Read Maru MARKU 2 Bible Online

MARKU 2 - Maru bible

MARKU 2

¹Dayo, zo: kyo thao re Yesu wa Kapena-um khyo dam: tug' joe" lo mung:- yham mae na: jo; ra" ga: ta" hau" ako".

²Qe, khug kham: dung: maqui" losho' mo, byu qe myo: sho' zang" li" ako". Alao" Yesu wa yao: bam re mungdao: kho" kyo" na: ra".

³Gaung jam: shid: ra" byu dayaug re byu byid zo" yang Yesu jhao" dao: li" ako".

⁴Yao: bam wa mo, paug' saung" thau yang: Yesu jhao" maqo" te' ye: gelao" yao" au: tho' mae" mhao: mug: tau: qhid' pye' mung: gaung jam: shid yaug re yab qo we' daga" shoe' khyo" ke' ako".

⁵Yao: bam: lam khug: myid re Yesu the' myao lao" yao: wa gaung jam: shid yaug re- Nga" zo: we"- ni" qobo re khyad' pye' byid: va"- ga: ta" ra".

⁶Aitau mae zaung: jo; ra" Tung" Pho" qe damyo" nhag' lam: khug mae-

⁷Ceyaug wa khoru: mung: cedao: vae" ta" i? Ce wa Mao"So re jung" ru ngad: ra". Mao"So dayaug za: qobo re qo" khyad' byid: yaug ngad: ra" ga: myid: qho: na: ako".

⁸Yao: bam: nhag' lam: khug mae airu: myid: qho: na ko" rure Yesu dalhang: dae yao" nhag' lam: khug mae beim: mung:- naonhaung" nhag' lam: khug mae pe"mung: airu: myid: qho: qu" na ko" i?

⁹Gaung jam: shid: ra" yaug re- Ni" qobo khyad' pye' byid: va" ein: ta" re je: laui: i? Mangad: lao"- To" wa,- ni" yab qo vo, yang: su" lo" wa,- ein: ta" re je: laui: i?

¹⁰Ngadqere: Byu: Yao: Zo: wa myidgaung dao mae qobo qo" khyad' byid' ra" kheim:so' qo" yaug ngad mangad: rure ngo naonhaung" re qhu" byid: geli"- ga: ta" mung: gaung jam: shid yaug re-

¹¹Nao re ngo ta" li"- To" wa,- ni" yab qo gaug: vo, mung: yham khyo lo" se,- ga: ta" ra".

¹²Ailao" jao" yao: to" mung: yao" yab qo gaug: vo, yang: yao: bam: qhid' kheim: mae" to" phao: lo" ra". Alao" yao: bam alhab' mo, mug' hao" bam mung: Mao"So re caung:khin" zo" re"- ngonhaung" ceru" ru khonhae" re: mamyao: qu" shi: ga: ta" ako".

¹³Yesu wa Galile tham: yae khyo dam: ye" lo" ra". Byu phung: alhab' yao: jhao" zang" phaung: li" gelao" Yesu wa yao: bam re mho" shid' ra".

¹⁴Aimae" yao: su" ye" lo" au: Alphaeu yao: zo: Levi wa yao" khang: khyui zaung mae zaung: jo; rure myao lao"- Yesu wa yao: re- Nga" thao cao" la,- ga: ta" ra". Ailao" jao" Levi to" mung: yao" thao cao" ye" lo" ra".

¹⁵Ai: thao Yesu wa Levi yham mae zozo" na: ra". Yao" thao cao" ra" khang: khyui zo: mo, myo: sho' we' qobo qo" ra" byu myo: sho' mae" damyo" wa- Yesu we' yao" mho"zo: qe we' daga" zozo: jaung: mae bocao: zo" na: ako".

¹⁶Ailao" khang: khyui zo: mo,- qobo qo" ra" mo, we' daga" Yesu zo: shaug' na: rure Pharishe qemae" Tung" Pho" qe damyo" myao lao" yao: bam wa- Pe"mung: yao: wa qobo qo" ra" mo,- khang: khyui zo: mo, we' daga" zo: shaug' na: i? ga: yao" mho"zo: qere myid' ako".

¹⁷Aire Yesu the' gyo: lao" yao: wa yao: bam re- Qao" zin" mo, wa mocid' sara maqo ngad: ako"- No mo, za: aqo: ako". Din:man" ra" mo, re khai nae" qhid' mae" ngo li" ru mangad:- Qobo qo" ra" mo, re khai nae" kam" wa ngo li" ru ngad: ra"- ga: ta" ra".

¹⁸qid nyhab' byid: yaug Yohan mho"zo: qe we' Pharishe qe wa zo:ve lhaung" jao" ako". Amung: mo, byu qe damyo" Yesu jhao" li" mung: yao: re- qid nyhab' byid' yaug Yohan: mho"zo: qe we' Pharishe qe: mho"zo: qe zo:ve jao" re ni" mho"zo: qe pe"mung: zo:ve majao" ko" i? ga: myid' ako".

¹⁹Yesu wa yao: bam re tau: mung: Lo,xo' poe leim mo, wa pho" sag' we' na shi" au: re zo:ve gai: jao" i? Yao: bam pho" sag' we' daga" ana na wa zo:ve magai: jao".

²⁰Ngadqere: pho" sag' re yao: bam: phaung mae" kao" jhui" lo" nae" ra" ba na joe" li" nae"- ailao" yao: bam zo:ve jao" genae" ngad: ra".

²¹Bau: xug' mae pin: sag' cug' yang khonhae" khag' malhaung" pho- Airu: pho lao" pin: sag' cug' yang bau: xug' re lao" cad' mung: bau: je: jad; lae: lo" byaug nae".

²²Alao" sabyi qang: asag' rere: shoqid thaung axug' mae khonhae" khag' malhaung" ke'- Airu: ke' lao" shoqid thaung baug; go; lo" mung: sabyi qang: yug: sheim: lo" ru we' shoqid thaung re: qeim: byaug nae". Amung: sabyi qang: asag' re shoqid thaung asag' mae ke' to: ca"- ga: ta" ra".

²³Ai: thao Yesu wa Dugno: Ba re gaug yo khyo" su" lai: lo" ang: ra". Yao" mho"zo: qe wa gaug shi: re shan" yu: ako".

²⁴Alao" Pharishe qe wa yao: re- Qu" wa,- Dugno: Ba re tarha" mavao: ra" mau" re yao: bam pe"mung: kad' na: ako" i? ga: ta" ako".

²⁵Yesu wa tau: mung:- Khinjaung Yin" Abiatha" ban: re Davi wa yao" thao cao" mo, vae: moe; qo ca" gelao" khoru: Mao"So: yham khug khyo vao ye: mung: khinjaung yin" mae" je yang: khag' zo: nae" tarha" mavao: ra" Mao"So: qhid' kheim: mae qhaug' byid' to" ra" mug re zo: mung: yao" thao cao" mo, rere: byid: zho" ra" khyo re naonhaung" khonhae" re: manghe' qu" ko" i? ga: yao: bam re ta" ra".

²⁷Alao" Yesu yao: bam re- Byu wa Dugno: Ba: qhid' mae" mangad:- Dugno: Ba kam" wa byu: qhid' mae" to" ru ngad: ra".

²⁸Amung: Byu: Yao: Zo: wa Dugno: Ba: Asang re: ngad: ra"- ga: ta" ra".