Read Maru MHO" PEIM: 3 Bible Online

MHO" PEIM: 3 - Maru bible

MHO" PEIM: 3

¹Ai: thao- mug: am: shad' Bashan mug: khaung: khyo to" mung:- kho:kham Oga wa ngonhaung" re khe' zin: nae" qhid' mae" Edri vogaung: nhae khyo yao" byu qe we' thug' li" ra".

²Ngadqere: ASANG wa ngore- Yao: re dagyaug wa,- ngo wa yao: re ab byid' to" ra" yao" byu qe we' yao" mug:myid alhab' naonhaung" re byid: nae" Heshbon mae eib: na: ra" Amori kho:kham Sihon re naonhaung" kad' ko" ru we' dakhyo: za: yao: re kad' ge,- ga: ta" ra".

³Airumung: ASANG wa kho:kham Oga we' yao" byu qere re: ngonhaung" nho: qam: so' lo, mae to: byid: yang:- yao: bam alhab' re ngonhaung" se' pye' va".

⁴Ai: yo, mae yao: yao" vogaung: alhab' re ngonhaung" sang: yu: bam va". Ngonhaung" masang: yu: ra" vogaung: dalam: re: madang lo:ngad: ra". Ngonhaung" sang: yu: ra" vogaung: alhab' wa khyaug' xe ngad: ra". Bashan kho:kham Oga eib: ra" Argob khaung: geim" mae" vogaung: jham bobo: ako".

⁵Ce: vogaung: jham alhab' wa vang jham myhao sho' kad' mung: kham: mo" we' aire pyid' ra" kham: mo" re kham: kyao" jham: yang kyao" to" ra" gug: gug: kad' to" ra" vogaung: jham ngad: ako". Amung: vang mabo: ra" vogaung: myo: sho' re: jo; ra".

⁶Ngonhaung" wa Heshbon kho:kham Sihon sang: ra" vogaung: jham re ngonhaung" kad' lo: ru we' dakhyo:- vogaung: alhab' re phyo' pye' mung: yauggai- myiqe:- zoshao alhab' re se' pye' bam va".

⁷Ngonhaung" wa gug'nyhug' gug' du: jham re yu mung: vogaung: jham re phyo' zo" pye' bam va".

⁸Ai: ayo, mae Yodan gyaung: ba thug' shad' mae" mug:myid we' Arnon gyaung: mae" Hermon bam joe" sho' ngad: ra" mug:myid re Amori kho:kham shid' yaug: lo, mae" qo" sang: yu: bam va". (Hernom bam re Sidon byu qeyang wa- Sirion ga: mhang" mung:- Amori byu qeyang wa Seni ga: mhang" ako".)

¹⁰Ngonhaung" wa Bashan kho:kham Oga nho: mug:myid ngad: ra" bug gaung mae" vogaung: jham- Gilead mug: khaung:- Bashan mug: khaung:- Saleka vogaung: we' Edri- vogaung: jham joe" sho' alhab' re sang: yu: bam va".

¹¹(Kho:kham Oga wa Rephaim amyu" mae" lo" thao" yaug ngad: ra". Yao" nho: sushid thaung: wa laug: yang kad' mung:- tarha" vao: ra" aka" re cao" yang: ka" re lu phyao: khyaug' pe:- qhang phyao: daxe: byid pe: ko bo: ra". Airu re Amon byumyu" qenho: Raba mae gai: the' myao: ashi".)

¹²Ngonhaung" ai: mung"dan: re sang: yu: ra" au:- ngo wa Rubin we' Gad amyu" kaung qere- Arnon gyaung: nhae mae" Aroe vogaung: mug: am: shad' mug:myid we' Gilead bam mug: dau- aimae" vogaung: jham we' daga" ab byid' ra".

¹³Manashe amyu" kaung agaung: daqi" re dang: ra" Gilead mug: re ngo jaung byid' ra". Oga eib: ra" Argob khaung: ngad: ra" Bashan mug: alhab' rere: jaung byid' ra". Bashan wa Rephaim mug:myid khyo" mang qi" ra".

¹⁴(Manashe amyu" kaung mae" Yaira wa Geshu we' Makha mug: kyo: joe" sho' ngad: ra" Bashan Argob khaung: geim" re sang: yu: ra". Yao: wa ai: vogaung: re yao" mang re cao" yang: mhang" ra". Ai: vogaung: jham wa Yaira vogaung: khyo" mang qi" jo; ashi".)

¹⁵Ngo wa Gilaed mung" re Manashe nho: amyu" kaung mae" Makhira re jaung byid' ra".

