadqere: yao: bam alhab' mo, wa- yao: re pyao: zang mae jin" se' pye' wa,- ga: je: zag: hug' ako".

¹⁵Ailao" Pilad wa mo, byu qere nhag' dag nhao nug yang: Baraba re nhao: ke' byid' ra". Yesu re wa be, mung: pyao: zang mae jin" se' pye' nae" qhid' mae" ab byid' ke' ra".

¹⁶Gyezo: jham wa Yesu re Pretori ga: mhang" ra" mung" zug: pho" yham mo" vang" khug khyo jhui" vao lo" mung:- gyetab geim" re khai: zhang" to" ako".

¹⁷Yao: bam wa Yesu re bau: qhang amo, vhe' byid: mung: zau: kyao: yang nag: to" ra" maug re yao" au: mae zhaung: byid' ako".

¹⁸Amung: yao: bam wa Yuda qenho: kho:kham we"- Kao qhang so' qhang vashao: wo"- ga: jung" nyhe' dao: we' phug' myao: byid' ako".

¹⁹Alao" yao: bam wa thao: khyaung" yang Yesu au: re be, mung: khata: phoe" sheim: byid' ru we' pad' thaug' thaug' yang: yao: re goe; pa" ako".

²⁰Yao: bam wa Yesu re nug: khyo: bin: jung" pye' lao"- bau: qhang amo, re khyad' pye' byid: mung: yao" mai bau: re dam: vhe' byid' ako". Amung: yao: bam wa yao: re pyao: zang mae jin" se' pye' nae" qhid' mae" jhui" thug' lo" ko" ra".

²¹Alao" yao: bam wa seyo: vogaung: mae" li" mung: su" lai: lo" na: ra" Simon ga: mang: ra" yaug re Yesu nho: pyao: zang re vo, byid: nae" lham: deim" zag: nhao: ako". (Simon wa Kureni mang: byu ngad mung: Alexanda we' Rufu tao: yao: pho" ngad: ra".)

²²Yao: bam wa Yesu re Golgotha ga: mhang" ra" jo, qo khyo jhui" ye" ako". (Golgotha ga" ru wa- au: gao: gye, jo, qo ga" ru ngad: ra".)

²³Yao: bam wa Mura we' lhag' to" ra" sabyi qang: Yesu re byid: jhaug' ako". Ngadqere: Yesu mashaug' ngad: ra".

²⁴Amung: yao: bam wa Yesu re pyao: zang mae jin" se' pye' ako". Yao" mai bau: jham re wa gae bam khyo" to: mung: khoyaug khobam yu ang: rure pha" be, yang: jho" gae: yu: ako".

²⁵Yesu re pyao: zang mae jin" pye' ra" ayo, wa- ne, kao gug yo, qug: mae ngad: ra".

²⁶Pyao: zang dao mae Yuda qe: kho:kham- ga: yao: re qobo zhaug' ra" khyo" tung" te' to" ako".

²⁷Amung: yao: bam wa yao: we' daga" damya, shid' zo: rere: yao" lo, yo shad' mae dayaug- yao" lo, kaung: shad' mae dayaug pyao: zang mae jin" te' to" ako".

²⁸Jham: mugsug' mae Yao: wa tarha" macao" ra" mo; japhin: mae boke' ru qhug' ra"- ga" ra" jham: dao: wa ceru: jab byang" lo: ra".

²⁹Khyo mae su" lai: lo" mo, re: Yesu re jung" ru we' au: nghoe" nghoe" mung:- No"- Caung:pa" Yham re phyo' pye' mung: sam ba gyo: mae dam: kad' nae" ga: yaug we"-

³⁰Ni" gaung re naoyao: khyad' yu mung: pyao: zang mae" gyo" lo wa, mhao"- ga: ta" ako".

³¹Ai we' dakhyo: khinjaung qi: qe we' Tung" Pho" qere: Yesu re jung" mung: su gaje qere yao: khyad' yu: ra"- ngadqere: yao" gaung re wa yao: maqo" khyad' yu ngad: ra".

