Read Maru MHO" PEIM: 11 Bible Online

MHO" PEIM: 11 - Maru bible

MHO" PEIM: 11

¹Naonhaung" Mao"So ASANG re jhid'de; mung: yao" tarha" alhab' re khonhae" re: phug' cao" na ge,.

²Yao: we' naonhaung" zam" khug: yang: thaung" qhug' ru jham khyo" yang naonhaung" zhao: yu vako" ra" ASANG: khyo re ana" ba myid: beim: ge,- ai: thaung" qhug' ru jham re qhug' lo mo, wa naonhaung" zoshao qe mangad:- naonhaung" yao: ngad: ako". Naonhaung" wa yao" qi" qhang: ru- yao" qam: so' yao" phung qam: o:-

³Yao" mug' pho: ve, lho jham re naonhaung" myao: lo: ako". Naonhaung" wa Egutu kho:kham re we' yao" mung"dan: geim" re pe" kad' lo: ra" khyo rere: myao: lo: ako".

⁴Naonhaung" re cao" khe' gelao" yao: bam re Tham: Ne mae nab: shid: lo" nhao: ra" khyo" yang yao: bam: myao: jham we' gye myao: lhin" jham we' daga" Egutu gyetab re ASANG: yang bin sho' khoru: sham" nghoe' pye' rure naonhaung" myao: lo: ako".

⁵Naonhaung" ce jo, qo khyo majoe" li" shi: gere ASANG wa din"pyad' yo mae naonhaung" qhid' mae" pe" kad' byid' lo: rure: naonhaung" ba: ako".

⁶Naonhaung" wa Rubin amyu" kaung mae" Eliab nho: yauggai zo: Dathan we' Abiram tao re yao: pe" kad' ra" khyo re naonhaung" myid: beim" ako". Yaug khao: ngo" nho: qhid' kheim: mae myidgaung wa bag: ho" li" mung: yao: shid' yaug: yham byu qe yao: bam: zaung jham- yao: bam: daui daui okaung qe alhab' we' gug'nyhug' jham we' daga" yao: bam re myug: pye' ra".

⁷Ngad va" ASANG kad' lo: ra" qi" qhang: mau" jham re myao mo, wa naonhaung" yao: ngad: avako".

⁸Ana" ba naonhaung" re ngo byid' ra" amyin" ja: khao: ngo" re phug' cao" ge,- ailao" naonhaung" wa ai: qid gyaung: re qo" gau" de; ye: mung: naonhaung" vao ye: genae" ngad: ra" mung"dan: re yeqo" sang: yu: li" genae".

⁹Amung: ASANG: yang naonhaung" phug' pho" qere we' yao: bam: myid:zo: qere byid: nae" ga: dao:so: byid' to" ra" myid xau bo mung: myid gai: ra" mung"dan: mae naonhaung" apyad qhang sho' qo" na: li" genae".

¹⁰Naonhaung" yesang: yu genae" ngad: ra" mung"dan: wa qhid' phyao: naonhaung" na: lai: lo: ra" Egutu mung" ru"ru mangad: ngad: ra". Aimae- naonhaung" gaug zo qho: gelao"-yothaung: jham khyo qid ke' nae" qhid' mae" gyai qam: ke' yang: mau" zaui: ca" ako".

¹¹Ngadqere: naonhaung" vao ye: genae" ngad: ra" mung"dan: wa bam mug:- lao:khaung: mug: qu yang qid qo" ra" mung"dan: ngad: ra".

¹²Naonhaung" Mao"So ASANG ce: mung"dan: re qu" gun caung byid: mung: zin geim" aire lhaug' qu" na: ra".

¹³Airumung: ana" ba ngo naonhaung" re byid' to" ra" amyin" dao: jham re phug' cao" ge,. Naonhaung" Mao"So ASANG re jhid'de; mung:- naonhaung" aung khug nhag' lam: alhab' yang yao: re caung da" byid: ge,.

¹⁴Naonhaung" phug' cao" ko" re wa- qo ca" ra" ayo, joe" lao" yao: wa naonhaung" mug:myid khyo jham: zang jham: zo: mug: qu byid: nae". Airulao" naonhaung" gaug zo- sabyi qang:- naonhaung" qhid' mae" zhanlun xau- thug' byid: mung:- naonhaung" gug'nyhug' jham: qhid' mae" mhin: yaug: li" nae". Naonhaung" o: ra" zo:ve alhab' re naonhaung" qo" yu: li" genae".

¹⁶So gatau jham re caung:pa" nae" we' caung da" byid: nae" qhid' mae" naonhaung" yao" gaung re ASANG mae" daphaug' lo" nhao ge,.

