Read Maru LUKA 4 Bible Online

LUKA 4 - Maru bible

LUKA 4

¹Ai: thao Yesu wa Gyang" Lho" Byo we' byang" mung: Yodan gyaung: mae" dam: thug' lo: au:- Byo: yang din"pyad' yo khyo jhui" ye" ra"- ai:tau mae Yesu wa byid xe ba geim" yui: yang ju" phyo' ru qhug' ra".

²Yesu wa ai: ba na gu: mae pe" re: mazo: ngad: ra"- ai: ba na gu: gan lao"- Yesu wa vae: moe' ra".

³Alao" yui wa Yesu re Nao Mao"So: yao: zo: ngad: re wa ce: laug baui re mug boe" li" nae" amyin" byid: wa,- ga: ta" ra".

⁴Yesu wa yui re Byu wa mug: yang za: kao so' qo" daui: na nae" mangad:- ga: Jham: Mugsug' mae tung" to" ra"- ga: phaug' tau" ra".

⁵Ai: thao yui wa Yesu re jhui" do, lo"mung: mug: myid dao mae" mung"dan: alhab' re damyo, nyag: gyo: mae ceim" shid' mung:-

⁶Ce: kheim: so' we' ai: mung"dan: jham: phungbao alhab' ngo nao re byid: nae"- ai:gu: alhab' wa ngore ab byid' to" ru ngad mung:- ngo byid: nug: ra" yaug khag' re ngadqere: ngo qo" byid' ra".

⁷Airumung: nao ngore goe; pa" ngad: re wa ai:gu: alhab' ngo nao re byid: nae"- ga: Yesu re ta" ra".

⁸Yesu wa Asang ni" Mao"So re za: goe; pa" mung: caung da" wa,- ga: Jham: Mugsug' mae tung" to" ra"- ga: tau" ra".

⁹Ai: thao re yui wa Yesu re Yerusalem khyo jhui" ye" lo" mung: Caung:pa" Yham mae" je: myhao: thao" ra" jo, qo mae yenha: to: mung: yang:- nao Mao"So: yao: Zo: ngad: re wa-

¹⁰Mho" khyo byae: gyo" lo" wa,- pe"mung:ga"re Nao re lhaug' zaung" byid: nae" Mao"So wa mug: lagyo: jham re amyin" byid' li" nae".

¹¹Amung: laug baui mae ni" khyid lhao" re: mathe' thaung: sho' yao: bam: lo; yang nao re lham: vo; yu: li" genae"- ga: re: Jham: Mugsug' mae tung" to" ra"- ga: Yesu re ta" ra".

¹²Alao" Yesu wa tau: mung:- ai: Asang ni" Mao"So re magai: jham" qu" nae"- ga: re: Jham: Mugsug' mae tung" to" ra"- ga: ta" ra".

¹³Ai: yui wa Yesu re aja: ja: mae ju" phyo' qu" ru bin lao"- Yesu tau mae" dayo, dataung zo: phao: lo" byaug: ra"- Khoau: agu: dam: yo" nae" rure lao" na: ra".

¹⁴Yesu wa Gyang" Lho" Byo qam: so' we' byang" mung: Galile mung" khyo dam: tug' lo: ra". Yao" khyo re ai: mung" alhab' mae gam: sho' hau" nhao" lo" ako".

¹⁵Yesu wa yao: bam: Tarha" Jung Yham jham mae mho" shid' byid' ra". Yao: re yaug khao: ngo" caung:khin" ako".

