Read Maru LUKA 1 Bible Online

LUKA 1 - Maru bible

LUKA 1

¹Phug' myao" ra" Theophilu we"- Sao qhid' maqhid mae" yao: bam yao" myo,jid' yang yao: zhaug' the' myao mo, we' ai: mungdao: re kho" kyo" ra" mo; yang-

²Ngonhaung" qhid' kheim: mae boe" lai: lo: ra" khyo jham re ngonhaung" re ta" zhao: kyo: vako" ru we' dakhyo:- mhomyi: tung" to: mo, myo: sho' na: ako".

³Airumung: ngore: boe" li" ra" khyo alhab' re athai: atho' bin: myid' zhao: yu mung:-

⁴Nao mho" zhao: yu va" ra" khyo wa gaigai: yao: dang: ra" khyo ngad: rure nao ba vashao:- adai: ato' jo jo za: ni" qhid' mae" tung" vhin: ke' re gai nae"- ein: ngo qo" myid: ra".

⁵Yuda kho:kham Herod pyad mae khinjaung Abiya phung: mae bobo: ra" Zakari ga: mang: ra" khinjaung dayaug na: ra". Yao" yham sang myhi" wa Elizabed ga: mang yaug ngad: ra"- Elizabed re: khinjaung Arun" kaung mae" ngad: ra".

⁶Yao: shid' tao wa Mao"So: amyin" dao: alhab' re mashad' manghung: phug' cao" na: rutao ngad mung:- Mao"So: qhid' kheim: mae yao: shid' tao geim" dan:man" ra" byu tao ngad: ako".

⁷Ngadqere: Elizabed wa bug daung: ngad yang: yao: shid' tao wa zo: dau maqo" ko" ngad: ra"- yao: shid' tao geim" re: mao" avako".

⁸Daba mae Zakari wa yao: bam: phung: ayab ang mung:- Mao"So: qhid' kheim: mae khinjaung mau" kad' na: au:-

⁹Mao"So: qhid' kheim: khyo vao ye: mung: phan dao mae nae pyo" ra" sheim phad' ngaui" byid: nae" qhid' mae" khinjaung qe: thung" jo; ru we' dakhyo:- pha" be, yang: khyin: yu: rumae yao: ang: ra".

¹⁰Ai: nae pyo" ra" sheim phad' ngaui" na: ra" yo, khyin: gyo: mae mo, byu qe wa taung gaung shad' mae akyu" mho' yang: na: ako".

¹¹Alao" Asang: mug: lagyo: dayaug wa nae pyo" ra" sheim phad' nghaui" ra" phan lo, yo shad' mae Zakari re li" ye; qhu" ra".

¹²Zakari wa ai: mug: lagyo: re the' myao lao"- gyaug: din: pye' ra".

¹³Ngadqere: mug: lagyo: wa Zakari we"- Dagyaug wa,- Mao"So wa ni" akyu" mho' thoe re tae" gyo: byid' ava". Ni" yham sang myhi" Elizabed wa ni" qhid' mae" yauggai nau" dayaug khau: li" nae" ngad:- nao wa yao" mang re Yohan- ga: mhang" byid: zai ngad: ra".

¹⁴Nao wa ngaui bau: ngaui lho" ru qhug' nae"- yao: khau: li" ruyang byu myo: sho' mo, ngaui bau: genae".

¹⁵Pe"mung:ga"re yao: wa Mao"So: qhid' kheim: mae qi" qhang yaug ngad nae"- yao: wa sabyi qang: we' yhid phai: shaug' nae" mangad:- yao: wa yao: myhi" aung mae" yao: Gyang" Lho" Byo we' byang" jo; li" nae".

¹⁶Yao: wa Israel byumyu" myo: sho' re yao: bam: Asang Mao"So jhao" dam: jhui" tug' lo: li" nae".

¹⁷Yao: wa lapa Elia we' dakhyo: qam: so' we' Asang Meshia qhid' au: mae ye" lo" na: li" nae"- yao: wa yao: pho" qe we' yao: zo: qe: gyo: mae dam: jho" vang" nhao nae"- Mao"So re geimlau gye kad' ra"mo, re din:man" ra" mo; myid pha,jhi" shad' khyo dam: tug' lo nhao nae"- yao: wa Mao"So: qhid' mae" jin" jin" ngad nae" qhid' mae" Asang: byumyu" re seim" nyhang" to" li" nae"- ga: Zakari re ta" ra".

