Read Maru MHO" PEIM: 12 Bible Online

MHO" PEIM: 12 - Maru bible

MHO" PEIM: 12

¹Ce wa naonhaung" phug' pho" qenho: Mao"So ngad: ra" ASANG: yang naonhaung" re byid: nae" ngad: ra" mung"dan: mae naonhaung" na: jo; ra" myhao" phug' cao" nae" tarha" jham ngad: ra". Ai: tarha" jham re tae" gyo: ge,.

²Ai: naonhaung" yesang: yu: na: nae" ra" mung" mae" byumyu" qe caung:pa" byid: ko" ra" yao: bam: so jham jo; ra"- myhao: ra" bam bug gaung- sag' gae qao: ru"ru jo, qo jham alhab' re phyo' qheim" pye' ge,.

³Yao: bam: phan jham re phyo' khyo" pye' byid: mung: yao: bam: gyang" lho" ra" laug zang baung: jham re adau atam" be; khyoe' pye' byid: ge,. Yao: bam: so myhi" Ashe nho: alho jham re ngha" pye' mung: yao: bam: so alho jham re baug: kho' pye' ge,- airulao" yao: bam wa ai: jo, qo mae khonhae" re: maqo" caung:pa" lo: genae" ngad: ako".

⁴Naonhaung" wa ai: byumyu" qe yao: bam: so jham re caung:pa" ko" ra" lai khyo" naonhaung" Mao"So ASANG re- dacaung:pa" ge,.

⁵ASANG wa amyu" byu qe yao" qhid' kheim: khyo li" mung: yao: re qo" caung:pa" byid: nae" jo, qo dalam: re naonhaung" amyu" kaung alhab' mo; nho: mug:myid mae" khyin: yu" li" nae".

⁶Naonhaung" wa aitau mae naonhaung" xeim: jham re phad' ngaui" byid: nae" ngad mung:- naonhaung" ngaui" xeim: gatau jham- daxe bam mae" dabam- naonhaung" ngaui" xeim: jham- ASANG re dao:so: byid' to" ra" jhaung qhu" jham- naonhaung" myid bug: yang: byid' ra" ngaui" xeim: jham- sao qhid' xao" ra" naonhaung" nung: we' yao jham re phad' ngaui" byid: genae"- ngad: ako".

⁷Aimae naonhaung" re shaman" byid: yaug ngad: ra" naonhaung" Mao"So ASANG: qhid' kheim: mae naonhaung" we' naonhaung" yham byu qe wa zo: gemung:- naonhaung" zaui: so: vako" ra" gai: ra" lo, mau" jham: qhid' mae" ngaui bau" li" genae".

⁸Ai: ayo, joe" lao"- naonhaung" zaui: so" lo: ru we' dakhyo: mazaui: ca" ko" ngad: ra". Naonhaung" alhab' mo, wa naonhaung" o ngaui: ru we' dakhyo:- ana" ba joe" sho' caung:pa" lo: ako".

⁹Pe"mung:ga"re naonhaung" Mao"So ASANG naonhaung" re byid: nae" ngad: ra" naonhaung" ngaui pyo: yaug yo za: qo" yu nae" mung"dan: khyo naonhaung" maqo" vao ye: shi: geyang: ngad: ako".

¹⁰Naonhaung" Yodan gyaung: re gau" de; ye: gelao"- ASANG wa ai: mung"dan: re naonhaung" re sang: yu nhao mung: aimae qo" na: li" genae". Yao: wa naonhaung" gyevo alhab' mo; lo, mae" gug:gam byid: mung: naonhaung" wa ngaui pyo: yaug yo za: qo" na: li" genae".

¹¹ASANG wa yao: re caung:pa" byid: nae" jo, qo dalam: re khyin: yu: li" nae". Naonhaung" wa ai: jo, qo khyo ngo amyin" byid' to" ra" gu: ja: khao: ngo" re yao: jhao" ce ye: ca" nae" ngad: ako". Phad' ngaui" byid: nae" naonhaung" ngaui" xeim: jham- naonhaung" gatau ngaui" xeim: jham- naonhaung" daxe bam mae" dabam alu: qhaug' byid' ra" jhaung qhu" ASANG re naonhaung" byid' to" ra" ai: gakai: lai alu: jhaung qhu" jham re ciye: ca" li" genae".

¹²Naonhaung" zo: dau qe- naonhaung" daui daui okaung qe- naonhaung" vogaung: mae na ko" ra" Levi byu qe we' daga" ai: yao" qhid' kheim: mae ngaui bau: ge,- Levi byu qe wa mug:myid maqo" sang: yu genae" rure myid beim: ge,.

¹³Naonhaung" wa naonhaung" yao: khyin: yu: ra" khojo, qo mae re: naonhaung" ngaui" xeim: jham re magai: ngaui" byid: nae" ngad: ako".

¹⁴Naonhaung" amyu" kaung jham mae" amyu" kaung dalam" nho: mug:myid mae" ASANG khyin: yu nae" ngad: ra" dajo, qo mae za: aijham re naonhaung" qhaug' byid: ca" nae" ngad: ako". Ai: jo, qo mae za: phad' ngaui" byid: nae" ngad: ra" naonhaung" ngaui" xeim: jham re qhaug' byid: nae" ngad mung:- ngo amyin" byid' to" ra" gatau alhab' re kad' genae" ngad: ako".

¹⁵Ngadqere: naonhaung" gug'nyhug' jham re naonhaung" na: ra" jo, qo khao: ngo" mae galin: gago: gai: se' zo" ako". Naonhaung" wa naonhaung" re ASANG: yang byid' ra" nho" qo" zo: nae" ngad: ako". Shocid- yo: sho: re naonhaung" zo" ru we' dakhyo: caung:pa" thung" khyo" san sin" mo,- masan masin" boe" mo, ai: sho: jham re gai: zo" ako".