¹⁶Yesu wa yao: na: qi" li" ra" Nazared vogaung: khyo joe" lo: ra"- yao: lhaung" kad' ru we' dakhyo:- Dugno: Ba mae Tarha" Jung Yham khyo ye" ra". Yao: wa Jham: Mugsug' nghe' nae"- ga: to" ye; li" lao"-

¹⁷Tarha" Jung Yham agyi pho" wa yao: re lapa Esaia Jham: Mugsug' dang: re byid' ke' ra". Yesu wa ai: Jham: Mugsug'dang: re phung" ke' we' ceru: tung" to" rure myao mung:-

¹⁸Asang: Byo wa nga" dao mae ngad: ra". Pe"mung:ga"re myaung sho" ra" mo, re Ngaui Bau"Lau Dao: Gai kho" kyo: byid: nae" qhid' mae" ngore xau gyad byid' to" ra"- taung" lhaung" to" ru qhug' ra" mo, re loe; beim nhao nae" ru we' myo, jid mo, re myo, dam: myao: li" nhao nae"- ga" ra" khyo re kho" kyo: byid: nae" qhid' mae" re:- deim" zag: yhin" ru qhug' ra" mo, re loe; beim nhao nae"- ga" ru we'

¹⁹Asang o ngaui: ra" zin na joe" li" va" rure kho" kyo: byid: nae" qhid' mae" yao: ngore nhao: ke' ru ngad: ra"- ga: nghe' ra".

²⁰Ai: thao Yesu wa ai: Jham: Mugsug' dang: re dang: mung: Tarha" Jung Yham agyi pho" re dam: byid' ke' mung: zaung: jo; ra"- ai: Tarha" Jung Yham mae na: ra" mo, alhab' Yesu re zhaug' qu" na: bam: ako".

²¹Alao" Yesu wa yao: bam re Ce: jham: dao: wa ana" ba naonhaung" the' gyo: vako" ru we' dakhyo:- jab byang" li" va" ra"- ga: ta" ra".

²²Alhab' mo, yao: re caung:khin" mung:- yao" nhad' thoe mae" jhau: thug' ke' ra" jeju dao: jham re mug' ako". Amung: yao: bam wa- Ceyaug wa Yoseb yao: zo: mangad: i? ga: ta" ako".

²³Alao" Yesu wa yao: bam re Naonhaung" wa mocid' sara pho" we"- naoyao" gaung re naoyao: ya: gai: yu wa,- ga" ra" dao: khyo: re tai" yang: Kapena-um re kad' ra" mau" zo" jham re ngonhaung" the' gyo: va" ru we' dakhyo:- ce: naoyao" mug: mae re: kad' wa,- ga: dang za: ngore ta" li" genae"-

²⁴Ngo naonhaung" re dang za: ta" ru wa lapa khoyaug rere: yao: yao" mug: mae" mo; yang makhae: yu gengad: ra".

²⁵Tae" gyo: ge,- Lapa Elia pyad mae Israel mung"dan: mae sam zin: lho" khyaug' khye' mug: maqu yang: ai: mung"dan: geim" mae bao" khug' mo" khug' lo: au:- Israel amyu" qemae cug' mo" myo: sho' na: ako".

²⁶Ai ngadqere: Mao"So wa ai bam mae" dayaug jhao" re: lapa Elia re manhao: ke' ngad: ra". Sidon mung" Zarephad vogaung: mae na: ra" cug' mo" myhi" dayaug jhao" za: nhao: ke' ra".

²⁷Lapa Elisha pyad mae re: Israel amyu" mae mao gae: de, mo, myo: sho' na gengad yang: re:- yao: bam mae" dayaug re: magai: shao: lo" ko"ngad: ra". Suri amyu" Naman za: gai: shao: lo" ra"- ga: ta" ra".

²⁸Tarha" Jung Yham mae na: ra" mo,byu qe wa cedao: re the' gyo: gelao"- nhag' gyai yo" ako".

²⁹Alao" yao: bam wa to" li" mung: Yesu re vogaung: khug mae" she: khyad' thug' lo" yang: yao: bam: vogaung: te" to" ra" bam au: thao byo, nhad' mae" yao: re deim" phyid' khyo" ke' nae" ga: she: ye" lo" ako".

³⁰Ngadqere: Yesu wa yao: bam: phaung gaung: khyo" phao: thug' lo" ra".

