Read Maru LUKA 19 Bible Online

LUKA 19 - Maru bible

LUKA 19

¹Yesu wa Yerikho vogaung: khyo" su" lai: lo" na: ra".

²Ai: vogaung: mae Zake ga: mang: ra" khang: gaug au: jhaung dayaug na: ra"- yao: wa jo,nho" gyai qo" yaug re: ngad: ra".

³Yao: wa Yesu khag' ngad: rure qu" nae" qhid' mae" qam: ke' na: ra"- ngadqere: yao: wa byulang" ngad: ru we' mo, paug' saung" thau: ruyang Yesu re maqo" the' myao ngad: ra".

⁴Airumung: yao: wa Yesu re qo" myao nae" qhid' mae" mo, byu qe: qhid' au: khyo tao" lo" mung:- pho'ham" gae dao mae lo" do; zaung: jo; ra".

⁵Yesu ai:jo, qo mae joe" lo lao"- tau: qu" mung: Zake we"- Phyad gyo" lo wa,- ana" ba ngo ni" yham mae thang zai ngad:- ga: ta" ra".

⁶Alao" Zake wa phyad za: gyo" lo mung:- gyai ngaui bau" ru we' bang" tug: yu: ra".

⁷Aire myao: ra" mo, alhab' wa- Byu ceyaug wa qobo qo" ra" yaug: yham mae bang" khug nae"- ga: cao: lo" ava"- ga: ta" nyhung: ako".

⁸Zake wa to" ye, mung:- Asang we"- nga" jo,nho" agaung: daqi" myaung sho: mo, re ngo gae byid: nae"- Dayaug yaug mae" ngo mhug' zo" ci: ngad: re ngo wa yao: re byid nho" dam: tug' byid: nae"- ga: ta" ra".

⁹Yesu wa yao: re- Khyad' yu: ru wa ana" ba ceyham mae joe" li" va" ra"- pe"mung:ga"re ceyaug re: Abraham nho: myid:zo: ngad: ra".

¹⁰Byu: Yao: Zo: wa byaug: lo" ra" mo, re qho: yu nae" we' khyad' yu nae" qhid' mae" joe" li" ru ngad:- ga: ta" ra".

¹¹Mo, byu qe cedao: re tae" gyo" na shiko" au:- Yesu wa Yerusalem khyo jhao" li" na: ru we' mo, byu qe wa Mao"So: mung"dan: wa ana" jao" yao: myao: thug' li" naeva" ga: myid: jho: na ko" ruyang Yesu wa xo' mung:- yao: bam re dao: tau" dalam: ci yang: ta" kyo" ra".

¹²Dalhang: mae aya: qi" ra" byu dayaug wa kho: kham aya: yetang" yu mung:- dam: lo nae" qhid' mae" va" ra" mung"dan: khyo gyaung: su" lo" nae" seim" to" ra".

¹³Yao: gyaung: masu: shire- yao" jeim qe daxe yaug re khai: yu mung:- yaug khao: ngo" re qhang thang: the: dakye' kye' byid: yang:- ngo dam: joe" lo sho' ce:yang phaga: kad' ge,- ga: ta" co' ra".

¹⁴Yao"mung" byu qe wa yao: re nghang: geyang:- ceyaug kho:kham lokad' nae"rure ngonhaung" ma-o ga:- yao" thao re lagyo: nhao: ke' yang: ta" nhao: ke' ako".

¹⁵Ai: yaug wa kho:kham aya: tang" ci mung: dam: tug' lo: ra". Ailao" jao"- yao: wa yao" jeim qe phaga: gau pai: khonho" ga" the' vako" rure ba nae" qhid' mae" yao" qhid' kheim: khyo vao li" genae" qhid' mae" amyin" khyo" ke' ra".

¹⁶Sao qhid' yaug wa li" mung:- Asang we"- ngo wa nao byid' to" ra" qhang thang: the: kye' yang qhang thang: the: daxe kye' the' qho: to: va"- ga: ta" ra".

