Read Maru LUKA 2 Bible Online

LUKA 2 - Maru bible

LUKA 2

¹Ai: ayo, mae- Roma khosin" Augustu wa mung"dan: geim" mae" gaegaung: japhin: re gaug: yu nae" qhid' mae" amyin" dalam: khyo" ke' ra".

²Ai: gaegaung: japhin: gaug: yu: ru wa Suri mung" mae Kureni mang: zug: kad' na: au: sao qhid' lhang gaug: yu: ra" japhin: ngad: ra".

³Airumung: byu yaug khao: ngo" wa mang japhin: ke' nae" qhid' mae" yao: yao" co' phyid' vogaung: khyo lo: ako".

⁴Alao" Yoseb re: Davi kaung mae" myid:zo: ngad mung:- Galile mung" Nazared vogaung: mae" Yuda mung" mae" Betlehem- ga: mhang" ra" Davi vogaung: khyo-

⁵yao: vhin" yu nae" mho' to" ra" Mari we' daga" mang japhin: ke' nae" qhid' mae" lo: ra". Mari kam" wa gaung la: gaung ngad: ra".

⁶Yao: shid' tao Betlehem mae na: jo, ko" au:- khau ba na nge; li" mung:-

⁷Yao: wa zoqhid' yauggai nau" re khau: ra"- Bang" khug yham mae jo, qo majo, yang: ai: zonau" re mai cug' yang thab' mung:- thaung: lhao: dalam: khug mae lhang" to" ra".

⁸Ai: mang: khaung: mae yao zaung" mo, damyo" wa myi" re pa: din" mae yao: bam: yao kyaung" jham re lhaug' mung: na: jo; ako".

⁹Asang: mug: lagyo: dayaug wa yao: bam jhao" thug' li" mung: Asang: phungbao wa yao: bam: lhang" gam: mae bao: jo; ra"- Alao" yao: bam wa gyai din: gyaug: pye' ako".

¹⁰Mug: lagyo: wa yao: bam re- Dagyaug ge,- Qu" ge,- Byu alhab' mo; qhid' mae" gyai ngaui bau: nae" ra" lau dao: gai ngo naonhaung" jhao" vin: li" ru ngad:-

¹¹Ana" ba: ba na mae khyad' yu yaug Asang Khristu wa Davi vogaung: mae naonhaung" qhid' mae" khau: li"va" ra".

¹²Ceru wa naonhaung" qhid' mae" ave, ngad nae"- zoshao nau" nin" dayaug re mai cug' yang thab' mung: thaung: lhao: khug mae lhang" to" rure naonhaung" yemyao genae"- ga: ta" ra".

¹³Ai: mug: lagyo: nhae mae mug:gaung mae" mo, ajham ataung nyag din taung" thug' li" mung: Mao"So re caung:khin" zo" re"-

¹⁴Myhao: thao" ra" mug:gaung tho' mae Mao"So wa phungbao qi" qhang: jo, vashao:- Myid gaung dao mae re: yao: o ngaui: ra" mo; dao mae yaug yo cae: tae" ru jo; jo, vashao: wo"- ga: ta" ako".

¹⁵Ai: mug: lagyo: jham yao: bam khyi" mae" mug:gaung khyo dam: phao: lo" gethao re yao zaung" mo, wa ngonhaung" wa Betlehem vogaung: khyo ye" lo"gelang:- Asang ngonhaung" re li" ta" kyo" ra" khyo re yequ" qu" gelang:- ga: yao: cao: jho" ta" ako".

¹⁶Alao" yao: bam wa hin hin za: ye" lo" mung: Mari we' Yoseb rere: thaung: lhao: khug mae lang" jo; ra" zonau" rere: yemyao: ako".

¹⁷Yao zaung" mo, wa ai: zonau" re yemyao gelao"- yao: bam wa ai: zonau" we' sin: mung:- mug: lagyo: pho" yang li" ta" kyo" ra" khyo yao: bam re ta" kyo" ako".

¹⁸Yao zaung" mo, ta" rure the' gyo: mo, alhab' wa gyo" mug' ako".

¹⁹Ngadqere: Mari wa ai: gu: alhab' re xam" ci mung: yao" aung khug mae myid: qu" na: ra".

