Read Maru LUKA 9 Bible Online

LUKA 9 - Maru bible

LUKA 9

¹Yesu wa mho"zo: qe daxe: shid' yaug re khai: zhang" yu mung:- yui alhab' re khe' thug' pye' nae" qam: so' we' no phyo: jham re gai byid: nae" qam: so' byid' ra".

²Ai: thao Yesu wa yao: bam re Mao"So: mung"dan: akhyo yekho" kyo: genae" we' no mo, re yegai byid: genae" qhid' mae" nhao: ke' ra".

³Yesu wa yao: bam re- Naonhaung" ai: gyaung: khyo qhid' mae" pe" re: dayu: ci ge,- Zaung: bao" daci ge,- Thaung pyan- zo:ve- Ngaui davin ge,- Bau: lhao" re: ajan" davin ge,-

⁴Naonhaung" re bang" lham: tug: yu: ra" yham kho:yham mae ngadqere: naonhaung" ai: vogaung: mae" dam: thug' lo" yo, joe" sho' ai: yham mae yethang: na ge,-

⁵Naonhaung" re bang" malham: tug: yu ko" re wa ai: vogaung: mae" thug' lo" mung: yao: bam shad' mae sagse: boe" nae" qhid' mae" naonhaung" khuvo: mae" phalhug re ko: khyo" to: co' ge,- ga: ta" ra".

⁶Alao" lagyo: qe wa thug' ye" lo" mung: vogaung: alhab' khyo jao: sho' du" qin" mung: Lau Dao: Gai re cao" kho" kyo" ru we' khyi" khao: ngo" mae" mo, re gai byid' ako".

⁷Galile mung" zug: Herod wa ai: boe" na: ra" khyo alhab' re the' gyo: lao"- yao: wa myid gyai gyo" nhaung" ra". Pe"mung:ga"re mo, byu qe daqhae: wa qid nyhab' Yohan kao so' dam: daui: li" ru ngad: ra"- ga: ta" na: ako".

⁸Amung: gatau daqhae: wa Elia po" thug' li" va" ra"- Daqhae: wa ganhae" mae" lapa qemae" dayaug yaug kao so' dam: daui: li" ru ngad: ra"- ga: ta" na: ako".

⁹Alao" Herod wa- Yohan au: re ngo phyid' pye' byid: va" ru ngad:- ngo lau thoe the' gyo" na: ra" ceyaug wa khag' ngad: i? ga: ta" mung: yao: wa Yesu re the' myao nae" qhid' mae" qam: ke' na: ra".

¹⁰Lagyo: qe wa phao: lo mung:- yao: bam zaui" lo: ra" mau" zo" alhab' Yesu re lota" kyo" ako". Alao" Yesu wa yao: bam re jhui: mung: Bedsaida ga: mang: ra" vogaung: khyo ye" lo" ko" ra".

¹¹Mo, byu qe ai: khyo re the' gyo: gelao"- yao: bam wa Yesu thao cao" ye" lo" ako"- Yesu wa yao: bam re lham: tug: yu mung: Mao"So: mung"dan: khyo yao: bam re ta" kyo" ru we' qo ca" ra" mo, re gai byid' ra".

¹²Ba vao: lo" na lao"- mho"zo: qe daxe: shid' yaug wa Yesu jhao" lo mung:- Mo, byu qere vogaung: jham khyo we' yozao jham khyo lo" mung: yab jo, qo we' zo:ve lo" qho genae" qhid' mae" nhao: ke' wa,- pe"mung:ga"re ce: jo, qo wa din"pyad' yo ngad: ra"- ga: ta" ako".

¹³Ngadqere: Yesu wa yao: bam re- Naonhaung" yao:- yao: bam re zo:ve byid: zho: ge,- ga: ta" ra"- Yao: bam wa tau: mung:- ngonhaung" qo" ru wa mug ngo" khai" we' ngo: shid' dau: za: angad:- nao ngonhaung" re ce: mo, byu qe alhab' mo, geim" qhid' mae" zo:ve yevai nhao nug: i? ga: ta" ako".

¹⁴(Ai: mae yauggai qe za: ngo" taung ko ngad: ra".) Yesu wa yao" mho"zo: qere- Daphung: re ngo" xe zo: zo: ko kad' mung: aphung: phung: zaung: jo, nhao ge,- ga: ta" ra".

