Read Maru MARKU 6 Bible Online

MARKU 6 - Maru bible

MARKU 6

¹Ailao" Yesu wa yao" mho"zo: qe we' daga" ai: jo, qo mae" thug' lo" mung: yao" yham mug: khyo joe" lo: ra".

²Dugno: Ba joe" lao" yao: wa Tarha" Jung Yham mae byu myo: sho' mo, re mho" shid' byid' ra". Yao" mho" dao: re the' gyo" ra" mo, alhab' gyo" mug' ako". Ailao" yao: bam wa- Ceyaug khokhyi" mae" ce: pha,jhi" re ba: yu: laug i? Yao: ba: yu: ra" pha,jhi" wa pe" ja" pha,jhi" ngad: i? Mug' pho: mau" jham re yao: khoru: qo" zaui" i?

³Yao: wa Mari yao: zo:- Yaku- Yoseb- Yuda we' Simon tao ho' yao: mao: lagsama" mangad: i? Yao: nhae: mo" bam: re: cemae nyhao: we' daga" na: bam: ru mangad: i? ga: ta" ako". Airumung: yao: bam wa yao: re ngag: pye' ako".

⁴Yesu wa yao: bam re- Lapa wa yao" mug:- ba nam ug zo: we' yao" ug' khug' mae" je yang: khyi" khao: ngo" mae myo, nho qo" ra"- ga: ta" ra".

⁵Yao: wa no phyo: dajhid' dathao qhug' ra" mo, re lo, kai: yang: gai byid' rumae" je yang: ai: vo mae mug' pho: mau" pe" re: maqo" zaui: ngad: ra".

⁶Yesu wa mo,byu qe lam khug: myid mabo ko" ruyang gyai myid: mug' ra".

⁷Alao" Yesu wa ai: lhang" gam: mae" vogaung: jham khyo ye: mung: mo, byu qere yemho" shid' byid' ra". Yao: wa mho"zo: daxe: shid' yaug re yao: jhao" khai: yu mung: shid' zo: dazam" zam" zham" mung: nhao: ke' ra". Makhyang" ra" byo jham re aung doe, nae" kheim: so' re: yao: bam re byid' ke' ra".

⁸Yesu wa yao: bam re- Gyaung: khyo qhid' mae" zaung: bao" mae" je yang: zokho- thaung a: we' naonhaung" phyid' cui: mae ngaui davin ge,-

⁹khyid zhaung: kam" wa zhaung: ge,- ngadqere: bau: shid' khye' dapaug' ve, ge,-

¹⁰naonhaung" re bang" lham: tug: yu: ra" vo mae" yham khoyham mae ngadqere ai: vo mae" dam: thug' lo" yo, joe" sho' aiyham mae thang: na ge,-

¹¹Davo vo mae" mo, naonhaung" re bang" malham: tug: yu lo:- naonhaung" kho" kyo" ra" dao: re malham: tae" gyo: ko" ngad: re wa ai: jo, qo mae" thug' lo" ge,- aimae" thug' lo" au: re yao: bam: shad' mae sagse: boe" nae" qhid' mae" naonhaung" khuvo: mae" phalhug jham re ko: khyo" to: co' ge,- ga: re: ta" ra".

¹²Ailao" yao: bam thug' ye" lo" mung: mo,byu qere myid tha" nae" qhid' mae" cao" kho" kyo" ako".

¹³Yao: bam wa yui myo: sho' khe' thug' pye' byid' ru we' no phyo: qhug' mo, myo: sho' re xau gyad byid: yang: nyhang" gai byid' ako".

¹⁴Ana" Yesu khyo alhab' re kho: kham Herod the' gyo" ra". Pe"mung:ga"re Yesu mang wa khyi" khao: ngo" mae suhau: qi" lo: na: ra". Byu damyo" wa Yesu re qid nyhab' byid: yaug Yohan dam: daui: li" ru ngad: ra". Aimung: mug' pho: mau" zaui: nae" ceru" ra" qam: so' qo" ru ngad: ra" ga: ta" ako".

¹⁵Ngadqere: gatau damyo" wa Yesu wa Elia ngad: ra"- ga: ta" mung: damyo" wa daba: pyad mae" lapa qe we' dau: ra" lapa dayaug ngad: ra"- ga: ta" ako".

¹⁶Herod aire the' gyo: lao"- ceyaug wa ngoyang au: phyid' pye' byid' ra" qid nyhab' Yohan dam: daui: li" ru ngad: ra"- ga: ta" ra".

¹⁷Herod wa yao: nhaung: Philib yham sang myhi" Herodia re lhad' ngho" ra" mathao mae Yohan re thaung: lhaung" nae" amyin" byid: mung: thaung: khug mae taui" to" ra".

¹⁸Pe"mung:ga"re Yohan wa Herod re- Ni" nhaung" nho: yham sang myhi" re lhad' yu nae" magai maang ngad: ra"- ga: gyai qeim: ra".