¹⁸Ailao" Zakari wa mug: lagyo: re Ceru: boe" nae" rure ngo khoru: ba nae" i? Pe"mung:ga"re ngo wa mao: va"- nga" yham sang myhi" re: mao: zo: ngad va"- ga: ta"ra".

¹⁹Mug: lagyo: wa Ngo wa Mao"So: qhid' kheim: mae ye; jo; ra" mug: lagyo: Gabriela ngad:- nao re ce: ngaui bau" lau dao: ta" kyo: byid: nae" qhid' mae" Mao"So: yang nhao: ke' yaug ngad:-

²⁰Qu" wa,- ngo ta" ra" dao: re nao malam" ruyang ceru: boe" li" nae" ra"ayo, joe" sho' nao wa dao: maqo" jhau lo: nhad' jid; jo; li" nae"- amung: ayo, joe" lao"- nga" dao: wa dang: lo: li" nae"- ga: ta" ra".

²¹Mo,byu qe wa Zakari re lao" na: ako"- yao: bam wa Zakari Mao"So: yham khug mae myao" sho' yena: byaug: rure myid: mug' ako".

²²Zakari Mao"So: yham mae" thug' lo lao"- yao: wa yao: bam re dao: maqo" jhau ngad: ra". Airumung: yao: bam wa Caung:pa" Yham khug mae yao: wa ve, lho daja: ja: the' myao va" rure yao: bam ba: qu" yu: ako". Yao: wa dao: dakheim: re: maqo" jhau yang: yao: bam re lo, tu" tu" qhu" ra".

²³Caung:pa" Yham khug mae yao: zaui: ang: ra" ayo, gan lao"- Zakari wa yham khyo phao: lo" ra".

²⁴Ai: thao mataung" myao" re Elizabed wa gaung la" li" mung: lho" mo" ngo" khye' lam: lam: khai: mathug' qin" lo: laung" jo; ra".

²⁵Elizabed wa Ana"- Mao"So wa ngore nhag' khyag' yu va"- Su: yang ngore gaui mho jung" khyoe' ta" rure- yao: yu: pye' byid: va"- ga: ta" ra".

²⁶Elizabed gaung la" li" ru lho" khyaug' khye' joe" li" lao"- Mao"So wa mug: lagyo: Gabriela re Galile mung" mae" Nazared vogaung: mae na: ra"

²⁷Davi kaung mae" Yoseb ga: mang: ra" yaug: yang mho' to" ra" zomyi: gyang" dayaug jhao" nhao: ke' ra"- ai: zomyi: gyang" wa Mari ga: mang yaug ngad: ra".

²⁸Mug: lagyo: wa Mari jhao" li" mung: Ngaui bau: yaug yo vashao:- nao wa ngaui lho" ra"- Mao"So wa nao we' daga" ngad: ra"- ga: ta" ra".

²⁹Mari wa ai: mug: lagyo: li" ta" ra" dao: thoe: yang gyai myid: mug' sang: kho: mung:- ce: bang" se" dao: wa pe" ga" ru ngad nae" laug i? ga: myid: qu" na: ra".

³⁰Ailao"- ai: mug: lagyo: wa Mari re Mari we"- dagyaug wa,- nao wa Mao"So: qhid' kheim: mae myo,nho qo" ava".

³¹Nao wa gaung la" li" mung: yauggai nau" dayaug khau: li" nae"- nao wa yao: re Yesu ein: mhang" byid: zai ngad: ra".

³²Yao: wa qi" qhang yaug ngad: li" nae"- yao: wa myhao: thao" ra" Mao"So: yao: Zo: ga: mhang" ru qhug' li" nae"- Asang Mao"So wa yao: pho" Davi nho: kho:kham tao" khau" yao: re ab byid' li" nae",

³³Yao: wa Yaku myid:zo: qere apyad ato eib: na: li" nae"- yao" mung"dan: wa khonhae" re: mathao" magan nae"- ga: ta" ra".

³⁴Alao"- Mari wa mug: lagyo: re Ceru wa khoru: gai: boe" li" zai ngad: laug i? Ngo wa yauggai we' mana: qu" shi" ra" zomyi: gyang" dayaug ngad:- ga: ta" ra".

³⁵Mug: lagyo: wa Gyang" Lho" Byo wa ni" dao mae joe" li" mung:- myhao: thao" ra" Mao"So: qam: so' wa nao re nghoe' qab: to: byid: nae"- Airumung: khau: li" nae" ra" yaug re Mao"So: yao: Zo:- ga: mhang" li" genae".

