Read Maru MARKU 3 Bible Online

MARKU 3 - Maru bible

MARKU 3

¹Ailao" Yesu wa Tarha" jung yham khyo dam: vao ye" ra". Ai: mae lo, dashad' shid: ra" byu dayaug na: ra".

²Ai: mae na: ra" mo, byu damyo" wa Dugno: Ba re aiyaug re yao: gai byid' ra" la, magai byid' ra" la, Yesu re qobo zhaug' nae" ga: te' za: jo" qu" na: ako".

³Amung: yao: wa lo, dashad' shid yaug re- Ce: qhid' au: khyo li" ye, ri:- ga: ta" ra".

⁴Alao" yao: wa mo, byu qere- Dugno: Ba mae gai: ra" mau" zaui: nae"- mangad: lao" magai: ra" mau" zaui: nae"- kao so' khyad' nae"- mangad: lao" se' nae" kholam: tarha" vao: i? ga: myid' ra". Yao: bam wa sae za: na: ako".

⁵Yao: bam: nhag' lam: qao: ruyang yao: nhag' kaug' mung: nhag' yo" ru we' lhang" gam: zhaug' qu" mung: aiyaug re Ni" lo, yheim" ke' wa,- ga: ta" ra". Lo, yheim" ke' we' yao" lo, gai: lo" byaug: ra".

⁶Alao" Pharishe qe wa thug' lo" mung: yao: re khoru: kad' mung: qo" se' pye' nae" ru Herod nho: byu qe we' ai jao" yao: byin phyo: lo" zin: ako".

⁷Amung: Yesu wa yao" mho"zo: qe we' daga" Galile" tham: khyo dam: ye" lo" ra". Galile" mae" byu phung: mo" zang re: yao: bam: thao cao" ako".

⁸Ai: tho' mago" Yuda mang mae" mo, Yerusalem vomo" mae" mo, Idumia mang: mae" mo,- Yodan gyaung: thoete' ba thug' shad' mae" mo,- Ture we' Sidon mang: mae" mo,byu phung: mo" qere: yao: kad' ra" mau" re the' gyo: gemung:- yao: jhao" li" ako".

⁹Alao" Yesu wa mo, byu qeyang yao: re mathe' zab: jhin" lhang: vageshao: ga: yao" qhid' mae" lha ngai dakhye' nyhang" to: byid: nae" qhid' mae" yao" mho"zo: qere ta" ra".

¹⁰Pe"mung:ga"re byu myo: sho' re gai byid' qu" va" rumung: no phyo: qhug' ra" mo, alhab' wa yao: re qo" tin: sho' ga: yao: jhao" jhin" vao li" ako".

¹¹Makhyang" byo zaung: ra" mo, re: yao: re myao lao" yao: bam wa yao" qhid' kheim: mae gyang: goe; lo" mung: nao wa Mao"So: Yao: Zo: ngad: ra"- ga: zag: hug' ako".

¹²Yesu wa makhyang" ra" byo jham re yao" khyo we' sin: mung: mahau" nhao" lo" genae" qhid' mae" jhaug' za: zug' nhao: ke' ra".

¹³Alao" yao: wa bug gaung dalam: khyo do, ye: mung:- yao: o: ra" mo, re khai: yu: ra". Yao: bam re: yao: jhao" lo: ako".

¹⁴Yao: wa daxe: shid' yaug re khyin: yu mung: yao: bam re lagyo: qe ga: mhang" byid' ra".

¹⁵Yao: wa yao: bam re- Naonhaung" re ngo we' daga" na nae" qhid' mae" khyin: to" ru ngad:. Amung: mungdao: kho" kyo: nae" qhid' mae" re: naonhaung" re ngo nhao: ke' nae". Ailao" naonhaung" wa yui jham re khe' thug' pye' nae" kheim: so' re: qo" li" genae"- ga: ta" ra".

¹⁶Amung: Yao: wa Simon re Petru ga: mhang" byid' ra".

