Read Maru LUKA 15 Bible Online

LUKA 15 - Maru bible

LUKA 15

¹Daba mae khang: gaug mo, myo: sho' we' qobo qo" ra" mo, wa Yesu mungdao: re tae" gyo: nae" ga: Yesu jhao" li" ako".

²Alao" Pharishe qe we' Jham: Tung" Pho" qe wa ceyaug wa qobo qo" ra" mo, re- bang" tug: yu mung: yao: bam we' lhao" re: zo daga" zo" ra"- ga: nyhung: ako".

³Airumung: Yesu wa ce: dao: tau" ci yang:- naonhaung" mae" dayaug yaug wa yao dayo dau: qo" mung:-

⁴Aimae" dadau: byaug: byaug lao"- yao: pe" ru: kad' nae" i? Yao: wa ai: dang: ra" gug xe: gug dau: re mhin: gyo, jao: mae nha: to: co' mung: ai: byaug: lo" ra" yao re myao sho' qho: li" nae".

⁵Ai: byaug: ra" yao re qho: myao lao"- yao: wa gyai bau" ru we' yao" lo, sin dao mae vo, yang: dam: lo: ra".

⁶Yham khyo joe" lo lao"- yao: wa yao" ba nam qere we' yham kyo: cao: qere khai: zhang" yu mung:- Byaug: byaug: ra" nga" yao dam: qho: qhug' va"- ngo we' daga" ngaui bau: gelang:- ga: ta" li" nae".

⁷Naonhaung" re ngo ta" geli"- ai we' dakhyo:- myid tha" maca"- ga: myid: na ko" ra" din:man" ra" byu gug xe: gug yaug: mathao mae ngaui bau" ra" tho' qobo qo" ra" byu dayaug myid tha" lo: ra" mathao: yang- mug:gaung dao mae je yang: ngaui bau" ra"- ga: ta" ra".

⁸Amung: dakhyo" wa myiqe: dayaug wa- ngaui thang: the: daxe kye' qo" mung:- aimae" dakye' byaug: byaug lao"- yao: wa pe" ru: kad' nae" i? Yao: wa myikaug' te' yang: yham geim" sham: mung: aire myao sho' khyi" khao: ngo" jid' jid' naug naug qho: li" nae".

⁹Yao: wa ai: ngaui thang: the: re qho: myao lao"- yao" ba nam qe we' yham kyo: cao: qere khai: zhang" yu mung:- Byaug: byaug: ra" nga" ngaui thang: the: kye' dam: myao va"- amung: ngo we' daga" ngaui bau: gelang:- ga: yao: bam re ta" li" nae".

¹⁰Naonhaung" re ngo ta" geli"- ai we' dakhyo: Mao"So: mug: lagyo: wa qobo qo" ra" byu dayaug myid tha" lo: ra" mathao: yang ngaui bau" ako"- ga: ta" ra".

¹¹Yesu xo' yang: ta" ru wa- dalhang: mae" byu dayaug wa yauggai zo: shid' yaug qo" ra".

¹²Angai yaug wa yao: pho" re- Nga" pho" we"- ngo sang ang: ra" jo,nho" re ana" yao: ngore gae bam khyo" byid: la,- ga: mho' ra". Ailao" yao: pho" wa yao: zo: tao re yao" jo,nho" gae byid' ra".

¹³Ai: thao mataung" myao" re yao: zo: angai yaug wa jo,nho" gae bam re aung" pye' mung:- jo,nho" aung: yang: qo" ra" ngaui alhab' re vin mung:- yham mae" thug' lo" ra". Yao: wa va" ra" mung" khyo ye" lo" mung:- ai: mung"dan: mae pyo: poe" kad' mung: mageim: be, lhu" pye' ra".

¹⁴Yao" ngaui alhab' yhung: zo" gan thao re ai: mung"dan: geim" mae bao" khug' mo" zang khug' lo mung:- yao: wa masho: majhin ngad: byaug: ra".

¹⁵Airumung:- yao: wa ai:mung" mae" byu dayaug jhao" yecao: khug: na: ra". Ai: yaug wa yao: re yao" khyae khyo vo, yezam: nae" qhid' mae" nhao: ke' ra".

¹⁶Yao: wa vo, jham zo" ra" vo, zo shagyao: daung" re lhao"- zo: nug: li" ra". Ngadqere: yao: re zo:ve khag' re: mabyid: zho: gengad: ra".