¹⁷kho:kham pho" wa Ngad va"- nao wa jeim gai dayaug ngad: ra". Nao wa ngai: ra" mau" zo" mae kyid yaug ngad: ruyang nao re ngo wa vogaung: mo" daxe eib zo: nhao nae"- ga: ta" ra".

¹⁸Shid' yaug ein: yaug re: li" mung:- Asang we"- ngo wa nao byid' to" ra" qhang thang: the: kye' yang qhang thang: the: ngo" kye' gau pai: the' qho: to: va"- ga: ta" ra".

¹⁹kho:kham pho" wa ai: yaug rere:- nao re ngo vogaung: ngo" lam: re eib zo: nhao nae"- ga: ta" ra".

²⁰Jeim gatau dayaug wa li" mung:- Asang we"- ni" qhang thang: the: ce ngad: ra". Ngo wa aire pha, jad: yang kag' mung: shaung: to"-

²¹Nao wa gyai qug' ra" yaug ngad: ruyang ngo wa nao re gyaug: ra"- nao wa naoyao: masang: ra" zai jham re gaug: sham" yu: ru we' naoyao: masin: maqho" ra" rumae" ashi: jham" yu nug yaug ngad: ra"- ga: ta" ra".

²²Alao"- kho:kham pho" wa yao: re- Jeim gao: we"- ni" nhad' dao: thoe re cao" yang: nao re ngo dao: kho' nae"- ngo wa qug' ra" yaug ngad: rure we' nga" zai mangad' rure gaug: sham" yu yang:- ngo masin: maqho" to" rumae" ashi: jham" yu yaug ngad: rure nao ba gau ngad: ra".

²³Airumung: ngo dam: tug' joe" lo lao"- ai: nga" qhang thang: the: wa gau pai: we' daga" dam: qo" yu nae" qhid' mae"- ai: nga" qhang thang: the: re nao pe"mung: ngaui jhi mae maye:ke' to: i? ga: ta" ra".

²⁴Ai: kho:kham pho" wa ai: ayae mae ye; jo; ra" mo, re- Ai: jeim pho" mae" qhang thang: the: yu: yu yang:- qhang thang: the: daxe kye' qo" ra" jeim re byid: ge,- ga: ta" ra".

²⁵Ngadqere: yao: bam wa kho:kham pho" re- Asang we"- yao: wa qhang thang: the: daxe kye' qo" yaug ngad: ra"- ga: tau" ako".

²⁶Alao"- kho:kham pho" wa Naonhaung" re ngo ta" geli"- Daja: ja: qo" ra" yaug khag' re ngadqere: je: laug sho' byid: shinae"- ngadqere:- Pe" maqo" ra" yaug mae" kam" wa yao: qo" ra" gu: dajhid' za: mae" lhao" yu: pye' byid: nae".

²⁷Aimung: Ngo kho: kham kad' nae" ma-o: ra" ai: nga" gyevo qere wa ce:khyo jhui" lo mung:- nga"qhid' kheim: mae yao:- yao: bam re se' pye' ge,- ga: dao: kho' ra"- ga: ta" ra".

²⁸Yesu wa ce:dao: jham re bin: ta" lao"- mho"zo: qe: qhid' au: mae Yerusalem khyo ye" lo" ra".

²⁹Yao: wa Zhan:lun: bam mae" Bedphage we' Bethani vogaung: nhae khyo joe"lo lao"- yao" mho"zo: shid' yaug re qhid' khyo nhao: ke' mung:-

³⁰Ni" shid' yaug: qhid' au: mae" vogaung: khyo ye" lo" ge,- ni" shid' zo: vogaung: khug khyo vao ye" lo" re khag' re: majui" qu" shi" ra" loze nau" dadau: taui" to" rure yemyao: li" genae"- ai: loze nau" re pheim yang: ce:khyo she: lo geri:.

³¹Dayaug yaug- ni" shid' zo: re Ni" shid' zo: pe"mung: pheim ko" i? ga: myid: lao"- Asang ci qo: ga"- ein: yao: re ta" ge,- ga: pin: ke' ra".

