Read Maru MARKU 5 Bible Online

MARKU 5 - Maru bible

MARKU 5

¹Yesu we' yao" mho"zo: qe wa Galile" tham: thoete' mae" Gerasa mang: khyo joe" ye" ako".

²Yesu lha khug mae" thug' lo lao" jao" makhyang" ra" byo zaung: ra" byu dayaug lab bug mae" thug' li" mung: yao: re li" qhug' ra".

³Ai: yaug wa lab jham: agyo: mae na: ra". Yao: re khag' re: maqo" taui: gengad: ako". Jao co: taui" yang lhao" re: maqo" taui" to: ngad: ra".

⁴Pe"mung:ga"re yao: re myo: sho' lhang kyam: vhe' mung: jao co: taui" yang re: taui" to" qu" vako" ra"- ngadqere: lhang khao: ngo" jao co: taui: re lao" phyid' pye' mung: kyam: rere: lao" kho' sin" pye' ra". Amung: yao: re khag' re: maqo" zaui: gengad: ra".

⁵Yao: wa myi" re: na" re: lab jham: agyo: mae we' bam khaung: mae hug' du" qin" mung: laug baui re yao: yao" gaung deim" thaung" cad' ci yang: na: ra".

⁶Yao: wa va: mae" Yesu re lham: myao lao" tao" ye: mung:- yao: re goe; pa" ra".

⁷Amung: yao: wa- Myhao: thao" ra" Mao"So: yao: zo: Yesu we"- nao we' ngo pe" jho" sin" i? Ngo re mayhin" vashao:- Mao"So re jham tang: yang: mho' ra"- ga: zag: hug' ra".

⁸Yao: airu: hug' ta" ru wa- makhyang" ra" byo we"- byu ceyaug mae" phao: thug' lo" se, ga:- Yesu amyin" byid' ke' mung: ngad: ra".

⁹Yesu wa yao: re- Ni" mang pe" ngad: i? ga: myid' ra". Alao" yao: wa- Ngonhaung" phung: mo" zang ngad: ruyang nga" mang wa Legio ngad: ga: tau" ra".

¹⁰Yao: wa Yesu re- ai: mang: mae" yao: bam re makhe' thug' pye' nae" qhid' mae" gyai ga: mho' ra".

¹¹Ana" ai: bug gaung khyid cao" mung: vo, jham mo" dajham bad zo" na: ako".

¹²Makhyang" ra" byo jham wa Yesu re- Ngonhaung" vo, jham: khug mae yevao: zaung nae" qhid' mae" vo, jham na: khyo nhao: ke' la, ga: mho' ako".

¹³Yesu wa yao: bam re akhang" byid' ke' ra". Makhyang" ra" byo jham wa ai: yaug khug mae" phao: thug' lo" mung: vo, jham: khug mae yevao: zaung: ako". Alao" shid' taung ko bo: ra" vo, jham alhab' wa dang" kam" nhad' mae" qid tham: khug khyo tao" byae: gyo" vao: lo" gemung: nab: shid: pye' ako".

¹⁴Vo, zam: mo, wa tao" phao: lo" mung: ai: khyo re vomo" khug mae re:- seyo: vogaung: jham: khyo re joe" sho' ta" hau" ke' ako". Alao" mo,byu qe wa boe" lai: lo va" khyo re qu" nae" qhid' mae" ai: jo, qo khyo thug' ye" lo" ako".

¹⁵Yao: bam Yesu jhao" joe" lao"- qhid' phyao: makhyang" byo Legio zaung: ra" yaug wa mai bau: nyang" za: ve, yang: nhag' gyang: gyang: za: zaung: jo; rure yemyao ge mung: yao: bam gyaug: byaug; ako".

¹⁶Aimung: ai: khyo re the' myao: ra" mo, wa makhyang" ra" byo zaung: ra" yaug we' vo, jham khoru: boe" lai: lo: ra" khyo mo, byu qere lham: ta" kyo" ako".

¹⁷Alao" yao: bam wa Yesu re yao: bam: mung" mae" thug' lo" nae" qhid' mae" mho' ako".

¹⁸Yesu lha khug khyo vao lo" na: au: qhid' phyao: makhyang" ra" byo zaung: ra" yaug wa Yesu jhao" yao: re: cao nae" qhid' mae" mho' ra".

¹⁹Ngadqere: Yesu yao: re akhang" mabyid: lo:- ni" yham khyo phao: lo" mung: yham byu qe we' ba nam qere Asang wa nao re khoqhi" nhag' khyag' yang: bao" thaug' va" khyo re lo" ta" kyo: wa,- ga: ta" ra".

²⁰Alao" yao: wa thug' lo" mung: Yesu yao: re khoqhi" bao" thaug' byid: va" khyo re Dekapoli mang: jao: sho' ta" hau" lo" ra". Aire the' gyo: mo, alhab' re: gyo" mug' ako".

²¹Thao re Yesu wa lha khyo" tham: thoete' khyo dam: gau" de; lo" ra". Alao" tham: yae mae byu phung: mo" zang yao" lhang" gam: mae li" zang" phaung: na: ako". Yesu wa tham: yae mae na: jo; ra".

