Read Maru LUKA 7 Bible Online

LUKA 7 - Maru bible

LUKA 7

¹Yesu wa ai: dao: jham re mo, byu qere bin: ta" lao"- yao: wa Kapena-um vogaung: khyo ye" lo" ra".

²Ai: vogaung: mae Roma gyezug: pho" dayaug wa yao: gyai ngaui: ra" daui daui okaung pho" dayaug qo" ra"- ai: daui daui okaung pho" wa no yang: alaug laug shid: lo" na: ra".

³Gyezug: pho" wa Yesu khyo re the' gyo: lao"- yao: wa Yuda byu au: jhaung daqhae: re Yesu jhao" nhao: ke' mung:- yao" daui daui okaung pho" re li" gai byid: nae" qhid' mae Yesu re mho' ke' ra".

⁴Yao: bam Yesu jhao" joe" li" gelao"- yao: bam wa Yesu re Ce: gyezug: pho" wa- nao bao" thaug' yu nae" man: qi" ra" yaug ngad: ra".

⁵Pe"mung:ga"re yao: wa ngonhaung" amyu" re jhid'de; mung:- ngonhaung" qhid' mae" Tarha" Jung Yham dalam: re kad' byid: yaug ngad: ra"- ga: ta" zo" re" kyid kyid ga: mho' ako".

⁶Airumung: Yesu wa yao: bam we' daga" cao" ye" lo" ra". Yao: wa ai: yham we' mataung" va" rumae joe" lao"- gyezug: pho" wa yao" ba nam qere nhao: ke' mung:- Yesu re- Asang we"- naoyao" gaung re aqug: akhai: dakad' wa,- nao nga" yham khyo vao li" nae" qhid' mae" ngo wa maman: qi" yaug ngad:-

⁷Ngo yao: nao jhao" li" nae" re: man: qi" nae"-ein: ngo majho- Ni" amyin" dao: dakheim: zo: ta" ke' re nga" daui daui yaug wa gai: lo" li" nae".

⁸Pe"mung:ga"re ngore: kheim: so' qo" ra" gyezug: mo" qe: o mae na: ra" byu dayaug ngad:- nga" o mae re: gyezo: qe myo: sho' na: ako". Gyezo: dayaug re ye: wa,- ein: amyin" byid: lao"- yao: ye" ra"- Gatau dayaug re- lo wa,- ein: amyin" byid: lao"- yao: lo: ra". Amung: nga" jeim pho" rere:- ce kad' wa,- ein: amyin" byid: lao"- yao: kad' ra"- ga: ta" nhao: ke' ra".

⁹Yesu wa cedao: re the' gyo: lao" mug' mung:- yao" thao cao" qin" ko" ra"- Mo, byu qere lhang: qu" yang:- naonhaung" re ngo ta" geli"- Israel amyu" mae lhao" re: ce: lam khug: myid qhi" bo: ru ngo mamyao: qu" shi:- ga: ta" ra".

¹⁰Gyezug: pho" ba nam qe yao" yham khyo dam: tug' joe" lo ko" re- gyezug: pho" daui daui yaug wa no gai: byaug va" rure yao: bam lomyao: ako".

¹¹Ai: thao mataung" myao" re Yesu wa Nain ga" ra" vogaung: khyo ye" lo" ra"- yao" mho"zo: qe we' byu phung: mo" zang re: cao" ye" ako".

¹²Vogaung: kyae" kham: mae Yesu joe" ye" lo" au:- byushid mao dai" mo, daphung: yan" thug' li" ako"- ai: byushid mao wa cug' mo" myhi" dayaug: zote: zo: ngad: ra". Ai: cug' mo" myhi" we' daga" vobyu qe phung: mo" zang re: bocao: dai" li" ako".

¹³Asang wa ai: cug' mo" myhi" re myao lao"- nhag' gyai qu" khyag' mung: yao: re- Dangug wa,- ga: ta" ra".

¹⁴Yesu wa te' sho' qui" ye: mung: ai: gaung: re yetin" ra"- Mao dao mo, re: thang byid' ako". Alao" Yesu wa- Zolau: zo: we"- nao re ngo ta" li"- To" wa,- ga: ta" ra".

¹⁵Alao" shid yaug wa to" zaung mung: dao: jhau: li" ra"- Yesu wa ai: zolau: zo: re yao: myhi" re dam: ab byid' ra".

¹⁶Byu alhab' mo, gyaug: mug' ru we' Mao"So re caung:khin" zo: re"- yao: bam wa- Ngonhaung" phaung gaung: mae lapa aqi: dayaug thug' li" va"- Mao"So wa yao" byumyu" re khyad' yu nae" qhid' mae" joe" li" va"- ga: ta" ako".

