Read Maru LUKA 18 Bible Online

LUKA 18 - Maru bible

LUKA 18

¹Ai: thao Yesu wa yao" mho"zo: qere khonhae" re: akyu" mho' na genae" qhid' mae" we' qam: mashan genae" qhid' mae" dao: tau" ci yang: yao: bam re mho" byid' ra".

²Vogaung: dalam: mae Mao"So rere: magyaug- byu rere: maphug' ra" tarha" zug: dayaug na: ra".

³Ai: vogaung: mae cug' mo" myhi" dayaug re: na: ra"- yao: wa tarha" zug: pho" jhao" dazab: makyo li" mung:- ngo we' tarha" yung" jho" zaung: ra" yaug: agyo: mae nga" shad' mae din:man" ra" khyo" dao: kho' byid: la,- ga: tarha" zug: pho" re mho' ra".

⁴Ngadqere: tarha" zug: pho" wa ba na myao" sho' dao: makho' byid: lo: na: ra". Thao re tarha" zug: pho" wa- ngo wa Mao"So rere: magyaug- byu rere: maphug' yaug ngad:-

⁵Ngadqere: ce:- cug' mo" myhi" wa ngore khin jang: na: ruyang tarha" din: vang" ra" khyo" yao" shad' mae ye, yang: dao: kho' byid: nae"- ngo airu: makad' re wa yao: wa ngojhao" dazab zab li" yang: lo" thao" mae ngore gyai myid myaung: nhao: li" nae"- ga: yao" aung khug mae ta" ra".

⁶Asang wa xo' yang:- ai: madin: man" ra" tarha" zug: pho" ta" ra" dao: re tae" gyo" qu" ge,-

⁷Mao"So wa myi" re: na" re: mho' yao: na ko" ra" yao" byu qe: shad' mae ye, yang: tarha" din: vang" ra" khyo" dao: makho' byid: lo: na nae" i?

⁸Naonhaung" re ngo ta" geli"- Mao"So wa phyad phyad za: yao: bam: qhid' mae" tarha" din: vang" ra" khyo" dao: kho' byid' li" nae"- ngadqere: Byu: Yao: Zo: joe" li" ra" ba na mae myid gaung dao mae lam khug: myid re li" the' myao shinae" laug?- ga: ta" ra".

⁹Yesu wa yao: yao" gaung re gai beim: mung: su gaje qere qu" ngai: ra" mo, re ce: dao: tau" ci yang: ta" ra".

¹⁰Dalhang mae byu shid' yaug wa akyu" mho' nae" qhid' mae" Caung:pa" Yham khyo ye" ako". Dayaug wa Pharishe ngad mung:- dayaug wa khang: gaug yaug ngad: ra".

¹¹Pharishe pho" wa yao: za: gatau ye; jo, mung: Pho" Mao"So we"- ngo wa su gaje qe we' dakhyo: so' kho' yaug- nhag' lam: madin: yaug- su: myi: lhad' yaug mangad:- Aitho' mago" thoe: khang: gaug yaug we' dakhyo: re: mangad: mung:- ngo nao re jeju caung: byid' ra".

¹²Ngo wa dalaban mae shid' ba zo:ve jao" mung: ngo the' ra" gu: alhab' mae" daxe bam mae" dabam nao re byid'- ga: akyu" mho' ra".

¹³Ngadqere: khang: gaug yaug wa va: mae ye; jo, yang:- mug:gaung khyo lhao" mavae" tau: qu" lo:- yao" qao gao mae theim yang: Pho" Mao"So we"- Qobo jab ngore nhag' khyag' yu la, wo"- ga: akyu" mho' ra".

¹⁴Yesu wa Naonhaung" re ngo ta" geli"- Pharishe yaug mangad:- khang: gaug yaug kam" wa Mao"So: qhid' kheim: mae din:man: yaug khyo" yham khyo phao: lo" ra". Pe"mung:ga"re yao: yao" gaung re khin" yaug khag' ngadqere: nyham: khyo" pye' ru qhug' li" nae"- yao: yao" gaung re nyham: khyo" ra" yaug khag' ngadqere: khin" byid' ru qhug' nae"- ga: ta" ra".

¹⁵Byu daqhae: wa yao: bam: zonau" qe: dao mae Yesu yao" lo, kai: byid: vashao:- ga: yao: bam: zonau" qere Yesu jhao" jhui" li" ako"- ai:rure mho"zo: qe myao gelao"- yao: bam re qeim: ako".

¹⁶Ngadqere: Yesu wa zoshao qere yao: jhao" khai: yu yang:- ai: zoshao qere ngojhao" lo nhao: ke' ge,- yao: bam re datam" to: ge,- pe"mung:ga"re Mao"So: mung"dan: wa airu" mo; mung"dan: ngad: ra".

¹⁷Cere xam" to: ge,- Khag' ngadqere: Mao"So: mung"dan: re ce: zoshao dayaug we' dakhyo:- makhae: yu: ra" yaug wa ai: mung"dan: khug khyo maqo" vao ye: nae"- ga: ta" ra".

¹⁸Yuda au: jhaung dayaug wa Yesu re- Gai: ra" Mho"Pho" we"- Apyad ato: kao so' qo" yu nae" qhid 'mae" ngo pe" kad' ca" i? ga: myid' ra".

¹⁹Yesu wa yao: re Nao ngore- pe"mung: gai: ein: ta" i? Mao"So mae" je yang: gai: ru khag' re: mana-

²⁰Nao wa kham" to" ra" tarha" jham mae bo: ra" Myi: shad' lao dashad'- Byu dase'- Dakhug'- Madang: ra" sagse: dakham- Ni" myhi" we' ni" pho" re phug' myao: wa, ga" ra" tarha" dao: re ba gau ngad: ra" mangad: i? ga: ta" ra".