¹⁶Amung: Rubin we' Gad amyu" kaung qere wa Gilaed mae" Arnon gyaung: joe" sho' mae" mug:myid re ngo jaung byid' ra". Qid gyaung: ale; dau wa yao: bam: mug: thao shad' mug: kyo: yao: bam: mug: am: shad' kyodam: wa Amon byu qenho: kyodam: dadau ngad: ra" Yabog gyaung: joe" sho' ngad: ra".

¹⁷Yao: bam: mug:myid Ba vao shad' khyo wa Yodan gyaung: joe" sho' ngad mung:- mug: am: shad' Galile tham: mae" mug: thao shad' Tham: Shid joe" sho' we'- ba thug' shad' khyo Pisga bam khyid joe" sho' gyo: mae" mug:myid ngad: ra".

¹⁸Ai: ayo, mae yao: ngo wa yao: bam re o mae" pyang dao: jham re byid' ra". Ngonhaung" Mao"So ASANG wa Yodan gyaung: ba thug' shad' mug:myid re yesang: yu nae" naonhaung" re byid' to" ava". Ana" naonhaung" gyekhe' sulhe: qere shae lhae nyhang" byid: mung: yao: bam: mug:myid sang: yu nae" rure bao" thaug' byid: nae" qhid' mae" Israel byu qe gaje qe: qhid' khyo Yodan gyaung: re gau" de; ye: nhao ge,.

¹⁹Naonhaung" yham sang myhi" qe- zoshao qe we' gug'nyhug' jham za: ngo jaung: to: byid' ra" vogaung: jham mae na: thang: jo; genae" ngad: ako". Naonhaung" gug'nyhug' myo: sho' qo" rure ngo ba: ra".

²⁰ASANG: yang yao: bam re byid' ra" Yodan gyaung: ba vao shad' mug:myid re yao: bam qo" sang: yu yo, joe" sho' we' ASANG wa cetau mae naonhaung" qhid' mae" kad' va" ru we' dakhyo:- ASANG yao: bam re aitau mae yaug yo za: na nhao: ra" ayo, joe" sho' naonhaung" Israel mao:nhaung: qere bao" thaug' byid: ge,. Ai: thao re naonhaung" wa naonhaung" re ngo jaung: to: byid' ra" ce: mug:myid khyo gai: dam: tug' lo: ako" ein: pyang va".

²¹Ai: thao ngo wa Yoshu re- nao wa naonhaung" Mao"So ASANG ai: Sihon we' Oga kho:kham shid' yaug re kad' ra" khyo alhab' re myao: ava". Amung: yao: wa naonhaung" jhin" vao ye" ra" mug:myid sang gatau yaug khao: ngo" rere: dakhyo: za: kad' li" nae".

²²Yao: bam re dagyaug wa,- pe"mung:ga"re naonhaung" Mao"So" ASANG wa naonhaung" qhid' mae" gyekhe' byid' li" nae" ein: pyang va".

²³Ai: ayo, mae ngo wa- ceru: kyid kyid ein: akyu" mho' ra".

²⁴Phung qam: so' bo: ra" ASANG we"- nao wa qi" qhang: ru we' nao kad' nae" seim" ra" mug' pho: mau zo" aqhid re za: ngore qhu" byid' rure ngo ba: ra". Mug:gaung dao mae re:- myidgaung dao mae re: nao kad' lo: ra" qam: so' mau" zo" re qo" kad' ra" so mana ngad: ra" wo"-

²⁵ASANG we" ngore Yodan gyaung: re gau" de; ye: nhao la,- thoete' mae" myid xau gai: ra" mug:myid- yaung" ra" bam mug:- Lebanon bam jham re myao nae" akhang" byid: la,- ein: kyid kyid ein: akyu" mho' va".

²⁶Ngadqere: naonhaung" amyu" byu qe: mathao mae ASANG wa ngore nhag' yo: mung: matae" gyo: byid: ngad: ra". Ai: atha" yao: wa- ga" va"- cekhyo re dadam: ta" wa,-

²⁷Pisga bam nyaug khyo do, ye: mung: mug: am:- mug: thao- ba thug'- ba vao shad' khyo yequ" ke' wa,- nao myao: ra" ja: re nyang" za: qu" wa,- pe"mung:ga"re nao wa khonhae" re: Yodan gyaung: re maqo" gau" de; ye: nae".

²⁸Yoshu re pyang dao: byid: wa,- yao" myid: phyid' ru qam: bo nhao wa,- pe"mung:ga"re yao: wa amyu" byu qere nao the' myao: ra" mug:myid re sang: yu nae" qhid' mae" jhui" gau" de; ye" li" nae"- ga: ta" ra".

²⁹Airumung: ngonhaung" wa Bethpeo vogaung: tau" te' mae" lao: khaung: mae thang: na: bam va".