Read Maru LUKA 17 Bible Online

LUKA 17 - Maru bible

LUKA 17

¹Yesu wa yao" mho"zo: qere- Byu re nhag' lam: tha" lang: nhao: ra" ja: jham wa khonhae" re: boe" zai ngad: ra"- ngadqere: aijham re boe" nhao: ra" yaug wa byuxa: vaqoe, qhug' ra".

²Ce: ngai: ra" mo, mae" dayaug re nhag' lam: tha" lang: nhao yaug wa yao" lang zang: mae laug lhang taui" lhao: mung: panglai: khug khyo pye' zaui: pye' qhug' ru wa yao" qhid' mae" je: gai: ra".

³Airumung: naonhaung"wa lha" yang: na ge,- (Ni" mao:nhaung: pho" nao re shad' ngad: re- yao: re qeim wa,- yao: myid tha" lo lao" wa qobo khyad' byid: wa,.

⁴Daba na mae za: yao: wa nao re nhad' lang shad' mung:- nhad' lhang: geim" nao jhao" li" yang: ngo myid tha" va"- ga: ta" lao" wa yao" qobo re khyad' pye' byid: ca" ra"- ga: ta" ra".)

⁵Alao"- lagyo: qe wa Asang re- ngonhaung" lam khug: myid re je: qi" li" nhao la,- ga: mho' ako".

⁶Asang wa yao: bam re- Naonhaung" lam khug: myid ao: shi: jid' qhi" bo gelao" re:- ce: thaung zo gae re- Agyi: we' daga" apan mae" ban" lo" mung: panglai: mae yeyaug: jo, wa,- ein: ta" gelao" thaung zo gae wa naonhaung" mho dao: re tae" gyo" li" nae".

⁷Naonhaung" mae" dayaug yaug wa yothaung: phaug' ra" daui daui okaung- mangad: lao"- yao lhaug' ra" daui daui okaung dayaug qo" ein: gelang:- ai: daui daui okaung pho" yothaung: mae" dam: joe" lo lao"- Myi" xeim zo: nae" phyad lozaung ri:- ein: yao: re naonhaung" khag' ta" genae" i?

⁸Naonhaung" mata" genae"- yao: re yaug kam" wa nga" myi" xeim phyad nyhang" jaung wa,- ngo zo: shaug' na: au:- mai bau: nyhang" ve,- lo, cid' pye' yang: ngore caung da" la,- ai bin thao re nao zo: shaug' wa,- ga: naonhaung" ta" genae" mangad: i?

⁹Daui daui yaug wa asang: amyin" dao: re tae" gyo" ruyang yao: re pe" jeju beim: maqo ngad: ra".

¹⁰Ai we' dakhyo:- naonhaung" re ta" to" ra" mau" zo" alhab' re bin: zaui: gelao"- ngonhaung" wa mageim: daui daui byu qe angad:- ngonhaung" wa ngonhaung" yao" mau" zo" re zaui: mo, za: angad:- ein: ta" ge,- ga: ta" ra".

¹¹Yesu wa Yerusalem vogaung: khyo ye" lo" na: au:- yao: wa Samari mung" we' Galile mung" kyo: khyo" lai: ye" lo" ra".

¹²Vogaung: dalam: khyo vao ye" lo" re- mao gae: de; ra" byu daxe yaug wa Yesu re li" qhug' ako".

¹³Yao: bam wa va: va: mae ye; jo, mung:- Asang Yesu we"- ngonhaung" re nhag' khyag' yu la, wo"- ga: zag: hug' ako".

¹⁴Yao: bam re Yesu myao lao" yao: wa- <Naonhaung" gaung khinjaung qere lo" qhu" byid: ge,-> ga: yao: bam re ta" ra".

¹⁵Yao: bam khyo mae lo" na: au: no gai: shao: lo" byaug ko" ra". Yao: bam mae" dayaug wa yao: gai: shao: lo" byaug va" rure ba lao"- dam: tug' lo mung:- thoe qi: we' Mao"So re caung:khin" byid'ra".

¹⁶Yao: wa Yesu khyid qao: khyo goe; gyo" yang: Yesu re jeju beim: so" ra"- aiyaug wa Samari byumyu" ngad: ra".

¹⁷Yesu wa- (Byu daxe zo: mao gae: gai: shao: lo" byaug vako" ra" mangad: i? Gatau gug zo" gu: khai: lo" ko" ra" i?

¹⁸Pe"mung: ce: taung bug byu dayaug za: Mao"So: jeju re caung: byid: nae" dam: tug' lo: ra" i? ga: myid' ra".

