Read Maru MHO" PEIM: 18 Bible Online

MHO" PEIM: 18 - Maru bible

MHO" PEIM: 18

¹Khinjaung kaung ngad: ra" Levi qe wa Israel mung" mae mug:myid gaebam maqo" yu genae". Ai: atha" yao: bam wa ASANG re byid' ra" jhaung qhu" we' xeim: jham: yang xo' daui: na ca" ako".

²Yao: bam gaje: amyu" kaung ru: mug:myid magai: sang ngad: ako". Yao: bam: gaebam wa- ASANG: yang dao:so: byid' to: va" ru we' dakhyo: ASANG: khinjaung jham qo" boe" ru ngad: ra".

³Nung: ngad ngad- yao ngad ngad ngaui" byid: au: re khinjaung qere lo,sin- ae khao: we' amphae: byid: ca".

⁴Yao: bam wa gaug zo maui: lam:- sabyi qang:- zhanlun xau we' sug' gug jham mae" sao qhid' gaebam re qo" yu ca" ako".

⁵ASANG wa naonhaung" kaung alhab' qemae" Levi kaung re khinjaung qekhyo" apyad ato yao: re caung da" byid: nae" qhid' mae" khyin: yu va".

⁶Levi' Kaung mae" nug yaug khag' ngadqere: Israel mug: mae" yao: yao" vogaung: mae" caung:pa" jo, qo khyo ye: mung:-

⁷Ai: jo, qo mae gatau: Levi qe ASANG re caung da" byid' na: ru we' dakhyo: ai: jo, qo mae khinjaung dayaug khyo" yao" Mao"So re gai: caung da" byid' ako".

⁸Yao: wa gatau: khinjaung qe we' dakhyo: zo: shaug' dano" no" yu ca" ra". Aimung: yao: wa yao" yham byu qe vhin byid' ru pe" ngadqere: gai: zam" ci nae" ngad: ra".

⁹Naonhaung" nho: ASANG Mao"So: yang naonhaung" re byid: nae" mug: khyo naonhaung" vao ye" ra" au: re- aimae" byumyu" qe: nho: ca' pho: mau" zo" jham re dabo: cao: kad' ge,.

¹⁰Naonhaung" nho: yao: zo: qere jham re phan dao mae" myi: mae daphad' ngaui" ge,. Aimung: naonhaung" byu qere boe, daphyid' nhao ge,- jo: daqu" ge,- mandan: davha" nhao ge,.

¹¹Khan" pha re dalam" ge,- aimung: shid va" mo; subyo re dakhai nhao ge,.

¹²Naonhaung" nho: ASANG Mao"So wa ceru" ra" ca' ja: mau" zo" kad' mo, re nghang" ra". Aimung: yang: naonhaung" qhid' au: khyo khoru: jhin" ye" re khoru: ai: mug: mae" byumyu" qere re: khe' thug' pye' na: ru ngad: ra".

¹³ASANG re bin sho' jhaug' zaug: na ge,.

¹⁴Aimung: Moshe wa- Naonhaung" yesang: na nae" mug: mae byu qe wa boe, phyid' ra" mo; yang pha,jhi" byid' ra" khyo" cao" mung: boe, phyid' jo: qu" ako". Ngadqere: naonhaung" ASANG Mao"So wa- naonhaung" re airu: kad' nae" akhang" mabyid: ngad: ra".

¹⁵Ai: atha"- yao: wa ngo ru"ru lapa dayaug re naonhaung" yao" byu qemae" nhao: ke' byid' li" nae". Aimung: naonhaung" wa yao" mho dao: re gyo: byid: ca" ra".

¹⁶Naonhaung" re Sina bam mae khai: qham: phaung: to" ra" ba na re naonhaung" wa shid nae" gyaug gemung: ASANG dao: dam: jhau: rure mathe' gyo: nhao lo:- yao" qhid' kheim: mae myi: we' dau: ra" phungbao re mamyao nhao nae" qhid mae" mho' yao: ako".

¹⁷Alao" ASANG wa ngore- yao: bam ngore nhag' bo: ra" khyo" mho' ako".

¹⁸Ngo wa yao: bam re nao yao: ru" ra" lapa dayaug re- yao: bam yao" byu qemae" nhao: ke' byid: nae" ngo wa yao: re pe" ta" nae" rure ta" kyo: nae"- aimung: yao: wa ngo amyin" byid' ru ja: khao: ngo" byumyu" qere ta" kyo" li" nae".

¹⁹Yao: wa nga" mang khyo" jhau: ke' mung: yao: re macao" gyo: byid' ra" yaug khag' re ngadqere: ngo: yang qobo dae byid: nae".

²⁰Ngadqere: lapa dayaug yaug wa ngo: yang ta" nae" amyin" mabyid' ru vae" kad' ngad: re- yao: wa ai: qhid' mae" shid ca" li" nae"- ga: ta" ra". Aimung: gatau: so jham: nho: mang khyo" ta" ra" lapa khoyaug ngadqere: ai we' dakhyo: shid ca" nae"- ga: ta" ra".

²¹Naonhaung" wa- lapa dayaug: mungdao: wa ASANG mae" mali" rure khoru: qo" ta" nae" laug ga: myid: li" genae".

²²Lapa dayaug wa ASANG: mang khyo" ta" ke' mung: yao: ta" ru majo; boe" li" ngad: re- aiwa ASANG: mungdao: mangad: ngad: ra". Ai: lapa wa yao: yao" kheim: so' akhang" khyo" jhau: thug' ke' ru ngad: ra". Aimung: naonhaung" wa yao: re magyaug ca" genae".