Read Maru MHO" PEIM: 2 Bible Online

MHO" PEIM: 2 - Maru bible

MHO" PEIM: 2

¹ngonhaung" wa lo" thao" mae ASANG amyin" byid' to" ru we' dakhyo: Aqaba qid kaui khyo joe" ra" khyodang- din"pyad' yo khyo ye" lo" bam va". Ngonhaung" wa Edom bam mug: khaung: mae ayo, myao" sho' du" lae" qin" lai: lo va".

²Ai: thao ASANG wa ngore- ai: bam khaung: mae ngonhaung" na: lae" qin" ra" ayo, wa ga" va"- aimung: mug: am: shad' khyo ngonhaung" ye" lo" nae" ngad: ra" khyo re ta" ra".

⁴Yao: wa ngore- o mae ta" to" ra" pyang dao: re ta" kyo: nae" ta" ra". Aijham wa naonhaung" wa Eso nho: myid:zo: qe ngad: ra" naonhaung" va" na vako" ra" amyu" ba nam qenho: mug: kyo: Edom bam mug: khyo" phyid' lai: ye: gezai ngad: ako". Yao: bam wa naonhaung" re gyaug: li" genae".

⁵Ngadqere: naonhaung" khyo" shi" yao: bam we' gye magai: khe' ngad: ra". Pe"mung:ga"re ngo wa yao: bam: mug:myid re- khyid dakhu zab naeqhi" lao" re: naonhaung" re ngo mabyid: nae" mung: ngad: ra". Ngo wa Edom mung" re Eso nho: myid:zo: qere byid' to: va".

⁶Naonhaung" wa zo:ve we' qid jham re yao: bam mae" gai: vai: yu: ako".

⁷Naonhaung" Mao"So ASANG wa naonhaung" kad' vako" ra" mau" ja: khao: ngo" mae khoru: shaman" byid' lai: lo va" rure myid: beim: ge, ce: damung" dadin" lu: ra" din"pyad' yo khyo" su" du" lae" lo: au:- yao: wa ai: byid xe zin gyo: mae naonhaung" we' daga" na mung: naonhaung" qo ca" ra" gu: alhab' qo" yu: avako".

⁸Aimung: ngonhaung" wa to" lo" mung: ai: khyodang re to: co' mung:- Elad we' Eziongeba vogaung: mae" tham: shid khyo ye: mung: mug: am: ba thug' shad' Moba shad' khyo ye" lo" bam va".

⁹ASANG wa ngore- Lod nho: myid:zo: qe ngad: ra" Moba byu qere- qug: khai: dayin dayo: dabyid: wa,- yao: bam we' gye re: dajho" khe' wa,. Ngo wa yao: bam re Ara vogaung: re byid' to: va" ngo wa yao: bam: mug:myid mae" dacug' re: naonhaung" re mabyid: nae"- ga: ta" ra".

¹⁰(Emim ga: mhang" ra" qam: bo: ra" byuqi: byuqhang qe wa ai: Ara vogaung: mae lhaung" na: ako". Yao: bam wa Anakim qe qhi" qi: qhang: ra" byuqi: byuqhang damyu" qe ngad gemung:-

¹¹Rephaim byu qe qhi" mang qi" ako". Ngadqere: Moba byu qe wa yao: bam re Emim ga: mhang" ako".

¹²Horid byu qe wa Edom mae lhaung" na: ako". Ngadqere: ASANG: yang byid' ra" mung" mae" yao: bam: gyevo qere Israel byu qeyang khe' thug' pye' ru we' dakhyo: Eso nho: myid:zo: qe wa yao: bam re khe' thug' pye' mung: aibam: amyu" mung"dan: re phyo' qheim" pye' yang: thao re aimae yao: bam yete" na: ako".)

¹³Ai: thao ngonhaung" wa ASANG: yang kad' nhao: ru we' dakhyo:- Zered gyaung: re gau" de; ye: va".

¹⁴Ceru wa Kade Barne mae" to" ye: thao sam xe: she' zin thao re boe" ru ngad: ra". Yao: bam boe" nae" khyo ASANG ta" to: va" ru we' dakhyo:- ai: qae" mae" gyekhe' sulhe: qe alhab' mo, shid: lo" ako".

¹⁵Yao: bam alhab' mo, re bin: se' tam" pye' sho' ASANG wa yao: bam re gye kad' ra".

¹⁶Yao: bam alhab' bin: shid gethao re-

¹⁷ASANG wa ngonhaung" re-

¹⁸Ana" ba- naonhaung" wa Ara vogaung: nhae Moba mug: kyo: khyo" lai: phyid' ye: gezai ngad: ako".

¹⁹Ailao"- naonhaung" wa Lod nho: myid:zo: qe: ngad: ra" Amon byu qenho: mug:myid khyo te' ye" li" genae". Yao: bam re qug: khai: dayin dayo: dakad' ge,- yao: bam we' gye dajho" zin: ge,- pe"mung:ga"re ngo wa ngoyang yao: bam re byid' to" ra" mug:myid mae" dacug' re: naonhaung" re mabyid: nae"- ga: ta" ra".

²⁰(Ce: mug:myid re- aimae lhaung" na ko" ra" byu qenho: mang ngad: ra" Rephaim byu qenho: mug:myid khyo" re: mang thug' ra". Amon byu qe wa yao: bam re Zamzummim ga: mhang" ako". Yao: bam wa Anakim qe qhi" qi" qhang: ako".

