Read Maru MHO" PEIM: 32 Bible Online

MHO" PEIM: 32 - Maru bible

MHO" PEIM: 32

¹Myidgaung we' mug:gaung we"- nga" dao: kheim: jham re gyo: ge,. Ngo ta" rure zhaug' za: te' mae" tae" gyo: ge,.

²Nga" nho: mho" shid' dao: wa mug: ce' jham we' dakhyo: gyo" li" nae" aimung: nghin we' dakhyo: myidgaung mae bam: jo; li" nae". Nga" dao: kheim: jham wa- qhovo: azo: jham: adao mae qu: gyo" ra" mug: qid we' dau nae"- mhin: nau" dao mae gyo" ra" byan byan mung: qu: ra" mug: ce' ru: ngad nae".

³Ngo wa ASANG: mang-a re caung:khin" byid: mung:- yao" byumyu" qe wa yao: qi" qhang: rure ta" li" genae".

⁴ASANG wa- naonhaung" qam: so' qi" ra" gye vha byid: yaug ngad: ra". Yao: wa khyokhe' khao: ngo" mae jab byang" mung: tarha" din: nyang: ra". Naonhaung" nho: Mao"So wa- jhaug' zaug mung: dang: man" ra". Yao: wa jo: ru we' tarha" din nyang: rure kad' ra".

⁵Ngadqere: naonhaung" wa jhaug' mazaug ngad: ako". Yao" nho: byumyu" boe" nae" maman: qi" ngad: ako". Qobo qo" ru we' mhug' pyag' ra" byumyu" ngad: ako".

⁶Nhag' magyang" ru we' maba: myid: ra" byumyu" we"- naonhaung" wa ASANG re cekhyo: lhaung" kad' ko" i? Yao: wa naonhaung" yao: pho" naonhaung" phan" ASANG ngad: ra". Yao: wa naonhaung" re byumyu" damyu" boe" nhao: to: yaug ngad: ra".

⁷Ganhae" gaco' lai: lo" va" ayo, mae" rure myid: qu" ge,. Boe" lai: lo: co' ru ni" pho" bam re myid: ge,. Lai: lo" va" ayo, mae" khyo ta" kyo: nae" qhid' mae" naonhaung" phug' mao: qere myid: ge,.

⁸Myao: thao" yaug wa byumyu" qere yao: bam: mug:myid byid mung:- xao su byu qere kho' byid' ra" au: re yao: wa Israel nho: yauggai zo: qenho: aso: we' dakhyo: amyu" qenho: mug: kyo: re aso: kad' byid' ra".

⁹Ngadqere:- Yaku nho: myid:zo: qere kam" wa yao: yao" qhid' mae" khyin: yu: ra".

¹⁰Yao: wa yao: bam re- kyaug' ho mung: la hug' hug' pyad' pye' ra" din"pyad' yo mae du" lae" qin" ru the' myao: ra". Yao: wa yao: bam re gug:gam: byid: mung: yao: yao" gaung re gug:gam: ru we' dakhyo: yao: bam re qu" gun caung: lo: ava".

¹¹Zeim baung: wa pyo: ci: ra" yao" daung dao mae gug: gug: za: taung" yu mung: yao: zo: qere dao" mho" ru we' dakhyo:- ASANG wa Israel re- magyang: lang: sho' zam" lo: ava".

¹²ASANG yao: dayaug za: taung bug: so: yang bao" ru mabo lo: yao" byumyu" re jhui" lo: ra".

¹³Yao: wa yao: bam re bam myhao mae eib nhao: ra". Aimung: yao: bam wa- yo myid mae yaug: rure zo" lai: lo: ako". Yao: bam wa laug byo, jham mae" seyo: byoyhid qhug' phyo' yu: ako". Yao: bam: zhanlun gae jham wa laug qan" mae yaug: ngang" jo; ako".

¹⁴Yao: bam: nung: jaung zang jham we' cad' be, jham wa nug' myo: sho' byid' ako". Yao: bam wa gai: thao" ra" yao jham- cad' be, jham we' nung: jham- gai: thao" ra" jung: gaug we' myho' thao" ra" sabyi qang: qo" ako".

¹⁵ASANG: byumyu" qe wa jo,nho" qo" lo: ako". Ngadqere: tau: lhan" li" ako". Yao: bam wa xau mung: zo:ve zo" gyi" na: ako". Yao: bam wa yao: bam: phan" ASANG Mao"So re shapye' mung: yao: bam nho: qam: so' qi" ra" khyad yu: ASANG re ngag: ha: pye' ako".

¹⁶Yao: bam: so alho caung:pa" ra" mau" wa ASANG re myid nug' nhao: mung: yao: bam kad' ra" makhyang: mashab: mau" wa yao: re nhag' yo: nhao: ra".

