Read Maru LUKA 22 Bible Online

LUKA 22 - Maru bible

LUKA 22

¹Lai co' Poe ga: mhang" ra" Man" Make' Ra" Mug Poe joe" nae" jhao" li" ra".

²Khinjaung qi: qe we' Jham: Tung" Pho" qe wa mo, byu qere gyaug geyang:- Yesu re sae za: se' pye' nae" khyo qho: ako".

³Alao" Satan wa mho"zo: daxe: shid' yaug mae bobo: ra" Iskarud ga: mang: ra" Yuda nho: nhag' lam: mae vao ye" ra".

⁴Airumung: Yuda wa khinjaung qi:qe we' Caung:pa" Yham gug: gam zug: qejhao" ye: mung:- yao: bam: lo, khyo Yesu re yao: khoru: qo" ab byid: nae" khyo re yeqham: ra".

⁵Yao: bam gyo" ngaui gemung:- yao: re ngaui byid: nae"- ga: dao:so: byid' ke' ako".

⁶Yuda re: aire myid vang" mung:- mo, byu qe maba mabeim: lo:- Yesu re yao: bam: lo, khyo ab byid: nae" qhid' mae" ayo, khoau: yo" nae" rure qho: na: ra".

⁷Man" Make' Ra" Mug Poe mae- Lai co' Poe myi" xeim qhid' mae" yao nau" re se' nyhang" nae" ba na joe" lo: ra".

⁸Alao" Yesu wa Petru we' Yohan re Ngonhaung" zo: nae" Lai co' Poe myi" xeim re yenyhang" seim" to: ge,- ga: ta" mung: nhao: ke' ra".

⁹Yao: shid 'zo: wa Yesu re- Khojo, qo mae yenyhang" seim" nae" nao o: i? ga: myid' ako".

¹⁰Yesu wa Ni" shid' zo: vogaung: khug khyo vao ye" lo" ko" re- qid am vo; ci: ra" yauggai dayaug wa ni" shid' zo: re lham: tug: yu: li" nae"- yao: vao lo" ra" yham khug khyo vao ye: mung:-

¹¹Ai: yham sang re- Nga" mho"zo: qe we' ngo Lai co' Poe myi" xeim zo: nae" khoqe, ngad: ra" i? ga: Mho"Pho" nao re myid: nhao: ke' ra"- ein: ye:ta" ge,-

¹²Alao" yao: wa nyhang" seim" jin" to" ra" tho' pyae mae" qe, mo" daqe, re ni" shid' zo: re ceim" shid' byid' li" nae-" Ni" shid' zo: ai: mae yenyhang" seim" na ge,- ga: ta" ke' ra".

¹³Yao: shid' zo: thug' ye" lo" ko" re yao: shid' zo: re Yesu ta" ke' ru we' dakhyo:- yemyao gemung:- Lai co' Poe myi" xeim re yenyhang" seim" ako".

¹⁴Ayo, joe" lao"- Yesu wa lagyo: qe we' daga" saboe" mae zaung: ra".

¹⁵Yesu wa yao: bam re- ngo qug: khai: dayin dayo: makham zo: shire ce: Lai co' Poe myi" xeim naonhaung" we' daga" zo: nae" ngo gyai myid: o: ra".

¹⁶Pe"mung:ga"re naonhaung" re ngo ta" geli"- ce: Lai o' Poe kad' ra" lajheim: Mao"So: mung"dan: mae majab byang" li" li" wa- Lai co' Poe myi" xeim re ngo khonhae" re: mazo: lo nae"- ga: ta" ra".

¹⁷Ai: thao Yesu wa sabyi keim re yu: yu mung: Mao"So re jeju bin: caung: byid: lao"- ce: sabyi keim re yu mung:- naonhaung" yao: cao: jho" gae shaug' ge,-

¹⁸Naonhaung" re ngo ta" geli"- Mao"So: mung"dan: majoe" li" li" wa- ce: sabyi qang: re ana" mae" thoegu: ngo mashaug' lo nae"- ga: ta" ra".

¹⁹Alao" Yesu wa mug rere: yu: yu mung:- Mao"So re jeju bin: caung: byid: lao"- ai: mug re khyoe' phai" yang:- mho"zo: qere byid: mung:- ce wa naonhaung" qhid' mae" byid' pye' ra" nga" gaung ngad: ra"- ngore myid: beim: nae" qhid' mae" ceru kad' ge,- ga: ta" ra".