²¹Yao: bam wa myo: sho' ngad ko" ru we' qam: bo: ra" amyu" ngad: ako". Ngadqere: yao: bam: mug:myid re Amon byu qe qo" yu mung: aimae qo" te" na genae" qhid' mae" ASANG wa yao: bam re se' tam" pye' ra".

²²ASANG wa Edom bam mug: mae na: ra" Eso nho: myid:zo: qe ngad ko" ra" Edom byu qe: qhid' mae" re: dakhyo: za: kad' lo: ra". Yao: bam na jo, shiko" ra" mug:myid mae Edom byu qe yeqo" yu mung: aimae yeqo" te" na genae" qhid' mae" yao: wa Horid byu qere se' tam" pye' ra".

²³Mug:gaung: panglai: qid yae cao" mae" mug:myid mae Krete gagyo: kao" mae" li" ra" byu qe te" na: bam: ako". Yao: bam wa na xug' qe ngad ko" ra" Avim byu qere se' tam" pye' mung:- mug: thao mae Gaza vogaung: joe" sho' yao: bam: mug:myid re yu: yu: ako".)

²⁴Ngonhaung" wa Moba mung" khyo" lai: phyid' ye thao ASANG wa ngonhaung" re- ana"- to" mung: Arnon gyaung: re gau" de; ye: ge,. Ngo wa Heshbon mae" Amori kho:kham Sihon we' yao" mug:myid re daga" za: naonhaung" qam: so' mae to" to: byid' ra". Yao: re gye yezin: ge,- yao" mug:myid yesang: na ge,.

²⁵Ana" ba mae" thoegu:- khyi" khao: ngo" mae" byu qere naonhaung" re gyaug nhao nae" naonhaung" mang re ta" thoe gyo: lao"- yaug khao: ngo" ko ko gyaug: nin" li" genae"- ga: ta" ra".

²⁶Ai: thao re ngo wa Kedemod din"pyad' yo mae" Heshbon mae" kho:kham Sihon re lagyo: qe nhao: ke' yang:-

²⁷Ni" mung"dan: khyo" ngonhaung" re su" lai: lo" nhao la,- ngonhaung" wa din: za: su" lai: lo" mung:- khyothaung" mavao nae".

²⁸Ngonhaung" zo: shaug' zo:ve we' qid qhid' mae" ngonhaung" aphug' byid: nae". Ngonhaung" kad' nug: ru wa- ngonhaung" Mao"So ASANG: yang byid: nae" ngad: ra" mung" khyo Yodan gyaung: re gau" de; yang: qo" vao ye: sho' ni" mung"dan: khyo" su" lai: ye: nae" ru ngad: ra". Edom mae na ko" ra" Eso nho: myid:zo: qe we' Ara mae na ko" ra" Moba byu qe wa yao: bam: mug:myid khyo" ngonhaung" re su" lai nae" akhang" byid' ako"- ga: yaug yo mang: dae dao: ta" ke' ra".

³⁰Ngadqere: kho:kham Sihon wa ngonhaung" re yao" mung"dan: khyo" masu" lai nhao ngad: ra". Yao: re aung: pye' mung:- ana" ngonhaung" sang: to: shi" ra" yao" mug:myid re ngonhaung" qo" sang: na nae" qhid' mae" naonhaung" Mao"So ASANG wa yao: re nhag' lam: qao nhao mung: tau: lhan" ra" myid ke' byid' ra".

³¹Ai: thao ASANG wa ngore- qu" wa,- ngo wa kho:kham Sihon we' yao" mug:myid re ni" qhid' kheim: mae agau to" to: byid: va". Yao" mug:myid re yesang: na wa,- ga: ta" ra".

³²Sihon wa ngonhaung" re khe' zin: nae" qhid' mae" yao" byu qe- alhab' mo, we' Yaha vogaung: nhae khyo thug' li" ako".

³³Ngonhaung" Mao"So ASANG wa yao: re ngonhaung" qam: so' lo, khug mae ke' byid: mung:- ngonhaung" wa yao: re we'- yao" yauggai zo: qe yao" byu qe alhab' re se' pye' bam va".

³⁴Aiyo, yao: mae ngonhaung" wa vogaung: khao: ngo" re sang: yu mung: phyo' qheim" pye' bam va" yauggai- myiqe:- zoshao yaug khao: ngo" re se' pye' va". Ngonhaung" wa dayaug re: matang" to: se' pye' va".

³⁵Ngonhaung" wa gug nyhug' gug' du: jham re yu mung: vogaung: jham re phyo' zo" pye' va".

³⁶Ngonhaung" Mao"So ASANG wa ngonhaung" re Arnon lao:khaung: thao mae" Aroe vogaung: jham alhab' rere:- ai: lao:khaung: agaung: mae Gilead khyo ye" ra" khyo mae" vogaung: rere: sang: yu nhao: ra". Kho vogaung: mae" vang jham re: ngonhaung" qhid' mae" magang" tang ngad: ra".

³⁷Ngadqere: ngonhaung" wa Ammonid byu qe: mug: kyo: khyo mate' ye:- Yabog qid yae khyo re: mate' ye:- bam mug: mae" vogaung: jham khyo re: mate' ye:- ngonhaung" Mao"So ASANG: yang maye: nae" amyin" byid' to" ra" gatau kho jo, qo khyo re: mate' ye:-