Read Maru LUKA 16 Bible Online

LUKA 16 - Maru bible

LUKA 16

¹Yesu wa yao" mho"zo: qere- Dalhang mae- sathe" dayaug wa yao" jo,nho" re zam: pyo byid' ra" daui daui byu dayaug qo" ra". Ai: daui daui yaug wa sathe" pho" jo,nho" jham re mageim: da" sin" pye' na: ra"- ga: sathe" pho" re ta" kyo" ako".

²Airumung: sathe" pho" wa yao: re khai: yu yang:- ni" khyo we' sin: mung: ngo the' gyo" ru wa pe" ru: i? Nao zam: pyo: na: ra" nga" jo,nho" japhin: alhab' sho' qhu" la,- pe"mung:ga"re ana" mae" thoegu: zam: pyo mau" kad' zai mangad: lo:- ga: ta" ra".

³Ai: daui daui yaug wa yao: yao: re- Nga" asang wa ngore zam: pyo mau" mae" phoe' pye' naeva" myao:- ngo pe" ru: kad' nae" i? Myid dau: myid baug nae" qam: o: mabo- Mho' zo: mho' shaug' nae" re: ngo qho' ra".

⁴Ngo re zam: pyo mau" mae" phoe' pye' lao"- su bam ngore yao: bam: yham mae lham: khae: yu nug gesho' pe" ru: kad' nae" rure ana" ngo ba va"- ga: ta" ra".

⁵Airumung: yao: wa yao" asang re jhin de, ko" ra" mo, alhab' re khai: yu: ra"- yao: wa sao qhid' yaug re- Nao nga" asang re jhin khonho" de; i? ga: myid' ra".

⁶Ai: yaug wa zhanlun xau yae: dayo jhin de;- ga: ta" ra". Zam: pyo pho" wa ni" japhin: ce ngad: ra"- Gyo" zaung mung:- ngo" xe ein: tung" wa,- ga: ta" ra".

⁷Ai: thao yao: wa gatau dayaug re Nao re: nga" asang re jhin khonho" de; i? ga: myid' ra". Ai: yaug wa jung: gaug tang dataung de;- ga: tau" ra". Zam: pyo pho" wa Ni" japhin: cemae ngad: ra"- Gyo" zaung mung: she' yo ein: tung" wa,- ga: ta" ra".

⁸Ai: nhag' lam: madin" ra" zam: pyo pho" wa airu: qag qag za: kad' ruyang yao" asang wa yao: re khin" byid' ra". Pe"mung:ga"re ce: myid gaung byu qe wa yao: bam: myid gaung: mau" zo" kad' rumae mug: bo" yao: zo: qe tho' je: qag: ako".

⁹Yesu wa xo' yang: Naonhaung" re ngo ta" geli"- Myid gaung dao: jo,nho" yang naonhaung" yao" ba nam kad' yu ge,- amung: ai: jo,nho" gan: byaug lao"- naonhaung" wa apyad ato: yham mae khae: yu: ru qhug' li" genae".

¹⁰Ngai: ra" mau" zo" mae kyid: ra" yaug wa qi" ra" mau" zo" mae re: kyid: li" nae"- Ngai: ra" mau" zo" mae nhag' lam: madin" ra" yaug wa qi" ra" mau" zo" mae re: nhag' lam: din: nae" mangad:-

¹¹Airumung: myid gaung dao: jo,nho" we' sin: yang: naonhaung" makyid ko" ngad: re wa dangman" ra" jo,nho" we' sin: yang: naonhaung" re khag' lam genae" i?

¹²Naonhaung" wa su gaje qe sang: ra" jo,nho" we' sin: yang: makyid ko" ngad: re wa naonhaung" sang ang: ra" jo,nho" re naonhaung" re khag' byid' li" nae" i?

¹³Daui daui byu okaung khoyaug ngadqere: asang shid' zo" nho: jeim maqo" kad'- yao: wa dayaug re nghang: mung:- gatau dayaug re wa jhid'de; li" nae"- Dayaug re wa phug' myao: mung: gatau dayaug re maphug' makhyad' kad' li" nae" Aimung: naonhaung" wa Mao"So re we' ngaui qhang jo,nho" shid' ja: geim" re jeim maqo" kad' genae"- ga: ta" ra".

¹⁴Ai: dao: alhab' re ngaui qhang jo,nho" so' kho' mo, ngad ko" ra" Pharishe qe gyo: gelao"- yao: bam wa Yesu re jung" ako".

¹⁵Yesu wa yao: bam re Naonhaung" wa su gaje: qhid' kheim: mae yao: yao" gaung din:man: mo, ngad: ako"- ga: qu" jho nae" kad' mo, ngad: ako"- ngadqere: Mao"So wa naonhaung" nhag' lam: re ba: ra"- pe"mung:ga"re byu: yang phug' te' ra" ja: wa Mao"So: qhid' kheim: mae phug' made, ngad: ra".

