Read Maru MHO" PEIM: 29 Bible Online

MHO" PEIM: 29 - Maru bible

MHO" PEIM: 29

¹Cegu: wa- Moba mug: mae Israel byumyu" we' to: nae" qhid' mae" Moshe re ASANG: yang amyin" byid' ra" dao: thang" mae bo: ra" dao: kheim: jham ngad: ra". Ceru alhab' wa- Sina bam mae ASANG: yang yao: bam we' to" ra" dao: thang" mae laung" ke' ru ngad: ra".

²Moshe wa shava byu alhab' re khai: zhang: to: mung: yao: bam re- ASANG: yang Egutu kho:kham re yao" zug: ade, qere- yao" mung" re khoru: kad' lai: lo: rure- naonhaung" yao: myao: avako".

³ASANG: yang kad' ra" gyaug pho: qam" no jham mug' pho: ve,lho we' qi" qhang: ra" mug' pho: mau" zo" re naonhaung" myao vako" ra".

⁴Ngadqere: ana" ba joe" sho' naonhaung" thaung" qhug' lai: lo: rure yao" yang naonhaung" re maba: gyo: nhao shingad: ra".

⁵Byid xe zin geim" naonhaung" re ASANG: yang din"pyad' yo khyo" jhui" lai: lo: re naonhaung" mai bau: jham we' khyid zhaung: jham khonhae" re: majad: byaug ngad: ra".

⁶Naonhaung" wa- zo: nae" mug maqo"- shaug' nae" sabyi re: naug qang: re: maqo" ngadqere:- ASANG wa naonhaung" Mao"So ngad: rure naonhaung" ba gesho' mho" shid' nae" qhid' mae" naonhaung" mae ca" qo: rure qu" jaung byid: va".

⁷Aimung: ngonhaung" ce: jo, qo khyo joe" li" re- Heshbon kho:kham Sihon we' Bashan kho:kham Oga shid' yaug wa ngonhaung" re khe' zin: nae" ga: thug' li" ako". Ngadqere: yao: shid' zo: re- ngonhaung" yang khe' aung: pye' va".

⁸Yao: shid' zo" nho: mug: re yu: pye' byid: mung: airu re Rubin- Gad we' Manashe kaung agaung: kho' re- kho' gae: pye' va".

⁹Aimung: naonhaung" kad' ru ja: khao: ngo" mae aung doe, nae" qhid' mae"- ce: dao: thang" mae bo: ra" dao: kheim: alhab' re jhaug' zaug taung" phug' cao" na ge,.

¹⁰Ana" ba naonhaung" alhab' mo,- naonhaung" au: jhaung qe we' zug: ade, qe- naonhaung" yauggai qe- naonhaung" myiqe: qe we' naonhaung" phaung gaung: mae na mung: naonhaung" qhid' mae" thao: gaug qid khae byid' ra" taung bug byu qe wa naonhaung" Mao"So ASANG: ra" qhid' kheim: mae ana" ba ye; jo; ako".

¹²Naonhaung" wa ce: jo, qo mae- ana" ba naonhaung" Mao"So ASANG: yang naonhaung" we' to" to: nae" dao: thang" re lhang: yu mung:- aimae bo: ra" qo re khae: yu ca" ko" ra".

¹³Aimung: ASANG wa naonhaung" we' naonhaung" phug' pho" Abraham- Isag we' Yaku bam re yao" yang dao:so: byid' to" ru we' dakhyo: naonhaung" re yao" byumyu" khyo" we' yao: wa naonhaung" Mao:So khyo" gang" tang nhao: ra".

¹⁴ASANG: wa ce: dao: thang" re ana" cemae na: ra" mo, we' za: kad' to" ru mangad:-

¹⁵Yao: wa ana" ba ce: yao" qhid' kheim: mae ye; jo; ra" ngonhaung" alhab' we' re: makhau: li" shi" ra" ngonhaung" nho: myid:zo: qe we' re: dao: thang" to" ru ngad: ra".

¹⁶Egutu mae" byuna khoru: ngad: ru we' gayaug: mug: khyo" gyaung: su" lai: lo: re khoru: mung: rure- naonhaung" myid: beim: gau ngad vako" ra".

¹⁷Sag' thaung:- laugbaui- ngaui we' qhang: yang kad' to" ra" yao: bam: qu" ca' sho' ra" solho jham re naonhaung" the' myao: avako".

