Read Maru LUKA 12 Bible Online

LUKA 12 - Maru bible

LUKA 12

¹Mo, byu qe ajham ataung zang" phaung: li" gemung:- yao: cao: jho" zab: khyad' na ko" au:- Yesu wa sao qhid' yao" mho"zo: qere- Geim kad' ru ngad: ra" Pharishe qe: man" re naonhaung" lha" ge,-

²Nghoe' to" ra" ja: pe" re: de: de: myao: thug' li" nae"- Zug' to" ra" ja:- ja: khao: ngo" wa- ba: thug' li" nae".

³Amung: mug: cad' yo mae naonhaung" ta" ra" dao: re mug: bo" mae the' gyo" li" genae"- Kug qe, mae naonhaung" dao: so' so' yang: ta" ra" dao: re yham khaung dao mae" hug' ta" li" genae"- ga: ta" ra".

⁴Nga" ba nam qe we"- naonhaung" re ngo ta" geli"- Gaung khyao re qo" se' pye' ngadqere: ai:thao gatau pe" re: maqo" kad' ra" mo, re dagyaug ge,-

⁵Naonhaung" khag' re gyaug ca" ko" rure ngo naonhaung" re ta" shid' geli"- Gaung khyao re se' pye' thao naonhaung" re myiqid tham: khyo pye' zaui: ke' nae" qam: so' qo" ra" Mao"So re gyaug ge,- ngad va"- yao: wa naonhaung" gyaug qo: ra" yaug ngad: ra".

⁶Jokhyao" ngo" dau: re byad san: shid' kye' mae aung" mangad: i? Ngadqere: Mao"So wa ai: jokhyao" dadau: rere: mato" myhid' ngad: ra".

⁷Naonhaung" au: mae" xae khe' alhab' re lhao" re: nghe' to" ra"- Airu: mung: dagyaug ge,- naonhaung" wa jokhyao" myo: sho' dau: tho' je: phug' de; ako".

⁸Naonhaung" re ngo ta" geli"- Su: qhid' kheim: mae nga" mho"zo: qe ngad:- ga: lhang: yu yaug khag' re ngadqere: Byu: Yao: Zo: re: Mao"So: lagyo: qe: qhid' kheim: mae yao" mho"zo: qe ngad:- ga: lhang: yu: li" nae".

⁹Ngadqere: su: qhid' kheim: mae ngore ngag: ha: pye' yaug re kam" wa Byu: Yao: Zo: re: Mao"So: mug: lagyo: qe: qhid' kheim: mae yao: re ngag: ha: pye' li" nae".

¹⁰Byu: Yao: Zo: re nhad' dao: thoe: yang shad' ra" yaug wa qobo khyad' byid' ru gai: qhug' ra"- ngadqere: Gyang" Lho" Byo re jung" gaui: ra" yaug kam" wa qobo khyad' pye' ru gai: qhug' nae" mangad:-

¹¹Amung: byu qe wa naonhaung" re yung" zaung nae" qhid' mae" Tarha" Jung Yham khyo- zug: qe we' kheim: so' qo" ra" mo; qhid' kheim: khyo jhui" ye: gelao"- khoru: ta" nae" laug ein: damyid: ci" ge,-

¹²Pe"mung:ga"re ai: yo, khyin: mae khoru: jhau ang: rure Gyang" Lho" Byo wa naonhaung" re mho" byid' li" nae"- ga: ta" ra".

¹³Mo, byu phaung gaung: mae" byu dayaug wa Yesu re- Mho" Pho" we"- ngonhae tao: yao: pho" to: byid: co' ra" jo,nho" jham re ngo we' jho" gae ngho" nae" qhid' mae" nga" mao: re ta" byid: la,- ga: ta" ra".

¹⁴Yesu wa yao: re- Nga" ba nam pho" we"- Dao: kho' nae" akhang"- mangad: lao"- ni" shid' tao: jo,nho" re kho' byid: nae" qhid' mae" ngore khag' yang khyin: to" ra" i? ga: tau" ra".

¹⁵Yesu wa xo' mung: yao: bam alhab' re- So' kho' obyid: ru aja: ja: re naonhaung" lha" yang: jao" pye' ge,- Byu dayaug: dangman" ra" kao so' wa yao: jo,nho" khonho" qo" yaug ngadqere: yao: qo" ra" jo,nho" mae mabo ngad: ra"- ga: ta" ra"- ga: ta" ra".

