Read Maru MARKU 4 Bible Online

MARKU 4 - Maru bible

MARKU 4

¹Ai: thao- Yesu wa Galile tham: yae mae dam: mho" shid' na: ra". Byu phung: mo" zang yao: jhao" zang" li" gelao" yao: wa tham: mae" lha dakhye' dao mae yevao: zaung jo; ra". Mo, byu qe wa tham: yae taung gaung mae na: jo; ako".

²Alao" yao: wa dao: tau" yang yao: bam re myo: sho' ja: mho" shid' byid: mung: ta" ru wa- Tae" gyo" qu" ge,-

³byu dayaug wa myug: shi: sin: nae" ga: yo khyo thug' ye" lo" ra".

⁴Yao: yesin" ke' ra" myug: shi: daqhae: wa khyodang mae gyo" lo" ako". Ai: myug: shi:jham re ngho' jham: yang li" gaug zo" pye' ko" ra".

⁵Daqhae: wa myid zhai: mathau: ra" laug qan" dao mae gyo" lo" ako". Myid zhai: mathau yang: aijao" yao: yaug: thug' li" geyang: re:-

⁶ba thaung: li" lao" lhe' mhai: pye' ru we' agyi: no, sho' maqo" cin" ruyang jhoe' byaug: ako".

⁷Daqhae: wa zau: bye, gyo: mae gyo" lo" ako". Zau: bye, jham yaug: qi" li" ru we' qhovo: pan jham re li" hab' pye' byid: mung: ashi: maqo" zaui: gengad: ra".

⁸Ngadqere: myug: shi: daqhae: wa myid gai mae gyo" lo" ako". Yaug: qi" li" mung: ashi: zaui" li" ko" ra". Daqhae: sam xe nho" daqhae: khyaug' xe nho" daqhae: dayo nho" myo" laug: lo: ako".

⁹Nokhye' de, mo, wa gyo" yu geshao:- ga: ta" ra".

¹⁰Yesu yao: za: ngad lao"- yao" dao: re the' gyo" ra" mo, mae" damyo" wa- mho"zo: daxe: shid' yaug we' daga" Yesu jhao" li" mung:- ai: dao: tau" jham re pheim: kyo: byid: nae" qhid' mae" mho' ako".

¹¹Ailao" yao: wa yao: bam re Mao"So: mung"dan: we' sin" ra" no; thao" ra" khyo pe" ngad: rure ba: gyo: nae" akhang" naonhaung" qhug' yu: avako". Ai: akhang" re maqhug' yu: ra" mo, kam" wa dao: tau" jham khyo" za: gyo" yu: ako". Pe"mung:ga"re

¹²Yao: bam wa Qu" ngadqere: mamyao- Gyo: ngadqere: maba: gyo: gengad: ra". Yao: bam myao mung: ba: gyo" yu ko" ngad: re wa Mao"So jhao" tug' lo: li" genae". Ailao" Mao"So wa yao: bam re qobo khyad' pye' byid: nae" ga: jham: mugsug' mae tung" to" ru we' dakhyo: ngad: ra"- ga: tau" ra".

¹³Ailao" Yesu wa Yao: bam re- Ce: dao: tau" re naonhaung" maba: gyo: ko" i? Airu: ngad: re dao: tau" alhab' re khoru: ba: gyo: genae" i?

¹⁴Myug:shi: sin: yaug wa ai: mungdao: re sin" ra".

¹⁵Byu damyo" wa khyodang mae gyo" lo" ra" myug: shi: jham we' dau: ako". Mao"So: mungdao: re the' gyo: lao" jao" Satan li" mung: yao: bam: nhag' lam: khug mae" ai: mungdao: re yu: pye' byid' ra".

¹⁶Gatau damyo" wa myid zhai: mathau: ra" laug qan" myid mae gyo" lo" ra" myug: shi: jham we' dau: ako". Ai: mungdao: re the' gyo: lao" jao" yao: bam ngaui bau" ru we' lham: khae: yu: ako".

¹⁷Ngadqere: ai: mungdao: wa yao: bam: nhag' lam: khug mae agyi: no, sho' maqo" cin" mung: myao" sho' maqo" zang: kham gengad: ra". Aimung dao" ra" mathao mae qug: khai" ru- mangad: lao" yhin" ru qhug' lo lao" phyad za: dam: phaug' lo" ko" ra".

¹⁸Amae" damyo" wa zau: bye, mae sin" ke' ra" myug: shi: jham we' dau: ako". Yao: bam wa ai: mungdao: re the' gyo" yu ngadqere:-

¹⁹Ce: mug: myid: byu na ban" qhid' mae" myid: qug: myid ci" ru- ngaui qhang jo,nho" mamyaung: masho: qo" nug: ru we' gatau aja: ja: re myo, no, o: byid: ra" ruyang ai: mungdao: re hab' pye' mung: ashi: maqo" zaui: gengad: ra".

²⁰Ngadqere: gatau damyo" wa myid gai re sin" ke' ra" myug: shi: jham we' dau: ako". Yao: bam wa ai: mungdao: re the' gyo: lao" khae: yu mung: daqhae: sam xe nho"- daqhae: khyaug' xe nho"- daqhae: dayo nho" ashi: zaui" li" ako"- ga: ta" ra".