³⁶Amung: Qu" wa,- ni" amyu" ba nam myhi" Elizabed re: mao: thao re yauggai nau" khau nae" gaung la: va" ra"- Su: yang bug daung:- ga: mhang" ra" yaug wa gaung la" li" mung: ana"- lho" khyaug' khye' ngad: ava".

³⁷Pe"mung:ga"re Mao"So maqo" kad' ru pe" re: majo,- ga: ta" ra".

³⁸Alao"- Mari wa Ngo wa Asang: jeim myhi" ngad:- nao ta" ru we' dakhyo: ngo mae boe" li" vashao:- ga: tau" ra". Alao" mug: lagyo: wa yao: mae" phao: lo" ra".

³⁹Ai: thao mataung" myao" re Mari wa Yuda mung" mae" bam vogaung: dalam: khyo hin hin za: to" ye" lo" ra".

⁴⁰Yao: wa Zakari yham khyo vao ye: mung: Elizabed re bang" yese" ra".

⁴¹Mari bang" li" se" ra" dao: re Elizabed the' gyo: lao"- yao" aung khug mae" zonau" wa thug' jhu" li" ra".

⁴²Elizabed wa Gyang" Lho" Byo we' byang" jo, mung: thoe qi: we' Nao wa myiqe: alhab' mo, tho' mae ngaui lho" ra"- ni" aung mae" zoshao re: ngaui lho" ra" wo".

⁴³Nga" Asang: yao: myhi" ngojhao" joe" li" ru wa pe" jeju khyo" yang qo" kham: yu li" laug i?

⁴⁴Pe"mung:ga"re Qu" wa,- ni" bang" se" dao: re ngo the' gyo: we' nga" aung mae" zonau" wa ngaui bau: mung:- thug' jhu" li" ra".

⁴⁵Asang yao: re ta" ra" dao: wa gaigai: jab byang" li" zai ngad:- ga: lam" ra" myiqe: wa ngaui lho" ra" wo"- ga: ta" ra".

⁴⁶Alao"- Mari wa- Nga" aung khug nhag' lam: ai: Asang re caung:khin" byid' ra".

⁴⁷Nga" alo zo: re: ngore khyad' yu: ra" Asang Mao"So: khug mae ngaui bau" ra".

⁴⁸Asang wa nyham: gyo" jo; ra" yao" jeim myhi" re qu" myao: ava"- qu" ge,- Ana" mae" byu qae: khao: ngo" mae" mo, wa ngore ngaui lho" ra" yaug ga: mhang" genaeva".

⁴⁹Pe"mung:ga"re qam: so' bo: ra" Asang wa qi" qhang: ra" mau" zo" nga" qhid' mae" kad' byid: mung: ngad: ra". Asang yao" mang wa gyang" lho" ra".

⁵⁰Asang yao: re gyaug phug' ra" mo; dao mae myid:zo: daqae: mae" daqae: yao" nhag' khyag' ru qhu" byid' na: ra".

⁵¹Yao" qam: bo: ra" lo,pau" re yheim" ke' mung: langa: kad' phug mo; nhag' lam: khug mae myid: yaung: to" ra" mau" zo" jham re abyi asin: kad' pye' byid' ra".

⁵²Yao: wa zug: kho:kham qe: aya: khyo" pye' byid: mung: ngai nyham: ra" mo, re tau: to' byid' ra".

⁵³Moe, shab' ra" mo, re gai: ra" ja" yang nhag' shid nhag' dag nhao mung:- jo,nho" qo" mo, re lo, cin nhao: ke' ra".

⁵⁴Ngonhaung" phug' phyid' qere yao: ta" to" ru we' dakhyo:- Abraham we' yao" myid:zo: qere-

⁵⁵Khonhae" re: yao" nhag' khyag' shogu: ru myid: beim: mung:- yao: wa yao" daui daui yaug Israel amyu" re bao" thaug' byid' ava"- ga: ta" ra".

⁵⁶Mari wa Elizabed we' daga" lho" mo" sam khye' ko na co' mung: yham khyo dam: phao: lo" ra".

⁵⁷Alao" Elizabed wa khau nae" ba na nge, mung:- yauggai nau" dayaug khau: ra".

⁵⁸Ai: Asang wa Elizabed re mug' pho: jeju kad' qhu" va"- ga" rure yao" yham kyo: cao: qe we' ba nam sang: cao: qe the' gyo: gelao" yao: bam wa yao: we' daga" ngaui bau" ako".