¹⁷Yao: bam: phug' pho" qe- khonhae" re: maba: ra" so asag' jham Israel byumyu" qe khonhae" re: maphug' cao" lo: ra" so jham- so agyang" mangad: ko" ra" so jham re xeim: ngaui" byid' ako".

¹⁸Yao: bam wa- yao: bam: Mao"So yao: bam: qam: so' qi" ra" khyad' yu: ASANG yao: bam re kao so' byid: yaug re to" myhid' pye' ako".

¹⁹Ceru re ASANG the' myao lao" yao: nhag' yo: mung: yao" yauggai zo: qe we' myiqe: zo: qere ngag: ha: pye' ra".

²⁰Yao: wa yao: bam re ngo mabao" lo nae"- Ailao" ai: nhag' lam: qao mung: jhaug' mazaug: ra" byumyu" mae pe" boe" li" rure ngo qu" qu" nae"- ga: ta" ra".

²¹Yao: bam wa- yao: bam: solho jham: yang ngore nhag' yo: nhao: avako". So agyang" mangad: ra" yao: bam: so- so agyang" mangad: ko" ra" so yao: bam: so ga: mhang" ko" ra" so jham: yang ngore myid nug: nhao: ko". Aimung: ngo wa- byu damyu" ein: rure ci mung: yao: bam re nhag' yo: nhao nae" nhag' magyang" ra" byumyu" damyu" re yao: bam myid nug' nae" khyo: ngo: yang kad' ke' nae".

²²Nga" nho: nhag' yo" ru wa- myishae we' dakhyo: do, li" mung:- myidgaung dao mae" ja: khao: ngo" re nga" pye' li" nae". Airu wa mug: myid o: pyae khyo joe" lo" mung:- bam jham: nho: apan agyi: jham re nga" pye' li" nae".

²³Ngo wa yao: bam: dao mae thao" maba: ra" kyi" khyag' ru leim zo: nhao mung: yao: bam: qhid' mae" nga" nho: myo: alhab' re ci: pye' nae".

²⁴Yao: bam wa vae: moe' ru we' no phyo" yang shid: dam" li" genae". Yao: bam wa gyaug ci" ja" no: yang shid: shao" genae". Yao: bam re gye kad' nae" seyo: gug'nyhug' re ngo nhao: ke' byid: mung: yao: bam re thoe: nae" daug thin: ra" lhaomaui jham rere: ngo nhao: ke' byid: nae".

²⁵Mang: zin" ruyang hau" mo" khyo jham mae shid: ru joe" nhao: nae"- yham khug mae gyaug: din: ru joe" nae" zolau: qe we' zomyi: zo: qe shid: dam: genae"- nug' nau" qere re:- phug' mao: qere re: tang" to: byid: nae" mangad:-

²⁶Yao: bam re khag' yang mamyid: beim: nakhyo: ngo yao: bam re bin sho' se' tam" pye' nae".

²⁷Ngadqere: yao: bam re ngo yao" yang yao: mhan" kad' pye' rure, nga" byumyu" qere yao: bam: yang: aung: pye' ru angad: ga: ta" phug nae" akhang" yao: bam: gyevo qere ngo akhang" maqo" byid: nae".

²⁸Israel byumyu" wa gai magai maba: myid yao: bam wa pha,jhi" dajhid' re: mabo- ngad: ako".

²⁹Yao: bam wa pe"mung: jeim" rure maba: myao ngad: ako". Pe"mung: lo: rure yao: bam maba: gyo: ngad: ako".

³⁰Pe"mung: yang: dayaug: yang dataung yaug re aung: pye' i? Pe"mung: yang: datug yaug re shid' yaug za" yang aung: pye' i? Yao: bam: Mao"So ASANG: yang yao: bam re shapye' pye' va". Yao: bam: qam: so' qi" ra" Mao"So wa yao: bam re to" pye' ava".

³¹Yao: bam yao" so jham wa Israel qenho: Mao"So ru: qam: so' maqi: ga" rure yao: bam: gyevo qe ba: to" ako".

³²Sodom- Gomora we' dakhyo: ave, qeim: ra"- yao: bam: gyevo qe wa kho: mung: daug bo: ra" ashi: zaui" ra" sabyi naui jham we' dau: ako".

³³Lhao maui: daug: yang phaung: to" ra" sabyi qang: we' dau: ako".

³⁴Yao: bam: gyevo qe kad' lai: lo: rure ASANG myid: beim" na: ra". Yao: wa yao: bam re qobo dae byid: nae" ayo, gai: re lao" na: ra".

³⁵ASANG wa yao: bam re lage, phaug' mung: qobo dae byid' li" nae". Yao: bam gyo" seim" nae" ba na joe" li" li" nae". Yao: bam byo; qeim: thao" nae" ba na wa jhao" li" na va".