¹⁹Yesu wa yao: re- To" mung: lo" se,- ni" lam khug: myid wa nao re gai: shao: lo" nhao: ava"- ga: ta" ra".)

²⁰Pharishe qe daqhae: wa Yesu re Mao"So: mung"dan: khonhae" joe" li" nae" i? ga: myid' ako"- Alao" Yesu wa- Mao"So: mung"dan: wa myo; yang myao: ra" khyo" joe" li" nae" mangad:-

²¹Qu" ge,- Mao"So: mung"dan: wa cetau mae ngad: ra"- Mangad: lao"- thoe:tau mae ngad: ra"- ga: khag' re: maqo" ta" ngad: ra"- pe"mung:ga"re Mao"So: mung"dan: wa naonhaung" khug mae ngad: ra"- ga: yao: bam re tau" ra".

²²Ai: thao Yesu wa yao" mho"zo: qere- Byu: Yao: Zo" nho: ba na mae" daba re- naonhaung" myao nug kao bau nae" ra" ba na joe" lo: li" nae"- ngadqere: naonhaung"aire maqhug' myao genae".

²³Byu daqhae: wa Qu" ge,- Byu: Yao: Zo: wa thoe:tau mae na: ra"- cetau mae na: ra"- ga: ta" gengad yang: re:- naonhaung" daye: qho ge,.

²⁴Lhe' cad' wa mug: myid dashad' mae" gatau dashad' joe" sho' mug:gaung mae bao: qhui: lai: lo" ru we' dakhyo:- Byu: Yao: Zo: re: yao" ba na mae airu: ngad: li" nae".

²⁵Ngadqere: Byu: Yao: Zo: wa dayin dayo: myo: sho' kham zo" ru we' ceqae" mae" byu qeyang ngag: ha: pye' rure sao qhid' kham zo: ca" li" nae",

²⁶Noa ban: pyad mae boe" ru we' dakhyo:- Byu: Yao: Zo: joe" li" nae" ba na mae re: airu: boe" nae".

²⁷Noa wa qid sang pho khug khyo vao lo" mung: daqid shi" li" yang: alhab' mo, nab: shid: lo" ra" ba na joe" sho' xao su byu qe wa zo: zo: shaug' shaug' myi:byid:- myi:yu mung:- na: ako".

²⁸Ai we' dakhyo:- Lod ba na mae re: byu qe wa zo: zo: shaug' shaug' zai vai zai aung:- qho: zo: qho: shaug'- yham zhaug' yang: na: ako".

²⁹Sodom vogaung: mae" Lod thug' lo" ra" ba na mae mug:gaung mae" myi: we' vhang qu: gyo" lo mung:- byu alhab' mo, re ngha" se' pye' ra".

³⁰Byu: Yao: Zo: joe" thug' li" ra" ba na mae re: ai we' dakhyo: ngad: li" nae".

³¹Ai: ba na mae yao" yham khaung dao mae na: ra" yaug wa gyo" lo" mung: yham khug mae" yao" ngaui qhang jo,nho" yu: ci nae" davao lo" shao:- ai we' dakhyo:- yothaung: din" mae na: ra" yaug re:- yham khyo datug' lo" shao:-

³²Lod nho: yham sang myhi" re myid: beim: ge,-

³³Yao: yao" kao so' re khyad' yu nug: ra" yaug khag' ngadqere: kao so' jeim: nae"- yao: yao" kao so' jeim: yaug wa kao so' khyad' yu: ru qhug' nae".

³⁴Naonhaung" re ngo ta" geli"- ai: myi re yab qo dalam: mae za: yab: jo, ko" ra" byu shid' zo: re dayaug re wa jhui" lo" mung:- dayaug re wa tang" to: co' li" nae".

³⁵Laug lhang dalam: mae za: daga" gyag: na ko" ra" myiqe: shid' zo: mae" re: dayaug re jhui" yu mung:- dayaug re wa tang" to: co' li" nae".

³⁶(Yo mae mau" daga" zaui" na ko" ra" byu shid' zo: mae" byu dayaug re jhui" yu mung:- dayaug re wa tang" to: co' li" nae"- ga: ta" ra".)

³⁷Mho"zo: qe wa Yesu re Asang we"- ai kho:tau mae boe" zai ngad: ra" i? ga: myid' ako". Yesu wa- sushid mao jo; ra" jo, qo mae nang da ngho' jham zang" ham: li" genae"- ga: ta" ra".