Read Maru LUKA 13 Bible Online

LUKA 13 - Maru bible

LUKA 13

¹Ai: ayo, mae ai: jo, qo mae na: ra" mo, byu qemae" damyo" wa Galile mang: byu qe Mao"So re xeim: ngaui" byid' na ko" au:- Pilad yang se' pye' ra" mo; khyo re Yesu re ta" kyo" ako".

²Yesu wa yao: bam re- Ai: Galile mang: byu qe airu: se' pye' qhug' ko" ruyang Galile mang: byu gaje qe alhab' mo, tho' je: xo: ra" qobo qo" mo, ngad ko" ra"-ein: naonhaung" jho ko" i?

³Gaigai: yao: airu: mangad:- naonhaung" re ngo ta" geli"- naonhaung" re: myid matha" ko" re wa ai bam shid ko" ru we' dakhyo:- naonhaung" alhab' re: shid: li" genae".

⁴Alao" Siloam mae" gyebyu zaung byo; gyo" lo" mung: lonhai" se' pye' ra" byu daxe: she' yaug wa Yerusalem vobyu alhab' tho' qobo qo" mo, ngad: ako" ein: naonhaung" jho ko" i?

⁵Gaigai: yao: mangad:- naonhaung" re- ngo ta" geli"- naonhaung" re:- naonhaung" qobo jham mae" myid matha" ko" re wa aibam shid: ru we' dakhyo:- naonhaung" re: shid: li" genae" ga: tau" ra".

⁶Alao" Yesu wa ce: dao: tau" ci yang: ta" ra"- Dalhang mae byu dayaug wa yao" sabyi khyae mae pho' ham" gae dagae qho" to" ra". Yao: wa pho' ham" shi: zaui: va" laug ga: yeqho qho mung: kad' ngadqere: dace' re: mamyao ngad: ra".

⁷Airumung: yao: wa yao" khyae lhaug' caung yaug re Ngo wa ce: pho' ham" gae re ashi: li" cao" qho: ru sam zin ngad va"- ngadqere: dace' re: ngo mamyao- Ce: pho' ham" gae thau: lhang" pye' wa,- Myid gaung re amyid: avho: pe"mung: kad' to: nae" i? ga: ta" ra".

⁸Ngadqere: khyae caung yaug wa Asang we"- dazin za: wa yaug: jo, shi: vashao:- Apan gam: sho' khoe' mung: myid xau ke' qu" shinae"-

⁹Airumung: sao nhag' ashi: gai zaui" li" shi: maba- Ashi: mazaui" li" lao" kam" wa thau: lhang" pye' wa,- ga: ta" ra".

¹⁰Dugno: Ba daba mae Yesu wa Tarha" Jung Yham dalam: khug mae mho" shid' na: ra".

¹¹Aimae makhyang" ra" yui bin: yang: daxe: she' zin geim" no: na: ra" myiqe: dayaug na: ra". Yao: wa dao nghaug' lo" byaug mung: dajhid' re: maqo" jhao" ke' ngad: ra".

¹²Yesu yao: re myao lao" yao: re khai: ke' mung: Myiqe: we"- ni" no mae" loe; ava"- ga: ta" ra".

¹³Amung: yao" dao mae lo, kai: byid' ra"- ailao" jao" ai: myiqe: wa yao" dao kao" jao: lo" byaug mung:- Mao"So re caung:khin" ra".

¹⁴Airu:- Dugno: Ba mae Yesu no gai byid' ruyang Tarha" Jung Yham au: jhaung pho" wa nhag' yo: mung:- Mo, byu qere Mau" zaui: nae" ba na khyaug' ba jo; ra"- Airumung: ai: ba na gyo" gu: mae no li" ya: gai: yu geri:- Dugno: Ba mae wa dali" ge,- ga: ta" ra".

¹⁵Asang wa yao: re- Geim kad' mo, naonhaung" we"- naonhaung" mae" khag' ngadqere: Dugno: Ba mae yao" nung: lo:- mangad: lao"- yao" lo ze re qid jhaug' nae" qhid' mae" gug'nyhug' yham mae" lhaung" pheim: ke' ko" ra" mangad: i?

¹⁶Abraham nho: myiqe: zo: ceyaug wa Satan" yang daxe: she' zin geim" taui" to" ru qhug' ra"- Dugno: Ba mae aimae" yao: re magai: pheim: ke' i? ga: phaug' tau" ra".

¹⁷Yesu phaug' tau" ra" dao: wa yao: re gye kad' na ko" ra" mo, re qho' ne phyi boe" nhao: ra". Mo, byu qe wa Yesu zaui" ra" mug' pho: mau" zo" jham: mathao mae ngaui bau" ako".

¹⁸Yesu wa- Mao"So: mung"dan: wa pe" we' dau: i? Ngo pe" ja: we' dau tau" nae" i?