³¹Ai: thao re Yesu wa Galile mung" mae" Kapena-um vogaung: khyo joe" lo: ra". Dugno: Ba mae yao: wa ai: vogaung: mae"- mo, byu qere mho" shid' byid' ra".

³²Yao: mho" shid' ra" khyo re yao: bam alhab' gyo" mug' ako". Pe"mung:ga"re yao" dao: thoe wa kheim: so' bo yang: ngad: ra".

³³Ai: Tarha" Jung Yham khug mae makhyang" ra" yui vao: jaung" ra" byu dayaug na: ra"- yao: wa thoe qi: we'-

³⁴Nazared mae" Yesu we"- nao ngonhaung" we' pe" jho" sin" i? Ngonhaung" re lhau: phyo' pye' nae" ein: nao cekhyo joe" li" i? Nao khag' ngad: rure ngo ba:- nao wa Mao"So: Gyang" Lho" ra" Lagyo: ngad: ra"- ga: zag: hug' ra".

³⁵Yesu wa yao: re Sae za: na wa,- yao: mae" thug' lo" wa,- ga: amyin" byid' ke' ra". Alao" yui wa aiyaug re mo, phaung gaung: mae be; mho' lhang" ke' mung: yao: re pe" dae mate' lo: yao" khug mae" phao: thug' lo" ra".

³⁶Mo,byu qe alhab' wa mug' yang: Cedao: jham wa pe" ru" ra" dao: kheim: jham ngad: i? Byu ceyaug wa kheim: so' qam: o: we' makhyang" ra" yui jham re amyin" byid' ke' lao" yao: bam phao: thug' lo" ko" ra"- ga: yao: cao: jho" ta" ako".

³⁷Yesu lau thoe wa ai: mung" geim" byang" sho' hau" nhao" lo" ra".

³⁸Yesu wa ai: Tarha" Jung Yham mae" thug' lo" mung: Simon: yham khyo vao ye" ra"- Simon: yaug myhi" wa noqam" bug yang: gyai no: na: ra"- Airumung: yao: bam wa Yesu re bao" yu nae" qhid' mae" lham: mho' ako".

³⁹Alao" Yesu wa ai: myiqe: myhi" nhae mae yeye; jo, mung: Noqam" gai: lo" wa,- ga: amyin" byid' ke' ra"- ai: myiqe: myhi" wa noqam" gai: lo" byaug: ru we' ailao" jao" to" li" mung: yao: bam re bang" da" byid' ra".

⁴⁰Ba vao: lo" lao"- no phyo: aja: ja: qhug' ra" mo, re Yesu jhao" jhui" li" ako". Ailao" Yesu wa no phyo: qhug' mo, yaug khao: ngo" dao mae lo, kai: byid: yang: yao: bam alhab' re gai byid' ra".

⁴¹Yui jham re: Nao wa Mao"So: yao: zo: ngad: ra"- ga: gyi: hug' mung: byu myo: sho' yaug mae" phao: thug' lo" ko" ra". Yao: wa Meshia ngad: rure yui jham ba ko" ruyang Yesu wa yui jham re qeim mung: yao: bam re dao: jhau nae" akhang" mabyid: ngad: ra".

⁴²Mug: bo" lao"- ai: vogaung: mae" thug' lo" mung: cae: tae" ra" dajo, qo khyo ye" lo" ra"- Mo, byu qe wa yao: re cao" qho mung:- yao: bam Yesu re qho: myao gelao"- yao: bam mae" mathug' lo" nae" Yesu re tam" ako".

⁴³Ngadqere: Yesu wa yao: bam re Ngo wa Mao"So: mung"dan: Ngaui Bau" Lau Dao: Gai re gatau: vogaung: jham mae re: yekho" kyo: ca" ra"- pe"mung:ga"re ce: mau" zo" qhid' mae" Mao"So ngore nhao: ke' ru ngad: ra"- ga: ta" ra".

⁴⁴Airumung: Yesu wa Yuda mung" geim" mae"Tarha" Jung Yham jham mae kho" kyo: byid' ra".