Read Maru MHO" PEIM: 13 Bible Online

MHO" PEIM: 13 - Maru bible

MHO" PEIM: 13

¹Lapa mangad: lao"- yab mo, lajheim: pheim yaug dayaug wa- qhid' phyao: nao macaung:pa" qu" ra" so jham re caung:pa" nae" we' caung da" byid: nae" qhid' mae" ve, lho we' mug' pho: mau" boe" nae" dao:so: qo" byid' re byid: nae". Yao: dao:so: byid' to" ru dang: li" sho' ngadqere:-

³Yao: re dajhid' re: datae" gyo: wa,- ni" Mao"So ASANG wa nao ASANG re ni" aung khug nhag' lam: alhab' yang jhid'de; la, majhid'de; ra" la,- ga" rure ba nae" qhid' mae" nao re jham" qu" nae" yao: re ci: na: ru ngad: ra".

⁴ASANG: thao cao" mung:- yao: re nga: yhe' wa,- yao" mho dao: re tae" gyo: mung:- yao" amyin" dao: jham re phug' cao" wa,- yao: re caung:pa" mung: yao: re jhaug' zaug wa,-

⁵Ngadqere: nao jeim doe; na: ra" Egutu mung" mae" nao re khyad' yu: ra" yaug ASANG re qobo vhin tau: lhan: nae" ta" ra" yab mo, lajheim: pheim yaug we' lapa khag' re ngadqere: se' pye' wa,- airu" ra" byu wa makhyang" ru we' nao daui na nae" ASANG amyin" byid' to" ra" kao so' khyo mae" nao re khyo jhui" nghung: nae" qhid' mae" seim" na yaug ngad: ra". Nao yao" gaung mae" ce: makhyang" rure yu: pye' nae" qhid' mae" yao: re se' pye' wa,.

⁶Ni" mao:nhaung:- ni" yauggai myiqe: zo:- nao jhid'de; ra" yham sang myhi" nao we' te' thao" ra" ba nam dayaug yaug lhao" re:- ni" phug' pho" qe khonhae" re: macaung:pa" qu" ko" ra" so jham re caung:pa" nae" qhid' mae" sae sae za: nao re qam: gai: khug' byid' ra".

⁷Aibam mae" dayaug yaug wa nao we' jhao" na: ra" byumyu" qenho: so jham- mangad: lao" va: mae na ko" ra" mo; nho: so jham re caung:pa" nae" qhid' mae" nao re qam: gai: byid' ra".

⁸Ngadqere: nao re data" ngaug: aung: yu nhao wa,- yao" dao: re gyo: lhao" datae" gyo: wa,- yao: re nhag' khyag' shogu: ru daqhu" byid: wa,- yao: re dagug: gam byid: wa,.

⁹Yao: re se' pye' wa,- nao sao qhid' laugbaui: yang yao: re pye' wa,- ai:thao re gaje yaug khao: ngo" rere: pye' nhao wa,.

¹⁰Shid sho' pye' ge,- yao: wa nao re jeim doe; na: ra" Egutu mung" mae" khyad' yu: ra" yaug ngad: ra" naonhaung" Mao"So ASANG mae" khyo jhui" nghung" lo" nae" seim" yaug ngad: ra".

¹¹Ailao" Israel byu alhab' wa boe" ra" khyo re the' gyo: mung: gyaug: li" genae"- airu" ra" makhyang" ra" mau" re khag' re: madam: kad' genae".

¹²Ni" Mao"So ASANG: yang nao re byid' ra" vogaung: jham mae nao na: jo; au:-

¹³Naonhaung" amyu" mae" aphug' made; ra" byu qe damyo" wa nao qhid' phyao: macaung:pa" qu" ra" so jham re caung:pa" nae" qhid' mae" naonhaung" vobyu qere khyo jhui" nghung" lo" pye' va" lau thoe re nao the' gyo" ra".

¹⁴Nao airu ra" lau dao: lae" re the' gyo: yang: ngad: re aire nyang" za: myid' ca: qu" wa,- ce: makhyang" ra" khyo boe" va" ru dang yang: ngad: re-

¹⁵Ai: vobyu qe alhab' mo, re se' pye' ge,- yao: bam: gug'nyhug' jham alhab' rere: se' pye' ge,- ai: vogaung: re bin sho' jhad' za: pyo' pye' ge,.

¹⁶Ai: vogaung: mae na: ra" mo, jo,nho" dai kham alhab' re cili" mung: vogaung: shava jao: mae li" bam: to: wa,- ai:thao re ni" Mao"So ASANG re qhaug' byid' ra" xeim: khyo" ai: vogaung: re we' aimae jo; ra" ja: khao: ngo" re ngha" pye' wa,- airu wa apyad ato mae byo; qeim: jo, ca" mung: khonhae" re: maqo" tae: nae".

¹⁷Phyo' qheim" pye' nae" dao: phyid' qhug' ra" ja: pe" ja: rere: ni" qhid' mae" dazam" ci wa,- airu: kad' lao"- ASANG yao" nhag' jam: yo" rumae" lhang: lo mung: nao re nhag' khyag' shogu: ru qhu" byid' li" nae". Ana" ba ngo nao re byid' to" ra" yao" amyin" dao: jham alhab' re nao phug' cao" mung:- yao: mho' ra" gu: re kad' ngad: re yao: wa ni" phug' pho" qere dao:so: byid' to" ru we' dakhyo: nao re nhag' khyag' mung:- nao re myo" laug: li" nhao nae".