Read Maru MHO" PEIM: 17 Bible Online

MHO" PEIM: 17 - Maru bible

MHO" PEIM: 17

¹Daja: ja" qo bo: ra"- nung: mangad lao" yao: re ASANG jhao" daqhaug' byid: ge, ASANG wa ceru re nghang" ra".

²Naonhaung" nho: vogaung: dalam: lam: mae yauggai dayaug we' myiqe: damyo" wa ASANG: amyin" we' shad' lhoe" khyo" gatau: so daja: ja: re la,- ba re la,- lho" re la,- kyi re la, caung:pa" ra" khyo" ASANG re shad' lhoe" mung: yao" dao: thang" re phyo' pye' ko" ra" thoe re the' gyo" ein gelang:.

⁴Airu ga" ra" lau dao: re naonhaung" the' gyo" re aire athai: atho' qin" qu" ge,. Ceru" ra" makhyang: mashab: khyo: qe Israel byumyu" phaung mae boe" ru dang: yang: ngad: re-

⁵Aiyaug re voyae khyo she: thug' ye: mung: laugbaui: yang pye' se' pye' ge,.

⁶Ngadqere: sagse: shid' yaug mangad lao" shid' yaug mae" tho' khyo yao: re qobo zhaug' gelao" za: yao: re gai: se' nae" ngad: ra". Sagse: dayaug za: na: ruyang yao: re magai: se' pye' nae".

⁷Sagse: qe wa sao qhid' laugbaui: yang pye' geshao: ai:thao mae dang: ra" mo, byu qe wa aiyaug re laugbaui: yang pye' genae" ngad: ako". Ceru: kad' yang: makhyang: mashab: rure yu: pye' genae" ngad: ra".

⁸Mau" daja: ja: wa vogaung" ade, qeyang maqo" phyid nae" mau" jo,nho" sang: yu nae" khyo we' sin" ra" mau" mangad: lao"- gaung mae dae de; ra" mau" mangad: lao" byuse' mau" we' byu the' se' ang: ra" mau" jo; thug' li" ba: ra". Ceru: boe" thug' lo: re- naonhaung" ASANG Mao"So: yang khyin: to" ra" caung:pa" jo, qo dalam: lam: khyo ye: ge,.

⁹Aimung: naonhaung" mau" re Levi khinjaung qejhao" re: ai: au: re tarha" agyi mau" zaui: ang yaug jhao" re: yetang: byid: mung: yao: bam re yeta" kho' nhao ge,.

¹⁰Yao: bam wa ta" kho' byid' li" genae"- aimung: naonhaung" wa yao: bam: yang naonhaung" re ta" ru we' dakhyo: khyag' byang" sho' cao" ca" genae".

¹¹Yao: bam: kho' phyid' dao: re khae: yu mung: yao: bam: mho" shid' ra" khyo" jid gam" jao gaug cao" ye: ge,.

¹²Mau" vin: ra" tarha" agyi mangad: lao" khinjaung mho: khyo" magyo: vae" kad' yaug re se' pye' ca" genae". Cekhyo" yang- Israel byumyu" phaung mae" makhyang: mashab: rure qo" yu: pye' genae" ngad: ra".

¹³Aimung: yaug khao: ngo" wa airu re the' gyo: lao" gyaug: li" genae"- aimung: gatau khag' re: airu" ru mau" re mavae" kad' lo: genae".

¹⁴Kho:kham we' sin: yang: mho" shid' ru naonhaung" re byid: nae" mug:myid re naonhaung" wa gatau: byumyu" qe we' dakhyo: kho:kham qo" ca" ga: myid: phyid' li" genae".

¹⁵Naonhaung" yang kho:kham khyo" khyin: to: yaug wa ASANG: yang khyin: yu yaug ngad ca" nae"- yao: wa naonhaung" byu yao: mae" ngad ca". Taung bug: byu dayaug re naonhaung" kho:kham dakad' nhao ge,.

¹⁶Kho:kham wa yao" gyetab qhid' mae" myao: myo: sho' dau: re magai: qo" nae". Aimung: yao" mung" byu qere myao: vai nae" qhid' mae" Egutu khyo magai: nhao: ke' nae". Pe"mung:ga"re ASANG wa yao" byumyu" qere ai: mung" khyo khonhae" re: magai: dam: tug' lo"- ga: ta" to: va".

¹⁷Kho:kham wa myhi" zang myo: sho' yaug magai: yu pe"mung:ga"re- airu: kad' lao" yao: re ASANG mae" va: khyo gao" lo" nhao: li" nae". Aimung: yao: yao" qhid' mae" ngaui we' qhang: yang jo,nho" qo" sho' magai: kad' yu nae".

¹⁸Yao: wa kho:kham boe" lao" Levi khinjaung qeyang ASANG tarha" jham we' mho" shid' dao: jham bo: ra" jham: paug' dapaug' re yu: sang: to: ca" nae".

¹⁹Yao: wa ce: jham: paug' re yao" nhae mae zam" ci mung: yao" pyad geim" aimae" nghe' ca" nae". Airumung: yao: wa ASANG re nga: yhe' byid: mung: aimae amyin" byid' to" ru ja: khao: ngo" re jhaug' zaug za: ba: phug' cao" nae" zhao: yu vashao:-

²⁰Ceru kad' ruyang yao: wa Israel byumyu" qemae" gayaug yaug tho' je: gai: ga: myid: yu: ru we' ASANG: amyin" dao: jham re daru: ru: khyo" maphug' cao" rumae" gug: gam byid' li" nae". Ailao" yao: wa zin lam: myo: sho' eib: na mung: yao" myid:zo: qe wa Israel byumyu" dao mae byuxag' myo: sho' eib: li" genae".