¹⁷Naonhaung" phaug' lo" gelao"- ASANG wa naonhaung" re nhag' yo" li" nae". Yao: wa mug: qu: rure tam" pye' mung: naonhaung" mug:myid wa qhovo: yaug nae" qhid' mae" gyai kyaug' ho: byaug: li" nae". Ailao" yao: naonhaung" re byid: nae" ngad: ra" mung"dan: wa mug:myid gai sho' ngadqere:- naonhaung" wa aimung" mae mamyao" re shid' byaug: li" genae".

¹⁸Ce: amyin" dao: jham re myid: beim: mung: aire jhid'de; kao bau ge,- ta" peim: byid' ra" zai khyo" aijham re- naonhaung" lo,pau" mae taui" te' ci mung: naonhaung" nga: lao: mae re: taui" te' ci ge,.

¹⁹Aijham re naonhaung" zo: dau qere mho" shid' byid: ge,. Naonhaung" wa yham mae na: au: re:- khyo su" na: au: re:- dugno: thang: na: au: re:- mau" zaui" na: au: re: ce amyin" dao: jham yao: bam re ta" kyo: ge,.

²⁰Aijham re- ni" yham kham: baung jham mae we' kham: mo" dung: jham mae tung" te' to: ge,.

²¹Ailao" ni" phug' pho" qere byid: nae" ga: naonhaung" Mao"So dao:so: byid' to" ra" mung"dan: mae nao we' ni" zo: dau qe wa apyad qhang sho' qo" na: li" genae". Naonhaung" wa ai: mung"dan: mae- myidgaung tho' mae mug:gaung ajo; jo; ra" myhao" qo" daui: na: li" genae".

²²Ngoyang naonhaung" re amyin" byid' to" ra" dao: ja: khao: ngo" jhaug' zaug za: phug' cao" ge,. Naonhaung" Mao"So ASANG re jhid'de; ge,- yao: byid' ra" amyin" dao: ja: khao: ngo" re phug' cao" mung: yao: re jhaug' zaug ge,.

²³Airulao" naonhaung" qhid' au: khyo jhin" ye" lo" au:- ai: byumyu" qere yao: khe' thug' pye' li" nae". Amung: naonhaung" tho' je: myo: je: qi" qhang: ru we' qam: je: bo: ra" byumyu" qe sang: ra" mung"dan: re qo" sang: yu: li" genae".

²⁴Naonhaung" zab: lai: ye" lo" ra" myidgaung wa naonhaung" myidgaung ngad: li" nae". Naonhaung" mug: kyo: wa mug: thao shad' din"pyad' yo mae"- mug: am: shad' Lebanon bam joe" sho'- ba thug' shad' Uphrad gyaung: mae" ba vao shad' Mug:gaung: panglai: joe" sho' ce" ye" lo" li" nae".

²⁵Naonhaung" ye" lo" ra" mung"dan: khao: ngo" mae ni" Mao"So ASANG wa yao: dao:so: byid' to" ru we' dakhyo: byumyu" qere nao re gyaug nhao nae". Naonhaung" re khag' yang re: maqo" tam" pye' genae".

²⁶Ana" ba ngo wa nao re- shaman" jeju we' nhang: kheim: re khyin: yu nae" akhang" byid' ra".

²⁷Nao wa ni" Mao"So ASANG: amyin" dao: jham re phug' cao" yang: ngad: re- ana" ba nao re ngo shaman" jeju byid: nae".

²⁸Ngadqere: nao wa ce: amyin" dao: jham re maphug' cao" lo:- nao qhid' phyao: macaung:pa" qu" ra" so gatau jham re- caung:pa" nae" qhid' mae" khyonghung: nghung" lo" byaug yang: ngad: re wa nhang: kheim: zao" nae".

²⁹Naonhaung" yesang: yu genae" ngad: ra" mung"dan: khyo ASANG naonhaung" re jhui" vao ye: lao"- naonhaung" wa shaman" jeju dao: re Gerizim bam mae" ta" hau: mung:- nhang: kheim: re wa Eba bam mae" naonhaung" ta" hau: nae" ngad: ako".

³⁰(Ce: bam shid' bam wa Yodan lao:khaung: mae na ko" ra" Khanan byu qe: mug: kyo: mae" Yodan gyaung: ba vao shad' mae jo, ako". Ai: bam shid' bam wa Gigela vogaung: nhae More vogaung: mae jo; ra" gyang" lho" ra" sag' gae jham mae" mataung" va" ra" ba vao shad' mae jo; ako".)

³¹Naonhaung" wa Yodan gyaung: gau" de; ye: mung: naonhaung" Mao"So ASANG: yang naonhaung" re byid: nae" ngad: ra" mung"dan: re- yesang: yu nae" ngad: avako". Naonhaung" aire yesang: yu mung: aimae yete" na gelao"-

³²Ana" ba ngo naonhaung" re byid' ra" tarha" alhab' re phug' cao" qo: rure beim: ge,.