Read Maru MARKU 9 Bible Online

MARKU 9 - Maru bible

MARKU 9

¹Ailao" Yesu wa yao: bam re- ngo naonhaung" re ta" ru wa Mao"So: mung"dan: wa qam: so' we' joe" li" rure mathe' myao myao wa cemae na: jo; ra" mo, mae" damyo" mashid genae"- ga: ta" ra".

²Ai: thao khyaug' ba re- Yesu wa Petru- Yaku we' Yohan bam re za: gathaung: san bam myhao khyo jhui" do, lo" ra". Yao: bam: qhid' kheim: mae yao: Yesu wa ve, bao tha" lo" ra".

³Yao" mai bau: bao: li" ru we' bao: bao: phyu: li" ra". Myid gaung dao mae" mai bau: zab zo: mo, khag' re: ai qhi" bao: bao: phyu sho' maqo" cid' phyu gengad: ra".

⁴Amung: yao: bam: qhid' kheim: mae Moshe we' Elia thug' li" mung: Yesu we' jho" jhau: na: ako".

⁵Ailao" Petru wa Yesu re Asang we"- ngonhaung" cejo, qo mae na: re gai: ra". Asang: qhid' mae" zaung dazaung- Moshe qhid' mae" dazaung Elia qhid' mae" dazaung- zaung sam lam: ngonhaung" re kad' nhao la,- ga: ta" ra".

⁶Pe"mung:ga"re yao: bam gyai gyaug: pye' ruyang pe" ta" nae" ru maba lo: ta" ke' ru ngad: ra".

⁷Ai: thao re jham dathaui: thug' li" mung: yao: bam re losham: nghoe' ra". Jham thaui: khug mae"- ceyaug wa ngo jhid'de; ra" nga" zo: ngad:- yao" dao: re tae" gyo: ge, ga: thoe jhau: thug' li" ra".

⁸Alao" yao: bam wa avai: ayae khyo nyag din taung" qu" ke' ako". ngadqere: Yesu mae" je yang: gatau khag' rere: mathe' myao lo: gengad: ra".

⁹Ai: bam mae" yao: bam dam: tug' gyo" lo: na: au: Yesu wa mho"zo: qere Byu: Yao: Zo: shid: rumae" madam: daui: to" li" li" wa naonhaung" the' myao: ra" khyo re khag' rere: data" kyo: ge,- ga: zug' nhao: ra".

¹⁰Yao: bam wa Yesu amyin" dao: re phug' cao" gengadqere: shid: rumae" dam: daui: to" li" ga" ru wa pe" ga" ru ngad: i? ga: yao: bam yao: cao: jho" ta" qham: na: ako".

¹¹Alao" yao: bam wa Yesu re- Elia shi" sao qhid' joe" li" nae" ga:- Tung" Pho" qe pe"mung: ta" ko" ra" i? ga: myid' ako".

¹²Yesu wa yao: bam re- Ja: khao: ngo" re jin" jin" seim" nyhang" to: nae" qhid' mae" Elia wa gaigai: yao: sao qhid' joe" li" nae" ngad:- ngadqere: Jham: Mugsug' mae Byu: Yao: Zo: wa khyag' qhui: ru myo: sho' kham zo: mung: ha: pye' ru qhug' li" nae" ga: pe"mung: tung" to" ra" i?

¹³Ngo naonhaung" re ta" ru wa Elia wa joe" li" ava"- yao" khyo re Jham: Mugsug' mae tung" to" ru we' dakhyo: yao: bam o nug: ra" khyo" yao: re kad' yu vako" ra"- ga: ta" ra".

¹⁴Yesu we' mho"zo: sam yaug wa- dang: ra" mho"zo: qejhao" joe" lo gelao" yao: bam: lhang" gam: byu phung: mo" zang zang" na: bam: ru we' Tung" Pho" qe wa yao: bam we' jho" ta" ngag: na ko" rure yao: bam lomyao: ako".

¹⁵Mo,byu qe Yesu re myao lao"- yao: jhao" tao" ye: mung: yetug: ako".

¹⁶Yesu wa yao" mho"zo: qere Pe" ja" khyo re naonhaung" yao: bam we' jho" ta" ngag: na ko" i? ga: myid' ra".

¹⁷Mo, phaung mae" byu dayaug tau: mung:- Mho" Pho" we"- ngo nao jhao" nga" zo: re jhui" li" ra". Pe"mung:ga"re yao: wa nhad'jid yui bo: ra" yaug ngad: ra".