¹⁵Mho"zo: qe airu: bin: kad' gethao re Yesu wa ai: mug ngo" khai" we' ngo: shid' dau: re yu: yu mung:- mug:gaung khyo tau: qu" yang: Mao"So re jeju caung: mung: mug we' ngo: re khyoe' phai" yang: mo, byu qere gae byid: genae" qhid' mae" mho"zo: qere byid' ra".

¹⁶

¹⁷Yao: bam alhab' mo, gyi: sho' zo" ako"- Mho"zo: qe wa zo" tang" ra" aje, abai" jham daxe: shid' gyan byang" sho' gaug: zhang: yu: ako".

¹⁸Daba mae Yesu wa yao: za: akyu" mho' na: au:- mho"zo: qe wa yao: jhao" lo: ako"- Yesu wa yao: bam re Ngo khag' ngad: ra"- ga: mo, byu qe ta" ako" i? ga: myid' ra".

¹⁹Yao: bam wa tau: mung: Daqhae: wa nao wa- qid nyhab' Yohan ngad: ra"- ga: ta" ako". Amung: daqhae: wa daba ganhae" mae" lapa qemae" dayaug dam: daui: li" ru ngad: ra"- ga: ta" ako"- ga: phaug' tau" ako".

²⁰Alao" Yesu wa yao: bam re- Aire naonhaung" wa ngore khag' ngad: ein: ta" ko" i? ga: myid' ra". Petru wa tau: mung:- nao wa Mao"So: yang nhao: ke' ra" Meshia ngad: ra"- ga: ta" ra".

²¹Alao" Yesu wa cekhyo re khag' rere: mata" kyo: genae" qhid' mae" yao: bam re jhaug' za: zug' nhao: ra".

²²Yesu wa yao: bam re- Byu: Yao: Zo: wa khyag' qhui: ru myo: sho' kham zo: ca" zai ngad:- Yuda lau de, au: jhaung qe- khinjaung qi: qe we' Jham: Tung" Pho" qeyang ngag: pye' ru qhug' mung: se' pye' li" genae"- ngadqere: sam ba thao re dam: daui: to" li" nhao nae".

²³Amung: yao: wa yao: bam alhab' re- Nga" thao cao" nug yaug khag' ngadqere: yao: yao" qhid' mae" ha: pye' ca"- amung: yao: yao" pyao: zang re ba khao: ngo" vo, yang: nga" thao cao" ca".

²⁴Pe"mung:ga"re yao: yao" kao so' re khyad' yu nug: ra" yaug khag' ngadqere: kao so' jeim: nae"- ngadqere: nga" mathao mae yao: yao" kao so' jeim" ra" yaug wa khyad' yu: ru qhug' nae".

²⁵Byu wa ce: mug: myid geim" re qo" sang: yu ngadqere:- yao: yao" kao so' jeim" byaug: re wa pe" akyu" bo: i? Pe" akyu" mabo ngad: ra".

²⁶Alao" ngore we' nga" mho dao: re qho' ra" yaug re wa Byu: Yao: Zo: wa yao" phungbao- yao: pho" phungbao- mug: lagyo: qe: phungbao we' joe" li" lao"- Byu: Yao: Zo: re: yao: re qho' li" nae".

²⁷Naonhaung" re ngo dang za: ta" geli"- cetau mae na: ra" mo, mae" daqhae: Mao"So: mung"dan: re mamyao myao wa mashid genae"- ga: ta" ra".

²⁸Aijham re bin: ta" thao dalaban kyo: re Yesu wa Petru- Yohan we' Yaku bam re jhui: mung: akyu" mho' nae" qhid' mae" bug gaung dalam: khyo do, ye" lo" ako".

²⁹Yao: akyu" mho' na: au:- yao" myo, nho lai" lo" mung: yao" mai bau: jham wa qhui qhui qhag qhag bao: bao: phyu: li" ra".

³⁰Ai: tau mae nyag din taung" byu shid' yaug wa Yesu we' dao: jho" jhau: na: ako"- ai shid' zo: wa- Moshe we' Elia ngad: ako"- yao: shid' zo: wa mug:gaung: phungbao we' thug' li" mung:- Yesu wa mataung" myao" re Yerusalem vogaung: mae shid kham: ra" khyo" yang-

³¹Mao"So myid o: ra" khyo re jab byang" nhao nae" khyo we' sin: mung: Yesu we' jho" jhau: na: ako".

