Read Maru LUKA 3 Bible Online

LUKA 3 - Maru bible

LUKA 3

¹Roma kho:sin" Tiberiu kho: kham kad' ru daxe: ngo" zin ein: zin re Yuda mung" mae Pontiu Pilad wa- mang: zug:- Galile mung" mae wa Herod- Iturea we' Trakonid mung" mae wa Herod yao: nhaung: Philib- Abilen mung" mae wa Lusania mung" zug: kad' na mung:-

²Anna we' Kayapha wa khinjaung yin" kad' na: ako"- ai: yo, re Mao"So: mungdao: wa din"pyad' yo mae na: ra" Zakari yao: zo: Yohan jhao" joe" li" ra".

³Alao" Yohan wa Yodan gyaung: cao" mae" mug: myid gam: sho' khyo ye: mung:- Nhag' lam: tha" pye' mung: qid nyhab' kham: yu ge,- ailao" Mao"So wa naonhaung" qobo jham re khyad' pye' byid' li" nae"- ga: kho" kyo" ra".

⁴Airu wa- Asang: khyo re nyhang" to: ge,- Yao" khyo re din: za: nyhang" jhao" ge,-

⁵Lao: khaung: alhab' re bam" pye' mung: bam we' bug gaung alhab' re dau" tae" pye' ca" nae" ngad: ra"- Khyo kaui jham re jhao" pye' mung: abau" akhyad' ra" khyodang jham re nyhang" tae" pye' ca" nae" ngad: ra".

⁶Alao"- xao su byu qe alhab' Mao"So khyad' khyui: yu: ra" khyo re the' myao: li" genae"- ga: din"pyad' yo mae dayaug hug' na: ra"- ga: lapa Esaia Mugsug' mae tung" to" ru we' dakhyo: ngad: ra".

⁷Amung: Yohan wa yao" lo, mae qid nyhab' kham: yu nae" ga:- joe" li" ra" mo,byu qere- Lhao maui amyu" qe we"- Joe" lo: na: ra" Mao"So nhag' yo" rumae" qo" phao: loe, nae" naonhaung" re khag' yang li" ta" peim: byid: vako" i?

⁸Myid tha" ru we' man: qi" ra" ashi: zaui: ge,- Abraham wa ngonhaung" yao: pho" ngad:- ein: data" ge,- pe"mung:ga"re ngo naonhaung" re ta" geli"- Mao"So wa ce: laug baui jham mae" Abraham qhid' mae" yao: zo: jham qo" phan" phaug' thug' ke' ra".

⁹Ana" yao: lhao" re: ai: vozaung: wa sag' gae jham re apan mae" thau: lhang" pye' nae" qhid' mae" jin" jin" ngad: ava"- Airumung: ashi: gai mazaui" ra" sag' gae alhab' re thau: lhang" ke' mung: myikhyeim" khug khyo pye' zaui: pye' ra"- ga: ta" ra".

¹⁰Alao"- mo, byu qe wa- Yohan re Airu: ngad lao" wa ngonhaung" khoru: kad' zai i? ga: myid' ako".

¹¹Yohan wa tau: mung:- Bau: shid' khye' qo" ra" yaug wa maqo" ra" yaug re dakhye' gae byid: vashao:- Zo: ve qo" yaug re: maqo" ra" yaug re gae zho: vashao:- ga: ta" ra".

¹²Khang: gaug mo, damyo" re: qid nyhab' kham: yu nae"- ga: joe" li" mung: yao: bam wa Yohan re- Mho" pho" we"- ngonhaung" khoru: kad' zai i? ga: myid' ako".

¹³Ailao"- Yohan wa naonhaung" gaug: yu ang: ra" gau jho tho' je yang: khang: dagaug: yu ge,- ga: yao: bam re ta" ra".

¹⁴Gyezo: qere: Aire ngonhaung" wa khoru: kad' zai i? ga: myid' ako". Alao" Yohan wa yao: bam re naonhaung" wa khag' rere: mangad mangung: qobo dazhaug' ge,- Khag' mae" re: dadeim" zag: lhad' zo: ge,- naonhaung" the' ra" lho" khye' okaung phug' we' nhag' shid nhag' dag yang: na ge,- ga: phaug' tau" ra".

¹⁵Mo, byu qe wa myid: lao" na: ru bo gemung: Yohan wa Meshia ngad va" laug- ga: yao: bam: nhag' lam: khug mae myid: qu" na: ako".

¹⁶Airumung: Yohan wa yao: bam alhab' re Ngo wa naonhaung" re qid: yang qid nyhab' byid' ra"- ngadqere: nga" tho' qam: so' je: bo yaug wa nga" thao mae joe" li" nae" ngad:- ngo wa yao" khyid zhaung: taui: pheim byid: nae" lhao" maman: qi"- yao: wa Gyang" Lho" Byo: yang re:- myi" yang re: naonhaung" re qid nyhab' byid' li" nae".

