Read Maru LUKA 21 Bible Online

LUKA 21 - Maru bible

LUKA 21

¹Yesu cao" qu" ke' re jo,nho" qo" ra" mo, wa Caung:pa" Yham Alu: Ban" khug khyo Alu: ke' na ko" rure myao: ra".

²Gyai myaung sho" ra" cug' mo" myhi" dayaug gyid: ngaui shid' kye' Alu: ke' rure re: yao: myao: ra".

³Yesu wa Ngo naonhaung" re ta" geli"- ce: myaung sho" ra" cug' mo" myhi" wa gaje qe alhab' mo, tho' Alu: ngaui je: ke' ava".

⁴Pe"mung:ga"re gaje qe wa yao: bam magan: mago" qo" ra" jo,nho" mae" jan" ra" gu: Alu: ke' ako". Ngadqere: ce: cug' mo" myhi" wa masho: majhin myaung sho" rumae" yao: zo: nae" ru alhab' re Alu: ke' pye' ava"- ga: ta" ra".

⁵Mho"zo: qe daqhae: wa Caung:pa" Yham wa yaung" ra" laug baui jham: yang zao: to" ru we' Mao"So re qhaug' byid' to" ra" Alu: zai jham: yang gyai qu" yaung" jo; ra" khyo re ta" na: ako".

⁶Alao" Yesu wa Ce: naonhaung" the' myao: na: ra" gu: alhab' wa laug baui dabaui re: yao" jo, qo mae makai" jo, losho' byo; gyo" lo" ra" ba na yo, khyin: joe" lo: li" nae"- ga: ta" ra".

⁷Yao: bam wa Mho" Pho" we"- Airu: khonhae" boe" li" zai ngad: i? Airu: boe" va" ga" rure ba nae" qhid' mae" pe" ja" ve, lho jham thug' li" nae" i? ga: myid' ako".

⁸Yesu wa Naonhaung" mhug' pyag' ru maqhug' genae" qhid' mae' lha" yang: na ge,- Byu myo: sho' wa nga" aqid ve, yang: thug' li" mung:- ngo wa ai: Meshia ngad va"- Ayo, joe" va"- ga: ta" li" genae"- ngadqere: yao: bam: thao dacao" ge,-

⁹Naonhaung" wa gyekhe' ru we' tau: lhan: gye to" ra" thoe the' gyo: gelao"- dagyaug ge,- ai:ru alhab' wa sao qhid' boe" li" ca" nae"- ngadqere: ai: lo" thao" ba na wa mangad: shinae"- ga: ta" ra".

¹⁰Yesu xo' yang:- Byu damyu" we' damyu"- damang: we' damang: gye jho" zin" li" genae".

¹¹Myid lab: qi: jham lab: li" nae"- Bao" khug' jham thug' li" nae"- Khyi" khao: ngo" mae no phyo: aqam" jham boe" thug' li" nae"- Mug:gaung mae" gakai: lai: ru we' qu" gyaug qu" lhaung sho' ra" ja: jham thug' li" nae.

¹²Cegu: alhab' maboe" shire naonhaung" re taung" yu mung:- yhin" li" genae"- yao: bam wa naonhaung" re dao: phyid' nae" qhid' mae" Tarha" Jung Yham jham khyo ab byid' pye' mung:- thaung: khug mae lhaung" to" li" genae". Naonhaung" wa nga" mathao mae kho: kham qe we' zug: qe: qhid' kheim: khyo jhui" ye" ru qhug' genae".

¹³Airu wa naonhaung" qhid' mae" Lau Dao: Gai sagse: kham nae" qhid' mae" akho: akhang" agu gai ngad: li" nae".

¹⁴Naonhaung" wa khoru: ta" qid' yu nae" rure gau: qhid' khae" yang: sang kho: sang: lhe' maboe" genae" qhid' mae" naonhaung" aung khug mae myid: phyid' to: ge,-

¹⁵Pe"mung:ga"re naonhaung" gyevo qemae" khag' re: maqo" ngag: thaug' nae" ra" nhad' dao: thoe qam: we' pha,jhi" qam: o: ngo naonhaung" re byid: nae".

¹⁶Naonhaung" wa naonhaung" yao" myhi" pho" qe- mao:nhaung: qe- ba nam ug zo: qe- naonhaung" ba nam qeyang ab byid' pye' ru qhug' li" genae"- naonhaung" mae" daqhae: wa se' pye' ru qhug' genae".

¹⁷Nga" mathao mae yaug khao: ngo" nghang" li" genae".

¹⁸Ngadqere: naonhaung" au: mae" xae dakhe' lhao" re: mabyaug nae".

¹⁹Naonhaung" wa zang: qhao" yang:- tang tang za: ye; jo, ge,- ailao" naonhaung" yao" gaung re qo" khyad' yu: li" genae"- ga: ta" ra".

