Read Maru LUKA 6 Bible Online

LUKA 6 - Maru bible

LUKA 6

¹Dugno: Ba daba mae Yesu wa jung: gaug yo khyo" su" lai: lo" ra"- yao" mho"zo: qe wa jung: gaug shi: re shan" yu mung: yao: bam: lo, vo: khug mae nai: phaug' yang: zo" ako".

²Pharishe qe daqhae: wa- Naonhaung" pe"mung: Dugno: Ba mae magai: kad' ra" ja: kad' ko" i? ga: myid' ako".

³Yesu yao: bam re phaug' tau: mung:- Davi wa yao: we' yao" byu qe vae: moe; gelao" khoru: kad' ko" rure naonhaung" manghe' qu" ko" i?

⁴Yao: wa Mao"So: yham khug khyo vao ye: mung: khinjaung qemae"je yang: khag' re: magai: zo" ra" Mao"So: qhid' kheim: mae qhaug' byid' to" ra" mug re yu zo: mung: yao" byu qere re: byid: zho" ra"- ga: ta" ra".

⁵Ailao" Yesu wa yao: bam re- Byu: Yao: Zo: wa Dugno: Ba: Asang ngad: ra"- ga: ta" ra".

⁶Dugno: Ba gatau daba mae Yesu wa Tarha" Jung Yham khyo vao ye: yang: mho" shid' byid' ra"- ai: mae lo, yo lo, shid: ra" byu dayaug na: ra".

⁷Alao" Tung" Pho" qe we' Pharishe daqhae: wa Yesu re qobo zhaug' nae" khyo qho nug gemung: Dugno: Ba mae no gai byid' ra" la,- magai byid' ra" la,- ga: yao: re nyang" za: jo" qu" na: bam: ako".

⁸Ngadqere: Yesu wa yao: bam: nhag' lam: re ba: pye' byid: mung: ai: lo, dashad' shid yaug re- To" mung: ce: qhid' au: mae li" ye, ri:- ga: ta" ra". Ailao" aiyaug wa to" li" mung: yeye; jo; ra".

⁹Yesu wa yao: bam re- ngo naonhaung" re myid: geli"- Kham" To" Ra" Tarha" wa Dugno: Ba mae gai: ra" mau" zo" kad' nae"- mangad: lao"- magai: ra" mau" kad' nae"- byu: kao: so' re khyad' yu nae"- mangad: lao" se' pye' nae" kholam: re kad' gai:- ga: akhang" byid' to" ra" i? ga: ta" ra".

¹⁰Yesu wa yao: bam re gam: sho' lhang: qu" mung: ai: lo, dashad' shid yaug re- Ni" lo, yheim" ke' wa,- ga: ta" ra". Ailao" aiyaug wa yao" lo, yheim" ke' mung: yao" lo, gai: lo" byaug: ra".

¹¹Yao: bam wa nhag' kyid kyid yo: mung: Yesu re khoru: kad' nae" ra" khyo re yao: bam yao: cao: jho" qham: ako".

¹²Ai: thao Yesu wa bug gaung dalam: khyo akyu" mho' nae"- ga: do, ye" lo" ra"- ai: mae damyi: geim" Mao"So re akyu" mho' mung: na: ra".

¹³Mug: bo" lao"- mho"zo: qere yao: jhao" khai: yu mung: yao: bam mae" daxe: shid' yaug re khyin: yu yang: yao: bam re lagyo: qe- ga: mhang" byid' ra".

¹⁴Ai: lagyo: daxe: shid' yaug wa- Petru ga: yao: mhang" byid' ra" Simon- Simon: yao: nhaung: Andre- Yaku we' Yohan- Philib we' Batholame-

¹⁵Mathe we' Thoma- Alphaeu yao: zo: Yaku we' byumyu" jhid' myid qi" ra" Simon-

¹⁶Yaku yao: zo: Yuda we' thao phyao: yao: re ab byid' pye' nae" yaug boe" li" ra" Yuda Iskarud bam ngad: ako".

¹⁷Yesu wa lagyo: qe we' daga" bug gaung mae" gyo" lo mung:- bug gaung khyid- jao: dae mae yao" mho"zo: qe phung: mo" zang we' daga" ye; jo; ra". Yuda mung"geim" mae" we' Yerusalem mae" re:- panglai: qid yae cao" mae" Ture we' Sidon vogaung: mae" joe" li" ko" ra"- mo, byu qe ajham ataung phung: mo" zang wa Yesu mungdao: re tae" gyo" yu nae" we' yao: bam: no phyo: gai: lo nug geyang: zang" ham: na: bam: ako".

¹⁸Makhyang" ra" yui jham: yang yhin" na: ru qhug' ra" mo, re: li" mung: gai byid' ru qhug' ako".

¹⁹Yesu gaung mae" qam: so' thug' lo" mung: yao: bam: no phyo: alhab' re gai byid' ruyang mo, byu qe alhab' mo, wa yao: re qo" tin: nae" qhid' mae" qam: ke' yang: cao" ako".