²⁰Ai we' dakhyo:- myi" xeim bin: zo: thao yao: wa sabyi keim rere: yu: yu yang:- yao: bam re byid: mung:- ce: keim wa naonhaung" qhid' mae" sheim: pye' ra" nga" sa" yang dazid thaung" to" ra" Mao"So: dao: thang" asag' ngad: ra".

²¹Ngadqere: qu" ge,- ngore ab byid' pye' nae" yaug wa ngo we' daga" ce: saboe" mae ngad: ra".

²²Byu: Yao: Zo: wa Mao"So myid: phyid' to: va" ruwe' dakhyo:- shid kham" li" nae". Ngadqere: yao: re ab byid' pye' ra" yaug wa byuxa: vaqoe, qhug' ra"- ga: ta" ra".

²³Alao" mho"zo: qe wa ceru: kad' nae" yao: bam mae" khoyaug lam: ngad nae" i? ga: yao: cao: jho" myid' ako".

²⁴Mho"zo: qe wa yao: bam mae" khoyaug lam: qi" thao" yaug ngad: i? ga: yao: cao: jho" ta" ngag: thug' li" ako".

²⁵Alao" Yesu wa yao: bam re Mao"So re malam: ra" amyu" kho:kham qe wa yao: bam: mung" byu qe: dao mae qam: so' we' eib: ako". Kheim: so' qo" ra" kho:kham qe wa mung" byu qe: jeju asang qe ga:- mhang" byid: nae" rure o: ako".

²⁶Ngadqere: naonhaung" wa ai we' dakhyo:- magai: ngad- Naonhaung" mae" qi" thao" ra" yaug wa ngai: thao" ra" yaug we' dakhyo:- ngad ca"- Au: jhaung wa daui daui yaug we' dakhyo: ngad ca".

²⁷Saboe" mae zaung: jo, yang: zozo" na yaug we' zozo: yaug re caung da" byid' ra" yaug mae" kho:yaug lam: je: qi" ra" i? Saboe" mae zaung: jo; ra" yaug je: qi" ra". Ngadqere: ngo wa naonhaung" phaung mae caung da" yaug we' dakhyo: ngad:-

²⁸Naonhaung" wa ngo we' daga" ju" phyo' khin jang: ru jham re thaung" qhug' lai: lo va" mo, ngad: ako".

²⁹Nga" Pho" yang ngore eib nae" akhang" byid' to" ru we' dakhyo:- ngore: ai: eib nae" akhang" naonhaung" re byid: nae".

³⁰Naonhaung" wa nga" mung"dan: khug mae- nga" saboe" mae qo" zo: shaug' li" genae"- ga: ta" ra".

³¹Yesu wa Simon we"- Simon we"- Tae" gyo: wa,- Jung: gaug re amo we' aseim gatau tau hug' kyang" pye' ru we' dakhyo:- naonhaung" alhab' rere: magai: ru we' gai: ru kyang" pye' nae" qhid' mae" Satan wa akhang" qo" ava".

³²Ngadqere: Simon we"- ni" lam khug: myid mabyo; lo" nae" qhid' mae" ngo akyu" mho' byid' to: va"- ngo jhao" nao dam: myid: phaug' lo lao"- nao wa ni" mao:nhaung: qere qam: laung: nyhad' tang byid: ca"- ga: ta" ra".

³³Petru wa Asang we"- Ngo wa thaung: laung" nae" khyo ngad: re ngad- Shid nae" ru khyo ngad: re ngad cao" nae" jin" jin" ngad:- ga: Yesu re tau" ra".

³⁴Yesu wa Petru we"- nao re ngo ta" li"- ana" myi yao: qo, mateim shire nao wa ngore maba- ga: sam lhang ha: pye' li" nae"- ga: ta" ra".

³⁵Ai: thao Yesu wa yao" mho"zo: qere- ngo naonhaung" re ngaui thaung- thaung a:- khyid zhaung: mavin nhao lo:- nhao: ke' ra" au:- naonhaung" daja: ja: qo ca" ko" i? ga: myid' ra". Yao: bam wa- Daja: re: maca"- ga: tau" ako".