¹⁶Ai: thao Yesu wa ce:dao: tau" ci yang: yao: bam re- Dalhang mae- gaug zo maui: lam: gyai thug' ra" yo qo" ra" daizug: dayaug na: ra".

¹⁷Yao: wa- yao" aung khug mae Nga" gaug zo maui: lam: jham re ke' to: nae" jo, qo majo, lo:- ngo pe"ru: kad' nae" i? ga: myid: ra".

¹⁸Amung: yao: wa- ngo ceru: kad' nae" ngad: ra"- nga" jhi jham re phyo' pye' mung: je: qi" ra" jhi sag' jham re ngo dam: kad' nae"- amung: nga" gaug zo maui: lam: jham we' jo,nho" zai jham re jhi sag' jham mae ke' to: nae"- ga: yao: re yao: ta" ra".

¹⁹Ai: thao ngo wa ngoyao" gaung re Zhau: vha: gai yaug we"- nao wa myo: sho' zin: qhid' mae" qo ca" ra" jo,nho" zai jham alhab' qo" ava"- Yo yo za: na wa,- Zo: se,- Shaug' se,- amung: pyo: pyo: na wa,- ein: ta" nae"- ga: ta" ra".

²⁰Ngadqere: Mao"So wa yao: re- Byugo we"- ana" myi yao: nao kao gyo" li" nae"- ailao" nao qaung" to" ra" jo,nho" zai jham wa khag' qo" sang nae" i? ga: ta" ra".

²¹Alao" Yesu wa yao: yao" qhid' mae" jo,nho" abam azao qaung" to: mung:- Mao"So: qhid' kheim: mae jo,nho" maqo" ra" mo, wa ceru" ra" yaug we' dau: ra"- ga: yao: bam re ta" ra".

²²Ai: thao Yesu wa yao" mho"zo: qere- Airumung: naonhaung" re ngo ta" geli"- naonhaung" kao so' daui: na nae" qhid' mae" qo ca" ra" zo:ve we' naonhaung" gaung khyao: qhid' mae" ve,mai ve,bau: we' sin: mung: damyid: ci" ge,-

²³Kao so' wa zo:ve tho' myo: sho' je: akhyag mung:- gaung khyao wa ve,mai ve,bau: tho' myo: sho' je: akhyag: ra".

²⁴Kano, jham re qu" ge,- yao: bam wa myug: shi: maqho:- masin:- yad re: mayad: yu ngad: ako"- yao: bam wa zai to: qe, we' gaug jhi jham re: maqo" ngad: ako". Ngadqere: Mao"So wa yao: bam re zho" na: ra". Naonhaung" wa ngho' zo: jham tho' gyai myo: sho' je: phug' de; ako".

²⁵Naonhaung" mae" khoyaug myid: ci" ruyang yao: yao" kao dajhid' je: qhang sho' qo"daui: na ko" i?

²⁶Airumung: naonhaung" wa- airu" ra" angai athao za: re lhao" maqo" kad' ko" re wa gatau: khyo jham we' sin: mung: pe"mung: myid: ci" ko" i?

²⁷Seyo: bin: gae jham khoru: yaug: qi" li" ko" rure qu" ge,- yao: bam wa mau" mazaui:- yao: bam: qhid' mae" mai bau: re: maqo, ko" ngad: ra"- ngadqere: naonhaung" re ngo ta" kyo: geli"- Sholamon kho:kham lhao" re: ai: seyo: bin: gae dagae qhi" yaung" sho' maqo" shaung: ve, ngad: ra".

²⁸Mao"So re lam khug: myid ngai: ra" mo, we"- ana" ba yaug: jo, mung: ne, mo" ba myikhyeim" mae ngha" pye' ra" seyo mae" myo, gae jham re Mao"So wa airu: shaung vhe' byid' to" ngad: re wa- aitho' mago" naonhaung" re je yang: shaung vhe' byid' li" nae" mangad: i?

²⁹Airumung: naonhaung" wa pe" zo: pe" shaug' nae" laug ein: damyid: ci" damyid: qug: ge,-

³⁰(Pe"mung:ga"re dangman" ra" Mao"So re malam khug: ra" ce: mug: myid dao mae" byumyu" alhab' wa aijham we' sin: mung: khonhae" re: myid: ci" na: ako") Aijham re naonhaung" qo ca" rure naonhaung" yao: Pho" ba: ra".

