Read Maru MARKU 7 Bible Online

MARKU 7 - Maru bible

MARKU 7

¹Ailao" Pharishe qe we' Yerusalem mae" do, lo: ra" Tung" Pho" qe daqhae: wa Yesu jhao" zang" li" ko" ra".

²Yao: bam wa Yesu nho: mho"zo: qe damyo" macid' san: pye' lo:- masan: ra" lo; yang zozo" na ko" rure the' myao: ako".

³Pe"mung:ga"re Pharishe qe we' Yuda byumyu" alhab' wa daba: mae" phug' phyid' thung" li re cao" mung: lo, shi" macid' san: pye' lo: zo:ve khonhae" re: mazo" qu" gengad: ra".

⁴Amung: gai mae" vai: cilo: ra" ja: alhab' rere: sao qhid' macid' san: pye' lo: yao: bam mazo" qu" ko" ngad: ra". Aimae" gatau keim kang: ug' we' gyid: khug' jham re cid' san: ra" thung" li" myo: sho' ja: rere: cao" ako".

⁵Pharishe qe we' Tung" Pho" qe wa Yesu re- Ni" mho"zo: qe wa phug' phyid' thung" li re macao" lo: masan masin" ra" lo; yang zozo" na ko" ra" i? ga: myid' ako".

⁶Yesu wa yao: bam re tau: mung:- naonhaung" khyo re Lapa Esaia tung" to" ru khoqhi" dang: ra" i? Naonhaung" wa geim kad' mo, ngad: ako". Esaia wa yao" lapa dao: mae byu cemyu" wa yao: bam: nhad' qid: yang za: ngore phug' myao" ako". Yao: bam: nhag' lam: kam" wa ngo we' gyai va" kyo: na: ako".

⁷Yao: bam wa byu: mho" dao: jham reza: mho" shid' byid' na gemung: yao: bam wa aje mae goe; pa" na ko" ra" ga: tung" to" ru we' dakhyo: ngad: ra".

⁸Naonhaung" wa Mao"So: amyin" dao: jham re to" pye' co' mung: byu: thung" li jham reza: phug' cao" na: ako"- ga: ta" ra".

⁹Xo' mung: Yesu wa naonhaung" wa naonhaung" thung" li re qo" phug' cao" nae" qhid' mae" Mao"So: amyin" dao: jham re gyai shab shab za: ngag: shapye' vako" ra".

¹⁰Pe"mung:ga"re Moshe wa Ni" myhi" ni" pho" re phug' myao: wa,- yao: myhi" yao: pho" re magai: ra" dao: jhau: ra" yaug khag' ngadqere: dang dang yao: shid' ca" ga:- amyin" byid' to" ra".

¹¹Ngadqere: naonhaung" wa byu dayaug yaug yao: pho" mangad: lao"- yao: myhi" re bao" thaug' nae" daja: ja: qo" ngadqere: aire Mao"So re byid' to: va" jhaung qhu" Koban- ngad: ga: ta" re wa

¹²yao: wa yao: pho" mangad: lao"- yao: myhi" re khau maca" ga: naonhaung" mho" byid' ako".

¹³Ceru: naonhaung" phug' phyid' thung" li" re naonhaung" lo, dai" mho" byid' gyo" lo ko" ruyang Mao"So: mungdao: re kyae" khyo" pye' ako". Ceru" ru gatau myo: sho' ja: re: naonhaung" kad' ako"- ga: ta" ra".

¹⁴Alao" Yesu wa mo, byu qere yao: jhao" dam: khai: yu mung: yao: bam re Naonhaung" alhab' nga" dao: re tae" gyo" yu mung: ba: gyo" yu ge,-

¹⁵Taung gaung mae" byu: aung khug khyo vao lo: ra" ja: pe" ja" yang ngadqere: byu re masan masin" maqo" boe" nhao ngad: ra". Byu: aung khug mae" thug' li" ra" ja" yang kam" wa byu re masan masin" qo" boe" nhao: ra".

¹⁶Airumung: naonhaung" no: de, ko' re wa tae" gyo: ge,- ga: ta" ra"

¹⁷Yesu wa mo, byu qere nha: to: co' mung: yham khug khyo joe" vao lo" lao"- yao" mho"zo: qe wa ai: dao: tau" lajheim: re sho' kyo: nae" qhid' mae" mho' ako".

¹⁸Alao" yao: wa yao: bam re- Naonhaung" re: maba: gyo: shi: genhaung i? Taung gaung mae" byu: aung khug khyo vao lo: ra" ja: pe" re: nhag' lam: khug khyo vao lo: ru mangad:- vae: dug: am phae: khug khyo vao lo" mung: ngha ye: jo, qo khyo dam: thug' lo" ra".