³²Ngonhaung" the' myao mung: lam" nae" qhid' mae" Israel kho:kham Meshia wa ai: pyao: zang mae" gyo" lo vashao:- ga: yao: cao: jho" ta" ako". Yao: we' daga" pyao: zang mae bojin" te' to" ra" damya, shid' zo: re: yao: re jung" pye' ako".

³³Amung: ba khaung tau yo, mae" myi" thao sam yo, qug joe" sho' damung" geim" no, sang: kyid mug: cad' byaug: ra".

³⁴Myi" thao sam yo, qug mae Yesu wa thoe qi: we' Eloi- Eloi- Lema sabagthani?- ga: hug' ta" ra". Aiwa Nga" Mao"So- Nga" Mao"So- Pe"mung: nao ngore shapye' ra" i? ga" ru ngad: ra".

³⁵Amung: ai: nhae mae ye: jo; ra" mo, damyo" aire the' gyo: gelao"- Qu" ge,- yao: wa Elia re khai: na: ra"- ga: ta" ako".

³⁶Byu dayaug wa tao" ye" lo" mung:- qid mug sad' mae sabyi jhin qang: dag sho' tag' yu mung: gyang: yao: au: mae thug' ze; te' ci yang:- Yesu re byid: jhaug' zo" re" Elia yao: re li" khyo" yu nae" la,- mali" khyo" yu nae" la,- ngonhaung" qu" na gelang:- ga: ta" ra".

³⁷Yesu wa thoe qi: zang hug' mung: kao gyo" lo" ra".

³⁸Ailao" Caung:pa" Yham mae" qe, kyo pin: lung: wa aau: mae" aqao: joe" sho' shid' gao go; lo" byaug: ra".

³⁹Yesu airu: kao gyo" lo" rure yao" qhid' kheim: mae ye; jo; ra" gyezo: dayo re eib: ra" gyezug: pho" myao lao"- ceyaug wa gaigai: yao: Mao"So: yao: zo: ngad: ra"- ga: ta" ra".

⁴⁰Myiqe: qe damyo" wa va: mae" qu" na: bam: ako". Aibam: phaung mae- yao: Galile mung" mae na shi" au:- yao" thao cao" mung: yao: re caung da" byid' ra" Magadala Mari- Yaku ngai we' Yoseb tao: yao: myhi" Mari we' Salome bam bobo: ako".

⁴¹Alao" Yerusalem khyo yao: we' daga" do, lo: ra" gatau myiqe: myo: sho' mo, re: bobo: ako".

⁴²Myi" thao mug: cad' lo" na: au: Arimathe vobyu Yoseb joe" li" ra". Yao: wa Yuda tarha" qe, do, mae bobo yaug ngad: ru we' phug' myao: tho' ra" byu dayaug ngad: ra". Mao"So: Mung"dan: joe" li" nae" rure lao" na: ra" yaug re: ngad: ra".

⁴³Ai: ba wa (Dugno: Ba qhid' mae" ba) Seim" Jin" ra" Ba na ngad: ruyang Yoseb wa magyaug mavae Pilad jhao" vao ye: mung: Yesu mao gaung re yemho' yu: ra".

⁴⁴Ailao" Pilad wa Yesu kao gyo" va" rure the' gyo: lao"- yao: wa gyezug: pho" re khai: yu yang: Yesu kao gyo" ru khomyhao" ngad va" rure myid' ra".

⁴⁵Pilad wa gyezug: pho" ta" kyo" rure the' gyo: lao" Yoseb re yao" mao gaung yu: yu nae" akhang" byid' ke' ra".

⁴⁶Ailao" Yoseb wa jid: mo" pin: dau vai: yu mung: Yesu mao gaung re yekhyo" yu yang: jid: mo" pin: dau: yang bin: thab' lao"- laug thin mae kyaung" to" ra" laug khyaung lab khug mae ye:vhao" to: mung: laug zang qi: dazang: yang lab kham: re lhang" jhid' to" ako".

⁴⁷Yesu re nyhab' to" ra" jo, qo re Magadala Mari we' Yoseb: yao: myhi" Mari shid' zo: myao: ako".- *