Read Maru LUKA 23 Bible Online

LUKA 23 - Maru bible

LUKA 23

¹Tarha" qe, do, phung: geim" alhab' mo, to" yang:- Yesu re Pilad qhid' kheim: khyo jhui" vao ye: mung:-

²Ceyaug wa mung" byu qere khyonghung: jhui" nghung" na: ra". Yao: wa Ketha kho:kham re khang: make' nae" qhid' mae" mo, byu qere ta" mung:- yao: yao" gaung rere: Meshia ga" ra" kho:kham ngad:- ga: ta" na: rure ngonhaung" the' gyo: va"- ga: Yesu re qobo zhaug' ako".

³Pilad wa Yesu re- Nao wa Yuda qe: kho:kham ngad: i? ga: myid' ra". Yesu wa- Aiwa nao ta" ru ngad: ra"- ga: phaug' tau" ra".

⁴Ai: thao Pilad wa khinjaung qi: qe we' mo, byu qere- ceyaug re dao: phyid' nae" qhid' mae" ngo pe" akhyo mamyao- ga: ta" ra".

⁵Ngadqere: yao: bam wa Yao: re- Galile mung" mae" qhid mung:- Yuda mung" geim" gam: sho' we' ce: jo, qo khyo lhao" re: joe" sho' mho" shid' byid: mung:- mo, byu qe lu" to" li" nae" qhid' mae" poe: na yaug ngad: ra"- ga: qam: ke' yang:- tin: tin: ga: qobo zhaug' ako".

⁶Pilad wa cedao: re the' gyo: lao"- yao: wa Ceyaug Galile byu ngad: ra" i? ga: myid' ra".

⁷Yesu wa Herod eib: ra" mung" mae" byu ngad: rure ba lao"- Yesu re Herod jhao" dai" ke' ra". Herod re: ai: ayo, mae Yerusalem mae lojoe" na: jo; ra".

⁸Herod wa Yesu re myao lao"- gyai bau" ra". Pe"mung:ga"re yao: wa Yesu khyo re the' gyo" qu" va" rumung:- Yesu re myao nug: ru myao" ava". Alao" yao: wa Yesu kad' qhu" ra" mug' pho: ve, lho daja: ja: re myao nae" myid: lao" na: ra".

⁹Airumung: Herod wa Yesu re dao: myid: myo: sho' ja: myid' ra". Ngadqere: Yesu wa pe" matau: ngad: ra".

¹⁰Khinjaung qi: qe we' Jham: Tung" Pho" qe wa qhid' au: khyo qui" ye: mung:- Yesu re qi: sho' qobo zhaug' ako".

¹¹Herod we' yao" gyezo: qere:- Yesu re jung" mung:- maphug' makhyad' kad' ako". Ai: thao yao: bam wa Yesu re gyai yaung" phug' de; ra" bau: qhang vhe' byid: yang:- Pilad jhao" dam: tug' dai" ke' ko" ra".

¹²Ai: ba na mae yao:- Herod we' Pilad wa dam: jho" nyang: ako". Qhid' phyao: wa yao: shid' zo: dayaug we' dayaug majho" vang" ko" ngad: ra".

¹³Pilad wa khinjaung qi: qe- lau: de, au: jhaung qe- mo, byu qere khai: zhang" to: mung:-

¹⁴yao: bam re- ceyaug wa mung" byu qere khyonghung: jhui" nghung: yaug ngad: ra"- ga: ta" mung:- naonhaung" yao: re ngojhao" jhui" li" ako". Naonhaung" yao" qhid' kheim: mae yao:- ngo wa yao: re myid' ca: qu" va"- naonhaung" zhaug' ra" qobo daja: re: yao: kad' shad' rure ngo mamyao-

¹⁵Herod re: Yesu qobo re mamyao ngad: ra"- Airumung: yao: re ngojhao" dam: tug' dai" ke' lo: ra"- ceyaug wa shid man" ra" qobo daja: re: mashad' ngad: ra".

¹⁶Airumung: ngo wa yao: re be, yang: nhao: ke' nae"- ga: ta" ra".

¹⁷Pilad wa Lai co' Poe khao: ngo" mae mo, byu qe: qhid' mae" khonhae" re: kyam: byu dayaug re lhaung" lhoe' ke' byid' ra".

¹⁸Mo, byu qe alhab' wa Yao: re se' pye' wa,- ngonhaung" qhid' mae" Baraba re lhoe' ke' byid: la,- ga: zag: hug' ako".

¹⁹(Baraba wa vomo" khug mae geim lau to" ru we' byu se' ra"qobo: yang thaung: laung" jo, yaug ngad: ra".)