¹⁹Airumung: taung gaung mae" byu: aung khug khyo vao lo: ra" ja: pe" yang ngadqere: byu re masan masin" maqo" boe" nhao: rure naonhaung" maba ko" i? ga: ta" ra". (Yesu ceru: ta" ru wa zo:ve alhab' zo: gai: ga" rure sho' kyo" ru ngad: ra".)

²⁰Xo' mung: Yesu wa byu: aung khug mae" thug' li" ra" ja" yang byu re masan masin" boe" nhao: ra".

²¹Pe"mung:ga"re byu: aung khug nhag' lam: mae" makhyang: mashab: ra" mau" zo" kad' nae" myid: yaung: thug' li" ra"- seim lai qho: ru- su: zai khug' ru-

²²byu se' ru- myi: shad' lao shad' ru- ju" phyo' ru- shab' mhin: ru- myid nug' ru- gaui mho: ru- nga: kad' ru we' go: joe; ru jham thug' li" ra".

²³Ce: makhyang: mashab'- ra" ja: alhab' wa byu: aung khug mae" thug' li" mung: byu re masan masin" boe" nhao: ra"- ga: ta" ra".

²⁴Alao" Yesu wa ai: jo, qo mae" to" lo" mung: Ture mang: khyo ye" lo" ra". Yao: wa yham dayham mae yethang: na: ra". Ai: rure khag' rere: maba nhao nug ngad: ra". Ngadqere: yao: maqo" vho' na ngad: ra".

²⁵Yao: zo: myiqe: nau" re makhyang" ra" byo vao: jaung" ra" myiqe: myhi" dayaug wa Yesu li" joe" na: rure the' gyo: we' li" mung: Yesu khyid qao: mae li" goe; ra".

²⁶Ai: myiqe: myhi" wa taung bug amyu" ngad mung: Suri Phoenikia mang: byu ngad: ra". Yao: wa Yesu re yao" myiqe: zo" khug mae" ai: yui re khe' thug' pye' byid: nae" mho' ra".

²⁷Yesu wa yao: re zoshao qere shi" sao qhid' gyi: sho' zho: ca"- pe"mung:ga"re- zoshao qe: vae: re yu mung: lakha: jham re pye' byid: nae" magai ngad: ra"- ga: ta" ra".

²⁸Myiqe: myhi" wa- Ngad va" Asang we"- Lakha: jham lhao" vae: zo: jaung: gyid' mae" zoshao qe: zosheim jham qo" zo" ako"- ga: Yesu re tau" ra".

²⁹Yesu wa myiqe: myhi" re- Nao airu: ta" ruyang yham khyo tug' lo" se,- ai: yui wa ni" myiqe: zo: mae" phao: thug' lo" ava"- ga: ta" ra".

³⁰Yao: yham khyo joe" lo" re yui wa yao: zo: mae" phao: thug' lo" byaug mung: yao: zo: wa yab jaung: dao mae lang" jo; rure lo" myao: ra".

³¹Alao" Yesu wa Ture mang: mae" dam: tug' lo" au:- Sidon mang: re lai: to: co' mung: Dekapoli mang: gaung: khyo" Galile tham: khyo joe" ye" lo" ra".

³²Byu damyo" wa nojid: ru we' myan" maboe" ra" nhad' jid dayaug re Yesu jhao" jhui" li" mung: yao" dao mae lo, kai: byid: nae" qhid' mae" mho' ako".

³³Yesu wa mo, phaung mae" yao: re za: gatau dajheim khyo jhui" thug' lo" mung: aiyaug: nokhyaung khug khyo yao" lo, nyhug' thug' zaui byid' ra".

³⁴Khota: phoe" yu mung: aiyaug: sho re tin: byid' ru we' mug:gaung khyo tau: qu" mung: so' mo" she yang: aiyaug re Ephata ga: ta" ra". Aiwa bung" lo wa, ga" ru ngad: ra".

³⁵Ailao" jao" yao" nokhye' bung" lo: ru we' shotaui: beim: lo" byaug mung: yao: wa dao: boe" boe" za: jhau: ra".

³⁶Yesu wa ai: khyo re khag' rere: mata" kyo: nae" qhid' mae" mo, byu qere zug' nhao: ra". Ngadqere: yao: bam wa yao: je: zug' nhao re je: aire je yang: hau" lo" ako".

³⁷Aire the' gyo" ra" mo, alhab' matho' mho losho' gyo" mug' pye' ru we' yao: wa ja: khao: ngo" re shab shab za: kad' ra". Nojid mo, re no: gyo: nhao mung:- nhad' jid mo, re gai: jhau nhao: ra"- ga: ta" ako".