¹⁷Ce: Yesu lau thoe wa Yuda mung" geim" jao: sho' we' avai: ayae mug: khaung: mae hau" nhao" lo" ra".

¹⁸Yohan: mho"zo: re wa ai: khyo alhab' re Yohan re lo" ta" kyo: gelao"-

¹⁹Yohan wa yao" mho"zo: shid' yaug re khai: yu yang:- Asang jhao" nhao: ke' mung:- nao wa ai: joe" li" nae" yaug ngad va" i? Mangad: lao"- gatau dayaug re ngonhaung" myid: lao" na shizai i? ga: myid: nhao: ke' ra".

²⁰Yao: shid' zo: wa Yesu jhao" joe" lao"- nao wa ai: joe" li" nae" yaug ngad va" i? Mangad: lao"- gatau dayaug re ngonhaung" myid: lao" na shizai i? ga: qid nyhab' byid: yaug Yohan wa nga" shid' zo: re myid: nhao: ke' ra"- ga: ta" ako".

²¹Ai: ayo, mae yao:- Yesu wa byu myo: sho' mo; no phyo: we' no jham re gai byid: mung: makhyang" ra" byo jham re khe' thug' ke' ru we' myo, jid myo: sho' mo, rere: myo, myao: li" nhao: ra".

²²Yesu wa Yao: shid' zo: re tau: mung:- ni" shid' zo: the' myao- the' gyo: vako" rure Yohan re lo" ta" kyo: ge,- Myo, jid mo, dam: qo" myao: li" ako"- Khyid qeim mo, khyo qo" su" li" ako"- Mao gae: de, mo, gai: shao: lo" ko" ra"- No: jid mo, no: gyo" li" ako"- Shid mo, dam: daui: to" li" ako"- Myaung sho: mo, wa Ngaui Bau" Lau Dao: re the' gyo" yu: ako".

²³Ngo re maaug' o: yaug wa ngaui lho" ra"- ga: ta" ra".

²⁴Yohan mho"zo: shid' yaug phao: lo" gethao re Yesu wa Yohan: khyo we' sin: yang: byu phung: mo" re- Naonhaung" Yohan jhao" din"pyad' yo khyo ye: ko" au:- naonhaung" pe" re qu" nae"ein: thug' ye: ko" i? La: yang hug' nghan" na: ra" myo, gae jham re qu" nae"ein: ye: ko" i?

²⁵Naonhaung" pe" re qu" nae"ein: thug' ye: ko" i? Mai gai bau: gai ve; ra" yaug re qu" nae"ein ko" i? Mai gai bau: gai ve, mung: ngaui qhang dao mae langa: khyo" na: na mo, wa kho:kham kho" mae na: ako".

²⁶Ngo re ta" kyo: gela,- naonhaung" pe" re qu" nae" ein: thug' ye: ko" i? Lapa re qu" nae" ein ko" i? Gaigai: yao: ngad: ra"- naonhaung" wa lapa tho' je: qi" yaug re yemyao: avako".

²⁷Pe"mung:ga"re Yohan wa Jham: Mugsug' mae- ngo wa ni" khyo re seim" nyhang" to: nae" qhid' mae" lagyo: re ni" qhid' au: mae ngo nhao: ke' nae"- ga: Mao"So ta" to" ra" yaug ngad: ra".

²⁸Naonhaung" re ngo ta" geli"- Yohan tho' je: qi" ra" xao su byu dayaug re: mana: qu" shi: ngad: ra". Ngadqere: Mao"So: mung"dan: mae je: ngai: thao" ra" yaug wa Yohan tho' je: qi" ra".

²⁹Mo, byu qe alhab' mo, Yesu dao: re gyo" ako"- yao: bam we' khang: gaug mo, wa- je yang: Mao"So nho: din:man" khyo re phug' cao" mo, ngad: ako". Yao: bam wa Yohan lo, mae qid nyhab' kham: yu va" mo, ngad: ako".

³⁰Ngadqere: Pharishe qe we' Tung" Pho" qe wa yao: bam: qhid' mae" Mao"So myid: yaung: to" rure ngag: pye' ako". Yao: bam wa Yohan: lo, mae qid nyhab' kham: yu nae" ha: pye' mo, ngad: ako".

³¹Yesu wa xo' mung:- ana" ceqae" mae" byu qere ngo pe" we' dau tau" nae" i? Yao: bam wa pe" we' dau: i?

³²Yao: bam wa gai jao: mae zaung: jo, mung: Naonhaung" wa ngonhaung" khalhao: mad ngadqere: mago" gengad: ra"- ngonhaung" ngug yao" yao" ngadqere: naonhaung" makaug' ngug gengad: ako"- ga: daphung: we' daphung: zojhi jhi yang: yao: cao: yao: jho" yao: na ko" ra" zoshao qe we' dau: ako".