²⁰Pilad wa Yesu re lhoe' ke' nug yang:- mo, byu qere dam: ta"qu"ra".

²¹Ngadqere: yao: bam wa Yao: re pyao: zang mae jin" se' pye' wa,- yao: re pyao: zang mae jin" se' pye' wa,- ga: zag: hug' ako".

²²Pilad wa yao: bam re Yao: pe" ja" qobo shad' lhoe" ra" i? Yao: mae shid man" ra" qobo daja: shad' qo re: mamyao- Amung: ngo wa yao: re be, yang:- nhao: ke' nae"- ga: sam lhang ein: lhang ta" ra".

²³Ngadqere: Yao: bam wa Yesu re pyao: zang dao mae jin" se' pye' nae" qhid' mae" thoe myhao: thao" mae" zag: hug' na: ako". Lo" thao" mae wa yao: bam hug' aung: yu: ako".

²⁴Airumung: Pilad wa yao: bam mho' ko" ruwe' dakhyo:- ngad shao:- ga: Yesu re dao: phyid' ke' ra".

²⁵Ai: thao Pilad wa geim lau to" ru we' byu se' ra" qobo: mathao mae thaung: laung" jo; ra" yaug re yao: bam mho' ru we' dakhyo:- nhao: ke' byid: mung:- Yesu re wa yao: bam o: ra" khyo" kad' genae" qhid' mae" ab: ke' ra".

²⁶Gyezo: qe wa Yesu re jhui" ye" lo" ako"- yao: bam ye" lo" na ko" au:- Seyo: vogaung: mae" vomo" khug khyo lo: na: ra" Simon ga: mang: ra" Kureni mang: byu dayaug re myao: ako". Yao: bam yao: re taung" yu yang:- pyao: zang re vo, nhao mung:- Yesu nhaung thao" mae su: nhao: ako".

²⁷Mo, byu qe ajham ataung Yesu thao cao" ye" ako". Ai: mo, byu phaung mae myiqe: qe damyo" wa Yesu qhid' mae" kaug' mung:- ngug byid ngug nhe' we' cao" ye" ako".

²⁸Yesu wa yao: bam shad' khyo lhang: lo mung: Yerusalem: myiqe: qe we"- nga" qhid' mae"dangug ge,- naonhaung" yao" qhid' mae" we' naonhaung" zo: dau qe: qhid' mae" kam" wa ngug ge,

²⁹Pe"mung:ga"re Zo: dau maqo" qu" ra" myiqe:- gaung mala" qu" ra" myiqe:- nug' cug majhaug' qu" ra" myiqe: wa ngaui lho" ra" wo"- ga: ta" genae" ra" ba na joe" lo: na: ra".

³⁰Ai: ba na mae byu qe wa bam jham re- Ngonhaung" dao mae logyo" nhai" gela,- Bug gaung jham re- ngonhaung" re lobam" pye' gela,- ga: ta" li" genae".

³¹Pe"mung:ga"re sag' jam: gae re lhao" re:- ceru: kad' ko" ngad: re wa sag' kyaug' gae re wa khoqhi" sho' kad' genae" i? ga: ta" ra".

³²Qobo shad' lhoe" ra" yauggai gatau shid' yaug rere:- Yesu we' daga" se' pye' nae" qhid' mae" jhui" ye" lo" ko" ra".

³³Yao: bam wa Au: Gao: Gye,- ga" ra" jo, qo khyo joe" ye: lao"- Yesu we' qobo shad' lhoe" ra" byu shid' yaug re- Yesu lo, yo shad' mae dayaug lo, kaung: shad' mae dayaug pyao: zang mae jin" te' ako".

³⁴Yesu wa- Pho" we"- yao: bam re qobo khyad' byid: wa,- yao: bam wa yao: bam yao: pe" kad' na: rure maba ko" ngad: ra"- ga: ta" ra". Yao: bam wa Yesu mai bau: jham re pha" ce' khyo" yang: yao: cao: jho" gae: yu: ako".

³⁵Mo, byu qe aitau mae lhaug' qu" na ko" au:- Yuda lau: de, au: jhaung qe wa- Su gaje qere wa yao: khyad' yu: ra"- yao: wa Mao"So: yang khyin: san: to" ra" Meshia ngad: re wa yao: yao" gaung re khyad' yu vashao:- ga: Yesu re gaui mho: ako".

³⁶Gyezo: qere:- Yesu jhao" qui" ye: gemung:- yhid jhin qang: byid: jhaug' zo" re"-

³⁷Nao Yuda qe: kho:kham ngad: re wa naoyao" gaung re khyad' yu wa,- ga: Yesu re jung" ako".

