Read Maru MARKU 16 Bible Online

MARKU 16 - Maru bible

MARKU 16

¹Dugno: Ba lai lao"- Magadala Mari- Yaku yao: myhi" Mari we' Salome bam wa Yesu mao gaung re gyad byid: nae" qhid' mae" sheim nae pyo" ra" xau vai: yu: ako".

²Yao: bam wa Laban ba ne, seim no' ba thug' so' re lab khyo ye" ako".

³Yao: bam wa ngonhaung" re lab khyaung nhad' mae" laug zang khag' yang tau: lhang" khyo" pye' byid: nae" laug i? ga: khyole; mae yao: cao: jho" ta" ako".

⁴Yao: bam yequ" ke' ko" re laug zang wa tau: lhang" pye' to: va" rure myao: ako". Ai: laug zang wa gyai qi" ra".

⁵Yao: bam lab khyaung khug khyo vao ye: we' mai bau: phyu ve; ra" zolau: dayaug lo, yo shad' mae zaung: jo; rure yemyao mung: yao: bam din: mug' byaug: ako".

⁶Alao" yao: wa yao: bam re- Dadin: mug' ge,- naonhaung" wa pyao: zang mae jin" se' pye' ra" Nazared mae" Yesu re qho: na: ako". Yao: wa daui: to" lo" byaug va"- yao: Cemae mana lo:- yao: re lhang" to" ra" cejo,qo re qu" ge,-

⁷Ngadqere: naonhaung" lo" mung: Petru we' mho"zo: qere- yao: wa Galile mung" khyo naonhaung" qhid' au: mae ye" lo" na: ga"- yao: naonhaung" re ta" to: va" ru we' dakhyo:- aimae naonhaung" yao: re yemyao: li" genae" ga" ein:- lo" ta" kyo: ge,- ga: ta" ra".

⁸Yao: bam wa lab khyaung mae" thug' lo mung: tao" phao: lo" ako". Pe"mung:ga"re yao: bam wa din: nin" ru we' mug' hao" byaug: ako". Yao: bam gyaug geyang: khag' rere: pe" mata" kyo: ko" ngad: ra".

⁹[Amung: Laban ba ne,seim no' mae"- Yesu daui: to" li" thao re Yao" yang yui nhad' dau: khe' thug' pye' byid' ra" Magadala Mari re sao qhid' yao" gaung na: qhu" byid' ra".

¹⁰Magadala Mari wa thug' ye" lo" mung: kaug' qhui: ru we' ngug: na ko" ra" Yesu mho"zo: qere yeta" kyo" ra".

¹¹Ngadqere: yao: bam wa Yesu daui: na: ga" rure we' Mari wa Yesu re myao va" ga" rure the' gyo: gengad yang: re: aire malam" ko" ngad: ra".

¹²Ai: thao re Yesu wa seyo: vogaung: khyo su" ye" lo" na ko" ra" mho"zo: shid' yaug re gatau ve, bao khyo" yang yao" gaung na: qhu" ra".

¹³Ailao" yao: shid' zo: wa dam: tug' phao: lo mung: dang: ra" gatau: mho" zo" qere ai: khyo lota" kyo" ako". Ngadqere: yao: bam wa aire malam" gengad: ra".

¹⁴Amung: ai:thao re Yesu wa mho"zo: daxe: dayaug za: zozo" na ko" au:- yao" gaung na: qhu" ra". Yesu wa yao: bam re yao: shid: rumae" dam: daui: to" li" thao yao: re the' myao va" mo; dao: re mho"zo: qe malam" ko" ruyang yao: bam: lam khug: myid mabo: ru we' nhag' lam: qao: rure qeim: ra".

¹⁵Ailao" Yesu wa yao: bam re Naonhaung" mug: myid geim" jao: sho' ye" lo" mung: byumyu" cao jab alhab' re ai: Ngaui Bau" Lau Dao: yekho" kyo: ge,-

¹⁶Lam" mung: qid nyhab' kham: yu: ra" yaug khag' ngadqere: khyad' yu: ru qhug' nae. Alao" malam" ra" yaug khag' ngadqere: dao: phyid' ru qhug' nae".

¹⁷Lam" ra" mo, wa- nga" mang khyo" yang yui jham re qo" khe' thug' pye' li" genae". Amung: gakai: lai mung: ra" dao: jham re qo" jhau: li" genae".

¹⁸Yao: bam wa- lhao maui jham re taung" zaui: gengadqere:- shid ja: daug daja: ja: shaug' gengadqere: pe" maca" genae". Amung: no phyo: qhug' ra" mo; dao mae yao: bam: lo, kai: byid: lao"- no phyo: qhug' ra" mo, gai: shao: lo" li" genae"- ga: ta" ra".

¹⁹Asang Yesu wa airu: mho"zo: qere bin: ta" lao"- yao: wa mug:gaung khyo to' yu: ru qhug' mung:- Mao"So: lo, yo shad' mae zaung: jo; ra".

²⁰Ailao" mho"zo: qe wa thug' ye" lo" mung: jo, qo khyi" khao: ngo" mae cao" kho" kyo" ako". Asang wa yao: bam we' daga" mau" zaui" qin" mung: mug' pho: ve, lho bobo byid' ra" khyo" yang ai: mungdao: re nyhad' tang byid' ra".] Dao: Pin" Axug' Gatau Dalam: [Myiqe: qe wa- Petru we' yao" byin cao: qejhao" ye: mung:- yao: bam re ta" ra" dao: jham alhab' re lang" ra" khyo" yao: bam re yeta" kyo" ako". Ai: thao re Yesu wa yao" mho"zo: qere apyad ato khyad' yu: ra" gyang" lho" ru we' khonhae" re: daui: na: ra" lau dao: re ba thug' shad' mae" ba vao shad' jao: sho' yekho" kyo: nae" qhid' mae" nhao: ke' ra".]