Read Maru LUKA 8 Bible Online

LUKA 8 - Maru bible

LUKA 8

¹Ai: thao mataung" myao" re Yesu wa vozo: vozang jham khyo gam: sho' du" qin" mung: Mao"So: mung"dan: Lau Dao: Gai re cao" kho" kyo: byid' ra"- Mho"zo: daxe: shid' yaug wa Yesu we' daga" bocao" qin" ako".

²Makhyang" ra" yui jham we' no jham mae" gai shao: lo" byaug ko" ra" mo, mae" myiqe: damyo" ngad: ra" yui nhad' dau: re khe' thug' pye' byid' ra" Magadala Mari-

³Herod yham mae" zug:pho" Khuza yao: myi: Yoana- Susanna bam we' gatau myiqe: myo: sho' mo, re: yao: bam yao" ngaui qhang: yang Yesu we' yao" mho"zo: qere bao" thaug' byid: mung: bocao: qin" ako".

⁴Mo,byu qe wa vogaung: khao: ngo" mae" zang" ham: li" na mung: byu phung: mo" zang ham: na: bam gelao"- ce: dao: tau" ci yang: yao: bam re ta" kyo" ra".

⁵(Dalhang: mae- byu dayaug wa myug: shi: sin: nae" qhid' mae" thug' ye" lo" ra". Yao: wa yo mae myug: shi: yesin" ke' re myug: shi: daqhae: wa khyodang mae gyo" lo" ge mung: byu jham zab: nhe" pye' ru we' ngho' jham: yang gaug zo" pye' ko" ra".

⁶Myug: shi: daqhae: wa laug qan" myid dao mae gyo" lo" ako"- Agae yaug: thug' li" qere: myid zhai: majhug' yang: kyaug' shid: lo" ko" ra".

⁷Myug: shi: daqhae: wa zau: bye, gyo: mae gyo" lo" ako"- Zau: gae jham we' daga" yaug: qi" li" mung: zau: gae jham: yang hab' pye' ra".

⁸Amung: myug: shi: daqhae: wa myid gai dao mae gyo" lo" ako"- Agae yaug: qi" li" gemung:- myug: shi: khao: ngo" anho" dayo nho" nho" ashi: zaui" li" ako"- ga: ta" ra".) Alao" Yesu wa No: de, ko" re wa gyo" yu ge,- ga: ta" mung: dao: pin" pye' ra".

⁹Yao" mho"zo: qe wa ce: dao: tau" pe" re ta" nug: ra" khyo Yesu re myid' ako".

¹⁰Yesu wa tau: mung: Naonhaung"wa Mao"So: mung"dan: no; thao" khyo re ba: gyo: nae" akhang" Mao"So wa naonhaung" re byid' to" ra". Ngadqere: dang: ra" gaje wa yao: bam qu" gengadqere:- mamyao- gyo: gengadqere: maba: gyo: genae" qhid' mae" dao: tau" khyo" yang ta" ru ngad:- ga: ta" ra".

¹¹Dao: tau" lajheim: wa ceru: ngad: ra"- ai: myug: shi: wa Mao"So: mungdao: ngad: ra".

¹²Khyodang mae gyo" lo" ko" ra" myug: shi: jham wa ai: mungdao: re gyo" yu gengadqere:- lam" mung: khyad' yu: ru maqhug' genae" qhid' mae" Satan wa li" mung: yao: bam: nhag' lam: khug mae" mungdao: re li" yu: pye' byid' ra" mo, ngad: ako".

¹³Laug qan" myid dao mae gyo" lo" ko" ra" myug: shi: jham wa mungdao: re gyo" yu ge we' ngaui bau: za: khae: yu gengadqere:- agyi: no, sho' macin" ruyang dayo, daban: za: lam khug mung: jham" qu" ru thaung" qhug' lo lao"- dam: phaug' lo" ra" mo, ngad: ako".

¹⁴Zau: bye, gyo: mae gyo" lo" ko" ra" myug: shi: jham wa ai: mungdao: re gyo" yu gengadqere: myid: qug: myid: ci" ru- jo,nho" qo" nug: ru- cepyad mae pyo: nug: ru jham: yang hab' pye' mung: ashi: lho" mazaui" ra" mo, ngad: ako".