³³qid nyhab' byid: yaug Yohan wa zo:ve jao" ru we' sabyi qang: mashaug' lo: joe" li" ra". Alao" naonhaung" wa Yao: wa yui zaung yaug ngad: ra"- ga: ta" ako".

³⁴Byu: Yao: Zo: wa zo: mung: shaug' mung: joe" li" lao" re:- naonhaung" wa- Ceyaug re qu" qu" ge,- yao: wa zo: shaug' so' kho' nhad' shu yaug- qobo qo" mo, we' khang: gaug mo; byin cao: ngad: ra"- ga: ta" ako".

³⁵Ngadqere: Mao"So: pha,jhi" wa khae: yu: ra" mo, alhab' khyo" yang dang: rure qhu" byid' ava"- ga: ta" ra".

³⁶Pharishe dayaug wa yao: we' daga" myi" xeim zo: nae" qhid' mae" Yesu re khai: ra". Yesu wa ai: Pharishe yham khyo vao ye: mung: zozo: nae" ga: zaung: jo; ra".

³⁷Ai: vogaung: mae qobo gyai kad' ra" myiqe: dayaug na: ra". Yao: wa Pharishe pho" yham mae Yesu zozo" na: ga" rure the' gyo: lao"- nae pyo" ra" xau byang" sho' bo: ra" laug gyang" thaug' dathaug' cili" mung:-

³⁸Yesu nhaung thao" shad' yao" khyid thao mae li" ngug: ye; jo; ra"- Yesu khyid wa yao" ngug byid jham: yang jhug' lo" byaug: ra". Alao" ai: myiqe: wa aire yao" xae: yang sad' byid: mung: khyid re bobaug baug yang: nae pyo" ra" xau vhe' gyad byid' ra".

³⁹Ceru re Pharishe pho" myao lao"- ceyaug wa lapa gaigai: ngad dang: re wa yao: re tin" ra" myiqe: wa khag' ngad: rure we' qobo jab ngad: rure ba nae" ngad: ra"- ga: yao" aung khug mae ta" ra".

⁴⁰Yesu wa yao: re- Simon we"- nao re ngo ta" nae" daja: jo;- ga: ta" ra". Simon wa Mho" pho" we"- ngore ta" kyo: la,- ga: ta" ra".

⁴¹Ailao" Yesu wa ngaui jhid' zo" ra" byu dayaug jhao" jhin de; ra" byu shid' zo: na: ako"- Dayaug wa ngaui thang: the: ngo" yo kye' jhin de, mung:- dayaug wa ngo" xe kye' jhin de; ra".

⁴²Yao: shid' zo: wa jhin madam: qo" xe' gemung: ai: ngaui sang wa- yao: shid' zo" geim" re jhin khyad' pye' byid' ra"- Alao" ai shid' zo: mae" khoyaug lam: ai: ngaui sang re je: jhid'de; nae" laug i? ga: ta" ra".

⁴³Simon wa- je: laug sho' re khyad' pye' byid: qhug' yaug ngad: ra" ein: ngo jho:- ga: tau" ra".

⁴⁴Alao" Yesu wa myiqe: shad' khyo lhang: lo mung: Simon re- Ce: myiqe re nao myao: i? Ngo ni" yham khyo vao li" re nao wa nga" khyid cid' qid mabyid: ngad: ra". Ngadqere: yao: wa nga" khyid re yao" ngug byid: yang cid' byid: mung: yao" xae: yang sad' ho byid' ra".

⁴⁵Nao wa ngore bobaug malham: baug ngad: ra"- ngadqere: yao: wa ngojhao" vao li" mae" nga" khyid re bobaug baug mathang ngad: ra".

⁴⁶Nao wa nga" au: mae xau magyad byid: ngad: ra"- ngadqere: yao: wa nga" khyid re nae pyo" ra" xau gyad byid' ra".

⁴⁷Airumung: ngo nao re ta" li"- yao" qobo myo: sho' khyad' pye' byid: qhug' va" ruyang yao: wa jhid'de; myid myo: sho' qhu" byid' ava"- Dajhid' za: khyad' pye' byid: qhug' yaug kam" wa jhid'de; myid dajhid' za: qhu" byid' ra"- ga: ta" ra".

⁴⁸Ailao" Yesu wa ai: myiqe: re- Ni" qobo jham re khyad' pye' byid: va"- ga: ta" ra".

⁴⁹Saboe" mae daga" zaung: jo, mo, wa- Qobo jham re lhao" qo" khyad' pye' byid' ra" byu ceyaug wa- khag' ngad: i? ga: yao: bam: aung khug mae ta" ako".

⁵⁰Ngadqere: Yesu wa ai: myiqe: re- Ni" lam khug: myid wa nao re khyad' yu: ava"- Yaug yo za: phao: lo" se,- ga: ta" ra".