¹⁷Zebede yao: zo: Yaku we' Yohan tao re Boanerga ga: mhang" byid' ra". (Aiwa mug: dam: nau" tao ga" ru ngad: ra".)

¹⁸Aimae"- Andre- Philib- Batholame- Mathe- Alphaeu yao: zo: Yaku- Thadaeu- byumyu" jhid' myid qi" ra" Simon we'-

¹⁹Thao phyao: yao: re ab: pye' nae" ra" Yuda Iskarud bam re khyin: to" ra".

²⁰Ai: thao Yesu wa yham khyo vao ye" ra". Yao: we' yao" mho"zo: qe zo lhao" maqo" gai: zo: losho' mo, byu qe dam: zang" li" ako".

²¹Ai: khyo re yao" yham byu qe the' gyo: lao" yao: bam wa yao: re taung" yu nae" ga: thug' ye" lo" ako". Pe"mung:ga"re mo, byu qe yao: re go: ava" ga: ta" na: ako".

²²Amung: Yerusalem mae" gyo" lo: ra" tung" pho" qere:- yao: wa yui bo yang: ngad: ra". Yui zug: mo" qam" yang yui jham re khe' thug' pye' ra" ga: ta" ako".

²³Alao" yao: wa yao: bam re yao: jhao" khai: yu mung: dao: tau" we'- Satan wa Satan re khoru: qo" khe' thug' nae" i?

²⁴Mung"dan: dalam: wa yao: phung: yao: jho" kho' mung: yao: cao: yao: gye kad' na: ru wa ai: mung"dan: wa byo; qeim: lo" byaug nae" ngad: ra".

²⁵Ug' khug' dalam: re: yao: cao: yao: jho" kho' mung: manug jho" mung: re wa ai: ug' khug' wa byo: sin" lo" byaug nae" ngad: ra".

²⁶Ai we' dakhyo: Satan wa Satan yao: cao: jho" kho' mung: gye kad' to" thug' li" re wa yao: wa maqo" gang" tang: jo, lo: thao" byaug nae" ngad: ra".

²⁷Qam: bo yaug re sao qhid' mataui" to: lo: khag' re: yao" yham khug khyo vao ye: mung: yao" zai re maye: qo" lhad' yu ngad: ra". Yao: re bin: taui" to: thao reza: yao" zai re yeqo" lhad' yu: ra".

²⁸Ngo naonhaung" re dang za: ta" ru wa- xao su byu qe wa yao: bam shad' lhoe" ra" qobo alhab' we' jung" ra" dao: aja: ja" qobo jham re khyad' pye' byid' ru qhug' ako".

²⁹Ngadqere: Gyang" Lho" Byo re jung" dao: ta" ra" yaug wa khonhae" re: qobo khyad' pye' byid: qhug' nae" mangad:- pe"mung:ga"re yao: wa apyad ato: qobo re shad' lhoe" yaug ngad: ra".

³⁰(Yesu ceru: ta" ru wa mo, byu qe damyo" yao: re makhyang" ra" yui bo: ra" ga: ta" geyang: ngad: ra".)

³¹Alao" Yesu yao: myhi" we' yao: nhaung: bam wa yham kheim: mae li" joe" ye; jo, mung:- byu dayaug re yao: re khai nhao: ke' ko" ra".

³²Yesu lhang" gam: mae zaung: jo; ra" mo,byu qe wa yao: re Ni" myhi" we' ni" nhaung:- ni" nhae: mo" bam yham kheim: mae nao re li" qho: na: ako" ga: ta" kyo" ako".

³³Yesu tau: mung:- nga" myhi" we' nga" nhaung: bam khobam ngad: ako" i? ga: ta" ra".

³⁴Amung: yao: wa- yao" lhang" gam: zaung: jo; ra" mo,byu qere gam: sho' qu" mung:- Qu" ge,- cebam wa nga" myhi" we' nga" nhaung: bam ngad va".

³⁵Pe"mung:ga"re Mao"So myid o: ra" khyo" cao" mo, khag' ngadqere: nga" myhi" we' nga" nhaung: nga" nhae: mo" bam ngad va"- ga: ta" ra".