¹⁵Myid gai dao mae gyo" lo" ra" myug: shi: jham wa ai: mungdao: re gyo" yu mung: gai: ru we' phug' cao" ra" nhag' lam: khug mae tang tang zaui" zag: ci yang: ashi: zaui"ra" mo, ngad: ako".

¹⁶Myikaug' re te' mung: ban" yang maug: lhaung" to:- mangad: lao"- jaung: gyid' mae khag' malhaung" zhaung: to" qu"- Yham khug khyo vao li" mo, alhab' myibao re myao genae" qhid' mae" myikaug' tao" dao mae lhaung" zhaung: to" ako".

¹⁷Nyham" to" ra" ja: pe" ngadqere: myao: thug' li" nae"- amung: nghoe' to" ra" ja: pe" ngadqere: de: de: za: myao: thug' li" nae".

¹⁸Airumung: naonhaung" khoru: gyo" yu ko" rure lha" ge,- pe"mung:ga"re qo" ra" yaug khag' re ngadqere: je: laung: byid' li" nae"- ngadqere: maqo" yaug mae" kam" wa- yao: qo"- ga: myid: jho: na: ra" dajhid' za: re lhao" yao: mae" yu: pye' byid' li" nae"- ga: ta" ra".

¹⁹Yesu yao: myhi" we' yao: nhaung: bam wa Yesu jhao" joe" li" ako"- ngadqere: mo, paug' saung" thau yang: yao: jhao" maqo" joe" vao ye: ngad: ako".

²⁰Byu dayaug wa Yesu re Ni" myhi" we' ni" nhaung: bam nao re qhug' nug mung: taung gaung mae li" ye; jo; ako"- ga: ta" kyo" ra".

²¹Yesu wa yao: bam alhab' mo, re- Mao"So: mungdao: re gyo" yu mung: phug' cao" ra" mo, wa- nga" myhi"- nga" nhaung: bam ngad: ako"- ga: ta" ra".

²²Daba re- Yesu wa yao" mho"zo: qe we' daga" lha dakhye' mae yedo; zaung mung: yao: bam re- Nyhao: nhaung"- tham: thoete' khyo gau"de; ye: gelang:- ga: ta" ra". Airumung: yao: bam wa gau" de; ye" lo" ako".

²³Yao: bam gau" de; ye" lo" na ko" au:- Yesu wa yab: myhid' jo; ra". Ai: tham: mae nyag din taung" la qam" hug' lo mung: lha khug mae qid byang" li" na: ruyang yao: bam wa gyai gyaug: ci" na: ako".

²⁴Mho"zo: qe wa Yesu re yenhug' mung:- Asang we" Asang we"- ngonhaung" jeim" lo" na va"- ga: ta" ako". Alao" Yesu wa to" li" mung: ai: la we' bang: lhung" re qeim: ke' ra"- La we' bang: lhung" wa yo za: tae" lo" byaug mung:- gyai qi: sho' yo: byaug: ra".

²⁵Alao" Yesu wa mho"zo: qere Naonhaung" lam khug: myid wa khotau mae i? ga: ta" ra". Yao: bam kam" wa mug' ru we' gyaug mung:- ceyaug wa khag' ngad: i? La we' bang: lhung" re lhao"- yao: amyin" byid: mung: yao" mho dao: gyo" ako"- ga: yao: cao: jho" ta" ako".

²⁶Yesu we' yao" mho"zo: qe wa- Galile mung" we' tau" te' mae" Gerase mung" khyo gau" de; ye" ako".

²⁷Yesu taung gaung khyo su" do, lo" na: au:- ai: vo mae" yui zaung: ra" byu dayaug yao: re li" qhug' ra"- aiyaug wa gaung pyad' du" qin" ru myao" va" ra"- yao: wa yham mae mana lo:- lab bug khaung: mae na: qin" ra".

²⁸Yao: wa Yesu re myao lao"- zag: hug' mung: Yesu khyid qao: mae gyang: goe, yang:- Myhao: thao" ra" Mao"So: Yao: Zo: Yesu we"- nao we' ngo pe" jho" sin" i? Nao re ngo mho' ra"- ngore dayhin" la,- ga: hug' ta" ra".