¹⁹Airumung: Herodia wa Yohan re manug yang: se' pye' nug ngadqere: Herod mathao mae khoru: maqo" se' pye' ngad: ra".

²⁰Pe"mung:ga"re Yohan wa din:man" ru we' gyang" lho" ra" byu dayaug ngad: rure Herod ba mung: yao: re gyaug phug' ru we' qu" gam byid' ra". Yohan: mungdao: re the' gyo: khao: ngo" yao" nhag' lam: mae qi: sho' nhag' lam: mamyan ngadqere: yao" mungdao: re ngaui bau: taung" za: tae" gyo: nug: ra".

²¹Herodia wa Herod kho:kham khau: ra" ba na joe" lao"- yao: myid: to" ru kad' nae" ayo, gai the' yu: ra". Khorumung: ga" re Herod wa yao: khau: ra" ba na mae Galile mang: mae" au: she mo, au: jhaung qe- lau: de, qe- mung" zug: qe we' yao" gyezug: qere khai mung: myi" xeim zo: poe da" byid' ra".

²²Ai: myi" xeim zo: poe mae Herodia yao: zo: zomyi: nau" wa zozo: poe khyo vao li" mung: li" go" nhan" qhu" ra". Airu re Herod we' yao" bang" vo qe qu" ngaui: ako". Amung: kho: kham wa myiqe: nau" re- Nao o: ra" ja: ngore mho' la,- ngo nao re byid: nae".

²³Nao ngore mho' ra" gu: nga" mung"dan: agaung: daqi" joe" sho' ngo nao re byid: nae" ga: jham tang: yang: ta" ra".

²⁴Ailao" myiqe: nau" wa thug' lo" mung: yao: myhi" re- ngo pe" ja: mho' yu nae" laug i? ga: myid' ra". Yao: myhi" wa qid nyhab' Yohan: au: re mho' yu wa,- ga: tau" ra".

²⁵Ailao" jao" myiqe: nau" wa hin hin za: kho:kham jhao" dam: tug' vao lo mung: qid nyhab' Yohan: nho: au: re ban mae ke' yang: ana" yao: ngore byid: nae" rure ngo o: ra" ga: mho' ra".

²⁶Kho:kham pho" gyai nhag' lam: mangaui bau: boe" pye' ra". Ngadqere: yao" bang" vo qe: qhid' kheim: mae jham tang: yang: ta" pye' va" dao" yang myiqe: nau" mho' rure maqo" ha: pye' ngad: ra".

²⁷Amung: yao: wa ai lao" jao" gug: gam gyezo: dayaug re Yohan: nho: au: re cilo nae" amyin" we' daga" nhao: ke' ra". Gyezo: pho" wa thaung: khyo ye: mung: Yohan: au: re yephyid' ra".

²⁸Ai: au: lam: re ban dao mae kai" cilo mung: myiqe: nau" re lobyid' ra". Myiqe: nau" re: yao: myhi" re lo" kai" byid' ra".

²⁹Yohan: nho: mho"zo: qe cekhyo re the' gyo: gelao"- yao: bam li" mung: yao" mao gaung re li" gaug: nyhab' pye' ako".

³⁰Ai: thao lagyo: qe wa Yesu jhao" dam: tug' lo mung: yao: bam zaui" lo: ra" mau" zo" we' mho" shid' byid' ra" khyo bin sho' yao: re lota" kyo" ako".

³¹Mo,byu qe myo: sho' ye: ye: lo lo abang mabyid gemung: Yesu we' yao" mho"zo: qe wa zo zo: ayo, lhao" re: maqo" gengad: ra". Amung: Yesu wa yao" mho"zo: qere- Cae: tae" ra" jo, qo dakhyo khyo ye: mung: nyhao: nhaung" yao: za: dazab zo: yeno" yu gelang:- ga: ta" ra".

³²Amung: yao: bam wa cae: tae" ra" dajo, qo khyo lha khyo" gau" de; ye" lo" ako".

³³Ngadqere: mo,byu qe myo: sho' mo, wa yao: bam thug' ye" lo" rure cao" myao: ke' ru we' Yesu we' yao" mho"zo: qe ngad: rure qu" se" ke' ako". Airumung: vo khao: ngo" mae" mo, byu qe wa khyid khyo" gau: qhid' khae" yang: tao" ye" lo" mung: Yesu we' yao" mho"zo: qe: qhid' mae yejoe" na: jo; ako".

³⁴Yesu lha khug mae" thug' li" lao"- yao: wa byu phung: mo" re myao: ra". Zaung" yaug mabo: ra" yao phung: we' dau gemung: Yesu wa yao: bam re nhag' qu" khyag' ra". Amung: yao: wa yao: bam re myo: sho' ja: mho" byid' ra".

³⁵Ba vao: lo" na lao" Yesu nho: mho"zo: qe wa yao: jhao" lo mung: cejo, qo wa din pyad' yo ngad: ru we' ba re: vao: lo" na: ava".