¹⁸Ana" ba cemae ye; jo; mo, mae" yauggai- myiqe: khoyaug re:- dayham khaung bao: we' dayham khaung bao: re:- ngonhaung" nho: Mao"So ASANG mae" phaug' lo" mung: gatau: byumyu" qenho: so jham re macaung:pa" genae" qhid' mae" khyag' za: lha" na ge,. Ceru wa kho: mung: daug thin: ra" agae yaug thug' li" ra" agyi we' dau: li" nae".

¹⁹Ce: tarha" mae mho' to" ru jham re ana" ba cemae the' gyo" yu yaug khag' ngadqere:- yao: o: ra" khyo: nhag' lam: qao taung" ye" lo" ngad: re lhao" re: yao: mae alhab' agai za: boe" nae" ein:- yao: yao" gaung re damyid: lam- airu wa- naonhaung" mae gai mo, we' makhyang: mo, alhab' re dakhyo: za: byo; qeim nhao: li" nae".

²⁰ASANG wa- airu" yaug re qobo khyad' byid: nae" mangad:. Ai: atha" ASANG: nhag' jam: yo" ru wa yao: re mhai: zao" mung:- yao: bin: byo; qeim sho' ce: mugsug' paug' mae tung" to" ra" qug: khai: qam" alhab' wa yao" dao mae gyo" zao" li" nae".

²¹ASANG wa yao: re- Israel byumyu" kaung alhab' mo; phaung mae" phoe' pye' mung:- ASANG: tarha" mugsug' paug' mae tung" to" ra" dao: thang" khug mae" nhang: kheim: jham alhab' japhin: we' dakhyo: yao" dao mae qam" gyo" nhao: li" nae".

²²Cethao: ne, mae" naonhaung" myid:zo: qe we' mug: va: mae" taung bug byumyu" qe wa ASANG: yang naonhaung" dao mae joe" nhao: ra" qug: khai: qam" jham we' khyag' qhui leim zo" rure the' myao: li" genae".

²³Qhovo: yo jham wa- vhang we' xo: bam" pye' mung: shao" byaug: li" nae"- pe" re: magai: qho: zo: nae"- aimung: ai: jo, qo mae mhin jham lhao" mayaug lo nae" naonhaung" mug:myid wa ASANG nhag' jam: yo" ra" au: re ASANG: yang phyo' qeim" pye' ra" Sodom we' Gomora ru:- Adma we' Zeboiim vogaung: jham we' dakhyo: boe" lo" li" nae".

²⁴Ailao" damugmyid geim" wa ASANG wa pe"mung: yang: yao: bam: mug:myid re ceru: kad' byid' laug i? yao" gyaug pho: nhag' jam: yo" ru wa pe" mae" qhid: lo: laug i? ga: myid' li" genae".

²⁵Aimung: dao: phyid kam" wa- yao: bam: phug' phyid' qere Egutu mae" jhui" thug' lo: ra" au: re- yao: bam: phug' pho" qenho: Mao"So: yang yao: bam we' dao: thang" to" ra" dao: thang" re- ASANG: byumyu" yang phyo' pye' mung: boe" lo: ru ngad: ra" ga: ta" li" genae".

²⁶Yao: bam wa- qhid' phyao: yao: bam khonhae" re: macaung:pa" qu" ra" so jham- macaung:pa" nae" qhid' mae" ASANG: yang yao: bam re tam" to" ra" so jham re yao: bam caung da" byid' ako".

²⁷Aimung: yang:- ASANG wa yao: bam re nhag' yo" lo mung:- ce: mug'sug' paug' mae tung" to" ra" qug: khai: qam" alhab' re yao: bam: mug:myid mae nhao: ke' byid' ra".

²⁸ASANG wa xo sho' nhag' yo: mung:- yao" nhag' yo" ruyang yao: bam re yao: bam: mug: mae" phan" pye' ru we' taung bug: mung" khyo shalhaui" pye' ra"- aimung: yao: bam ana" ba ai: jo, qo mae na: bam: ako"- ga: ta" li" genae".

²⁹Ngonhaung" nho: Mao"So ASANG wa gatau daqhae: re nyham" shaung: to" ra". Ngadqere: yao: wa yao" tarha" re qhu" byid' ava". Aimung: ngonhaung" we' ngonhaung" nho: myid:zo: qe wa aire apyad ato mae phug' cao" na: bam ca" ra".