Read Maru MHO" PEIM: 27 Bible Online

MHO" PEIM: 27 - Maru bible

MHO" PEIM: 27

¹Ai: thao Moshe wa- Israel au: jhaung qe we' daga" ai: byumyu" qere- ana" ba ngo: yang naonhaung" re byid' to" ra" mho" shid' dao: alhab' re phug' cao" na ge,.

²Naonhaung" wa Yodan gyaung: re gau" de, mung: ASANG: yang naonhaung" re byid: nae" mug:myid khyo vao ye" ra" ba re- laug zang aqi: jham re tau: zhaug' mung: aijham re byilad sheim: ca" genae".

³Ai: dao mae- ce: tarha" jham we' mho" shid' dao: alhab' re tung" to: ge,- naonhaung" phug' phyid' qenho: Mao"So ASANG: yang naonhaung" re dao:so: byid' to" ra" jo,nho" bo mung: myid xau gai: ra" mug: khyo naonhaung" qo" vao ye: mung:

⁴Yodan thoeshad' khyo joe" ye" lo" ra" au: re- ana" ba ngo naonhaung" re mho" shid' ru we' dakhyo: Eba bam mae ce: laug zang jham re tau: zhaug' to: mung: aigu: re byilad sheim" pye' ge,.

⁵Ai: jo, qo mae jo, to' yang kad' ra" dau pe" maci lo: laug zang jham: yang phan dalam: zhaug' ge,.

⁶Pe"mung:ga"re- naonhaung" Mao"So ASANG: qhid' mae" naonhaung" zhaug' ra" phan kholam: ngadqere: makho' pye' ra" laug zang: yang kad' ca" ra". Ai: jo, qo mae phad' ngha" ra" ngaui" xeim: re naonhaung" qhaug' byid: ca" ra".

⁷Aimung: naonhaung" wa ngaui" xeim: se' ngaui" byid: mung: zam" khug ngaui" xeim: ceim" zo: yang: naonhaung" Mao"So ASANG: qhid' kheim: mae jeju beim: so" na ca" ra".

⁸Byilad sheim" to" ra" laug zang jham: dao mae- Mao"So: tarha" jham mae" dao: kheim: khao: ngo" re gyang: gyang: za: dung sho' tung" te' to: ca" ra"- ga: ta" ra".

⁹Ai: thao Moshe wa- Levi khinjaung jham we' daga" Israel byu alhab' re- Israel byumyu" qe we" cekhyo phaug' lo mung: ngore tae" gyo: ge,. Ana" ba nao wa- ni" Mao"So ASANG: byumyu" boe" lo: ava".

¹⁰Aimung:- yao: re phug' cao" ru we' ana" ba ngo naonhaung" re byid' ra" yao" tarha" alhab' re cao" na ge,- ga: ta" ra".

¹¹Ai: thao Moshe wa- Israel byu qere-

¹²Naonhaung" wa- Yodan gyaung: re bin: gau" de, thao shaman" dao: ta" au: re Gerizim bam mae ye; jo, nae" ra" mo, wa- Simon- Levi- Yuda- Isakha- Yoseb we' Benyamin kaung ngad: ako".

¹³Nhang: kheim: ke' ra" au: re Eba bam mae ye; jo, nae" mo, wa Rubin- Gad- Ashe- Zebulun- Dan- we' Nabhtali kaung qe ngad: ako".

¹⁴Levi qe wa ce: dao: kheim: jham re thoe qi: ke' mung: ta" ca" ra".

¹⁵Laug zang- sag'- mangad lao" jo, to' yang solho kad' mung: khug' caung:pa" yaug khag' re ngadqere: Mao"So: nhang: kheim: zao" vashao:- ASANG wa solho no' rure nghang" ra" ga: ta" geshao:- Aimung: mo, byu alhab' wa- Amen! ga: tau" li" genae".

¹⁶Yao: pho" mangad lao" yao: myhi" re nga: ngai nhao: ru khag' re ngadqere: Mao"So: nhang: kheim: zao" vashao:. Aimung: mo, byu alhab' wa- Amen! ga: tau" li" genae"-

¹⁷Yham kyo: cao" nho: mug: kyo: re qhui" pye' yaug khag' re ngadqere:- Mao"So: nhang: kheim: zao" vashao:- Aimung: mo,byu alhab' wa- Amen! ga: tau" li" genae".

¹⁸Myo,jid yaug re mangad: ra" shad' khyo ceim" shid' yaug khag' rere: Mao"So: nhang: kheim: zao" vashao:- Aimung: mo,byu alhab' wa- Amen! ga: tau" li" genae".

¹⁹Taungbug byu qe- cug' zonau" qe we' cug' mo" qere- yao: bam qo" yu ang: ru mabyid: yaug khag' ngadqere:- Mao"So: nhang: kheim: zao" vashao:- Aimung: mo,byu alhab' wa- Amen! ga: tau" li" genae".

²⁰Yao: pho" nho: yham sang myhi" dayaug yaug we' gaung sho: zam" mung: yao: pho" re nga: ngai nhao yaug khag' rere:- Mao"So: nhang: kheim: zao" vashao:- Aimung: mo,byu alhab' wa- Amen! ga: tau" li" genae".

²¹Gug'nyhug' dadau: we' gaung sho: zam" yaug khag' rere: Mao"So: nhang: kheim: zao" vashao:- Aimung: byu alhab' wa- Amen! ga: tau" li" genae".

²²Yao: nhae: mo" sang mangad: lao" myhi" pho" dayaug qhan" ra" nhae: mo" abye" we' gaung sho: zam" yaug khag' rere: Mao"So: nhang: kheim: zao" vashao:- Aimung: mo,byu alhab' wa- Amen! ga: tau" li" genae".

²³Yao" yaug myhi" we' gaung sho: zam" yaug khag' rere: Mao"So: nhang: kheim: zao" vashao:- Aimung: mo,byu alhab' wa- Amen-! ga: tau" li" genae".

²⁴Byu khug' se' yaug khag' rere: Mao"So: nhang: kheim: zao" vashao:- Aimung: mo,byu alhab' wa- Amen! ga: tau" li" genae".

²⁵Qobo maqo" yaug re se' pye' nae" qhid' mae" aphug' ngaui khae: yu yaug khag' rere:- Mao"So: nhang: kheim: zao" vashao:- Aimung: mo,byu alhab' wa- Amen! ga: tau" li" genae".

²⁶Mao"So: tarha" jham we' mho" shid' dao: jham re- maphug' cao" yaug khag' rere: Mao"So: nhang: kheim: Zao" vashao:- aimung: mo,byu alhab' wa- Amen! ga: tau" li" genae"- ga: ta" ca" ako".