³⁶Zo: ve daja: ja: yevai zo: genae" qhid' mae" yao: bam re avai: ayae mae" vogaung: jham khyo ye: nhao: ke' wa,- ga: yao: re ta" ako".

³⁷Yesu wa naonhaung" yao:- yao: bam re zo: nae" daja: ja: byid: ge, ga: yao: bam re ta" ra". Ailao" yao" mho"zo: qe wa ngonhaung" ngaui shid' yo kye' phug' mae" mug yevai mung: yao: bam re byid: zho: zai i? ga: myid' ako".

³⁸Yesu wa Naonhaung" mug khonho" qo" ko? Yequ" qu" ge,- ga: yao: bam re ta" ra". Yao: bam yeqho: myao gelao"- mug ngo" khai" we' ngo: shid' dau:- ga: yao: re ta" ako".

³⁹Ailao" Yesu wa mo,byu qe alhab' re kho' mung: vohau: yo mae azhan zhan zaung nhao nae" qhid' mae" yao" mho"zo: qere ta" ra".

⁴⁰Amung: mo, byu qe wa dazhan re dayo- dazhan re ngo" xe jin mung: zaung: jo; ako".

⁴¹Yesu wa ai: mug ngo" khai" we' ngo: shid' dau: re bin: yu: yu lao" mug:gaung khyo qu" mung: Mao"So re jeju caung: byid' ra". Yao: wa mug re khyoe' phai" mung: mo, byu qere gae byid: nae" qhid' mae" yao" mho"zo: qere byid' ke' ra". Amae" Yesu wa ngo: shid' dau: rere: yao: bam re kho' byid' ra".

⁴²Yaug khao: ngo" gyi: sho' zo" ako".

⁴³Ai: thao mho"zo: qe wa dang: ra" ngo: we' mug aje, aman" jham daxe: shid' gyan byang" sho' gaug: zhang: yu: ako".

⁴⁴Mug zo: mo, yauggai qe ngo" taung ko ngad: ako".

⁴⁵Yesu wa mo,byu qere nhao: ke' zo" re" yao" mho"zo: qere lha dao do; zaung yang: tham: thoete' mae" Betsaida vogaung: khyo gau" de; ye" lo" na genae" qhid' mae" nhao: ke' ra".

⁴⁶Mo, byu qere bin: au" ke' thao re Yesu wa akyu" mho' nae" qhid' mae" bug gaung khyo do, ye" lo" ra".

⁴⁷Myi" thao joe" lao" mho"zo: qe zaung: ra" lha wa tham: gaung: mae gau" ye" lo" na: ako". Yesu wa yao: za: taung gaung mae na: jo; ra".

⁴⁸Yesu wa la mayo" mung:- la lham: deim" thaug' ruyang yao" mho"zo: qe lha gau" qug' na ko" rure the' myao lao"- ne, kao mug: bo" zo" re qid dao khyo" yao: bam jhao" su" ye" lo" ra". Yesu wa yao: bam: nhae khyo" su" lai: lo" nae" seim" ra".

⁴⁹Yao: bam kam" wa qid dao mae Yesu khyo su" na: rure myao gelao"- subyo ngad: ga: jho mung: gyi: hug' ako".

⁵⁰Yesu re myao lao" yao: bam gyai gyaug: pye' ko" ra". Ailao" jao" Yesu wa yao: bam re jhau mung:- Dagyaug ge,- ngo angad:- ga: ta" ra".

⁵¹Yesu wa yao: bam zaung: jo, ko" ra" lha dao khyo do; vao ye" lo" ra". Alao" la wa tae" lo" byaug: ra". Yao" mho"zo: qe wa matho' ta" losho' mug' byaug: ako".

⁵²Pe"mung:ga"re byu ngo" taung re mug zho" ra" mug' pho: mau" zo" lajheim: re yao: bam maba: gyo: geyang: ngad: ra". Yao: bam: myid wa aire maqo" khae: yu ngad: ako".

⁵³Yesu we' yao" mho"zo: qe wa tham: thoete' khyo gau" ye" lo" ko" ra". Genesared khyo joe" lao" yethang mung: lha re aimae taui" to" ako".

⁵⁴Lha khug mae" yao: bam thug' li" lao" jao" mo, byu qe wa Yesu re qu" xam: gemung:-

⁵⁵Yao: bam wa avai: ayae mung" geim" jao: sho' tao" ye" lo" mung: no phyo: qhug' ra" mo, re yab myhung: phaung: thin we' zung geim" Yesu na thoe the' gyo" ra" jo, qo khao: ngo" khyo dao: li" ako".

⁵⁶Yesu vao ye" ra" vozo: vozang khao: ngo" mae" hau" mo" cao" yang: mo, byu qe wa no phyo: qo" ra" mo, re li" jhui" lhang" to: mung: no mo, re yao" bau: thao mae khalhao" the' tin: nhao nae" qhid' mae" mho' ako". Yao" bau: thao re qo" tin" yu: ra" mo, alhab' wa no phyo: gai: shao: lo" byaug: ako".