²⁹Yao: ceru: ta" ru wa yao" khug mae" ai: makhyang" ra" yui re phao: thug' lo" nae" Yesu amyin" byid' ke' ruyang ngad: ra". Ai: makhyang" ra" yui wa aiyaug re myo: sho' lhang vao: jaung" va" ra"- yao" khyid lo, jham re jao co" yang taui: mung: kyam: khug mae lhaung" to: sho' ngadqere:- yao: wa jao co: jham re lao" phyid' pye' mung: ai: yui wa yao: re din"pyad' yo khyo cidao" lo" lo" mung: ra".

³⁰Yesu wa yao: re- Ni" mang pe" ngad: i? ga: myid' ra"- Alao" yao: wa- nga" mang wa Legio ngad: ga: tau" ra". Pe"mung:ga"re yui myo: sho' yao" khug mae vao: jaung" jo, gemung: ngad: ra".

³¹Yui jham wa yao: bam re no; thao" ra" jo, qo khyo makhe' khyo" ke' nae" qhid' mae" Yesu re mho' ako".

³²Aitau mae vo, dajham mo" zang bug gaung mae bad zo" na: ako"- Airumung: yui jham wa yao: bam re vo, jham: khug mae yevao: jaung" nhao nae" qhid' mae" Yesu re akhang" mho' ako". Yesu wa yao: bam re akhang" byid' ke' ra".

³³Yui jham wa ai: byu mae" phao: thug' lo" mung: vo, jham: khug mae yevao: jaung" ako". Alao" ai: vo, phung: mo" geim" wa dang" kam" nhad' mae" tham: khug khyo tao" byae: gyo" lo" gemung: nab: shid: pye' ako".

³⁴Airu: boe" rure vo, zam: mo, myao gelao"- yao: bam tao" phao: lo" mung: ai: lau thoe re vogaung: khug mae we' seyo: vogaung: jham khyo hau" nhao" lo" ko" ra".

³⁵Mo, byu qe wa boe" lo: ra" khyo re yequ" nae" qhid' mae" thug' ye" lo" ako". Yao: bam Yesu jhao" joe" ye: ko" re yao" khug mae" yui jham phao: thug' lo" vako" ra" yaug wa mai bau: ve, yang: Yesu khyid qao: mae nhag' gyang: gyang: za: zaung: jo; rure yemyao gemung:- yao: bam alhab' mo, gyaug: din: pye' ako".

³⁶Aire the' myao: ra" mo, wa- mo, byu qere ai: yui vao: jaung" ra" yaug khoru: gai: lo" byaug: rure lham: ta" kyo" ako".

³⁷Ailao" ai: mang: khaung: mae"- mo, byu qe wa gyai gyaug: nin" pye' geyang: Yesu re yao: bam tau mae" phao: lo" nae" qhid' mae" mho' ako". Airumung: Yesu wa lha dao yedo; zaung yang: dam: tug' phao: lo" ra".

³⁸Ai: yui jham phao: thug' lo" byaug vako" ra" yaug wa Yesu re- ngore: nao we' daga" cao" nae" qhid' mae"akhang" byid: la,- ga: mho' ra".

³⁹Ngadqere: Yesu wa Ni" yham khyo phao: lo" mung: Mao"So nao re khoqhi" bao" thaug' byid: va" ra" khyo alhab' re lo" ta" kyo: wa,- ga: yao: re ta" mung: nhao: ke' ra". Ai: yaug wa- Yesu yao: re gai byid: va" khyo re vogaung: gam: sho' ta" hau" lo" ra".

⁴⁰Yesu tham: thoete' mae" dam: tug' joe" lo lao"- mo, byu qe alhab' mo, yao: re lao" na: bam ko" ruyang mo, byu qe wa yao: re lham: tug: yu: ako".

⁴¹Alao" Yairu ga: mang: ra" Tarha" Jung Yham agyi pho" dayaug joe" li" ra". Yao: wa Yesu khyid qao: mae li" goe, mung: Yesu re yao" yham khyo li" nae" qhid' mae" mho' ra".