³²Petru we' yao" byin cao: qe wa yab nug moe moe mung: nug: ako"- ngadqere: yao: bam so" li" gelao"- Yesu phungbao re we' yao: we' daga" ye; jo; ra" byu shid' zo: re myao: ako".

³³Ai shid' zo: Yesu mae" phao: lo" na ko" au:- Petru wa Yesu re Asang we"- ngonhaung" cetau mae na: re gai: ra"- ni" qhid' mae" zaung dalam:- Moshe qhid' mae" dalam:- Elia qhid' mae" dalam: ngonhaung" zaung sam lam: kad' nae"- ga: pe" mabeim: maso: ta" ke' ra".

³⁴Petru airu: jhau: na shi" au:- jham dathaui: thug' li" mung: yao: bam re losham: nghoe' ra"- Mho"zo: qe wa ai: jham thaui: yao: bam: dao mae losham: nghoe' ke' lao"- yao: bam gyaug: din: ako".

³⁵Jham thaui: khug mae"- Ceyaug wa nga" Zo: ngad:- yao: re ngo khyin: to" ru ngad:- yao" mho dao: re tae" gyo: ge,- ga: thoe dathoe jhau: thug' li" ra".

³⁶Ai: thoe jhau: thang: lo" lao"- aitau mae wa Yesu za: thang: jo; ra". Mho"zo: qe wa yao: bam the' myao: ra" khyo alhab' re ai: ayo, gyo: mae khag' rere: mata" kyo: lo: sae za: na: ako".

³⁷Thao: ba Yesu we' mho"zo: sam yaug wa bug gaung mae" dam: tug' gyo" lo: ako"- Byu phung: mo" zang Yesu re li" tug: yu: ako".

³⁸Byu dayaug wa mo, phaung gaung: mae" hug' mung:- Mho" Pho" we"- nga" zo: zote: zo: re qu" byid: nae" ngo nao re mho' ra".

³⁹Ai: yui yao: re vao: jaung" mung:- nyag din taung" hug' ru we' lao" thin: jab: lo" yang: nhad' mae" nyab dui" athaui: thaui: thug' ra"- no sho' gyai aqug: akhai: kad' yang: lhaung" phao: thug' lo" ra".

⁴⁰Ai: yui re khe' thug' pye' byid: nae" qhid' mae" ngo wa ni" mho"zo: qere mho' ngadqere: yao: bam maqo" khe' thug' ngad: ako"- ga: ta" ra".

⁴¹Yesu wa- Lam khug: myid mabo: ru we' shad' nghung" ra" byu qe we"- ngo naonhaung" we' khomyhao" joe" sho' na zai i? Ngo naonhaung" re khomyhao" joe" sho' zang: qhao" zai i? ga: tau" ra". Ai: thao Yesu wa- aiyaug re Ni" zo: re cekhyo jhui" lo ri:- ga: ta" ra".

⁴²Ai: yauggai nau" lo: na: au:- yui wa yao: re myid gaung khyo gyang: lang" lo" nhao mung: lao" thin: jab: lang" lo" nhao: ra". Yesu wa ai: makhyang" ra" yui re amyin" byid: mung:- yauggai nau" re gai byid' ra". Amung: yao: pho" re dam: ab byid' ke' ra".

⁴³Mo, byu qe alhab' mo, wa Mao"So: qam: so' re mug' hao" byaug: ako". Mo, byu qe wa Yesu zaui" ra" mau" zo" ja: khao: ngo" re mug' na: bam shiko" au:-

⁴⁴Yesu wa yao" mho"zo: qere- Byu: Yao: Zo: wa byu jham: lo, khug khyo ab byid' pye' ru qhug' li" nae"- Dao: ceru re naonhaung" mato" myhid' lo: xam" ci ge,- ga: ta" ra".

⁴⁵Ngadqere: mho"zo: qe wa cedao: pe" re ta" nug: rure maba: gyo: ko" ngad: ra". Ai: dao: re yao: bam maba: gyo: vageshao: ga:- nyham" to: byid' ra". Mho"zo: qe wa ai: khyo we' sin: mung: Yesu re mavae" myid: ngad: ako".

