Read Maru MHO" PEIM: 20 Bible Online

MHO" PEIM: 20 - Maru bible

MHO" PEIM: 20

¹Naonhaung" wa- naonhaung" gyevo qere gye yekhe' zin: nae" qhid' mae" naonhaung" tho' mae" je: myo" ra" myao: lin" jham- myao: jham we' gyetab re the' myao lao" yao: bam re dagyaug ge,- naonhaung" re Egutu mae" khyad' khyui: yu: ra" naonhaung" Mao"So ASANG wa naonhaung" we' daga" ngad nae".

²Naonhaung" gye makhe' qhid shire khinjaung dayaug qhid' khyo thug' li" mung: gyetab re-

³Israel byu qe we"- tae" gyo: ge,- ana" ba naonhaung" gyekhe' ye: nae" ngad: naonhaung" gyevo qere dagyaug ge,- qam: re: dashan ge,- sang: re: danin" ge,.

⁴Naonhaung" nho: Mao"So ASANG wa naonhaung" we' daga" ye" lo" mung: yao: wa naonhaung" re aung doe, nhao nae"- ga: ta" vashao:.

⁵Ai: thao zug: ade, qe wa gyezo: qere mamyao" shire za: yham kad' mung: yham mavao co' shi" ru dayaug yaug cemae bo ko" i? Bo: ngad: re- yao: wa yham phao vashao: airu: mangad: re yao: wa gyekhe' jao: mae se' pye' qhug' lao" gatau dayaug: yaug yao" yham re yham sag' vao: pye' byid' li" nae".

⁶sabyi khyae qho" to: mung: maqo" phyo' yu shiru dayaug yaug cemae bo ko" i? Bo: ngad: re yao: wa yham phao vashao: airu: mangad: re yao: wa gyekhe' jao: mae se' pye' qhug' lao" gatau dayaug: yang- sabyi qang: re shaug' pye' byid' li" nae".

⁷Lo,xo' nae" qhid' mae" myi: mho' to" ru dayaug yaug cemae bo: ko" i? Bo: ngad: re yao: wa yham phao vashao:- airu: mangad: re- yao: wa gyekhe' jao: mae se' pye' qhug' lao" gatau dayaug wa yao: mho' to" ra" myiqe: re lo,xo' yu: pye' li" nae"- ga: ta" ra".

⁸Zug: ade, qe wa- ai: yauggai qere- cemae sang: ngai mung: gyaug: ra" dayaug yaug bo ko" i? Bo: ngad: re yao: wa yham khyo phao vashao:- ai mangad: re yao: wa gaje qe: lhe: myid re baui" lo" nhao nae" ga: re: ta" li" genae".

⁹Zug: ade, qeyang gyezo: qere dao: bin: ta" lao" phung: ngai khao: ngo" qhid' mae" gyezug: qere khyin: to: ca" ra".

¹⁰Naonhaung" wa vomo" davo vo khyo ye: khe' zin" re sao qhid' ai: vobyu qere lo, tau nae" akhang" shi" byid: ge,.

¹¹Yao: bam: vomo" kham: phung" mung: lo, tau ko" ngad: re- yao: bam alhab' wa naonhaung" jeim boe" nhao mung: naonhaung" qhid' mae" mau" zaui: byid: ca" li" genae".

¹²Ngadqere: ai: vomo" mae" byu lo, matau lo: mang: zin: nae" khyin: yu: ko" ngad: re ai: vomo" re naonhaung" gyetab: yang vang" lhaung" to: ge,.

¹³Ai: thao- naonhaung" Mao"So ASANG: yang naonhaung" re ai: vomo" re taung" yu nhao lao" ai: khug mae" yauggai alhab' re se' pye' ge,.

¹⁴Ngadqere ai: vomo" mae" myiqe: qe zoshao jham- gug'nyhug' jham we' gatau pe" ja: ngadqere: naonhaung" yao" qhid' mae" sang: yu ge,. Naonhaung" nho: gyevo qe sang: ru pe" ja: re ngadqere: naonhaung" gai: yhung" ci: ra" ASANG: yang naonhaung" re airu byid: va".

¹⁵Airu wa- naonhaung" yete" na nae" mug:myid we' gyai jho" va" mae jo; ra" vomo" jham re kad' nae" khyo ngad: ra".

¹⁶Ngadqere:- naonhaung" Mao"So ASANG: yang naonhaung" re byid: nae" mug: mae" vomo" jham re naonhaung" yesang: yu ko" au:- yaug khao: ngo" re se' pye' ge,.

¹⁷Naonhaung" re ASANG kad' nhao: ru we' dakhyo: Hiti byu qe- Amori byu qe- Khanan byu qe- Perizi byu qe- Hivi byu qe we' Yebusi byu qe- alhab' re jhad' za: se' tam" pye' ge,.

¹⁸Yao: bam wa yao: bam: so jham re caung:pa" ra" au: kad' ra" maca' majhad' ru jham naonhaung" re mho" byid' ra" khyo" ASANG re qobo mashad' lhoe" nhao sho' yao: bam re se' pye' ge,.

¹⁹Naonhaung" wa- vomo" davo re taung" yu nae" seim" ngad: re vang" lhaung" mung: lham: ra" ba na myao" qere: aimae yaug: ra" shigae jham re dathau: pye' ge,. Ashi: zo: ge- ngadqere: sag' gae jham re daphyo' qheim" pye' ge,- sag' gae jham wa naonhaung" gyevo mangad:-

²⁰Gatau: sag' gae jham re kam" wa naonhaung" thau mung: ai: vomo" re qo" sang: yu sho' myid bam" kad' rumae gai: ci genae".