⁵⁹Ai: thao she' ba ein: ba re yao: bam wa zonau" au: qid lhai: poe khyo li" ako". Yao: bam wa ai: zonau" re yao: pho" mang ru: yao: Zakari- ga: mhang" byid: nug: ako".

⁶⁰Ngadqere: ai: zonau" yao: myhi" wa airu: mamhang" nae"- Yohan ein: mhang" zai ngad:- ga: ta" ra".

⁶¹Yao: bam wa Elizabed re Ni"amyu" kaung mae Yohan ga: mang ru dayaug re: mabo- ga: phaug' tau" ako".

⁶²Alao"- yao: bam wa yao: pho" khoru: mhang" byid: nug: laug- ga: zonau" yao: pho" re lo, tu" tu" yang: myid' qu" ako".

⁶³Zakari wa tung" the: dalam: mho' yu mung:- zonau" mang wa Yohan ngad:- ga: tung" qhu" ra". Yao: bam alhab' mo, mug' hao" byaug: ako".

⁶⁴Ailao" jao" Zakari wa dao: dam: gai: jhau: li" mung: Mao"So re caung:khin" ra".

⁶⁵Yham kyo: cao: qe alhab' mo, wa gyaug: mug' pye' ako"- Airu: boe" ra" lau dao: re Yuda mung" mae" bam mug: khaung: jao: sho' hau" nhao" lo" ako".

⁶⁶Ai: khyo re the' gyo" ra" mo, alhab' wa- airu re yao: bam: nhag' lam: khug mae xam" to: mung:- ce: zoshao wa khoru" ra" yaug boe" nae" ngad: i? ga: ta" ako". Ai: Asang: qam: so' wa yao: we' daga" ngad: ra".

⁶⁷Alao" Yohan yao: pho" Zakari wa- Gyang" Lho" Byo byang" mung: lapa dao: ta" ru wa

⁶⁸Ai: Asang Israel nho: Mao"So wa ngaui lho" vashao: wo"- Yao: wa yao" amyu" qejhao" li" mung:- yao: bam re loe; beim nhao: ava".

⁶⁹Yao: wa yao" daui daui yaug Davi amyu" mae" qam: so' qi" qhang: ra" khyad' yu: Asang ngonhaung" re byid' ava".

⁷⁰Amung: yao: wa ganhae" mae" yao" gyang" lho" ra" lapa qe: nhad' khyo" yang-

⁷¹ngonhaung" re gye jham: lo, mae" re:- ngonhaung" re nhang" ra" alhab' mo; lo, mae" re:- yao: ngonhaung" re khyad' yu nae"- ga: dao:so: byid' to" ra".

⁷²Yao: wa ngonhaung" phug' pho" qere nhag' khyag' shogu: ru qhu" byid: mung: yao" gyang" lho" ra" dao: thang" re myid: beim: nae"- ga: ta" to" ra".

⁷³Ngonhaung" wa Mao"So: qhid' kheim: mae ngonhaung" pyad geim" gyang" lho" ru we' din:man: mo, boe" nae" qhid' mae"-

⁷⁴

⁷⁵Ngonhaung" re gye jham: lo, mae" khyad' yu mung:- yao: re magyaug maci" lo: caung da" byid: nhao nae"- ga: ngonhaung" phug' pho" Abraham re jham tang: yang: ta" to" ra".

⁷⁶Nga" zo: we"- nao wa myhao: thao" ra" Mao"So: lapa- ga: mhang" ru qhug' nae"- Nao wa Mao"So: khyodang re nyhang" to: nae"- Asang: qhid' au: mae ye" lo" mung:-

⁷⁷Asang: byumyu" re yao: bam: qobo re khyad' pye' byid: mung: khyad' yu nae"- ga" rure ta" kyo" li" nae".

⁷⁸Ngonhaung" Asang Mao"So wa nhag' khyag' shogu: ru byang" jo, yaug ngad: ra"- Yao: wa khyad' yu: ra" jeju ba bao re ngonhaung" dao mae zho nhao mung:-

⁷⁹Shid: ra" aqab khug mae na: jo; ra" mo; dao mae zho: bao byid' li" nae"- Amung: ngonhaung" khyid re yaug yo cae: tae" ra" khyodang khyo jhui" gun: su" ye" li" nae" yaug ngad: ra"- ga: ta" to" ra".

⁸⁰Ai: zoshao wa gaung khyao qi" qhang: li" ru we' byo qam: so' bo: li" mung: Israel amyu" qhid' kheim: mae de: de: za: mana: qhu" shire yao: wa din"pyad' yo mae na: ra".