²¹Ailao" ai: yaug wa Yesu re- Ai: kham" to"ra" dao: alhab' re ngo zoshao: yo, mae" phug' cao" lo va"- ga: phaug' tau" ra".

²²Yesu cedao: re the' gyo: lao" yao: re- Nao daja: kad' ca"shi" ra"- nao qo" ra" gu: alhab' re aung" pye' mung:- myaung sho: mo, re gae byid: wa,- ailao" nao wa mug:gaung dao mae jo,nho" qo" nae". Airu: bin: kad' lao"- nga" thao cao" wa,- ga: ta" ra".

²³Ngadqere: ai: yaug wa cedao: re the' gyo: lao"- yao: wa gyai nhag' kaug' lo" byaug: ra". Pe"mung:ga"re yao: wa jo,nho" gyai qo" yaug ngad: ra".

²⁴Yao: airu: nhag' kaug' rure Yesu myao mung:- Jo,nho" qo" ra" mo, wa Mao"So: mung"dan: khyo vao ye: nae" gyai qug' ako".

²⁵gola:u wa nghe' no: dung: khyo" lai: lo" nae" qug' ra" tho' jo,nho" qo" ra" yaug: qhid' mae" Mao"So: Mung"dan: khyo vao ye: nae" je: qug' ra"- ga: ta" ra".

²⁶Ce:dao: re the' gyo" ra" mo, byu qe wa Yesu re- Aire khyad' yu: ru khag' za: qhug' zai i? ga: myid' ako".

²⁷Yesu wa tau: mung:- Byu: yang maqo" kad' boe" ra" ja: alhab' re Mao"So wa qo" kad' boe" ra"- ga: ta" ra".

²⁸Alao" Petru wa Qu" wa,- ngonhaung" wa ngonhaung" yham dang: yokhyao: to" pye' co' yang: ni" thao cao" va"- ga: ta" ra".

²⁹Yesu wa yao: bam re Ngad va"- naonhaung" re ngo dang za: ta" geli"- Mao"So: mung"dan: mathao mae yao: yao" yham- mangad: lao"- yham sang myhi"- mangad: lao"- mao:nhaung:- mangad: lao"- myhi" pho"- mangad: lao"- zo: dau qere to: co' ra" yaug khag' ngadqere:-

³⁰ana" ce: pyad mae myo: sho' nho" qo" khae: yu: li" genae"- amung: thao: pyad mae wa apyad ato: kao so' qo" khae: yu: li" genae"- ga: ta" ra".

³¹Yesu wa mho"zo: daxe: shid' yaug re gatau jhui" yu yang: yao: bam re- Tae" gyo: ge,- ngonhaung" Yerusalem khyo ye" lo" na: ru ngad:- Byu: Yao: Zo: we' sin: yang: lapa qe tung" ra" jham: dao: alhab' jab byang" lo: li" nae".

³²Byu: Yao: Zo: re taung bug qe: lo, khyo ab byid' pye' li" genae"- yao: bam wa yao: re jung" mung:- roe" ru we' khata: phoe" sheim" li" genae"-

³³Yao: bam wa yao: re be, mung: se' pye' li" genae"- ngadqere: sam ba kyo thao re yao: wa dam: daui: to" li" zai ngad:- ga: ta" ra".

³⁴Ngadqere: mho"zo: qe wa ai: dao: dakheim: rere: maba: gyo: ko" ngad: ra". Dao: lajheim: re yao: bam maba: gyo: genae" qhid' mae" nyham" to: byid' ruyang Yesu pe" ta" na: rure yao: bam maba: gyo: gengad: ra".

³⁵Yesu Yerikho vogaung: khyo joe" lo: na: au:- myo, jid pho" dayaug wa khyoyae mae zaung: jo, yang: mho' zo" na: ra".

³⁶Yao: wa byu ajham ataung su" lai: lo" na: ra" thoe re the' gyo: lao"- pe" ngad: ra" i? ga: myid' ra".

³⁷Yao: bam wa Nazared mae" Yesu su" lai: lo" na: ra"- ga: ta" kyo"ako".

³⁸Ailao" yao: wa Davi yao: zo: Yesu we"- ngore nhag' khyag' yu la, wo"- ga: zag: hug' ra".

³⁹Qhid 'au: mae su" ra" mo, wa sae za: na nae" qhid' mae" yao: re qeim: ako"- ngadqere: yao: wa thoe je: to' mung:- Davi yao: zo: we"- ngore nhag' khyag' yu la, wo"- ga: zag: hug' ra".

⁴⁰Ailao" Yesu wa thang mung:- ai: myo, jid pho" re yao: jhao" jhui" lo nae" qhid' mae" amyin" byid' ra"- ai: myo, jid pho" wa Yesu jhao" te' li" lao"-

⁴¹Yesu wa yao: re- Ni" qhid' mae" ngo pe" kad' byid: nae" o: i? ga: myid' ra". <Myo, jid pho" wa Asang we"- ngo myo, dam: myao nug: ra"- ga: tau" ra".>

⁴²Yesu wa yao: re- Ni" myo, myao: li" vashao:- ni" lam khug: ra" myid wa nao re myo, myao nhao: ava"- ga: ta" ra".

⁴³Ailao" jao"-yao: wa myo, dam: myao: li" mung: Mao"So: jeju re caung:khin" byid: yang:- Yesu thao cao" ra". Mo, byu qe wa aire myao gelao"- yao: bam alhab'mo, Mao"So re caung:khin" ako".