¹⁷Yao" lo, mae gaug khyo" nae" qhid' mae" gaug khyo" gaung: zhab' ci: ra". Amung: yao: wa gaug nao: zam jao: mae" gaug bam re vhag' kyang" pye' mung: gaug mo gu: re wa yao" gaug jhi khug mae gag: zhang: ke' to" li" nae"- gaug seim jham re kam" wa matho' se' ra"myikhyeim" mae ngha" pye' li" nae"- ga:ta" kyo" ra".

¹⁸Airumung: Yohan wa ta"peim: ta" kyang" ra" dao: gatau myo: sho' we' re: ai: mo, byu qere Ngaui Bau" Lau Dao: Gai kho" kyo" ra".

¹⁹Ngadqere: Yohan wa Mung" zug: pho" Herod re- yao: nhaung: Philib yham sang myhi" Herodia re vhin" yu: ra" mathao mae we' gatau shad' lhoe" ra" makhyang" ra" mau" zo" jham: mathao mae qeim: ra".

²⁰Ai: thao Herod wa Yohan re thaung: khug mae taung" lhaung" pye' nhao mung: je: xo: ra" qobo re shad' lhoe" ra".

²¹Mo, byu qe alhab' qid nyhab' bin: kham: yu gelao"- Yesu re: qid nyhab' kham: yu: ra"- yao: akyu" mho' na: au:-

²²mug:gaung bung" li" mung: Gyang" Lho" Byo wa phaung" kyug' ru: dao" gyo" li" ra". Amung: mug:gaung mae"- Nao wa ngo jhid'de; ra"- nga" Zo: ngad:- nao re ngo gyai o ngaui: ra"- ga: thoe jhau: thug' li" ra".

²³Yesu wa yao" mau" zo" zaui" qhid: ra" au: re yao" apyad wa sam xe zin ko ngad: ava"- Byu jham yao: re Yoseb: yao: zo: ngad: ga: jho: ako". Yoseb wa Heli yao: zo:- Heli wa Mathad yao: zo:-

²⁴Mathad wa Levi yao: zo:- Levi wa Melkhi yao: zo:- Melkhi wa Yannai yao: zo:- Yannai wa Yoseb yao: zo:- Yoseb wa Matathia yao: zo:- Matathia wa Amu yao: zo:- Amos wa Nahum yao: zo:-

²⁵Nahum wa Esli yao: zo:- Esli wa Magai yao: zo:-

²⁶Magai wa Maad yao: zo:- Maad wa Matathia yao: zo:- Matathia wa Semein yao: zo:- Semein wa Yoseg yao: zo:- Yoseg wa Yuda yao: zo:-

²⁷Yuda wa Yohan yao: zo: Yohan wa Rhesa yao: zo:- Rhesa wa Zerubabela yao: zo:- Zerubabela wa Shealtie yao: zo:- Shealtie wa Neri yao: zo:-

²⁸Neri wa Melkhi yao: zo:- Melkhi wa Addi yao: zo:- Addi wa Kusam yao: zo:- Kusam wa Elmadam yao: zo:- Elmadam wa Era yao: zo:-

²⁹Era wa Yesu yao: zo:-Yesu wa Elieze yao: zo:- Elieze wa Yorim yao: zo:- Yorim wa Mathad yao: zo:- Mathad' wa Levi yao: zo:-

³⁰Levi wa Simon yao: zo:- Simon wa Yuda yao: zo:-Yuda wa Yoseb yao: zo:- Yoseb wa Yonam yao: zo:- Yonam wa Eliakim yao: zo:-

³¹Eliakim wa Melea yao: zo:- Melea wa Mena yao: zo:- Mena wa- Matatha yao: zo:- Matatha wa Nathan yao: zo:- Nathan wa Davi yao: zo:-

³²Davi wa Yese yao: zo:- Yese wa Obed yao: zo:- Obed wa Bua yao: zo:- Bua wa Salmon yao: zo:- Salmon wa Nashon yao: zo:-

³³Nashon wa Adminadab yao: zo:- Admin wa Arni yao: zo:- Arni wa Hezron yao: zo:- Hezron wa Pere yao: zo:- Pere wa Yuda yao: zo:-

³⁴Yuda wa Yaku yao: zo:- Yaku wa Isag yao: zo:- Isag wa Abraham yao: zo:- Abraham wa Tera yao: zo: Tera wa Naho yao: zo:-

³⁵Naho wa Serug yao: zo:- Serug wa Reu yao: zo:- Reu wa Peleg yao: zo:- Peleg wa Eber yao: zo:- Eber wa Shela yao:zo:-

³⁶Shela wa Kainan yao: zo:- Kainan wa Arphaxad yao: zo:- Arphaxad wa Shem yao: zo:- Shem wa Noa yao: zo:- Noa wa Lameg yao: zo:-

³⁷Lameg wa Methusela yao: zo:- Methusela wa Enog yao: zo:- Enog wa Yared yao: zo:- Yared wa Mahalale yao: zo:- Mahalale wa Kenan yao: zo:-

³⁸Kenan wa Enu yao: zo:- Enu wa Sed yao: zo:- Sed wa Adam yao: zo:- Adam wa Mao"So: yao: zo: ngad: ra".