¹⁶Moshe Tarha" dao: we' lapa qe: jham: paug' jham wa qid nyhab' Yohan joe" li" ra" ba na joe" sho' kheim: so' bo: jo; ra"- Yohan joe" li" ra" ba na mae" Mao"So: mung"dan: Ngaui Bau" Lau Dao: Gai wa ta" hau" lo: na mung:- yaug khao: ngo" ai: mung"dan: khug khyo jhin" jhe' vao ye" ako".

¹⁷Ngadqere: ai: Tarha" dao: mae" ngai: thao" ra" tung" ce' dace' byaug: lo" nae" laui: ra" tho' mug:gaung we' myid gaung baui" lo"nae" je yang: laui: ra".

¹⁸Yao" yham sang myhi" re kao" pye' yang: gatau dayaug re dam: vhin" yu: ra" yaug wa myi: shad' yaug ngad: ra"- Kao" pye' to" ra" myiqe: re vhin" yu: ra" yaug re: myi: shad' yaug ngad: ra".

¹⁹Dalhang: mae sathe" dayaug wa phug' thao" ra" ve,mai ve,bau: re ve, yang: ba khao: ngo" zo: pyo: shaug' pyo: yang: na: ra".

²⁰Myaung sho: mung: gaung geim" jad: ra" Lazaru ga: mang: ra" byu dayaug re: sathe" pho" yham kham: dung: mae li" jhui" nha: to: to: kad' ako".

²¹Yao: wa sathe" pho" saboe" mae" sheim: gyo" ra" zosheim re the' zo: nae" myid: lao" na: ra". Lakha: jham lhao" re: yao" dae jad: re li" yo, byid' ako".

²²Ai: thao re ai: myaung sho" ra" yaug wa shid: lo" mung:- mug: lagyo: qeyang Abraham nho: lo, yo shad' mae zaung: jo, nae" vo; lo" byaug: ako"- Sathe" pho" re: shid: lo" mung:- nyhab' shaung: pye' ako".

²³Sathe" pho" wa movo: mug: mae gyai dayin dayo: kham zo: mung: tau: qu" ke' re Abraham rere: Abraham nhae mae zaung: jo; ra" Lazaru rere: va: mae" myao: ra".

²⁴Airumung: yao: wa nga" pho" Abraham we"- ngore nhag' khyag' yu la,- ngo wa ce: myikhyeim" khug mae dayin dayo: kham zo" na:- Lazaru wa qid mae yao" lo, nyhug' au: thug' jam: yu yang: nga" sho re li" tag' byid: nae" qhid' mae" yao: re ngojhao" nhao: ke' byid: la,- ga: hug' ta" ra".

²⁵Ngadqere: Abraham wa Nga" zo: we"- nao wa daui: na shi" au: ngaui bau: ngaui lho" qhug' kham zo" lo: rure re:- Lazaru wa dayin dayo: masho: majhin kham zo" lai: lo: rure myid: beim: wa,- ana" yao: wa cemae ngaui bau: ngaui lho" qhug' kham zo" na: ra"- nao wa dayin dayo: no kham zo" na: ava".

²⁶Ai: tho' mago" cetau mae" naonhaung" jhao" de; ye: nug mo, maqo" de; ye: genae" we' naonhaung" na: mae" ngonhaung" jhao" maqo" de; li" genae" qhid' mae" ngonhaung" we' naonhaung" agyo: mae gyai no; ra" lao: khaung: dalam: jo; ra"- ga: ta" ra".

²⁷Sathe" pho" wa Ailao"- nga" pho" Abraham we"- Lazaru re nga" pho" yham khyo nhao: ke' byid: nae" ngo goe; mho' ra".

²⁸Nga" nhaung: bam ngo" zo: na shiko" ra"- yao: bam khalhao" dayin dayo: no kham zo" ra" cejo, qo khyo mali" genae" qhid' mae" yao: bam re lo" ta"peim: byid: nhao la,- ga: ta" ra".

²⁹Alao" Abraham wa yao: re- Ni" nhaung: bam re ta"peim: byid: nae" Moshe we' lapa qe na: bam: ako"- ni" nhaung: bam wa aibam: dao: re tae" gyo: vageshao:- ga: ta" ra".

³⁰Sathe" pho" wa- Nga" pho" Abraham we"- ai:yang za: maga" nae"- Shid: byaug va" mo, mae" daui: li" ra" dayaug yaug yao: bam jhao" ye" lo" ngad: re wa yao: bam myid tha" lo: li" genae"- ga: ta" ra".

³¹Ngadqere: Abraham wa Moshe we' lapa qe: dao: re matae" gyo: ko" re wa shid: rumae" dayaug yaug daui: li" ngadqere: yao: bam lam" genae" mangad:- ga: ta" ra".