²⁰Yao zaung" mo, wa mug: lagyo: ta" ru we' dakhyo:- the' myao: yu ba: yu gemung:- Mao"So: phungbao re caung:khin" zo" re" dam: tug' phao: lo" ko" ra".

²¹Ai: zonau" wa she' ba byang" mung:- au: qid lhai: yo, joe" lao"- yao: myhi" aung mae mabo shimae" mug: lagyo" yang mhang" byid' ra" mang we' dakhyo:- yao: re Yesu ga: mhang" ako".

²²Moshe amyin" dao: re cao" yang: yao: bam: kyang" san: ra" gin khyao kad' nae" ayo, joe" lao"-

²³Zoqhid' yauggai nau" alhab' re Asang: qhid' mae" jaung: to: ca"- ga: Asang: tarha" mae tung" to" ru we' dakhyo:- ai: zoshao re Mao"So: qhid' kheim: mae yeqhaug' byid: nae" we'-

²⁴Asang: Tarha" mae ta" to" ru we' dakhyo:- phaung" kyug' shid' dau:- mangad: lao"- jid: au shid' dau: re xeim: ngaui" byid: nae" qhid' mae" Mari we' Yoseb wa ai: zoshao re Yerusalem vomo" khyo jhui" ye" ako".

²⁵Ana"- Yerusalem mae Simon ga: mang: ra" byu dayaug na: ra"- yao: wa Mao"So re gyaug phug' ru we' din:man" ra" yaug ngad mung:- Israel amyu" qe khyad' yu: ru qhug' nae" qhid' mae" myid: lao" na yaug ngad: ra". Ai: Gyang" Lho" Byo re: yao: we' daga" ngad: ra".

²⁶Amung: yao: wa Mao"So: yang dao:so: byid' to" ra" Meshia re mathe' myao myao wa nao mashid nae"- ga: Gyang" Lho" Byo: yang qhu" byid' ra" ve, lho re myao: to: yaug ngad: ra".

²⁷Yao: wa Byo: yang nhug' jhan: byid' ru qhug' mung: Caung:pa" Yham khug khyo vao ye" ra". Yao: myhi" we' yao: pho" tao wa- kham" to" ra"Tarha" we' dakhyo:- ai: zoshao re au: qid lhai: byid: nae" qhid' mae" Caung:pa" Yham khug khyo jhui" vao li" gelao"-

²⁸Simon wa ai: zoshao re yao" lo, khug mae lham: vo; yu yang: Mao"So re caung:khin" zo" re"-

²⁹Asang we"- ni" dao:so: jab byang" va" rumung: ana"- ni" jeim pho" ngore yaug yo za: lo" nhao la, se,-

³⁰Byumyu" alhab' qhid' kheim: mae nyhang" jaung: to: mung:-

³¹Taung bug qere ni" myid o: ra" khyo" qhu" byid: nae" bo" bao we'-

³²Ni" amyu" Israel qhid' mae" phungbao ngad: ra" ni" khyad' yu: ra" khyo re nga" myo,jid' yang yao: zhaug' za: the' myao va"- ga: ta" ra".

³³Yao: myhi" we' yao: pho" tao wa ai: zoshao: khyo we' sin: mung: Simon ta" ra" dao: jham re the' gyo: gelao" mug' ako".

³⁴Simon wa yao: mho' re shaman" byid: mung: yao: myhi" Mari- re Qu" wa,- ce: zoshao wa Israel amyu" myo: sho' byo; qeim: ru we' myo: sho' mo, khyad' yu: ru qhug' nae" qhid' mae" Mao"So: yang khyin: to" ra" yaug ngad: ra"- Byu myo: sho' mo, yao: re ngag: ha: pye' mung: yao: bam: nhag' lam: khug mae khug' myid: yaung: to" ra" gu: jham myao: thug' li" nae" ra" Mao"So: ve, lho ngad: li" nae".

³⁵Ni" nhag' lam: kheim ce' re shae ceim" yang thug' kyao" to" ru we' dakhyo: ngad: li" nae"- ga: ta" ra".