³¹Ai: atha"- naonhaung" wa Mao"So: mung"dan: re qho ge,- Airu:lao"- Mao"So wa ai:gu: alhab' naonhaung" re byid' li" nae".

³²Yao kyaung" ngai we"- Dagyaug wa,- pe"mung:ga"re naonhaung" Pho" wa naonhaung" re mung"dan: byid: nug: ra".

³³Naonhaung" jo,nho" jham re aung" pye' mung:- myaung sho: mo, re byid: ge,- maqeim: majad: ra" ngaui thaung jham re kad' yu ge,- Khug' hab' maqo" khug' yu mung: nhug: yang maqo" zo" qheim" pye' ra" mug:gaung: dao mae magyid mayeim: ra" naonhaung" jo,nho" jham re qaung" to: ge,-

³⁴Pe"mung:ga"re naonhaung" jo,nho: jo; ra" tau mae naonhaung" nhag' lam: taui" jo; li" nae".

³⁵Naonhaung" wa pe" boe" lo ngadqere: jin" jin" ngad: na genae" qhid' mae" phyid' cui: cui" ci yang:- naonhaung" myibaung: jham re te' to: ge,-

³⁶Lo, xo' poe mae" thug' lo: ra" Asang re lao" na ko" ra" daui daui mo, we' dakhyo: kad' na ge,- Asang joe" lo mung: kham: loko' we' aijao" yao:- yao: bam wa yao: re kham: phung" byid' li" genae".

³⁷Asang dam: tug' joe" lo: ra" au:- jin" jin" za: lhaug' na ko" rure daui daui mo; asang: yang lomyao: ra" daui daui mo, wa ngaui lho" ko" ra"- naonhaung" re ngo ta" geli"- ai: daui daui mo; asang wa yao: bam re zozo: jaung: mae zaung: jo, nhao mung:- yao" bau: qang khyad' pye' yang:- yao: bam re caung da" byid' li" nae".

³⁸Gae gaung: myi: re- mangad: lao"-qo, teim myi: re ngad ngad yao: joe" lo: re jin" jin" za: kad' na ko" rure yao: lomyao: re wa ai: daui daui mo, wa ngaui lho" ko" ra".

³⁹Yham sang wa khug' hab' vao li" nae" ayo, re yao: ba: ngad: re wa yao" yham khug khyo ai: khug' hab' re cad' vao li" nhao nae" mangad: ein: rure naonhaung" xam" to: ge,-

⁴⁰Aimung: naonhaung" re: jin" jin" kad' to: ge,- Byu: Yao: Zo: wa naonhaung" mamyid: to" ra" yo, khyin: mae joe" li" li" nae"- ga: ta" ra".

⁴¹Alao" Petru wa- Asang we"- ce: dao: tau" wa ngonhaung" qhid' mae" ta" ru i? Mangad: lao"- yaug khao: ngo" qhid' mae" nao ta" ru ngad: i? ga: Yesu re- myid' ra".

⁴²Asang wa Kyid: ru we' qag yaug khoyaug ngad: i? Yao: wa yao" Asang: yang yao" yham khug: mau" zo" jham re au: jhui" she: kad' nae" we' ayo, joe" lao"- yao" daui daui mo, re zo:ve kho' byid: nae" qhid' mae" san: to" ra" yaug ngad: li" nae".

⁴³Asang dam: joe" lo: au:- ai: daui daui yaug wa byid' to" ra" mau" zo" jham re kyid kyid za: zaui" na: rure yao" Asang lomyao: re wa ai: daui daui yaug wa ngaui lho" ra".

⁴⁴Naonhaung" re ngo dang za: ta" geli"- Asang wa yao" jo,nho" zai yo alhab' re pyo nae" qhid' mae" ai: daui daui yaug re san: to" li" nae".

⁴⁵Ngadqere: ai: daui daui yaug wa nga" Asang dam: joe" lo nae" myao" shi"- ga: yao: yao" aung khug mae myid yang:- yao: wa gatau: daui daui yauggai- myiqe: qere be; ru we' zo: shaug' mung: yid: na: ra".

