Read Maru LUKA 14 Bible Online

LUKA 14 - Maru bible

LUKA 14

¹Dugno: Ba daba mae Yesu wa Pharishe au: jhaung dayaug: yham khyo zozo: nae" ga: vao ye" ra". Mo, byu qe wa Yesu re te' te'za: lhaug' qu" na: bam: ako".

²Khyid lo, qae: mung: no: ra" byu dayaug Yesu jhao" li" joe" na: jo; ra".

³Yesu wa Tarha" Mho" Pho" qe we' Pharishe qere- Ngonhaung" tarha" wa- Dugno: Ba mae no gai: gai byid' ga:- ta" ra" i? Mangad: lao"- magai: gai byid:- ga: ta" ra" i? ga: myid' ra".

⁴Ngadqere: yao: bam wa pe" dakheim: re: matau: ko" ngad: ra". Ailao" Yesu wa ai: no yaug re jhui" yu yang: gai byid: mung: yao: re phao nhao: ke' ra".

⁵Amung: Yesu wa yao: bam re- Naonhaung" mae" dayaug yaug wa yao: zo:- mangad: lao"- nung: lo: dadau: Dugno: Ba mae qid thaung: khug khyo byid: gyo" vao: jo; ngad: re aijao" yao: naonhaung" mashe: thug' yu lo: khag' na genae" i? ga: myid' ra".

⁶Ngadqere: yao: bam wa cedao: re maqo" phaug' tau: ko" ngad: ra".

⁷Bang" vo qemae" damyo" wa gai: thao" ra" jo, qo re khyin: na ko" rure Yesu qu" ba lao"- yao: wa yao: bam re dao: tau" ci yang:-

⁸Nao re dayaug yaug myi: vhin" poe khyo li" khai lao"- gai: thao" ra" jo, qo mae dazaung wa,-

⁹Nao tho' je: akhyag: ra" yaug rere: khai: to: mung:- ni" shid' zo: geim" re khai: to" ra" poe sang pho wa nao jhao" li" yang: Yao: re- cejo, qo mae zaung nhao wa,- ga: ta" lao"- nao wa qho' phau" ru we' nyham: thao" ra" jo, qo khyo qui" zaung ca" li" nae"- ga: ta" ra".

¹⁰Airumung: nao re khai gelao"- nyham: ra" zaung jo, qo mae yezaung wa,- ailao" nao re khai: ra" bang" sang pho wa nao jhao" li" mung:- ba nam pho" we"- Je: gai: ra" zaung jo, qo khyo li" zaung wa,- ga: nao re ta" nae"- ailao" nao wa bang" vo alhab' mo; qhid' kheim: mae nga: ye; li" nae".

¹¹Pe"mung:ga"re yao: yao" gaung re khin" ra" yaug wa nyham: khyo" pye' ru qhug' li" nae"- yao: yao" gaung re nyham: khyo" ra" yaug kam" wa khin" byid' ru qhug' li" nae"- ga: ta" ra".

¹²Ai: thao Yesu wa yao" bang" sang pho re Nao wa ne, xe: mangad: lao"- myi"xeim re da" zho: nae"ein lao"- ni" ba nam qe- ni" mao:nhaung: qe- ni" ba nam ug zo: qe- ni" yham kyo: cao: sathe" qere dakhai- pe"mung:ga"re yao: bam wa nao re dam: tug' khai zho: mung: nao re jeju dam: tug' xe' li" genae".

¹³Airumung: nao wa zo: shaug' poe da" zho: lao"- myaung sho: mo,- gaung dau: qeim mo, khyid gyug: mo, myo, jid mo, re khai zho: wa,-

¹⁴Alao" nao wa ngaui lho" li" nae"- pe"mung:ga"re yao: bam wa nao re jeju maqo" dam: xe' ko" ngad: ra". Din:man" ra" mo, dam: daui: to" li" ra" ba na mae Mao"So wa nao re jeju dam: xe' li" nae"- ga: ta" ra".

¹⁵Saboe" mae zaung: jo; ra" mo, mae" dayaug wa ai: dao: re the' gyo: lao"- yao: wa Yesu re- Mao"So: mung"dan: mae" zo: shaug' poe mae yeqo" vao zo: nae" yaug wa ngaui lho" ra" wo"- ga: ta" ra".

¹⁶Yesu wa yao: re- Byu dayaug wa zo: shaug' poe mo" dalam: seim" nyhang" na mung:- yao: wa byu myo: sho' re khai: to" ra".

¹⁷Ai: zo: shaug' poe ba na joe" lao"- yao" daui daui byu dayaug re yao: khai: to" ra" mo, jhao" nhao: ke' mung:- Li" gese,- Alhab' jin" va"- ga: yecao" ta" nhao: ra".

