Read Maru LUKA 5 Bible Online

LUKA 5 - Maru bible

LUKA 5

¹Dalhang: mae" Yesu Genesared tham: yae mae ye; jo; au:- mo, byu qe wa Mao"So: mungdao: re tae" gyo: nae" ga: Yesu jhao" jhin" vao ye" ako".

²Alao" Yesu wa tham: yae mae taui" to" ra" lha shid' khye' re myao: ra". Ngo: kung" mo, wa ai: lha mae" thug' mung: yao: bam: geim jham re cid' san: na: ako".

³Yesu wa ai: lha shid' khye' mae" Simon: lha khug khyo vao ye: mung: lha re gyagao: mae" tham: gaung: khyo dajhid' zo: qhui" ke' nae" qhid' mae" Simon re ta" ra". Yesu wa lha dao mae zaung: jo, yang:- mo, byu qere mho" shid' byid' ra".

⁴Bin lao" Yesu wa Simon re qid no; ra" khyo qui" ye: mung: ngo: myhi" nae" naonhaung" geim jham re khyo" ke' ge,- ga: ta" ra".

⁵Simon wa tau: mung:- Asang we"- ngonhaung" wa amyi damyi khyeim mayab macam: kung" yang: re: ngo: dadau: re: mathe' kung"- ngadqere: ni" dao: thoe khyo" yang ngo wa geim jham re khyo" ke' nae"- ga: ta" ra".

⁶Yao: bam wa geim jham re khyo" ke' mung: ngo: dajham dataung geim" re the' lhaung" yu: ako"- ngo: saung" laug yang: yao: bam: geim jham lhao" re: alaug laug jad: lo" ra".

⁷Ailao"- gatau: lha mae na: ra" yao: bam: byin cao: qere li" bao" yu genae" qhid' mae" lo, tu" tu" yang: khai: ako"- yao: bam li" mung: lha shid' khye' geim" alaug laug nab: lo" sho' ngo: ke' ako".

⁸Ceru re Petru myao lao"- Yesu khyid qao: mae goe, mung:- Asang we"- ngo wa qobo qo" yaug ngad:- ngo khyi" mae" phao: lo" wa,- ga: ta" ra".

⁹Petru we' yao" byin cao: qe alhab' wa yao: bam the' kung" to" ra" ngobam ngozao re qu" mug' ako".

¹⁰Simon we' ngo: kung" byin cao: ngad ko" ra" Zebede yao: zo: Yaku we' Yohan tao re: ai we' dakhyo: mug' ako"- ailao" Yesu wa Simon re Dagyaug wa,- ana" ba mae" thoegu: nao wa byu kung" yaug ngad: li" nae"- ga: ta" ra".

¹¹Yao: bam wa lha re qid yae mae lo" thang: to: mung:- alhab' re to" pye' co' yang: Yesu thao cao" ako".

¹²Dalhang: mae" Yesu wa vogaung: dalam: mae na: jo; au:- ai: vogaung: mae dagaung: geim" mao gae: de; ra" byu dayaug na: ra"- yao: wa Yesu re myao lao" goe; pa" mung: Asang we"- nao o nug: re wa ngore qo" gai: shao: lo" nhao zai ngad: ra"- ga: ta" ra".

¹³Yesu wa yao" lo, yheim" ke' yang: yao: re tin: byid: zo" re" Ngo o nug: ra"- Gai: shao: lo" wa, ga: ta" ra". Ailao" jao" mao gae: gai: shao: lo" byaug: ra".

¹⁴Yesu wa yao: re- Ce: khyo re khag' rere: data" kyo: wa,- ngadqere: khinjaung pho" jhao" din: za: lo" mung: ni" gaung yao: re lo" qhu" wa,- amung: nao gai: shao: lo" va" khyo mo, byu qe: qhid' mae" sagse: doe, vashao:- Moshe amyin" byid' to" ra"xeim: re lo" ngaui" byid: wa,- ga: ta" ke' ra".

¹⁵Ngadqere: Yesu lau thoe wa je: je: za: hau" nhao" lo" mung:- mo, byu qe ajham ataung wa yao" mungdao: re tae" gyo" yu nae" we' yao: bam: no phyo: gai nae" qhid' mae" Yesu jhao" zang" li" ako".

¹⁶Yesu kam" wa yao: lhaung" kad' ru we' dakhyo: cae: tae" ra" jo, qo khyo ye" lo" mung: akyu" yemho' ra".

¹⁷Daba re Yesu mho" shid' byid' na: au:- Yuda mung" we' Galile mung" vogaung: khao: ngo" mae" we' Yerusalem vogaung: mae" joe" li" ko" ra" Pharishe qe we' Tung" Pho"qe wa aitau mae zaung: jo; bam: ako"- No phyo: gai byid: nae" Asang: qam: so' wa Yesu mae bo: ra".

¹⁸Alao" Qu" ge,- Byu daqhae: wa yab qo mae lang" jo; ra" gaung jam: shid: ra" byu dayaug re Yesu jhao" dao: li" ko" ra"- yao: bam wa ai: gaung jam: shid yaug re yham khug khyo dao: vao ye: mung:- Yesu qhid' kheim: mae yeqo" dao: to: nae" qam: ke' ako".