⁴²Pe"mung:ga"re daxe: shid' zin ngad va" ra" yao" zote: myiqe: zo: shid: lo" na mung: ngad: ra". Yesu wa aiyaug jhao" cao" ye" lo" na: au: mo, byu qe wa shad' khao: ngo" khyo" Yesu re the' jhin" ako".

⁴³Aibam: phaung mae daxe: shid' zin lam: lam: sa: sheim no no: ra" myiqe: dayaug bobo: ra". Yao: wa yao: qo" ra" gu: alhab' mocid' sara qere byid: mung: ya nhao ngadqere:- yao: re khag' maqo" ya: gai byid: gengad: ra".

⁴⁴Ai: myiqe: wa Yesu nhaung thao" khyo qui" li" mung: Yesu bau: thao mae yetin" ke' ra". Ailao" jao"- yao" sa: sheim: ru thang: lo" byaug: ra".

⁴⁵Yesu wa- ngore tin: yaug khag' ngad: i? ga: myid' ra". Yaug khao: ngo" wa khag' matin:- ga: ha: ako". Petru wa- Asang we" Mo, byu qe wa nao re lhang" kham" to: mung: nao re the' jhin" zao" ako"- ga: ta" ra".

⁴⁶Ngadqere: Yesu wa- Dayaug yaug ngore tin" kyivako"- pe"mung:ga"re nga" khug mae" qam: so' thug' lo" kyiva" ruyang aire ngo ba:- ga: ta" ra".

⁴⁷Ai: myiqe: wa yao: kad' rure beim: va" ra"- ga" rure ba: qu" lao"- yao: wa ko, ko, nin" ru we' Yesu khyid qao: mae li" goe, mung:- yao: pe"mung: Yesu re tin" ra" khyo we' ailao" jao"- yao" no khoru: gai: lo" byaug: ra" khyo re mo, byu qe alhab' mo; qhid' kheim: mae Yesu re ta" kyo" ra".

⁴⁸Yesu wa ai: myiqe: re- Nga" myiqe: zo: we"- ni" lam khug: myid wa nao re gai byid' ava"- Yaug yo za: lo" se,- ga: ta" ra".

⁴⁹Yesu cedao: ta" na shi" au:- ai: Tarha" Jung Yham agyi pho" yham mae" byu dayaug joe" li" mung:- Yairu re- Ni" myiqe: zo: shid: ava"- Mho" Pho" re aqug: akhai: dacekad' lo: wa,- ga: ta" ra".

⁵⁰Ngadqere: Yesu aire the' gyo: mung: Yairu re- Dagaung yug- Lam" za: lam" wa,- ni" myiqe: zo: dam: gai: li" zai ngad:- ga: ta" ra".

⁵¹Yesu wa Yairu yham mae joe" ye: lao"- Petru- Yohan- Yaku we' ai: myiqe: nau" yao: myhi" yao: pho" tao mae" je yang: khag' rere: yham khug khyo yao: we' daga" mavao nhao ngad: ra".

⁵²Ai: tau mae yaug khao: ngo" wa- ai: myiqe: nau" mathao mae kaug' ngug: na: bam: ako"- yao: wa Dangug ge,- ai: zoshao wa mashid- yao: wa yab: myhid' jo; ru angad:- ga: ta" ra".

⁵³Yao: bam alhab' mo, wa ai: myiqe: nau" shid va"- ga" rure ba geyang:- Yesu re qi: jung" pye' ako".

⁵⁴Yesu kam" wa ai: myiqe: nau" lo, mae zaui" ci mung:- Zoshao we"- To" wa,- ga: yao: ke'ra".

⁵⁵Myiqe: nau" wa kao so' dam: daui: li" mung: ailao" jao" to" li" ra"- Yesu wa ai: myiqe: nau" re zo:ve byid: zho: genae" qhid' mae" amyin" byid' ra".

⁵⁶Ai: myiqe: nau" yao: myhi" yao: pho" tao wa mug' hao" byaug: ako". Ngadqere: Yesu wa ai: boe" ra" khyo re khag' rere: mata" kyo: genae" qhid' mae" yao: shid' tao re zug' nhao: ra".