¹⁹Mao"So: mung"dan: wa ceru we' dau: ra". Byu dayaug wa ao: shi: jid' re yu mung:- yao" yo mae sin" ke' ra". Ao: shi: wa yaug: qi" li" mung: ngho' jham wa ao: gae akaung jham mae asad' sad' ako"- ga: ta" ra".

²⁰Alao" Yesu wa- Mao"So: mung"dan: re ngo pe" we' dau tau" nae" i? Aiwa ceru we' dau: ra"- ga: ta" ra".

²¹Myiqe: dayaug man" re yu mung:- cin man" sam phai" mae ke' lao" cin man" bam geim" re bai" do, li" nhao: ra" man" we' dau: ra".

²²Yesu wa Yerusalem khyo ye" lo" ra" gyaung: khyo mae mo, byu qere mho" byid: zo" re" vozo: vozang khao: ngo" re su" lai: ye" ra".

²³Byu dayaug wa Yesu re- Asang we"- Khyad' yu qhug' ra" mo, dajhid' za: ngad nae" i? ga: myid' ra".

²⁴Yesu wa yao: bam re- Lhae" ra" kham: dung: khyo" vao ye: nae" qhid' mae" naonhaung" qam: ke' ge,- naonhaung" re ngo ta" geli"- byu myo: sho' mo, ai: kham: dung: khyo" vao ye: nae" qam: ke' li" genae"- ngadqere: yao: bam maqo" vao ye: genae".

²⁵Yham sang wa ai: kham: re li" pyid' pye' mung: naonhaung" wa ai: taung gaung mae ye; jo, yang: Asang we"- Ngonhaung" re kham: li" phung" byid: la, ga: mho' gelao"- yham sang wa- Naonhaung" khai: mae" joe" li" mo, ngad ko" rure ngo maba- ga: ta" li" nae".

²⁶Alao" naonhaung" wa- Ngonhaung" wa nao we' daga" zo: shaug' mung: na: qu" va" mo, ngad:- nao wa ngonhaung" vogaung: mae mho" shid' byid' qu" va" ra" ga: ta" li" genae".

²⁷Ngadqere: yham sang wa- Naonhaung" khai: mae" joe" li" mo, ngad ko" rure ngo maba- Makhyang" ra" mo, we"- ngo mae" thug' lo" ge,- ga: tau" li" nae".

²⁸Naonhaung" wa Mao"So: mung"dan: khug mae Abraham- Isag- Yaku we' lapa alhab' re myao gemung:- naonhaung" yao: wa ai: mung"dan: taung gaung shad' khyo khe' thug' pye' ru qhug' gelao"- ai:tau mae naonhaung" wa ngug byid ngug nhe' we' zaui kyag' yang: na: li" genae".

²⁹Byu qe wa ba thug'- ba vao- mug: am:- mug:thao shad' mae" joe" li" mung:- Mao"So: mung"dan: zo: shaug' poe mae li" zaung: jo; li" genae".

³⁰Amung: ana" athao" mae ngad: ra" mo, wa qhid' au: mae ngad: li" genae"- ana" qhid' au: mae ngad: ra" mo, wa athao" mae ngad: li" genae"- ga: ta" ra".

³¹Ai: yo, khyin: mae Pharishe qe daqhae: wa Yesu jhao" li" mung:- nao Cetau mae" gatau dakhyo khyo thug' ye" lo" wa,- pe"mung:ga"re Herod nao re se' pye' nae" seim" na: ra"- ga: ta" ako".

³²Yesu wa yao: bam re- ngo wa ana" ba we' ne, mo" ba gu: mae yui jham re khe' thug' mung:- no phyo: jham re gai byid: yang: na nae"- amung: sam ba: ba re wa nga" mau" zo" re zaui" pin" nae" ga" ein: ai: zagne pho" re lo" ta" kyo: ge,-

³³Ngadqere: ana" ba- ne, mo" ba- sao pho" ba wa ngo gyaung: xo' ye: ca" shi"- Lapa wa Yerusalem mae" je yang: gatau mae se' pye' qhug' nae" maang ngad: ra".

³⁴Yerusalem we"- Yerusalem we"- Lapa qere se' pye' mung:- Mao"So: yang nhao: ke' ra" lagyo: qere laug baui: yang nao pye' se' ra". Qo, zang wa qo, nau" jham re yao" daung khug mae zhang" to" ru we' dakhyo:- ngo wa ni" vobyu qere nga" lo, khug mae zhang" to: nae" qhid' mae" ngo khonho" lhang qam: ke' ngadqere: nao maqad ngad: ra".

³⁵Airumung: ni" Caung:pa" Yham re shapye' pye' ru qhug' li" nae". Nao re ngo ta" nae"- Mao"So: mang we' joe" li" ra" yaug wa ngaui lho" vashao: wo"- ga: nao mata" ta" wa ana" ba mae" nao ngore maqhug' myao lo nae"- ga: ta" ra".