³⁸Amung: yao" au: tho' mae- ceyaug wa Yuda qe: kho:kham ngad: ra"- ga: tung" te' to" ako".

³⁹Pyao: zang mae jin" te' to" ra" damya, shid' zo: mae" dayaug wa- Nao wa Meshia ngad:- mangad: i? Nao yao: re we' nga" shid' zo: rere:- khyad' yu la,- ga: jung" dao: ta" ra".

⁴⁰Ngadqere: gatau dayaug wa Mao"So re nao magyaug i? Nao wa yao: kham: yu: ra" dao: phyid' ra" qobo dae we' daja: za: qobo dae kham: yu: ra".

⁴¹Ngadqere: nga" shid' zo: wa nga" shid' zo: yao: shad' lhoe" ra" qobo dae kham zo: man" ru we' dakhyo:- dao: phyid' ru qhug' va". Ngadqere: yao: wa pe" re: mashad' ngad: ra"- ga: qeim: ra".

⁴²Amung: yao: wa Yesu re- Yesu we" Nao kho:kham khyo" joe" li" lao"- ngore myid: beim: la, wo"- ga: ta" ra".

⁴³Yesu wa yao: re- Nao re ngo dang za: ta" li"- ana" ba yao: nao wa ngo we' daga" Pharadisu mae qhug' na: li" nae"- ga: ta" ra".

⁴⁴Na" gaung daxe: shid' yo, qug ko ngad: au: mae"- myi" thao sam yo, qug joe" sho' ba zho: ru thang: lo" mung:- no, sang: kyid mug: cad' cad' lo" byaug: ra".

⁴⁵Caung:pa" Yham mae" qe, kyo pin: lung: re:- shid' gao go; lo" byaug; ra".

⁴⁶Alao" Yesu wa Pho" we"- nga" byo ni" lo, mae ab byid' ra"- ga: thoe qi: we' hug' ta" mung:- kao gyo" lo" ra".

⁴⁷Airu: boe" rure gyezo: dayo eib: ra" gyezug: pho" myao lao"- ceyaug wa gaigai: yao: byugai dayaug ngad nhaung wo"- ga: ta" mung:- Mao"So re caung:khin" byid' ra".

⁴⁸Ai: tau mae li" zang" ham: qu" na ko" ra" mo, byu qe wa airu: boe" rure myao gelao"- alhab' mo, yao: yao" qao gao re theim yang: kaug' phao: lo" ko" ra".

⁴⁹Yesu re ba se" ra" mo, alhab' we' Galile mae" yao" thao cao" ko" ra" myiqe: qe wa va: va: mae ye; jo, yang:- qu" na: bam: ako".

⁵⁰Yuda mung"- Arimathe vobyu Yoseb ga: mang: ra" Yuda Tarha" Qe, Do, phung: mae bobo: ra" byu dayaug na: ra". Yao: wa phug' myao: tho' ra" din:man" ra" byu dayaug ngad: ru we' Mao"So: mung"dan: joe" li" nae" rure lao" na: ra" yaug ngad: ra"- yao: wa Tarha" Qe, Do, phung: vao byu dayaug ngadqere: Tarha" Qe, Do, phung" yang dao: phyid' ru we' kad' ra"lo, mau" re myid mabovang" ngad: ra".

⁵¹

⁵²Yao: wa Pilad qhid' kheim: khyo vao ye: mung:- Yesu mao gaung re yemho' ra".

⁵³Yoseb wa mao gaung re yu: khyo" yu yang:- jid: mo" pin: dau: yang mao gaung re thab' pye' mung:- khag' re: manyhab' qu" shi" ra" laug thin re kyaung" to" ra" laug khyaung lab mae Yesu mao gaung re yeke' to" ra".

⁵⁴Ai: ba wa ban thug' ngo" ba- nyhang" seim" ra" ba na ngad mung:- Dugno: Ba khyo de; ye: nae" jhao" li" na: ra".

⁵⁵Galile mae" Yesu thao cao" qin" ko" ra" myiqe: qere:- Yoseb we' daga" ye: mung:- lab re we' Yesu mao gaung re khoru: to" rure yao: bam myao: ako".

⁵⁶Airumung: yao: bam wa yham khyo tug' phao: lo" mung:- sheim nae pyo" ra" ja: we' Mura xau nyhang" to" ako". Kham" To" Ra" Tarha" jo; ru we' dakhyo:- yao: bam wa Dugno: Ba mae thang: na: ako".