²⁰Naonhaung" wa Yerusalem vogaung: re gyevo qeyang lhang" gam" to" rure myao gelao"- ai: vogaung: wa byo; qeim: lo" nae" jhao" li" va"- ein: rure naonhaung" beim: ge,-

²¹Alao" Yuda mang: mae na: ra" mo, wa bam khyo tao" phao geshao:- Vomo" khug mae na: ra" mo, wa aimae" phao: thug' geshao:- Voyae mae" vogaung: ngai mae na: ra" mo, wa vomo" khug khyo mavao lo" geshao:-

²²Pe"mung:ga"re ai: ba na jham wa Jham: Mugsug' mae ta" to" gu: alhab' jab byang" nhao: ra" qobo dae byid' ra" ba na jham ngad: li" nae".

²³Ai: ba na gyo: mae gaung la: mo, we' nug' nau" jhui: mo, wa gyai qug: khai: genae". Ce: mung" mae qug: khai: qi: joe" lo: mung: ce: byumyu" qe: dao mae Mao"So: qobo dae byid' ru joe" li" nae" ngad: ra".

²⁴Damyo" re shae: yang se' pye' li" genae"- amung: damyo" wa mung"dan: khao: ngo" khyo kyam: byu khyo" taung" jhui" lo" ru qhug' li" genae". Tarha" taung bug qe wa yao: bam: ayo, ba na magan gan wa Yerusalem re zab: nhe" pye' li" genae"- ga: ta" ra".

²⁵Alao"- ba kyi lho" mo" jham mae ve, lho jham boe" thug' li" nae"- Myid gaung dao mae" byumyu" alhab' wa qid panglai: myang thoe we' bang: lhung" to" li" ra" thoe: yang gyaug mung nhag' lam: thao" li" genae".

²⁶Xao su byu qe wa mug: myid dao geim" mae joe" lo: na: ra" qug: khai: khyag' qhui: ru jham re myid: gyaug yang:- mo; byaug: li" genae". Pe"mung:ga"re mug:gaung mae" qam: so' jham wa laui" nin" li" genae".

²⁷Alao"- Byu: Yao: Zo: wa qam: so' phungbao qi: we' daga" jham thaui: mae joe" li"rure the' myao: li" genae".

²⁸Cegu: boe" qhid: li" na gelao"- to" ye, mung: naonhaung" au: re tau: qu" ge,- pe"mung:ga"re naonhaung" re khyad' yu nae" ra" ba na wa jhao" li" va" ra"- ga: ta" ra".

²⁹Ai: thao Yesu wa yao: bam re ce:dao: tau" ci yang: ta" ra". Pho' ham" gae we' gatau: sag' gae alhab' khyo re myid: qu" ge,-

³⁰Ai: agae jham: avho' tad' li" rure naonhaung" myao gelao"- zin vao kheim: jhao" va" rure naonhaung" ba: ako".

³¹Ai we' dakhyo:- ta" to" ra" gu: boe" na: rure naonhaung" the' myao gelao"- Mao"So: mung"dan: wa joe" li" na va" rure naonhaung" ba ge,-

³²Naonhaung" re ngo dang za: ta" geli"- ana" daui: na: ra" mo, alhab' mashid; gan shire ai:gu: alhab' boe" li" zai ngad:-

³³Mug:gaung we' myid gaung wa lai: lo" byaug: li" nae"- ngadqere: nga" dao: thoe wa khonhae" re: lai: lo" nae" mangad:- ga: ta" ra".

³⁴Naonhaung" wa zo: pyo: shaug' pyo: lai: ru we' ce:pyad mae na: ra" au: qhid' mae" myid: qug: myid: ci" ru jham mae za: dathaui" yaug: na ge,- Mangad: re wa ai: ba na wa nyag din taung" naonhaung" re lha" we' dakhyo:- myi" li" nae".

³⁵Pe"mung:ga"re ai: ba na wa myid gaung xao su byu alhab' mo; dao mae joe" li" zai ngad: ra".

³⁶Airumung: ai: boe" li" nae" qug: khai: khyag' qhui: ru jham re qo" thaug' qhao" nae" qam: o:- qo" nae" we' Byu: Yao: Zo" nho: qhid' kheim: mae qo" ye; jo; ra" mo, boe" genae" qhid' mae" akyu" mho' mung:- khonhae" re: lha" yang: na ge,- ga: ta" ra".

³⁷Yesu wa ai: ba na gyo" gu: mae na" gaung re wa Caung:pa" Yham mae mho" shid' byid' na mung: myi" thao lao" Zhan:lun: bam khyo yena: na mung: ra".

³⁸Ba khao: ngo" ne, seim no' mae" byu alhab' mo, wa- yao" dao: gyo: nae" qhid' mae" Caung:pa" Yham khyo ye" ako".