³⁶ASANG wa yao" byumyu" re yao: bam qam: gan: byaug: rure yao: the' myao lao" khyad' yu: li" nae". Yao: wa yao: re caung da" byid: mo, re yao: bam: bao" byu maqo" ru yao: the' myao lao" nhag' khyag' byid' li" nae".

³⁷Aimung: ASANG wa yao" byumyu" qere naonhaung" khug ngha: lo: ra" ai: qam: so' qi" ra" so jham khai: lo" byaug vako".

³⁸Naonhaung" wa aijham re naonhaung" xeim: mae" xau: yang zho" lai: lo: avako". Yao: bam re shaug' nae" sabyi qang: re qhaug' byid' avako". Ana" yao: bam: yang naonhaung" re li" bao" yu ge vashao:- naonhaung" jhao" lhau" tao" li" mung: khyad' yu vashao:.

³⁹Ngo wa ngo dayaug za: Mao"So ngad: gatau so khoru re: agyang" mangad: ngo wa se' pye' mung: kao so' byid' ra". Ngo wa dae te' mung: dae gai nhao: ra". Aimung: ngo kad' rure khag' yang maqo" ngag: thaug' genae".

⁴⁰Ngo wa dang dang kao so' daui: na: ra" Mao"So ngad: ru we' dakhyo:- qhi qhi mung: ra" nga" shae pyang: re ngo saui" tho' mung:- tarha" ru kad' va" laug ga: the' myao nae" qhid' mae" nga" lo, re tau mung: jham tang" to: va". Nga" gyevo qere ngo: yang lage, phaug' mung:- ngore nghang: mo, re ngo: yang qobo dae byid: nae".

⁴¹

⁴²Nga" myo: jham wa yao: bam: sa: zo; gyo" li" mung:- nga" shae pyang: wa ngore ngag: thaug' mo, alhab' mo; re se' pye' li" nae". Ngo wa ngore khe' zin: yaug khag' rere: matang" to: nae"- dae de; mo, we' kyam: byu qelhao" shid: li" genae".

⁴³Byumyu" qe we"- naonhaung" wa ASANG: byumyu" re caung:khin" ca" ako". Yao: bam re se' pye' mo, re yao" yang qobo dae byid' ra". Yao: wa yao" gyevo qere lage, phaug' mung:- yao" byumyu" qenho: qobo re khyad' pye' byid' ra"- ga: ta" ra".

⁴⁴Moshe we' Nun nho: yauggai zo: Yoshu wa- Israel byumyu" qe the' gyo" yu sho' ce: nghaui" caung: dao: re ta" kyo" ako".

⁴⁵Moshe wa ai: byumyu" qere Mao"So: mho" shid' dao: jham bin: byid: lao".

⁴⁶Ana" ba naonhaung" re ngo: yang byid' ra" ce: amyin" dao: alhab' re naonhaung" khyag' qo" phug' cao" na sho' kad' ge,. Naonhaung" nho: myid:zo: qe Mao"So: mho" shid' dao: jham alhab' re jhaug' zaug taung" qo" phug' cao" gesho' yao: bam: re paug' yang: ta" kyo: ge,.

⁴⁷Ce: mho" shid' dao: jham wa nhad' ta" dao: keim jham mangad: ai: dao: jham wa naonhaung" kao so' yao: ngad: ava". Aijham re phug' cao" ko" ngad: re- Yodan thoete' mae naonhaung" yesang: na nae" za: ngad: ra" mug:myid mae naonhaung" myao" sho' daui: na: li" genae"- ga: ta" ra".

⁴⁸Ai: ba mae yao: ASANG wa Moshe re-

⁴⁹Yerikho vogaung: mo" we' tau" te' Moba mung" mae" Abarim bam jham khyo ye" lo" wa,- Nebo bam khyo do, ye: mung: Israel byumyu" qere ngo: yang byid: nae" seim" to" ra" Khanan mung" re qu" ke' wa,.

⁵⁰Hora bam mae ni" mao: Aran shid: lo" ru we' dakhyo:- ai: bam dao mae nao shid: li" nae".

⁵¹Pe"mung:ga"re- Ni" shid' yaug: geim" Israel byumyu" qenho: qhid' kheim: mae ngore jhaug' mazaug mung: vako" ra". Naonhaung" wa- Zin din"pyad' yo Kade vogaung: nhae mae" Meriba qid jham mae joe" na ko" ra" au: re- ni" shid' tao wa- Israel byumyu" qenho: qhid' kheim: mae ngore nga: ngai nhao: ako".

⁵²Nao wa ai: mug: re va: mae" qu" ngadqere:- Israel byumyu" re ngo byid: nae" seim" ra" mug: khyo mavao ye: nae" ngad: ra"- ga: ta" ra".