³⁶Yesu wa yao: bam re Ana" kam" wa ngaui thaung- thaung a: qo"ra"yaug wa yu: vin ge,- Shae maqo" ra" yaug wa yao" bau: qhang aung" pye' yang:- shae vai: ci ge,-

³⁷Pe"mung:ga"re Ngo naonhaung" re ta" geli"- Jham: Mugsug' mae yao: wa tarha" macao" ra" mo; japhin: mae boke' ru qhug' ra"- ga: tung" to" ru wa ngo mae jab byang" li" ca" ra"- Gaigai: yao:- ai: tung" to" ru wa ngo mae jab byang" li" ca" ra"- ga: ta" ra".

³⁸Alao" mho"zo: qe wa Asang we"- Qu" wa,- cemae shae shid' khyae: jo; ra"- ga: ta"ako". Yesu wa Ai: gu: ga" va"- ga: phaug' tau" ra".

³⁹Yesu wa vomo" mae" thug' lo" mung:- yao: khonhae" re: lhaung" ye" ru we' dakhyo: Zhan:lun: bam khyo ye" lo" ra". Mho"zo: qere: yao" thao cao" ye" ako".

⁴⁰Ai: jo, qo khyo joe" ye: lao"- yao: wa mho"zo: qere Naonhaung" wa ju" phyo' ru khyo magyo" lo" genae" qhid' mae" akyu" mho' ge,- ga: ta" ra".

⁴¹Amung: yao: wa mho"zo: qemae" laug baui dalhang pye' joe" vha" lai: ye: mung:- pad' thaug' thaug' yang:-

⁴²Pho" we"- nao myid: o: ru ngad: re wa- ce: qug: khai: khyag' qhui: ra" keim re ngo mae" yu: pye' byid: la,- ngadqere: ngo myid: o: ra" khyo" mangad:- nao myid o: ra" khyo" boe" lo vashao:- ga: akyu" mho' ra".

⁴³Mug:gaung dao mae" mug: lagyo: Yesu jhao" thug' li" mung:- yao: re qam: li" byid' ra".

⁴⁴Yesu wa yao" nhag' lam: aung khug mae dayin dayo: kham zo" na: ruyang qam: ke' mung:- akyu" mho' ra". Yao" gaung mae" bau kyoe: wa sa: we' dakhyo:- myid gaung khyo yug: gyo" lo" ra".

⁴⁵Yesu wa akyu" mho' rumae" to" mung:- mho"zo: qejhao" dam: tug' lo: re- yao: bam myid: kaug' myid: myaung: geyang: yab: jo; bam ko" rure Yesu lomyao: ra".

⁴⁶Alao" Yesu wa yao: bam re- Naonhaung" pe"mung: yab: myhid' jo, ko" i? To" mung:- naonhaung" wa ju" phyo' ru khyo magyo" lo" genae" qhid' mae" akyu" mho' ge,- ga: ta" ra".

⁴⁷Yesu airu: jhau: na shi" au:- mho"zo: daxe: shid' yaug mae bobo: ra" Yuda yang jhui" li" ra" byu daphung: joe" li" ako". Yuda wa Yesu re bobaug baug nae" qhid' mae" Yesu jhao" qui" ye" ra".

⁴⁸Yesu wa yao: re Yuda we"- nao wa Byu: Yao: Zo: re bobaug baug yang: ab byid' pye' nae" i? ga: ta" ra".

⁴⁹Alao" Yesu we' daga" na: ra" mho"zo: qe wa boe" li" nae" ra" ave, re ba: qu" geyang:- yao: bam wa Yesu re- Ngonhaung" shae ci naeva" laug i? ga: myid' ako".

⁵⁰Mho"zo: qemae" dayaug wa Khinjaung Yin" jeim pho" dayaug re qam" ke' mung:- ai: yaug: lo, yo shad' no:khye' byid: lo" ra".

⁵¹Ngadqere: Yesu wa Airu: dakad'- ga: ta" mung:- jeim pho" nokhye' re yao" lo, tin: byid: yang:- gai byid' ra".

⁵²Alao" Yesu wa yao: re taung: nae" ga: joe" li" ko" ra". Khinjaung qi: qe- Caung:pa" Yham gug: gam gyezug: qe we' lau: de, au: jhaung qere- Naonhaung" wa damya, re taung" ruru: ngore taung: nae" qhid' mae" shae we' thaung kang we' li" ko" i?