¹⁸Ngadqere: yao: bam wa dayaug: thao dayaug maqo" li" ra" khyo ta" ako". Sao qhid' mae" yaug wa- ngo yo dakhyao: vai: to"- ai re yequ" ca" ra"- Airumung: ngore akhang" byid: la,- ga: ai: daui daui yaug re ta" ra".

¹⁹Gatau dayaug wa- ngo wa nung: jaung lo: ngo" zam" vai: to"- Aijham we' mau" yezaui" jham" qu" ca" ra". Airumung: ngore akhang" byid: la,- ga: ta" ra".

²⁰Amung: gatau dayaug wa Ngo wa ana" za: shi" myi: yu: to: yang: maqo" li"- ga: ta" ra".

²¹Daui daui yaug wa dam: tug' lo mung: ai: gu: alhab' yao" asang re lota" kyo" ra"- yao" asang wa nhag' yo: mung:- yao" daui daui yaug re hau" mo" khyodang jham we' yham gyo: khaung: mae" khyodang jham khyo phyad thug' ye: mung: myaung sho" ra" mo,- gaung dau qeim: ra" mo,- myo, jid mo,- khyid gyug: mo, re yekhai: jhui" lo ri:- ga: ta" ra".

²²Mataung" myao" re ai: daui daui yaug wa dam: lo mung:- Asang we"- nao ta" ru we' dakhyo: bin: kad' va"- ngadqere: zaung jo, qo gung" jo; ashi"- ga: yao" asang re ta" ra".

²³Alao" asang wa yao" daui daui yaug re- Seyo: vogaung: khyo jham khyo phyad thug' ye: mung:- byu qere nga" yham byang" sho' maqad maqui" yekhai: jhui" lo ri:- ga: ta" ra".

²⁴Naonhaung" re ngo ta" geli"- ngo khai: to" ra" mo, wa nga" myi" xeim re qhug' tau" genae" mangad:- ga: ta" ra".

²⁵Dalhang: mae" mo, byu qe ajham ataung Yesu we' su" ye" lo" na ko" au:- Yesu wa yao: bam shad' khyo lhang: lo mung:-

²⁶Ngo jhao" li" ra" yaug khag' ngadqere: yao" myhi" pho"- yao" myi: zo:- yao" mao:nhaung: nhae: mo" we' yao: yao" gaung re jhid'de; ra" tho' ngore majhid'de; ra" yaug wa nga" mho"zo: maqo" boe" ngad: ra".

²⁷Amung: yao" pyao: zang re tau: vo, mung: nga" thao macao" ra" yaug khag' ngadqere: nga" mho"zo: maqo" boe" ngad: ra".

²⁸Naonhaung" mae" khag' ngadqere: gyebyu zaung kad' nae" ein lao"- aire bin sho' kad' nae" yao" lo, mae ngaui laug nae" malaug nae" gyo" ang: ra" gau jho re shi" zaung: jo, mung: masun" qu" nae" khag' na: i?

²⁹Yao: wa airu: masun" qu" lo:- apan aqao: wa yekad' qhid: to: mung:- ai: gyebyu zaung re maqo" kad' pin" ngad: re wa- aire myao: ra" mo, alhab' wa yao: re qi: jung" pye' li" genae".

³⁰Ceyaug wa apan aqao: wa zhaug' qhid: to: mung: maqo" kad' pin" ngad: ra"- ga: ta" li" genae".

³¹Amung kho: kham dayaug yaug wa yao: re gye kad' ra" kho:kham dayaug- gyezo: shid' tug we' gye to" li" ra" yaug re yao" gyezo: datug we' thug' ye: mung:- gye yezin: nae" ein lao"- yao: wa gyo" zaung mung:- ai: gatau kho:kham pho" we' gye zin: nae" yao" gyezo: qam: bo mabo: rure shi" sao qhid' mamyid: phyid' qu" ra" kho:kham na nae" i?

³²Yao: gye maqo" zin: re wa ai: gatau kho:kham pho" va: va: mae ngad shi" au:- yao: wa lagyo: qere nhao: ke' mung:- ai:gatau kho: kham pho" re mang: jho" dae nae" qhid' mae" mho' nhao: ke' li" nae".

³³Ai we' dakhyo:- naonhaung" mae" khag' ngadqere: yao: qo" ra" gu: alhab' re mato" pye' co' ra" yaug wa nga" mho"zo: maqo" boe" ngad: ra"- ga: dao: pin" ra".

³⁴Xo: wa gai: ra"- ngadqere: ai: xo: wa ngae: ru shao" byaug lao" wa dam: ngae sho' khoru: madam: gai: kad' ngad: ra".

³⁵Aiwa yo myid gaung qhid' mae" re:- myid xau kad' nae" qhid' mae" re: magai lo:ngad: ra". Amung: ai: xo: re taung gaung khyo shapye' pye' nae" za: angad: ra". Amung: nokhye' de; ra" yaug wa tae" gyo" yu vashao:- ga: ta" ra".