¹⁹Ngadqere: mo,paug' saung" thau: ruyang yao: bam wa ai: gaung jam: shid yaug re yham khug khyo dao: vao ye: nae" khyo mamyao ko" ngad: ra". Ailao" yao: bam wa ai: gaung jam: shid yaug re yham khaung dao khyo dao: do, lo" mung:- mhao: mug: zhogam: pye: re tau: qhid' pye' yang: yab qo geim" we' mo, phaung gaung: Yesu qhid' kheim: mae shoe' khyo" ke' ako".

²⁰Yesu wa yao: bam: lam khug: myid re myao lao"- ai: gaung jam: shid yaug re ba nam pho" we"- ni" qobo re khyad' pye' byid: va"- ga: ta" ra".

²¹Tung" Pho" qe we' Pharishe qe wa Mao"So re ceru: jung" dao: jhau: ra" yaug wa khoru" byu ngad: ra" i? Mao"So dayaug mae" je yang: qobo re khoyaug qo" khyad' byid' i? ga: yao: bam: aung khug mae myid: qu"na: bam: ako".

²²Yesu wa yao: bam: aung khug mae airu: myid: qu" na ko" rure ba yang: Naonhaung" airu: pe"mung: myid: qu" na ko" i?

²³Ni" qobo re khyad' pye' byid: va"- ein: ta" nae" je: laui: i? Mangad: lao"- To" ye, yang: su" lo" wa,- ein: ta" nae" je: laui: i?

²⁴Ngadqere: byu: yao: zo: wa myid gaung dao mae qobo khyad' byid: nae" kheim: so' qo" yaug ngad: rure qhu" byid: geli"- ga: ta" mung: ai: gaung jam: shid yaug re Ngo nao re ta" li"- To" wa,- ni" yab qo re gaug: vo, mung: yham khyo phao: lo" wa,- ga: ta" ra".

²⁵Ailao" jao"- ai: gaung jam: shid yaug wa yao: bam alhab' mo; qhid' kheim: mae to" ye; li" mung: yao" yab qo re gaug: vo,yang: Mao"So re caung:khin" zo" re" yham khyo phao: lo" ra".

²⁶Yao: bam wa matho' ta" losho' gyaug: mug' pye' ru we' Ana" ba ngonhaung" mug' pho: mau" zo" re the' myao va"- ga: ta" mung: Mao"So re caung:khin" ako".

²⁷Ai: thao Yesu ai: vogaung: mae" thug' lo" re yao" khang: gaug zaung mae zaung: jo; ra" Levi- ga: mang: ra" khang: gaug byu dayaug re myao: ra"- Yesu wa yao: re Nga" thao cao" la,- ga: khai: ra".

²⁸Levi wa alhab' re to" pye' co' mung: Yesu thao cao" ra".

²⁹Levi wa yao" yham mae Yesu qhid' mae" bang" da" poe aqi: dalam: kad' ra"- ai: poe mae khang: gaug mo, myo: sho' we' gatau bang" vo qe myo: sho' bobo: ako".

³⁰Ailao" Pharishe qe we' yao: bam: phung: mae" Tung" Pho" qe daqhae: wa Yesu mho"zo: qere Naonhaung" wa khang: gaug mo,we' daga" za: pe"mung: zo: shaug' na ko" i? ga: jung" ta" ako".

³¹Yesu wa yao: bam re Qao" zin" ra" mo, wa mocid' sara maqo ko" ngad: ra"- No mo, za: aqo: ako".

³²Ngo wa din:man: mo, re khai nae" qhid' mae" li" ru mangad:- Qobo qo" ra" mo, myid tha" nae" qhid 'mae" ngo li" ru angad:- ga: phaug' tau" ra".

³³Byu damyo" wa Yesu re- Yohan mho"zo: qe we' Pharishe qe: mho"zo: qe wa- dazab: makyo zo:ve jao" yang: akyu" lhaung" mho' mho' mung: kad' ako"- ngadqere: ni" mho: zo: qe wa zo: yang: shaug' yang: na: ako"- ga: ta" ako".

³⁴Ailao" Yesu wa yao: bam re Lo, xo' poe mae" bang" vo qe wa- pho" sag' we' daga" na: jo, shi" au:- yao: bam re zo:ve qo" jao" nhao genae" i? Maqo" jao" nhao genae".

³⁵Ngadqere: yao: bam: phaung mae" pho" sag' re li" jhui" yu: ra" ba na joe" lo: li" nae"- ailao" kam" wa yao: bam zo:ve jao" li" genae"- ga: phaug' tau" ra".

³⁶Yesu wa dao: tau" ci yang re: yao: bam re- Mai bau: sag' mae" dacug' cad' yu yang: mai bau: xug' mae khag' re: malhaung" pho ko" ngad: ra"- Airu: pho lao" mai bau: asag' khye' jad: lo" li" nae"- ai za: mangad:- Mai bau: asag' cug' we' mai bau: xug' re: majho" dau zai ngad: ra".

³⁷Aimae" sabyi qang: asag' rere: shoqid thaung xug' mae khoyaug re: malhaung" ke' ngad: ra"- Airu: ke' lao"- sabyi qang: asag' yang shoqid thaung xug' re jhin" kho' ke' mung: sabyi qang: yug: sheim:lo" byaug: li" nae". Alao" shoqid thaung re:qeim: lo" byaug zai ngad: ra".

³⁸sabyi qang: asag' re wa shoqid thaung asag' khug mae ke' to: qo: ra".

³⁹Amung: khag' ngadqere: sabyi qang: axug' re bin: shaug' thao re sabyi qang: asag' re manug: shaug' ko" ngad: ra". Yao: wa axug' yao: je: gai:- ga: ta" ra".