³²Amung: yao: shid' zo: ye" lo" re yao: shid' zo: re: Yesu ta" ke' ru we' dakhyo:- yemyao: ako".

³³Yao: shid' zo: loze taui: yepheim: na ko" au:- loze sang qe wa- Ni" shid' zo: pe"mung: pheim ko" i? ga: myid' ako"-

³⁴Alao" yao: shid' zo: wa- Asang ci qo: ga"- ga: phaug' tau" ako".

³⁵Yao: shid' zo: wa loze nau" re Yesu jhao" she: lo mung:- yao: bam: mai bau: jham re loze nau" dao mae nhe: byid: yang:- Yesu re jui: nhao: ako".

³⁶Yesu jui" ye" lo" na: au:- mo, byu qe wa yao: bam: mai bau: jham re khyodang mae myhung: byid' ako".

³⁷Yesu wa Yerusalem vogaung: nhae khyo joe" lo: na: au:- zhanlun bam to' gyo" jo, qo mae joe" lao"- yao" mho"zo: qe ajham ataung wa yao: bam myao: lo: ra" mug' pho: mau" zo" qi: jham: mathao mae thoe qi: we' Mao"So re jeju caung:khin" byid: mung:-

³⁸Asang: mang mae joe" li" ra" kho:kham pho" wa ngaui lho" vashao: wo"- Mug:gaung dao mae yaug yo: ru we' Mao"So wa phungbao qi" qhang: jo, vashao: wo"- ga: ta" ako".

³⁹Alao"- mo, phaung mae" Pharishe qe daqhae: wa Yesu re- Mho" Pho" we"- Ni" mho"zo: qere sae za: na genae" qhid' mae" amyin" byid: wa,- ga: ta" ako".

⁴⁰Yesu wa yao: bam re- Naonhaung" re ngo ta"geli"- cebam sae za: na gelao" wa- ce: laug bam jham yao: zag: hug' thug' li" genae"- ga: phaug' tau" ra".

⁴¹Yesu wa Yerusalem vogaung: nhae khyo te' ye" lo" mung:- vogaung: re the' myao lao"- ai: vogaung" mathao mae Yesu ngug yang:-

⁴²Vogaung: nao we"- Yaug yo: ra" khyo boe" nhao: ru pe" ngad: rure ana" ba nao ba: ngad: qa: we"- ngadqere: ana" wa nao maqo" the' myao ngad: ra".

⁴³Ni" gyevo qe wa nao re akham" we' lhang" gam" to: mung:- shad' khao: ngo" khyo" kham" lhaung" pye' ra" ayo, joe" lo: li" nae".

⁴⁴Yao: bam wa nao we' ni" vang khug mae na: ra" vobyu qe alhab' re mhan" za: kad' pye' li" genae"- Laug baui dabaui lhao" re: yao" jo, qo mae makai" jo, losho' kad' li" genae"- pe"mung:ga"re Mao"So nao re khyad' yu nae" qhid' mae" nao jhao" joe" li" ra" ayo, ba na re nao maba mabeim: ngad: ra"- ga: ta" ra".

⁴⁵Ai: thao Yesu wa Caung:pa" Yham khug khyo ye: mung:- zai aung: zai vai mo, re- Nga" yham re akyu" mho' yham ga: mhang" li" genae"- ga: Jham: Mugsug' mae tung" to" ra". Ngadqere:-

⁴⁶naonhaung" wa aire damya, khyaung kad' pye' avako"- ga: ta" yang: yao: bam re khe' thug' pye' ra".

⁴⁷Ba khao: ngo" Yesu wa Caung:pa" Yham mae mho" shid' byid' ra". Khinjaung qi: qe Jham: Tung" Pho" qe we' lau: de, au: jhaung qe wa Yesu re se' pye' nug: ako".

⁴⁸Ngadqere: mo, byu qe alhab' wa Yesu mho" dao: re dakheim: rere: malhai: ke' lo:- tae" gyo" na: bam ko" ruyang yao: bam wa Yesu re khoru: qo" se' pye' nae" khyo mamyao ko" ngad: ra".