²⁰Yesu wa yao" mho"zo: qere qu" mung: ta" ru wa- Myaung sho" ra" mo, naonhaung" wa ngaui lho" ko" ra"- pe"mung:ga"re Mao"So: mung"dan: wa naonhaung" mung"dan: ngad: ra".

²¹Ana" moe, shab' na mo, naonhaung" wa ngaui lho" ko" ra"- pe"mung:ga"re naonhaung" nhag' shid nhag' dag: ru qhug' li" genae"- ana" kaug' ngug: na mo, naonhaung" wa ngaui lho" ko" ra"- Pe"mung:ga"re naonhaung" qi: li" genae".

²²Byu: Yao: Zo" mathao mae byu jham naonhaung" re ngag: ha: pye'- jung" gaui mung: naonhaung" mang re ta" phyo' ta"qheim" ru qhug' gelao"- naonhaung" wa ngaui lho" ko" ra".

²³Airu: qhug' gelao"- thug' jhu: sho' bau: ge,- pe"mung:ga"re mug:gaung: mung"dan: dao mae naonhaung" aphug' jhaung qhu" wa- gyai qi" ra"- naonhaung" re airu: kad' ra" mo; phug' phyid' qe wa naonhaung" re kad' ru we' dakhyo:- daba: mae" lapa qere re: airu: kad' vako" ra".

²⁴Ngadqere: jo,nho" qo" ra" mo, naonhaung" wa byuxa: vaqoe, qhug' ko" ra"- pe"mung:ga"re naonhaung" wa myan myan yo yo za: qo" na: avako".

²⁵Ana" zo" gyi: shaug' gyi: mo, naonhaung" wa byuxa: vaqoe, qhug' ko" ra"- Pe"mung:ga"re naonhaung" vae: moe; genae"- Ana" qi mo, naonhaung" wa byuxa: vaqoe, qhug' ko" ra"- Pe"mung:ga"re naonhaung" kaug' ngug: li" genae".

²⁶Byu alhab' yang naonhaung" re gai:- ga: caung:khin" gelao"- naonhaung" byuxa: vaqoe, qhug' ko" ra"- pe"mung:ga"re yao: bam: phug' phyid' qere: lapa apyag' qere ai we' dakhyo: caung:khin" byid: vako" ra".

²⁷Ngadqere: nga" mungdao: re tae" gyo" yu: ra" mo, naonhaung" re ngo ta" ru wa- Naonhaung" gyevo qere jhid'de; ge,- naonhaung" re manug thug nghang" ra" mo, re gai kad' ge,-

²⁸Naonhaung" re nhang" ra" mo, re shaman" byid: ge,- naonhaung" re roe" zo" ra" mo; qhid' mae" akyu" mho' byid: ge,-

²⁹Ni" boqae dashad' re pyo' ra" yaug re gatau dashad' rere: khae byid: shi: wa,- ni" adao: bau: re yu: pye' ra" yaug re ni" akhug: bau: rere: yu nhao shi: wa,-

³⁰Nao jhao" li" mho' ra" mo, alhab' re byid: wa,- ni" zai yu: pye' ra" yaug mae" dadam: mho' yu wa,-

³¹Su: yang nyhao: re khoru: kad' byid: nae" nyhao: yao: myid: o: ru we' dakhyo:- su rere: ai we' dakhyo: kad' byid: ge,-

³²Naonhaung" re jhid'de; ra" mo, reza: naonhaung" jhid'de; ko" re wa- naonhaung" wa Mao"So: shaman" jeju khoru: qo" khae: yu genae" i? Qobo qo" ra" mo, lhao" re: yao: bam re jhid'de; ra" mo, re wa jhid'de; ako"

³³Naonhaung" re gai kad' mo, reza: naonhaung" gai dam: phaug' kad' ko" ngad: re wa naonhaung" wa Mao"So: shaman" jeju khoru: qo" khae: yu genae" i? Qobo qo" ra" mo, lhao" re: ai we' dakhyo: kad' ako".

³⁴Dam: qo" xe' byid' li" nae"- ga: myid: lam: ra" mo, re za: naonhaung" jhid' byid: ko" re wa- naonhaung" wa Mao"So: jeju khoru: qo" khae: yu genae" i? Qobo qo" ra" mo, lhao" re: dam: qo" tug' yu nae"- ga: myid: lam yang: qobo qo" ra" mo, yao: cao: jho" jhid' byid' ako".

³⁵Ngadqere: naonhaung" kam" wa naonhaung" gyevo qere jhid'de; mung: yao: bam re gai kad' ge,- Pe" rere: nhag' manghae: lo: jhid' byid: ge,- Airu: kad' gelao"- naonhaung" aphug' jhaung qhu" wa qi: nae"- ailao" Myhao: Thao" ra" Mao"So: Yao: Zo: bam re: naonhaung" boe" genae"- pe"mung:ga"re Mao"So wa jeju maba: beim" ra" mo, we' makhyang" ra" mo, re gai kad' ra" yaug ngad: ra".

