Read Maru MHO" PEIM: 14 Bible Online

MHO" PEIM: 14 - Maru bible

MHO" PEIM: 14

¹Naonhaung" wa naonhaung" Mao"So ASANG: byumyu" ngad: ako". Shid: ra" yaug: qhid' mae" kaug' ngug gelao"- gatau: byumyu" qe kad' ru we' dakhyo: naonhaung" gaung re dalhai" cad' ge,- naonhaung" nga: lao: mae" xae rere: daqaug: pye' ge,.

²Naonhaung" wa naonhaung" Mao"So ASANG: byumyu" ngad: ako". Yao: wa myidgaung dao mae na: ra" byumyu" alhab' phaung mae" yao" byumyu" boe" nae" qhid' mae" naonhaung" re khyin: yu: to" ra".

³ASANG: yang masan masin" ga: ta" to" ra" ja: daja: rere: dazo:-

⁴Ce: gug'nyhug' jham re wa naonhaung" gai: zo" ra" aijham wa nung:- yao- cad' be,-

⁵Shocid- yao lae"- yo:- shopho" jham-

⁶khyid sin: go; mung: zo tug' vo: zo" ra" gug nyhug' pe" ja: re: gai: zo" ra".

⁷Khyid sin: mago; ru we' zo matug' vo: zo" gug'nyhug' pe" ja: rere: nao magai: zo: ngad: ra". Nao wa- gola:u- thao lho- jhalha jham re magai: zo: ngad: ra". Aijham re masan masin" ra" ja: khyo" myid: jho ca" ra". Aijham wa zo tug' vo" ako"- ngadqere: khyid sin mago; ko" ngad: ra".

⁸Vo, sho: dazo:- aire masan masin" ra" ja: khyo" myid: jho: ca" ra". Aiwa khyid sin: go, ngadqere: zo matug' vo: ngad: ako". Ce: gug'nyhug' jham mae" daja: rere: dazo:- aijham: shid mao re tin: lhao" re: datin:-

⁹Daung de, mung: akye' de; ra" ngo: pe" ja" ngo: re: naonhaung" gai: zo" ra".

¹⁰Ngadqere: daung we' akye' made; ra" qid khug na: ra" ja: pe" re: magai: zo: ngad: ra". Aijham re wa masan masin" ra" ja: khyo" myid: jho ca" ra".

¹¹San sin" ra" ngho' pe" ja: rere: nao gai: zo" ra".

¹²Ngadqere: ce: ngho' jham wa naonhaung" magai: zo" ra" ja: ngho' jham ngad: ra". Aijham wa zeim baung:- khaung: bab:- zeim bab:- zeim kyao:- zeim kyao: myi: ku"- ngo taung: zeim- nang da- kano,- qo,- gola:u- panglai: phaung" kyug'- qid ngho' tung"- qid ngho' khyid qhang- qid ngho' qi:- qid kano,- mug: ngho'- pho' qhid' ngad: ako".

¹⁹Daung de; ra" bathaung bajin: alhab' masan masin" ngad: ra"- aijham re dazo:-

²⁰San sin" ra" bathaung bajin: jham re wa nao gai: zo" ra".

²¹Yao: yao: za: shid: ra" gug'nyhug' pe" rere: dezo:- naonhaung" phaung mae na: ra" taung bug byu qere nao gai: zo: nhao: ra"- mangad: lao"- gatau: taung bug byu qere gai: aung: byid' ra". Ngadqere: nao wa Mao"So ASANG: yang sang: ra" yaug ngad: ra". Nao wa yao" byu ngad: ra". Yao nau" mangad: lao"- cad' nau" re yao: myhi" nug' we' dakyug' wa,-

²²Zin khao: ngo" ni" yo jham mae" thug' ra" gu: alhab' daxe bam mae" dabam alu: re gatau kho' to: wa,-

²³Ai: thao ni" Mao"So ASANG: yang caung:pa" nae" khyin: to" ra" dajo, qo khyo ye: mung: aitau- yao" qhid' kheim: mae ni" gaug zo:- sabyi qang:- zhanlun xau- sao qhid' xao" ra" ni" nung:- ni" yao- mae" daxe bam mae" dabam alu: re zo: shaug' wa,- ni" Mao"So ASANG re nao khonhae" re: nga: ba: yhe' byid: nae" rure qo" zhao: yu nae" qhid' mae" ceru re kad' wa,-

²⁴caung:pa" nae" jo, qo wa ni" yham mae" ASANG: yang nao re shaman" byid' to" ra" gu: mae" daxe bam mae" dabam re ai: jo, qo khyo vin: ye: nae" saung" va: yang: ngad: re-

²⁵Ceru: kad' wa,- aijham re aung" pye' mung: ai: caung:pa" jo, qo khyo ngaui vin: ye: wa,-

²⁶Nung: sho:- yao sho:- sabyi qang:- yhid phai: jham ru" ra" nao o: ra" ja: alhab' qhid' mae" ai: ngaui re yhung: mung: ni" Mao"So ASANG: qhid' kheim: mae nao we' ni" yham byu qe zo: nae" ngad mung: naonhaung" yao" gaung re ngaui bau: sho' kad' ge,.

²⁷Ni" vogaung: mae na: ra" Levi amyu" qere daqu" lhaui" pye' wa,- yao: bam wa yao: bam yao: sang: ra" jo,nho" pe" maqo" ngad: ako".

²⁸Sam zin byang" khao: ngo" lo" thao" mae- ni" qhovo: qhoshi: alhab' mae" daxe bam mae" dabam alu: re cili" mung:- ni" vogaung: mae aijham re qaung" to: nae" ngad: ra".

²⁹Ce: zo:ve wa yao: bam sang: ra" jo,nho" maqo" ko" ra" naonhaung" vogaung: mae na ko" ra" Levi amyu" qe- taung bug byu qe- cug' zo: qe- cug' mo" qe: qhid' mae" ngad: ra". Yao: bam wa aijham re yao: bam qo: ra" gu: alhab' li" the' yu nae" ngad: ako". Ceru re kad' wa,- ailao" ni" Mao"So ASANG wa- nao kad' ra" mau" ja: khao: ngo" mae nao re shaman" byid' li" nae".