³⁶Ashe amyu" kaung mae" Penue ga" ra" yaug: yao: zo: Anna- ga: mang: ra" lapa cug' mo" myhi" dayaug na: ra"- yao: wa gyai mao: va" ra". Zoqae: yo, re yham qo" mung: yao" yham sang pho" we' nhad' zin za: qo" zam" na: ra"- yao" apyad she' xe: byid zin joe" sho' cug' mo" mo" ra".

³⁷Yao: wa Caung:pa" Yham mae" magao: lo:- zo:ve jao" akyu" mho' ru we' myi" re: na" re: Mao"So re caung:pa" yang: na: ra".

³⁸Ai: au: reyao:- Anna wa joe" li" mung: Mao"So re caung:khin" zo" re"- Yerusalem re khyad' yu nae"- ga: myid: lao" na ko" ra" mo, alhab' re ai: zoshao: nho: khyo re ta" kyo" ra".

³⁹Yoseb we' Mari wa ai: Asang Kham" To" Ra" Tarha" we' dakhyo: gin khyao alhab' re bin: kad' gelao"- Galile mae" yao: bam: mug: Nazared vogaung: khyo dam: tug' phao: lo: ako".

⁴⁰Ai: zoshao wa qi" qhang: li" mung: qam: o: bo: li" ru we' nyan: pha,jhi" bo: li" ra". Mao"So: shaman" jeju wa yao" dao mae bo: jo; ra".

⁴¹Yesu yao: myhi" we' yao: pho" tao wa zin khao: ngo" Yerusalem khyo Lai co' Poe lhaung" ye" ako".

⁴²Yesu daxe: shid' zin byang" lao"- thung" jo; ru we' dakhyo:- yao: mho' wa Yerusalem khyo Lai co' Poe ye" ako".

⁴³Ai: poe bin lao"- Yoseb we' Mari wa yham khyo dam: tug' phao: lo: ako"- ngadqere: zoshao Yesu wa Yerusalem mae thang: na co' ra"- yao: myhi" we' yao: pho" tao wa aire maba ko" ngad: ra".

⁴⁴Yao: tao wa Yesu re vogaung: bao: we' ngad naeva"- ga: myid: jho geyang: daba gyam sho' phao: lo" ako"- Thao re yao: shid' tao wa Yesu re ba nam qe we' byin cao: qe: phaung mae yeqho: ako".

⁴⁵Yao: tao wa Yesu re mamyao lao"- Yerusalem khyo dam: tug' qho: ye" ako".

⁴⁶Sam ba ein: ba re yao: tao wa Yesu re Caung:pa" Yham khug mae Yuda amyu" qe: mho" pho" qe: phaung gaung: mae zaung: jo, yang: mho" pho" qe ta" ra" dao: jham re tae" gyo: zo" re"- yao: bam rere: dao: myid: tug' myid: mung: na: jo; rure yao: tao yemyao: ako".

⁴⁷Yao" dao: re the' gyo: mo, alhab' wa pha,jhi" kung: ra" yao" dao: myid: we' dao: phyid re mug' ako".

⁴⁸Yao: myhi" we' yao: pho" tao wa yao: re the' myao gelao"- mug' byaug: ako". Alao" yao: myhi" wa Nga" zo: we"- ni" pho" we' ngotao re nao pe"mung: yang: ceru: kad' i? Ni" pho" we' ngotao wa nao re sang: kho: yang: qho: qin"- ga: ta" ako".

⁴⁹Yesu wa yao: myhi" we' yao: pho" tao re- Naotao ngore pe"mung: qho ko" i? Ngo wa nga" Pho" yham khug mae na ca"- ga" rure naotao maba ko" i? ga: phaug' tau" ra".

⁵⁰Ngadqere: yao: tao wa Yesu ta" ra" dao: re maba: gyo: ko" ngad: ra".

⁵¹Yesu wa yao: myhi" yao: pho" tao we' daga" Nazared vogaung: khyo dam: tug' phao: lo mung:- mho dao: gyo: gyo: za: na: ra"- yao: myhi" wa ai:gu: alhab' re yao" aung khug mae xam" ci: ra".

⁵²Amung: Yesu wa gaung khyao qi" qhang: li" ru we' nyan: pha,jhi" bo: li" mung:- byu: qhid' kheim: mae re: Mao"So: qhid' kheim: mae re: myo,nho lu: li" ra".