Read Maru MHO" PEIM: 21 Bible Online

MHO" PEIM: 21 - Maru bible

MHO" PEIM: 21

¹Naonhaung" nho: Mao"So ASANG: yang naonhaung" re byid: nae" mug: mae" pyang: yo mae byu dayaug se' to" rure qhug' myao: ein gelang: byuse' yaug re naonhaung" maba ko" ngad: re-

²Naonhaung" nho: au: jhaung qe we' tarha" agyi qe wa thug' ye: mung: maogaung re qhug' myao: ra" jo, qo mae" avai: ayae mae jo, ra" vogaung: jham khyo ka" qu" ca" ra".

³Ai: thao- ai: maogaung re qhug' myao: ra" jo, qo we' je: jhao" thao" ra" vogaung: mae" au: jhaung qe wa- mau" khonhae" re: manhao: qu" shi" ra" nung: jaung bae: dadau: re khyin: yu mung:-

⁴Khonhae" re: mayug: kin" ra" qid gyaung: zo: nhae mae" jo, qo dalam: khyo she: ye: mung: phaug' re: maphaug' qu"- qhovo: re: maqho" qu" ra" myidgaung aimae nung: lang zang: re khyug' pye' ca" ra".

⁵Levi khinjaung qere: ai: jo, qo khyo ye: ca" ako". Pe"mung:ga"re yao: bam wa aqan alan mau" we' sin" ra" yug: khyo lam: khao: ngo" re dao: phyid' kho' byid: ca" ako". Naonhaung" nho: Mao"So ASANG wa yao: re caung da" byid: nae" qhid' mae" we' yao" mang-a mae shaman" dao: ta" nae" qhid' mae" yao: bam re khyin: yu: to: va".

⁶Ai: thao- se' pye' qhug' ra" shid yaug: maogaung re the' myao: ra" jo, qo we' jhao" thao" ra" vogaung: mae" au: jhaung qe wa ai: nung: jaung zang dao mae yao: bam: lo, cid' pye' mung:

⁷Ce: byu re ngonhaung" mase' khag' se' rure ngonhaung" maba-

⁸ASANG we"- Egutu mung" mae" nao khyad' yu: ra" ni" byumyu" Israel qere qobo khyad' byid: la,. Ngonhaung" re qobo khyad' byid: mung: ce: qobo maqo" ra" byu re se' ra" qobo ngonhaung" re dazhaug' ga: ta" ge vashao:-

⁹Airu: ASANG: yang mho" ra" gu: re cao" pyang" ruyang naonhaung" wa- byuse' yug: mau" qobo vin nhao: ru maqhug' genae".

¹⁰Naonhaung" nho: Mao"So ASANG: yang naonhaung" re gyekhe' aung nhao mung: naonhaung" wa byu taung" lo ko" ngad: re-

¹¹Aibam mae" nao qu" ngaui mung: lo, xo' yu nug: ra" myiqe: yaung" dayaug yaug myao: ngad: re-

¹²Yao: re ni" yham khyo jhui" lo" mung: yao" au: re myhaug' pye' byid: wa, lo, sang: jham rere: phyid' pye' byid: wa,.

¹³Aimung: yao" mai bau: jham re: tha" pye' byid: wa,- yao: wa ni" yham mae na mung: yao: myhi" yao: pho" tao: qhid' mae" lho" dakhye' kaug' na vashao:- ai:thao yao: re nao lo, gai: xo' yu: ra".

¹⁴Thao phyao: nao: yang yao: re ma- o lo: lao" yao: re loe, beim: lo" nhao ca" ra" nao wa yao: re maqad maqui" gaung sho: zam" pye' va" rumung: yao: re jeim khyo" zam" khug yang: magai: aung: zo: ngad: ra".

¹⁵Byu dayaug wa- myi: shid' yaug qo" mung: shid' yaug: geim" yao: re yauggai zo:khau byid: ngadqere: zoqhid' yaug wa- yao: je: ngaui: ra" yao: myi: mae" mangad: ein gelang:-

¹⁶Aiyaug wa yao: zo: bam re yao" jo,nho" kho' gae byid: nae" qhid' mae" myid: phyid' ra" au:- yao: je: ngaui: ra" yao: myi" nho: yauggai zo: re- zo: qhid' yaug qo" ang: ra" gae bam byid: mung: myo, nho khyin: ru magai: qhu" byid: nae".

¹⁷Yao: wa yao" zoqhid' re yao: je: ngaui: ra" yao: myi" nho: yauggai zo: mangadqere:- gaebam shid' zhao" byid: ca" ra". Yauggai dayaug wa- yao" zoqhid' yauggai: zo: re aso: khyo" lhang: yu mung: tarha" khyo" yao: qo" yu ang: ra" gae bam re byid: ca" ra".

¹⁸Byu dayaug wa- nhag' lam: qao mung: aqan alan: ra" yauggai zo: dayaug yao: myhi" yao: pho" yang qobo dae byid: ngadqere: myhi" pho" mho dao: magyo" ru qo" to" ein: gelang:-

¹⁹Myhi" pho" tao wa- yao: re yao: na: ra" vogaung: mae" au: jhaung qejhao" jhui" ye: mung: dao: phyid' nae" qhid' mae" yung" do, nhao ca" ra".

²⁰Yao: shid' tao wa yao: bam re- nga" shid' zo" nho: yauggai zo: wa nhag' lam: qao: ru we' aqan alan: rumung: nga" shid' zo" mho dao: magyo: ngad: ra". Yao: wa ngaui re be; lhu" pye' mung: yhid ya: dayaug ngad: ra"- ga: ta" vageshao:.

²¹Ailao" ai: vomo" mae" yauggai qe wa yao: re laugbaui: yang pye' se' ca" ra" airumung: naonhaung" wa ce: makhyang: mashab: rure yu: pye' genae" ngad: ra" Israel mae" yaug khao: ngo" wa boe" lo va" rure the' gyo: mung: gyaug: li" genae".

²²Byu dayaug wa magai: ra" yug: mau" dalam" qhid' mae" se' pye' ru qhug' mung: yao" maogaung wa zang mae cui" lhao" to" ru ngad: re-

²³Aimae damyi: geim" magai: jo; bo" nae"- aire aiba mae yao: nyhab' pye' ca" ra". Pe"mung:ga"re Zaung mae sushid maogaung lao" jo; ru wa ai mug:myid mae Mao"So: nhang: kheim: zao" nhao: ra". Naonhaung" nho: Mao"So ASANG: yang naonhaung" re byid: nae" mug: re maca' majhad' maboe" nhao nae" qhid' mae" ai: maogaung re nyhab' pye' ge,.