²²Alao" Yairu ga: mang: ra" Tarha" Jung yham agyi dayaug joe" li" mung: Yesu re myao lao"- yao" khyid qao: mae goe, mung:-

²³nga" zo: myiqe: nau" shid: lo" na va"- yao: no gai: lo mung: daui: na nae" qhid' mae" yao" dao mae ni" lo, li" kai: byid: la,- ga: yao: re gyai ga: li" mho' ra".

²⁴Yesu wa Yairu we' daga" cao" ye" lo" ra". Mo, byu phung: mo" zang yao" thao cao" gemung: Yesu re the' jhin" zao" ako".

²⁵Ai: mae daxe: shid' zin sa: sheim no no: ra" myiqe: dayaug re: bobo: ra".

²⁶Mocid' sara myo: sho' yang ya: qu" vako" ra". Yao: qo" ra" gu: alhab' gan sho' yang ya ngadqere: no gai: li" khyo majo,- je: za: no: li" ra".

²⁷Yao: wa Yesu khyo re the' gyo" qu" va" rumung:-

²⁸mo, phaung khyo ye: mung: Yesu nhaung thao"mae yeye; jo, yang:- ngo wa yao" mai bau: re khalhao" yeqo" tin" ke' ngad: re wa nga" no gai: lo" li" nae"- ga: ta" ra".

²⁹Airumung: Yesu mai bau: mae yao" lo; yang yetin" ke' ra"- ailao" jao" yao: sa: sheim: ru dam: lo" byaug: ru we' yao" no gai: lo" byaug va" rure beim" ra".

³⁰Yesu wa yao" khug mae" qam: so' thug' lo" va" rure aijao" ba: ruyang mo, byu qe: shad' khyo lhang: qu" mung:- nga" mai bau: re khag' li" the' tin: ko" i? ga: myid' ra".

³¹Yao" mho"zo: qe wa- Mo, byu qe nao re the' jhin" zao" na: rure nao myao: na gau- ngore khag' li" the' tin: ko" i? ein: pe"mung: myid' i? ga: yao: re tau" ako".

³²Ngadqere: Yesu wa yao: re the' tin: yaug khag' ngad: rure myao nae" qhid' mae" gam: sho' lhang: qu" na: ra".

³³Ai: myiqe: kam" wa yao: mae boe" lo va" khyo re ba beim: yang: gyaug: nin" ru we' Yesu qhid' kheim: mae goe, mung: ngad dang: ra" khyo alhab' yao: re ta" kyo" ra".

³⁴Amung: Yesu wa yao: re- Nga" myiqe: zo: we"- ni" lam khug: myid: yang nao re gai byid: va"- Yaug yo za: lo" se,- ni" no gai: shao: lo" vashao:- ga: ta" ra".

³⁵Airu: ta" na shi" au: Yairu yham mae" mo, joe" li" mung: Ni" myiqe: zo: shid: ava"- Mho" Pho" re pe" aqug: akhai: cekad' na shi" i? ga: ta" ako".

³⁶Ngadqere: yao: bam ta" rure Yesu the' gyo: lao" Yairu re- Dagaung yug wa, lam za: lam wa, ga: yao: re ta" ra".

³⁷Alao" Petru- Yaku we' Yaku yao: nhaung: Yohan mae" je yang: gatau khag' rere: yao: we' daga" macao" nhao ngad: ra".

³⁸Yairu yham mae joe" lao" mo, thaui: mo, yaug mung: gyai kaug' ngug: yhau: na ko" rure myao: ra".

³⁹Alao" yao: wa yham khug khyo vao ye: mung: yao: bam re- Naonhaung" pe"mung: mo, thaui" mo, yaug ngug: yhau: na ko" i? Zomyi: zo: wa shid: ru mangad:- yab: myhid' jo; ru angad: ra"- ga: ta" ra".

⁴⁰Yao: bam wa yao: re qi: jung" pye' byid' ako". Alao" Yesu wa yao: bam re taung gaung khyo nhao: thug' pye' mung: zomyi: zo" nho: yao: pho" yao: myhi" we' yao" mho"zo: sam yaug re jhui: mung: ai: zomyi: zo: lang" jo; ra" qe, khyo vao ye" lo" ra".

⁴¹Yao: wa ai: zomyi: zo" nho: lo, re zaui: mung:- Talitha koum ga: ta" ra". Aiwa Zomyi: zo: we"- nao re ngo ta" li"- To" wa,- ga" ru ngad: ra".

⁴²Ailao" jao"- zomyi: zo: wa to" li" mung: su" lo" ra". Yao" apyad wa daxe: shid' zin ngad: ra". Yao: bam wa gyai mug' byaug: ako".

⁴³Ngadqere: Yesu wa cekhyo we' sin: yang: naonhaung" khag' rere: data" kyo: ge, ga:- yao: bam re zug' nhao mung: zomyi: zo: re zo:ve daja: ja: byid' zho: gese,- ga: ta" ra".