¹⁸Ai: yui vao: jaung" khao: ngo" myidgaung khyo be; lhang" ke' mung: nhad' mae" nyab dui" athaui: thaui: thug' ru we' zaui kyag' mung: gaung geim" kyaung: thin: byaug byaug mung: ra"- ai: yui re khe' thug' pye' byid: nae" qhid' mae" ni" mho"zo: qere ngo mho' ngadqere: yao: bam maqo" khe' thug' pye' ngad: ako"- ga: Yesu re ta" ra".

¹⁹Ailao" Yesu wa yao: bam re- Lam khug: myid mabo: ra" byumyu" we"- ngo naonhaung" we' daga" khomyhao" joe" sho' na zai i? Ngo naonhaung" re khomyhao"joe" sho' zang: kham byid: zai i? Ai: yauggai nau" re ngojhao" jhui" lo geri:- ga: ta" ra".

²⁰Yao: bam wa ai: yauggai nau" re Yesu jhao" jhui" lo: ako". Ai: yui wa Yesu re myao lao"jao" ai: yauggai nau" re lao" thin: jab: lo" nhao mung: myid gaung khyo gyang: be; lo" ru we' nhad' mae" nyab dui" athaui: thaui: lang" lhe' lhau: ra".

²¹Yesu wa yao: pho" re- yao: ceru: boe" ru khomyhao" ngad va" i? ga: myid' ra". Yao: pho" wa- Zonau" mae" ngad va" ga: tau" ra".

²²Yui wa yao: re se' pye' nae" ga: myo: sho' lhang yao: re myi: mae qid mae lang" be; zaui: ke' ke' mung: ra". Nao qo" boe" ngad: re wa ngopha: re nhag' khyag' ru we' bao" yu la,- ga: ta" ra".

²³Yesu wa- Nao qo" boe" ngad: re wa ein: pe"mung: ta" i? Lam khug: myid bo: ra" yaug: qhid' mae" ja: khao: ngo" qo" gai: boe" ra"- ga: ta" ra".

²⁴Ailao" jao" ai: zoshao: yao: pho" wa- Ngo lam khug: ra"- nga" malam" ra" myid re bao" thaug' yu la,- ga: hug' ta" ra".

²⁵Yesu wa mo, byu qe yao: jhao" tao" zang" phaung: lo: na: rure myao lao" ai: makhyang" ra" yui re- Nhad'jid nojid: ra" yui we"- ngo nao re amyin" byid' ra"- Yauggai nau" mae" thug' lo" wa,- yao: mae khonhae" re: dadam: vao lo:- ga: qeim: ra".

²⁶Ai: makhyang" ra" yui wa gyi: hug' yang: ai: yauggai nau" re lao" thin: jab nhao mung: yao" khug mae" phao: thug' lo" ra". Yauggai nau" re: sushid mao we' dakhyo: lang" jo; ra". Byu myo: sho' wa yao: shid: ava"- ga: ta" ako".

²⁷Ngadqere: Yesu wa ai: yauggai nau" lo, mae zaui: mung: she: to" ke' ra". Ailao" ai: yauggai nau" wa to" ye; li" ra".

²⁸Yesu wa yham khug khyo dam: vao lo" mung: yao: za: na: au: yao" mho"zo: qe wa yao: re- Ngonhaung" ai: yui re pe"mung: maqo" khe' thug' pye' geli" laug i? ga: myid' ako".

²⁹Yesu wa yao: bam re- Akyu" mho' ruyang mangad: re wa gatau pe" yang re: ceja" yui re maqo" khe' thug' pye'- ga: ta" ra".

³⁰Yesu we' yao" mho"zo: qe wa aimae" to" mung: Galile khyo" lai: ye" lo" ako". Ai: khyo re khag' rere: maba nhao nug ngad: ra".

³¹Pe"mung:ga"re Yesu wa yao" mho"zo: qere- Byu: Yao: Zo: wa byu qe: lo, khug khyo ab byid' pye' ru qhug' mung: yao: bam wa yao: re se' pye' li" genae"- ngadqere: se' pye' thao sam ba re yao: wa dam: daui: to" li" nae" ga:- mho" byid' na: ruyang ngad: ra".

³²Yao" mho"zo: qe wa yao" mho" shid' dao: re maba: gyo: ko" ngad: ra". Ngadqere: yao: bam wa yao: re mavae" myid: gengad: ra".

³³Yesu we' yao" mho"zo: qe wa Kapena-um khyo joe" ye" ako". Yham khug mae yevao: na thao Yesu wa yao" mho"zo: qere Naonhaung" wa khyole; mae pe" nam jho" ta" ngag ko" i? ga: myid' ra".