²¹Yesu wa xo' mung: yao: bam re myikaug' re yao" tao" dao mae makai" to: lo: dao: khug maug: lhaung" to: nae"- mangad: lao" yab jaung: gyid' mae to" to: nae" qhid' mae" khoyaug lhaung" ci: li" ko" i?

²²Pe"mung:ga"re mamyao lo: sho' nyham" to" ra" ja: alhab' de: de: za: myao: thug' li" nae"- Nghoe' to" ra" ja: alhab' re: bung" lo: li" nae".

²³No: khye' de, mo, wa gyo" yu geshao: ga:- ta" ra".

²⁴Alao" yao: wa Naonhaung" the' gyo" ra" ja: re galho: za: tae" gyo" yu ge,- naonhaung" su re lag byid' ra" jao, lag: yang yao: Mao"So wa naonhaung" re dam: tug' lag byid' li" nae".

²⁵Pe"mung:ga"re qo" yaug re wa je: dam: laung: byid: shi: nae" ga: yao: bam re ta" ra".

²⁶Yesu wa xo' mung: Mao"So: mung"dan: wa ce we' dau: ra". Byu dayaug yao" yo mae gaug myug: ye sin" ke' to: mung:-

²⁷myi" re yab- na" lao" to"- dam: to" dam: yab mung: na: ra" gyo: mae ai: gaug shi: wa baug: thug' li" mung: yaug: qi" li" na: ra". Ngadqere: ai: gaug shi: khoru: yaug: qi" li" rure yao: maba ngad: ra".

²⁸Pe"mung:ga"re myid gaung wa yao: yao: za: ai: gaug gae re yaug: qi" li" nhao: ra". Sao qhid' agan"- ai: dao gaug nhae thug' li" nhao mung: thao re gaug nhae mae" ashi: zaui" li" nhao: ra".

²⁹Gaug mhang" lao"- yad yo, joe" va" rumung: yao: wa lagam" yang ye: yad: yu: ra"- ga: yao: bam re ta" ra".

³⁰Amung: Yesu wa Mao"So: mung"dan: re pe" ja: we' dao: tau" nae" i? Pe" ja" dao: tau" ci mung: ta" nae" i?

³¹Mao"So: mung"dan: wa ao: shi: jid' we' dau: ra". Ao: shi: wa sin" ke' au: myid gaung dao mae jo; ra" ashi: alhab' tho' je: ngai: thao" ra" ashi: ngadqere:-

³²Myid mae sin" ke' lao" yaug: qi" li" mung: gatau: ao: pho' vho' alhab' tho' je: qi" lu: li" ra". Akaung jham re: qi" byo: li" ru we' ai: aqab mae ngho' jham sad' li" sad' mung: qo" khug: na: ako".

³³Amung: Yesu wa yao: bam qo" ba: gyo" ra" dao: tau" jham khyo" yang za: ai:mungdao: re kho" kyo" ra".

³⁴Yao: bam yao: za: ngad lao"- Yesu wa yao" mho"zo: qere acao jab ta" pheim: kyo" ra".

³⁵Ai: ba re yao:- myi" thao joe" lao" Yesu wa yao" mho"zo: qere- Soge, ngonhaung" tham: thoete' khyo gau" de; lo" gelang:- ga: ta" ra".

³⁶Alao" yao: bam wa mo, byu qere to: co' mung: Yesu yao: zaung: jo, ra" lha dao mae yevao: zaung mung: gau" lo" ko" ra". Gatau: lha jham re: bobo: ako".

³⁷Ai: au: re la qam" mo" zang nyag din taung" hug' lo mung: bang: lhung" yang lha khug khyo qid lobe, vhao" ke' ra"- amung: lha khug mae qid alaug laug byang" lo: na: ra".

³⁸Yesu wa lha thao mae au: khau" dalam: khau" mung: yab; jo; ra". Mho"zo: qe wa yao: re nhug' mung: Mho" Pho" we"- ngonhaung" nab: shid: lo" na: rure nao pe" shui manho: i? ga: yao: re ta" ako".

³⁹Yesu wa yab jo, rumae" to" li" mung: la qam" re Sae za: na wa,- ga: amyin" byid' ra"- bang: lhung" rere: Tae" lo" wa,- ga: ta" ke' ra". Alao" la qam" thang: lo" mung: bang: lhung" re: tae" lo" byaug: ra".

⁴⁰Alao" Yesu wa yao" mho"zo: qere- Naonhaung" pe"mung: ai: qhi" taung" gyaug ko" i? Naonhaung" ana" joe" sho' lam khug: myid mabo shi: ge, i? ga: ta" ra".

⁴¹Yao: bam kam" wa gyai gyaug: din: pye' ako". Amung:- ceyaug wa pe" ru" byu ngad: i? La qam" we' bang: lhung" lhao" yao" dao: re tae" gyo: ko" ra" ga: yao: cao: jho" ta" ako".