¹⁶Ngadqere: naonhaung" wa aibam: sa: re magai: zo: ngad: ako". Naonhaung" wa ai: sa: re qid re" ru: myidgaung khyo zhin: khyo" pye' ca" ako".

¹⁷Naonhaung" na: ra" jo, qo mae ASANG re qhaug' byid' ra" ja: pe" ja: re: magai: zo: ngad: ra". Naonhaung" nho: gaug zo- sabyi qang:- zhanlun xau- xe bam dabam alu: re qhid' xao" ra" nung: nau"- yao nau" alu: rere: ASANG re dao:so: to" ra" jhaung qhu" alu: rere:- myid bug: yang: byid' ra" alu: rere:- magai: zo: ngad: ra". Gatau: jhaung qhu" alu: jham rere: naonhaung" na: ra" jo, qo mae ASANG re qhaug' byid' ra" ja: pe" ja: rere: magai: zo: ngad: ra".

¹⁸Naonhaung" we' naonhaung" zo: dau qe- naonhaung" daui daui okaung qe we' naonhaung" vogaung: mae na ko" ra" Levi byu qe wa daga" za: naonhaung" Mao"So: yang caung:pa" nae" khyin: to: byid' ra" dajo, qo- naonhaung" Mao"So ASANG: qhid' kheim: mae za: ai: xeim: jham re daga" zo: nae" ngad: ako". Naonhaung" wa ai: jo, qo mae naonhaung" kad' vako" ra" lo, mau" ja: khao: ngo" dao mae ngaui bau: nae" ngad: ako".

¹⁹Naonhaung" wa naonhaung" mung"dan: mae daui: na: ra" myhao"- Levi amyu" qere maqu" lhaui" to: nae" rure re: lha" ge,.

²⁰Yao: dao:so: byid' to" ru we' dakhyo:- naonhaung" mug:myid re naonhaung" Mao"So ASANG re byid: lao"- naonhaung" zo: nug khao: ngo" sho: qo" zo: genae" ngad: ako".

²¹Ai: caung:pa" nae" dajo, qo wa saung" va: yang: ngad: re- naonhaung" re ngo ta" to: va" ru we' dakhyo:- naonhaung" o: ra" au: re ASANG naonhaung" re byid' to" ra" naonhaung" nung:- mangad: lao"- yao mae" dadau: dau: re se' mung: ai: sho: re yham mae naonhaung" gai: zo" ako".

²²Shocid sho: we' yo: sho: re zo" ru we' dakhyo: caung:pa" thung" khyo" san sin" yaug- masan sin" boe" yaug ngad ngad khag' re: ai: sho: re gai: zo" ra".

²³Ai: sho: re sa: we' daga" za: dazo: ge,- pe"mung:ga"re kao so' wa sa: mae bo: ra". Amung: kao so' we' sho: re daga" naonhaung" magai: zo: ngad: ako".

²⁴Sa: re zo:ve khyo" daci ge,- ai: atha" qid re we' dakhyo:- myidgaung khyo zhin: khyo" pye' ge,.

²⁵Ce: amyin" dao: naonhaung" phug' cao" ko" ru ngad: re- ASANG: yang ngaui: ru qhug' nae". Amung: yao: wa naonhaung" re we' naonhaung" myid:zo: qere na: dai nhao: li" nae".

²⁶Naonhaung" nho: ngaui" xeim: jham re we' ASANG re naonhaung" dao:so: byid' to" ra" jhaung qhu" alu: jham re caung:pa" jo, qo dalam: khyo za: ciye: ge,.

²⁷Ai: jo, qo mae"- ASANG: phan dao mae xeim: jham re bin sho' phad' ngaui" byid: nae" ngad: ako". Naonhaung" zo: ko" ra" sho: mae" ai: xeim: jham rere: sa: re phan dao mae zhin: sheim: genae" ngad: ako".

²⁸Ngo nao re byid' to" ra" amyin" re jhaug' zhaug za: phug' cao" wa,. Alao" yao: wa nao re we' ni" myid:zo: qere apyad ato gai kad' byid' li" nae". Pe"mung:ga"re nao wa jo: rure we' ni" Mao"So ASANG o ngaui: rure kad' yang: ngad: li" nae".

²⁹Yao: bam: mung" khyo naonhaung" jhin" vao ye" ra" au:- ni" Mao"So ASANG wa ai: byumyu" qe re se' tam" pye' li" nae". Alao" naonhaung" wa aire yesang: yu mung: ai: mung" mae yete" na: li" genae".

³⁰Ai: byumyu" qere ASANG: yang bin: se' tam" pye' thao- yao: bam: caung:pa" thung" we' sin" ra" ave, lo, mau" jham: thao khyo macao ye: nae" lha" ge,- pe"mung:ga"re airu wa shid khyo ngad: ra". Naonhaung" ai we' dakhyo: za: qo" caung:pa" genae" qhid' mae" yao: bam: so jham re yao: bam khoru: kad' yang: caung:pa" ko" ra" khyo re daye: jo" qu" wa,-

³¹Yao: bam: so jham re yao: bam caung:pa" ko" ra". Pe"mung:ga"re yao: bam: so jham re caung:pa" rumae ASANG nghang" ra" maca' majhad' mau" alhab' re yao: bam kad' ako". Yao: bam wa yao: bam: zo: dau qere lhao" re: yao: bam: phan dao mae" myi: mae phad' ngaui" ako".

³²Ngo naonhaung" re amyin" byid' to" ru ja: khao: ngo" re kad' ge,- aire daja: ja: dalaung: ge,- aimae" daja: rere: dayu: pye' ge,.