⁴⁶Mho"zo: qe wa yao: bam mae" qi" thao" ru khoyaug ngad: i? ga: yao: bam yao: cao: jho" ta" ngag: thug' li" ko" ra".

⁴⁷Yesu wa yao: bam: aung khug mae pe" myid: na ko" rure ba: ruyang yao: wa zoshao dayaug re jhui" yu mung: yao" ayae mae yhe' to: yang:-

⁴⁸yao: bam re- Nga" mang mathao mae ce: zoshao re khae: yu: ra" yaug khag' ngadqere: ngore khae: yu: ra"- ngore khae: yu: ra" yaug khag' ngadqere: ngore nhao: ke' ra" yaug re khae: yu: ra". Pe"mung:ga"re naonhaung" mae alhab' tho' ngai: thao" ra" yaug wa qi" thao" ra" yaug ngad: ra"- ga: ta" ra".

⁴⁹Alao"- Yohan wa Asang we"- ni" mang khyo" yang yui jham re khe' thug' na: ra" byu dayaug re ngonhaung" the' myao:- ngadqere: yao: wa ngonhaung" phung: mae" mangad: yang: ngonhaung" yao: re tam" pye' va"- ga: ta" ra".

⁵⁰Yesu wa Yohan we' gatau mho"zo: qere- Naonhaung" yao: re datam" ge,- pe"mung:ga"re naonhaung" re gye makad' ra" yaug khag' ngadqere: naonhaung" shad' mae" yaug ngad: ra".

⁵¹Yesu mug:gaung khyo to' yu: ru qhug' nae" ayo, joe" li" na lao"- yao: wa myid: phyid' ci mung:- Yerusalem khyo ye" lo" na: ra".

⁵²Yesu wa yao" qhid' au: khyo lagyo: qere nhao: ke' mung: yao: bam wa- Yesu qhid' mae" ja: khao: ngo" nyhang" seim" byid: nae"qhid' mae" Samari vogaung: dalam: khyo vao ye" ako".

⁵³Ngadqere: Yesu wa Yerusalem vogaung: khyo ye" lo" na: ruyang vogaung: bao: wa yao: re makhae: yu ko" ngad: ra".

⁵⁴Mho"zo: Yaku we' Yohan tao wa ceru re myao gelao"- yao: shid' tao wa- Asang we"- yao: bam re ngha" se' pye' nae" qhid' mae" ngotao mug:gaung mae" myi: khai: khyo" yu nae"- nao qad: i? ga: ta" ako".

⁵⁵Yesu wa lhang: lo mung:- yao: shid' tao re qeim: ra".

⁵⁶Ai: thao Yesu we' yao" mho"zo: qe wa gatau: vogaung: khyo thug' ye" lo" ako".

⁵⁷Yao: bam khyole; mae su" na ko" au:-byu dayaug wa Yesu re- nao khai: ye: khai: ni" thao ngo cao" nae"- ga: ta" ra".

⁵⁸Yesu wa yao: re- Zag ne jham wa khyaung qo" ako"- Ngho' zo: jham re: asad' qo" ko" ra"- ngadqere: Byu: Yao: Zo: wa au: khug jo, qo lhao" re: maqo" ngad: ra"- ga: ta" ra".

⁵⁹Yesu wa gatau dayaug re nga" thao cao" wa,- ga: ta" ra". Ngadqere: aiyaug wa- Mho" Pho" we"- nga" pho" mao gaung re shi" lo" nyhab' shaung: pye' nae" qhid' mae" akhang" byid: la,- ga: ta" ra".

⁶⁰Yesu wa- byushid qe wa yao: bam: byushid qere nyhab' shaung vageshao:- nao wa Mao"So: mung"dan: khyo yehau" kyo: byid: wa,- ga: tau" ra".

⁶¹Gatau dayaug wa- Mho" Pho" we"- ngo ni" thao cao" nae"- ngadqere: nga" yham byu qere shi" lo" au" co' nae" akhang" byid: la,- ga: ta" ra".

⁶²Yesu wa yao: re- Kheim zhaug' mae zaui" ci yang: nhaung thao" khyo lhang: qu" ra" yaug khag' ngadqere: Mao"So: mung"dan: qhid' mae" akyu" mabo ngad: ra"- ga: ta" ra".