³⁶Naonhaung" Yao: Pho" wa nhag' khyag' shogu: yaug ngad: ru we' dakhyo:- naonhaung" re: nhag' khyag' shogu: na ge,-

³⁷Su re dao: dakho' ge,- ailao" Mao"So wa naonhaung" re dao: makho' nae"- Su re dao: daphyid' ge,- ailao" Mao"So wa naonhaung" re dao: maphyid' nae"- amung: su re qobo khyad' byid: ge,- ailao" Mao"So wa naonhaung" qobo re khyad' byid' li" nae".

³⁸Su re byid: ge,-Ailao" Mao"So wa naonhaung" re byid' li" nae". Byang" sheim sho' deim" jhan yang: man" ra" jo, lag: yang naonhaung" lo, mae ke' byid' li" nae". Gaigai: yao: naonhaung" lo, khug mae qo" yu: li" genae". Mao"So wa- naonhaung" yang su re lag byid' ra" jo, lag: yang naonhaung" re lag byid: li" nae".

³⁹Yesu wa ce: dao: tau" yang re: yao: bam re- mho" shid' ra". Myo, jid yaug wa myo, jid yaug re khyoqhid' qo" she nae" i? Yao: airu: khyoqhid' she: ngad: re wa yao: shid' zo: shid' zo" geim" dung: gyan: khug khyo byid: gyo" lo" li" genae" mangad: i?

⁴⁰Mho"zo: wa mho" pho" tho' maje ngad: ra". Ngadqere: mho"zo: wa cao jab alhab' bin: zhao: yu thao re wa- yao" mho" pho" we' dakhyo: ngad: li" nae".

⁴¹Nao wa naoyao" myo,jid' khug mae bo: ra" thao: thaung: re bo thoe magyo: lo:- ni" mao:nhaung: pho" myo,jid' khug mae bo: ra" thao: je; re pe"mung: myao: i?

⁴²Nao wa naoyao" myo,jid' khug mae bo: ra" thao: thaung: re lhao" bo thoe magyo: lo:- ni" mao:nhaung: pho" re Mao:nhaung: pho" we"- ni" myo,jid' khug mae" thao: je, re yu: pye' byid: li"-ein: khoru: mung: qo" ta" i? Geim kad' yaug we"- ni" myo,jid' khug mae" thao: thaung: re shi" sao qhid' yu: pye' wa,- airulao" za:- ni" mao:nhaung: pho" myo,jid' khug mae bo: ra" thao: je, re qang: qang: za: myao yang: qo" yu: pye' byid: nae".

⁴³Qam: bo: ra" shi: gae wa malho" ra" ashi: mazaui: ngad: ra"- Qam: mabo: ra" shi: gae re: lho" ra" ashi: maqo" zaui: ngad: ra".

⁴⁴Zaui" ra" ashi: re qu" yang: shi: gae khao: ngo" re gai: qu" ba: yu: ra"- naonhaung" wa zau: gae mae" pho' ham" shi: maqo" phyo' yu gengad: ra"- amung: zau: bye, mae" re: sabyi shi: maqo" phyo' yu gengad: ra".

⁴⁵Gai: ra" yaug wa yao: yao" nhag' lam: gai: ra" jo,nho" ban" mae" gai: ra" ja: re phoe' thug' ba: ra". Amung: magai: ra" yaug re: yao: yao" nhag' lam: magai: ra" jo,nho" ban" mae" magai: ra" ja: re phoe' thug' ba: ra"- pe"mung:ga"re nhad' wa nhag' lam: khug mae byang" jo; rure jhau: thug' ke' ra".

⁴⁶Naonhaung" wa nga" mho dao: re wa magyo: lo:- ngore Asang we"- Asang we"- ein: pe"mung: ta" ko" i?

⁴⁷Ngo jhao" li" mung: nga" dao: re tae" gyo" yu yang: phug' cao" ra" yaug khag' ngadqere: yao: wa khag' we' dau: rure ngo naonhaung" re ta" kyo: geli".

⁴⁸Aiyaug wa yham zhaug' ra" au:- no, sho' dau: yang: laug thin dao mae apan zhaug' mung: yham zhaug' ra" yaug we' dau: ra". Qid je" li" lao" moe bug: yang ai: yham re lodeim: ngadqere: ai: yham wa tang tang za: zhaug' to" ru ngad mung: ai: yham wa malaui: ngad: ra".

⁴⁹Ngadqere: nga" dao: re gyo" yu mung: maphug' cao" ra" yaug wa- apan mazao lo: myid cin mae yham zhaug' ra" yaug we' dau: ra". Moe bug: yang lodeim: we' aijao" yao: byo; gyang: lo" ra"- amung: ai: yham byo; gyang: lo" ru wa phyi yao: ngad: ra"- ga: ta" ra".