³⁴Ngadqere: yao: bam wa sae za: tae" bam: ako". Pe"mung:ga"re yao: bam wa khyole; mae yao: bam mae" khag' qi" thao" ngad: ga" rure yao: cao: jho" ta" ngag: lo geyang: ngad: ra".

³⁵Ailao" Yesu wa zaung: jo, mung: daxe: shid' yaug re khai: yu yang: yao: bam re- Qhid' mae na nug yaug wa alhab' mo; thao mae na ca"- amung: alhab' mo; daui daui yaug boe" ca"- ga: ta" ra".

³⁶Yesu wa zoshao dayaug re jhui" yu mung: yao: bam: agaung: mae yhe' to" ra". Ai: zoshao re yao" lo; yang ge; ci zo" re" yao: bam re-

³⁷Zoshao qe mae" ceru" ra" zoshao dayaug re nga" mang khyo" lham: khae: yu: ra" yaug khag' ngadqere: ngore lham: khae: yu: ra". Amung: ngore lham: khae: yu: ra" yaug khag' ngadqere: ngore za: lham: khae: yu: ru mangad:- ngore nhao: ke' ra" yaug rere: lham: khae: yu: ra"- ga: ta" ra".

³⁸Yohan wa Yesu re Mho" Pho" we"- ni" mang: yang yui khe' thug' na: ra" byu dayaug re ngonhaung" myao:- ngadqere: yao: wa ngonhaung" we' daga" cao yaug mangad: mung: yao: re ngonhaung" tam" pye' co' va"- ga: ta" kyo" ako".

³⁹Yesu wa- yao: re datam" ge,- pe"mung:ga"re nga" mang khyo" yang mug' pho: mau" bin: zaui: thao nga" khyo re magai: ra" dao: xoe" xoe" za: qo" ta" byu khag' mana.

⁴⁰Pe"mung:ga"re nyhao: re gye makad' ra" yaug wa nyhao" shad' mae" byu ngad: ra".

⁴¹Ngo naonhaung" re dang za: ta" ru wa- Nga" byu qe ngad: ako" ga" ra" khyo" yang naonhaung" re qid dakeim byid: jhaug' yaug khag' ngadqere: gaigai: yao: aphug' jhaung qhu" qo" khae: yu nae"- ga: ta" ra".

⁴²Amung: ngore lam khug: na: ra" ce: zoshao qemae" dayaug yaug re lam khug: myid zai" phyo' ra" yaug khag' ngadqere: yao" lang zang: mae laug lhang gye, qi: taui" lhao: mung: qid tham: khug khyo pye' zaui: ke' ru wa yao" qhid' mae" je: gai: ra".

⁴³Ni" lo; yang ni" lam khug: myid re zai" phyo' byid' ngad: re wa- ai: lo, re qam" phyid' pye' wa,- lo, shid' lo, geim" we' myi: khonhae" re: mashid masham: ra" myiqid tham: khyo gyo" lo" nae" tho' lo, dashad' made, lo: kao so' daui: ra" khyo vao ye: nae" ru wa ni" qhid' mae" je: gai: ra".

⁴⁴

⁴⁵Ni" khyid: yang ni" lam khug: myid re zai" phyo' ngad: re wa ai: khyid re qam" phyid' pye' wa,- khyid shid' khyid geim" we' myi: khonhae" re: mashid masham: ra" myiqid tham: khyo gyo" lo" nae" tho' khyid dashad' made, lo: kao so' daui: ra" khyo vao ye: nae" ru wa ni" qhid' mae" je: gai: ra".

⁴⁶

⁴⁷Ni" myo,jid' yang ni" lam khug: myid re zai" phyo' ngad: re wa- ai: myo,jid' re thad' pye' wa,- myo,jid' shid' shad' geim" we' khonhae" re: myi: mashid masham- yao: bam re zo" ra" laug daung: khonhae" re mashid: ra" myiqid: tham: khyo gyo" lo" nae" ru tho' mae- myo,jid' dashad' za: de, mung: Mao"So: mung"dan: khyo vao ye: nae" ru wa ni" qhid' mae" je: gai: ra".

⁴⁸

⁴⁹Xeim: re xo: ke' yang: kyang" shao: pye' ru we' dakhyo:- byu alhab' rere: myi" yang kyang" shao: pye' li" nae".

⁵⁰Xo: wa gai: ra"- ngadqere: ai: xo: shao: byaug lao"- ai: xo: re dam: ngae sho' naonhaung" khoru: qo" kad' yu genae" i? Naonhaung" khug mae jho" zam" khug: ra" xo: bo: jo, mung:- dayaug we' dayaug ngaui pyo: yaug yo za: zam" khug: na ge,- ga: ta" ra".