⁴⁶Ai: daui daui yaug mamyid: to" ra" ba na we' yao: maba mabeim" ra" yo, khyin: mae Asang wa dam: joe" lo: li" nae". Ailao" yao" Asang wa ai: daui daui yaug re xo sho' qobo dae byid: mung: mho dao: magyo" ra" mo, kham zo" ra" qobo dae re kham zo: nhao: li" nae".

⁴⁷Khoru: kad' re yao: yao" Asang o: ga" rure ba: to: qere: jin" jin" maseim" to:- Asang myid o: ra" khyo" makad' to" ra" daui daui yaug wa qobo dae myo: sho' be; ru qhug' kham zo" li" nae".

⁴⁸Ngadqere: yao" Asang pe" o: ga" rure maba lo:- qobo kham zo: man" ra" mau" shad' ra" daui daui yaug kam" wa qobo dae po: nae"- Myo: sho' kham: yu: ra" yaug mae" wa myo: sho' mho' yu: li" nae"- myo: sho' ab byid' to: yaug mae" wa myo: sho' mho' yu: li" nae".

⁴⁹Ngo wa myid gaung dao re myi: ngha" nae" qhid' mae" joe" li" ru ngad:- ana" yao: de; nga" re wo"-

⁵⁰Ngo kham: yu ca" ra" qid nyhab' dalam: jo, shi"- ai: mau" zo" mabin bin wa ngo gyai myid myo: myid laug mung: ra".

⁵¹Ngo wa ce: mug: myid dao khyo yaug yo nhao nae" qhid' mae" joe" li" ru ngad: ein: naonhaung" jho ko" i? Mangad:- Ngaui pyo: yaug yo: ru mangad:- jho" kho' nhao nae" qhid' mae" joe" li" ru angad:-

⁵²Ana" mae" thoegu:- yham khug byu ngo" zo: na: ra" ug' khug' dinkhu: dalam: mae shid' zo: wa dashad' sam zo" gu: wa dashad' jho" kho' li" genae".

⁵³Yao: pho" qe wa yao: bam: yauggai zo: qe we'- yauggai zo:qe wa yao: pho" qe we'- yao: myhi" qe wa yao: bam: myiqe: zo: qe we'- myiqe: zo: qe wa yao: myhi" qe we'- yao: na bam wa dau mo" qe we'- dau mo" qe wa yao: na bam we' gye jho" boe" mung:- byo; sin" lo" li" genae".

⁵⁴Yesu wa mo, byu qere- ba vao shad' mae" nhag' qhid' do, lo: na: rure naonhaung" myao gelao"- mug: qu naemyao:- ga: naonhaung" dalhang: dae lhaung" ta" ako"- ai we' dakhyo: re: lhaung" boe" ra".

⁵⁵Qid bang: shad' khyo" la hug' lo lao"- ba lhe' naemyao:- ga: naonhaung" lhaung" ta" ako"- ai we' dakhyo: re: lhaung" boe" ra".

⁵⁶Geim kad' mo, we"- naonhaung" wa mug:gaung we' myid gaung re qu" mung: mug: phung: mug: qu nae" ave, ayaug: re qo" ba: kho' ta" ako"- aire ana" pyad qae" mae" ave, ayaug: re naonhaung" pe"mung: maba: kho' qu" ko" i?

⁵⁷Jo: ru kad' nae" qhid' mae" naonhaung" yao: pe"mung: dao: maqo" kho' ko" i?

⁵⁸Byu dayaug yaug nao re yug: zhaug' mung: yung" zaung nae" qhid' mae"tarha" yung" khyo jhui" ye" lo" ngad: re- tarha" yung" khyo majoe" ye: shire gai: boe" ra" qhi" yao: we' mang: dae sho' kad' wa, Nao airu: makad' re wa yao: wa nao re tarha" zug: pho" qhid' kheim: khyo she: khyad' ye" lo" li" nae"- ailao" tarha" zug: pho" wa nao re gug: gam pho" lo, khyo ab byid' pye' mung:- nao re thaung: mae lhaung" to" li" nae".

⁵⁹Nao khyug' ca" ra" ngaui alhab' mabin: khyug' khyug' wa thaung: khug mae" nao qo" thug' lo nae" mangad:- ga: mo, byu qere ta" ra".