⁵³Ngo wa Mao"So: yham mae ba khao: ngo" naonhaung" we' daga" na ngad yang: re:- naonhaung" ngore mataung: ko" ngad: ra". Ngadqere: ce: yo, khyin: wa naonhaung" yo, khyin:- mug: cad' zug' nho: qam: so' eib: ra" yo, khyin: ngad: ra"- ga: ta" ra".

⁵⁴Yao: bam wa Yesu re taung: mung:- Khinjaung Yin" yham khug khyo yao: re jhui" ye" ako". Petru wa va: va: mae" cao" ye" lo" ra".

⁵⁵Byu daqhae: wa yham vang" agaung: mae myi: mad: gao yang:- zaung: bam: ako". Petru re: yao: bam: phaung mae yebo: zaung: jo; ra".

⁵⁶Daui daui okaung myiqe: nau" dayaug wa ai: myikhyeim" mae Petru zaung: jo; rure the' myao lao"- yao: wa Petru re zhaug' qu" mung:- ceyaug re:- Yesu we' daga" na: qin" yaug ngad: ra"- ga: ta" ra".

⁵⁷Ngadqere: Petru wa Myiqe: nao we"- yao: re ngo ba lhao" re: maba- ga: ha: pye' ra".

⁵⁸Ai: thao dazab re yauggai dayaug wa- Petru re the' myao mung:- nao re: yao: bam: phung: mae" dayaug ngad: ra"- ga: ta" ra". Ngadqere: Petru wa Byu nao we"- yao: bam: phung: mae ngo mabo- ga: tau" ra".

⁵⁹Amung: dayo, qug ko kyo thao re yauggai gatau dayaug wa ceyaug wa Yesu we' daga" na: qin" yaug ngad: rure aug' o: nae" khyo pe" majo, ngad: ra"- pe"mung:ga"re yao: re: Galile byu dayaug ngad: ra"- ga: qam: ke' yang: ta" ra".

⁶⁰Ngadqere: Petru wa- Byu nao we"- nao ta" ra" khyo re ngo maba- ga: phaug' tau" ra". Yao: airu: ta" na shi" au: yao:- qo, teim: ra".

⁶¹Asang wa lhang: lo mung:- Petru re zhaug' qu" ke' ra". Alao" Petru wa- Ana" myi yao: qo, mateim shi:re nao ngore maba- ga: sam lhang ha: pye' li" nae"- ga: Asang yao: re ta" to" ra" dao: re myid: beim" ra".

⁶²Arumung: Petru wa taung gaung khyo thug' ye: mung:- gyai ye:kaug' ngug: ra".

⁶³Yesu re zaung" na: ra" mo, wa yao: re jung" mung: be; ako".

⁶⁴Yao: bam wa Yesu myo,khung: re thab' pye' byid: mung:- nao re be, yaug khag' ngad: ra" i? Tag: qu" wa,- ga: ta" ako".

⁶⁵Amung: yao: bam wa jung" dao: gatau myo: sho' we' yao: re maphug' makhyad' roe" ako".

⁶⁶Mug: bo" li" lao"- lau: de, au: jhaung qe- khinjaung qi: qe we' Jham: Tung" Pho" qe wa daga" za: zang" ham: na: bam: ako". Ai: thao yao: bam wa Yesu re Tarha" Qe, Do, khyo jhui" vao ye" ako".

⁶⁷Yao: bam wa nao Meshia ngad: i? Ngonhaung" re ta" kyo: la,- ga: Yesu re myid' ako". Yesu wa yao: bam re- ngo ta" kyo: ngadqere: naonhaung" lam" genae" mangad:-

⁶⁸Alao" ngo naonhaung" re dao: myid: ngadqere: naonhaung" phaug' tau: genae" mangad:-

⁶⁹Ngadqere: Byu: Yao: Zo: wa ana" mae" thoegu: phung qam: so' bo: ra" Mao"So: lo, yo shad' mae zaung: jo; li" nae"- ga: ta" ra".

⁷⁰Yao: bam alhab' mo, wa Aire wa- Nao wa Mao"So: yao: Zo: ngad: i? ga: myid' ako". Yesu wa yao: bam re Ngo Mao"So: yao: Zo: ngad: ra"- ga: naonhaung" yao: ta" vako" ra"- ga: tau" ra".

⁷¹Yao: bam wa Ngonhaung" sagse: gatau pe" qo lo" i? Yao: ta" ra" dao: thoe reyao:- ngonhaung" the' gyo: va"- ga: ta" ko" ra".