¹⁷Lo" thao" mae myid: beim" li" mung:- nga" pho" okaung qe alhab' wa magan: mago" qo" zo" ako"- ana" ngo wa cetau mae moe; kyaug' shid: lo" na:-

¹⁸Ngo wa to" mung:- nga" pho" jhao" lo" mung:- nga" pho" we"- ngo wa Mao"So rere:- nga" pho" nao rere: shad' va"-

¹⁹Ngo wa ni" zo: ein: ta" nae" lhao" re: maman: qi" lo:ngad: ra"- ni" okaung pho" dayaug we' dakhyo: ngore to: la,-ein: nga" pho" re lo" ta" nae"- ga: ta" ra".

²⁰Alao" yao: wa to" mung: yao: pho" jhao" phao: lo" ra". Yao: va: va: mae ngad shi" au: mae" yao: pho" wa yao: re myao mung:- nhag' qu" khyag' ru we' tao" ye: yang:- yao: zo" lang zang: re yege; vo, mung:- bobaug baug: ra".

²¹Yao: zo: wa nga" pho" we"- ngo wa Mao"So rere:- nga" pho" nao rere: shad' va"- ngo wa ni" zo: ein: mhang" nae" lhao" re: maman: qi" ngad: ra"- ga: ta" ra".[1]

²²Ngadqere: yao: pho" wa yao" daui daui mo, re- Gai: thao" ra" bau: qhang phyad yu: lo mung: yao: re lovhe' byid: geri:- yao" lo, mae lo, pin: lopin: byid: geri:- yao" khyid mae khyid zhaung: lozhaung: byid: geri:-

²³Amung: myhaug' to" ra" nung: jaung nau" se' ge,- amung: ngonhaung" ngaui ngaui bau: bau: za: zo: shaug' poe kad' gelang:-

²⁴Pe"mung:ga"re nga" zo: ceyaug wa shid va" ru ngad:- ngadqere: ana" dam: daui: li" va". Yao: wa byaug: byaug va" yaug ngad:- ana" wa dam: myao va"- ga: ta" ra". Amung: ngaui ngaui bau: bau: zo: shaug' poe kad' ako".

²⁵Ai: au: zoqhid' yaug wa yo mae ngad: ra". Yo mae" lo mung:- yham khyo jhao" li" na lao"- yao: wa zang- mao" be, thoe we' go" na ko" ra" thoe re lothe' gyo" ra".

²⁶Airumung: yao: wa daui daui byu dayaug re khai: yu mung:- Pe" kad' na ko" ra" i? ga: myid' ra".

²⁷Ai: daui daui yaug wa ni" nhaung: dam: joe" lo mung: ni" pho" wa Ni"- nhaung: pe" maqo byan: byan: za: dam: joe" lo yang: myhaug' to" ra" nung: jaung nau" re se' nhao va" ra"- ga: tau" ra".

²⁸Zoqhid' yaug wa gyai nhag' yo: mung:- yham khug khyo mavao lo" lo: na: ra". Ailao" yao: pho" wa thug' ye: mung:- yham khug khyo vao lo nae" qhid' mae" yejhu" ra".

²⁹Ngadqere: yao: zo: zoqhid' yaug wa yao: pho" re- Qu" wa,- ngo wa jeim dayaug we' dakhyo: ni" qhid' mae" cenho" zin mau" zaui" lo va"- ni" amyin" dao: re ngo khonhae" re: mangag: qu"- ngadqere: nao ngore pe" daja: byid' qu" i? Nga" byin cao: qe we' pyo: poe" kad' nae" qhid' mae" cad' be, dadau: lhao" re: nao ngore mabyid' qu" ngad: ra".

³⁰Ngadqere: ni" jo,nho" jham re shava myhi" qe we' zam" mung:- mageim: da" sin" pye' ra" ce: ni" zo: dam: joe" lo lao"- nao wa yao" qhid' mae" myhaug' to" ra" nung: jaung nau" se' ra"- ga: ta" ra".

³¹Yao: pho" wa Nga" zo: we"- nao wa khonhae" re: ngo we' daga" za: na: ra"- ngo qo" gu: alhab' ni" mae" ngad: ra".

³²Ni" nhaung: wa shid: byaug va" ru ngad:- ngadqere: yao: wa ana" dam: daui: li" va" ra"- yao: wa byaug: byaug va" ru ngad: ra"- ana" wa dam: myao va". Aimung: ngonhaung" wa ngaui bau: za: zo: shaug' poe kad' gai: ra"- ga: jhu" ra"- ga: ta" ra".